Franska súkkulaðikakan hennar LísuFranska súkkulaðikakan hennar Lísu
Lísa Hjalt er mögnuð kona. Hún er þriggja barna móðir í námi og hún hefur samt tíma til að útbúa hollan mat fyrir fjölskylduna og það er enginn slormatur. Hún er ein af þessum íslensku ofurkonum sem virðast geta allt. Lísa sendir mér gjarnan uppskriftir að því sem hún er að útbúa og alltaf er það girnilegt og gott. Hún var svo góð að gefa mér uppskrift af súkkulaðikökunni sinni sem slegið hefur í gegn á heimili hennar og víðar. Ég er búin að bíða nokkuð lengi eftir uppskriftinni en hún hefur verið í þróun í smá tíma (og sumir orðnir spenntir á mínu heimili nefni engin nöfn). Ég frumsýni kökuna hér með. Ég breytti aðeins lítillega uppskriftinni en set alls staðar í hornklofa því sem ég breytti.
Ég gef Lísu orðið: Það á vera pínulítil frönsk súkkulaðikökustemning yfir þessari. Æðisleg með jarðarberjum, bláberjum eða hindberjum eða með rjóma fyrir þá sem borða svoleiðis!
Ég ætla bara að segja ykkur að Jóhannes lagðist næstum því í gólfið úr hamingju þegar hann borðaði kökuna ...enda a.l.g.j.ö.r.l.e.g.a. dásamleg. Hafið í huga að það er AFAR mikilvægt að baka kökuna ekki lengur en gefið er upp. Ég baka hana í nákvæmlega 12 mínútur í mínum ofni (athugið að ofnar eru misjafnlega kröftugir) en hún á að vera rétt svo þétt í köntunum en afar mjúk í miðjunni (og nánast eins og deig).
Athugið að þið þurfið 23 sm bökunarform og matvinnsluvél (eða góðan töfrasprota) til að útbúa þessa uppskrift.
Senda uppskrift
Prenta uppskrift
Setja í uppskriftabox
30 ummæliÞessi uppskrift er:
- Án mjólkur
Franska súkkulaðikakan hennar Lísu
Innihald
- 80 g döðlur, lagðar í bleyti í 30 mínútur
- 50 g cashewhnetur, lagðar í bleyti í 30 mínútur
- 4 msk cashewhnetur og 4 msk kókosolía
- 160 g hrásykur (ekki nota of grófan) [ég notaði 120 g af rapadura hrásykri]
- 2 egg (bara nota aðra eggjarauðuna)
- 65 g spelti
- 1 tsk vínsteinslyftiduft
- 4 msk kakó (kaupið endilega lífrænt framleitt og helst fair trade)
- 0,25 tsk salt [ég notaði Himalaya]
- 1 tsk vanilludropar eða vanillusykur úr heilsubúð
- Ögn af muldum valhnetum [ok að sleppa en gefur afar gott bragð]
- 20 g dökkt (70%), lífrænt framleitt súkkulaði með hrásykri, saxað smátt [má sleppa]
Aðferð
- Saxið döðlur gróft og leggið í bleyti ásamt 50 g af cashewhnetum.
- Setjið 4 msk af cashewhnetum í matvinnsluvél. Blandið í eina mínútu. Skafið hliðar matvinnsluvélarinnar og á meðan vélin vinnur, bætið þá 4 msk af olíunni matskeið fyrir matskeið út í. Blandið vel og setjið cashewmaukið til hliðar.
- Hellið vatninu af döðlunum og cashewhnetunum og setjið í matvinnsluvélina. Vinnið vel (þangað til nokkuð vel maukað en ekki þó of).
- Hrærið hrásykur og egg með gaffli, setjið svo cashewhnetumaukið og vanilludropana saman við og hrærið uns allt blandast vel saman
- Blandið spelti, vínsteinslyftidufti, salti og kakói saman [sigtið kakóið út í speltið] og setjið svo út í hrásykursblönduna. Hrærið rólega saman með sleif.
- Setjið maukuðu döðlurnar og cashewhneturnar út í og hrærið vel.
- Stráið ögn af muldum valhnetum út í, ásamt saxaða súkkulaðinu.
- Smyrjið hringlaga form (passið að þvermálið sé ekki meira en 23 sm) með kókosolíu [eða klæðið formið með bökunarpappír].
- Bakið við 180° C í 12-15 mínútur. Gætið þess að baka kökuna EKKI of lengi.
- Takið kökuna strax úr ofninum og leyfið henni að kólna aðeins.
Gott að hafa í huga
- Nota má möndlumauk eða heslihnetumauk í staðinn fyrir cashewhnetumauk.
- Hægt er að kaupa cashewhnetumauk í heilsubúðum en ódýrara er að búa það til sjálfur sbr. uppskriftina hér að ofan.
- Ef kókosolían er hörð má stinga krukkunni í heitt vatn í nokkrar mínútur þar til hún verður fljótandi.
- Notið hamingjuegg ef þið mögulega getið.
- Í staðinn fyrir cashewhnetumaukið má nota hnetusmjör. Einnig má sleppa öllu hnetumauki og nota 6 msk af kókosolíu í staðinn.
- Athugið að dökkt súkkulaði inniheldur yfirleitt mjólk, lesið ávallt innihaldslýsingu ef þið eruð með óþol/ofnæmi. Hægt er að nota mjólkurlaust súkkulaði í staðinn.
Tengdar uppskriftir
Ofnæmi/Óþol
Bloggið
Póstlistinn
Ummæli um uppskriftina
06. jan. 2011
þessi kaka er sjúklega góð og er í uppáhaldi á mínu heimili, meira segja þeir sem segjast ekki borða hnetur eru æstir í hana. mæli með henni í staðin fyrir franska súkkulaði köku þessi slær henni algjörlega við. :o)
07. jan. 2011
Gaman að heyra Drífa og takk fyrir að deila með okkur :)
08. jan. 2011
Þessi er líka í miklu uppáhaldi á okkar heimili - ég nota hana líka þannig að ég sker hana í litla teninga og á í boxi svo hægt sé að næla sér í hollan gúmmelaðibita í ísskápnum (ekki mikið svindl það) ;)
08. jan. 2011
Sniðug hugmynd, að eiga kökuna í litlum bitum í boxi :)
14. apr. 2011
Ótrúlega góð þessi uppskrift, gæti verið að það hafi gleymst vínsteinslyftiduftið?
Ég held ég hafi bakað hana aðeins of stutt, var reyndar með 21cm form ; )
Hér brostu allir allan hringinn!
15. apr. 2011
Það getur munað öllu að vera ekki með rétta stærð á formi því kakan verður þykkari og því lengur að bakast með minna formi :) Það á sérstaklega við um þessa köku svo ef þú bakar hana eftur passaðu þá að bæta nokkrum mínútum við baksturstímann. Kakan á að vera mjög klesst og þunn en ekki þannig að hún sé óbökuð.
15. apr. 2011
Þessi er æði
á kærasta sem ekki má heyra ,,heilsu,, eitthvað en hann borðaði þessa með bestu list :) takk fyrir frábæran vef!
15. apr. 2011
Takk fyrir þessa fínu uppskrift, þessi kaka hvarf ofan í samstarfsfólk mitt í gær og flestir urðu hissa (og glaðir) þegar þeir heyrðu að hún væri líka góð. Ég átti ekki alveg nóg af cashewhnetum svo ég bætti það upp með hnetusmjöri sem var mjög gott :)
15. apr. 2011
Þetta átti auðvitað að vera "líka holl"
11. maí. 2011
Hae hae,
mig langadi ad vita hvort tad se leyfilegt ad nota hunang eda ageve syrop i stadinn fyrir hrasykurinn tar sem sonur minn ma helst ekki borda sykur?
Takk fyrir frabaera sidu.
11. maí. 2011
Sæl Fanney
Nei ég er hrædd um að kakan yrði fljótandi, þ.e. allt of lin :( Þú gætir keypt Lucuma duft eða Maca í heilsubúðinni (veit ekki hvort að það fæst en þú getur hringt þangað). Eða ef hann má fá xylitol gætirðu notað það í staðinn fyrir hrásykurinn (en minna af því, um 3/4 af magninu). Svo er spurning hvort þú sleppir hrásykrinum en notir meira af döðlum í staðinn og aðeins meira af agave. Kakan verður ekki eins en það kannski kemur ekki að sök?
28. maí. 2011
Er að prófa þessa uppskrift. Hlakka til að fá útkomuna.
En það hefur líklega gleymst að taka það fram hvenær þú setur lyftiduftið.
frábær síða annars! :)
29. maí. 2011
Mikið rétt, búin að leiðrétta, takk fyrir :) Vona að kakan hafi tekist vel ;)
19. júl. 2011
Ég er mikill aðdáandi að frönskum súkkulaðikökum og get alveg sagt að þessi er nú í uppáhaldi! Ótrúlega góð og ekki skemmir fyrir að hún er holl líka :D Rosa gott að setja bláber ofan á.
19. júl. 2011
Mmmmmm bláber, góð hugmynd :)
28. sep. 2011
Þessi finnst mér æði, svona kaka sem maður finnur ekki að sé eitthvað extra "holl", sló í gegn :)
28. sep. 2011
Gaman að heyra Guðrún Ýr. Ég skila því til Lísu súkkulaðisnillings :)
05. nóv. 2011
Þessi kaka er unaðslega góð. Ég var með hana í saumó í fyrra og nú aftur um daginn því stelpunum fannst hún þvílíkt æði.Ég bauð upp á þeyttan rjóma og fersk jarðarber með. Eini ókosturinn er sá að hún endist ekki lengi, kallinn var búinn að klára rest á hádegi daginn eftir saumó:-)
05. nóv. 2011
Ég er með munninn fullan af kökunni í þessum skrifuðu orðum.....ég er heppin að fá sneið því maðurinn minn var einn heima með henni he he.
20. nóv. 2011
Er að gera kökuna.Spennandi að sjá hvernig hún kemur út!:)
20. nóv. 2011
Ætla að hafa hana í kvöld í desert með fjökskyldunni.Mæli algjörlega með henni.
FRÁBÆR SÍÐA!
20. nóv. 2011
Gaman að heyra :) Njótið vel :)
14. feb. 2013
Er gluten i thessu
14. feb. 2013
Já, hún væri annars merkt sem glúteinlaus. Þú getur notað kartöflumjöl í staðinn eða hrísmjöl.
14. feb. 2013
Dóttir mín er með glúteinofnæmi og elskar franska súkkulaðiköku og ef svo er ad thad sé glútein var eg að vonast eftir hvort hægt væri að sleppa thvi ?
14. feb. 2013
Ok takk
18. feb. 2013
Takk innilega fyrir þessa uppskrift. Þessi kaka var bökuð fyrir afmæli dóttur minnar (sem er með laktósóþol) og hún vakti mikla lukku bæði hjá fullorðnum og börnum.
18. feb. 2013
Það er gaman að heyra Andrea og ég skal koma því áleiðis til Lísu snillings :)
24. mar. 2013
Sæl og takk fyrir frábæra síðu :)
Það eru mörg óþol á mínum bæ svo ég er með þrjár spurningar varðandi breytingar áður en ég fer afstað:
-hrásykur: get ég notað t.d. Kókosblóma sykur í staðinn (sem er ekki svo grófur)?
-egg/rauður: er hægt að nota "egg Substitute" duft (blandað í vatn samkv. pakkanum)?
-Ef ekki þessar breytingar virka dettur þér þá aðrar lausnir í hug?
Með fyrir fram þökk
24. mar. 2013
Þú getur vel notað coconut sugar (coconut palm sugar) í staðinn fyrir hrásykur, það er ekkert mál og ég hef gert það oft.
Varðandi egg substitute þá hef ég ekki notað það í kökuna en svo lengi sem þú notar sambærilegt magn við eggin í kökunni þá ætti það að vera í lagi því egg er ekki megin uppistaðan í kökunni (ólíkt t.d. muffinsum þar sem egg skipta meira máli).
Vona að þetta hafi hjálpað :)
Kv. Sigrún
Skrifa ný ummæli