Döðlu- og valhnetubrauð

6. apríl, 2003

Þetta er samsetning úr mörgum döðlubrauðsuppskriftum. Þetta er voða fínt kökubrauð með sunnudagskaffinu og passar sérlega vel í nestisboxið fyrir stóra sem smáa. Brauðið má frysta og gott að hita varlega upp, eða skella í brauðristina.

Athugið að þið þurfið um 1 kílóa brauðform til að baka kökubrauðið í. Athugið einnig að ef þið hafið ofnæmi fyrir hnetum má alveg sleppa þeim.

Senda uppskrift

Prenta uppskrift

Setja í uppskriftabox

4 ummæli

Þessi uppskrift er:

Án mjólkur

Þessa uppskrift er auðvelt að gera:

Án hneta

Döðlu- og valhnetubrauð

Gerir 1 brauð

Innihald

220 g döðlur, saxaðar gróft
50 g valhnetur, saxaðar gróft (má sleppa)
300 ml vatn (fyrir döðlurnar)
350 g spelti
20 g hveitiklíð (eða meira spelti)
2 tsk vínsteinslyftiduft
1 tsk kakó eða carob (má sleppa)
75 g rapadura hrásykur (eða annar hrásykur)
2 egg
2 msk hreint hlynsíróp (e. maple syrup)
2 msk kókosolía
1 tsk vanilludropar (úr heilsubúð)

Aðferð

Saxið döðlurnar gróft, setjið í skál og hellið um 300 ml af sjóðandi heitu vatni yfir. Látið standa í 20 mínútur.
Saxið valhneturnar gróft.
Sigtið saman í stóra skál spelti, lyftiduft og kakó. Hrærið vel og bætið hveitiklíðinu saman við.
Í annari skál skuluð þið hræra saman eggjum, vanilludropum, rapadura hrásykri, hlynsírópi og kókosolíu. Hellið út í stóru skálina og veltið deiginu til (ekki hræra of mikið).
Hellið vatninu af döðlunum og geymið. Bætið döðlunum út í stóru skálina ásamt valhnetunum. Notið eins mikið af vatninu og þarf út í deigið. Athugið að deigið á að leka af sleif í stórum klessum en á ekki að leka af í dropatali. Það ætti heldur ekki að vera nægilega þurrt til að hægt væri að hnoða deigið.
Klæðið brauðform að innan með bökunarpappír. Hellið deiginu út í og gætið þess að það fari í hornin líka.
Bakið við 180°C í 40-45 mínútur.
Berið fram með lífrænt framleiddum sultum án viðbætts sykurs, smurosti, ólífusmjöri o.fl.

Gott að hafa í huga

Ef kókosolían er hörð má stinga krukkunni í heitt vatn í nokkrar mínútur þar til hún verður fljótandi.
Notið hamingjuegg ef þið mögulega getið.
Gott er að bæta svolitlu af söxuðum valhnetum eða pecanhnetum í deigið.
Kanill fer vel með þessu kökubrauði, sérstaklega ef þið bakið það fyrir jólin.
Þegar kökubrauðið hefur kólnað er best að skera það í sneiðar og frysta hverja sneið fyrir sig. Þannig er auðvelt að kippa einni og einni sneið út og setja t.d. í brauðrist eða bakaraofn.