Engiferbrauð

Þessi uppskrift kom svo sannarlega á óvart, brauðið var verulega gott!!! Ég fann þessa uppskrift (þ.e. upprunalegu útgáfuna af henni) í einhverjum bæklingi sem ég greip með mér í búðinni í London. Það eru oft sniðugar uppskriftir sem liggja frammi og maður getur safnað þeim í möppu ef maður vill. Ég er nú ekki svo skipulögð og ég hef heldur ekki pláss fyrir bæklingasafn. Mér finnst því best að fletta í gegnum bæklingana, klippa út uppskriftina sem ég ætla að nota og hengja hana t.d. á ísskápinn. Þá man ég eftir að gera hana við fyrsta tækifæri og ef mér líst vel á hana, fer hún á vefinn.

Ég er búin að breyta uppskriftinni aðeins, nota barnamat í staðinn fyrir alla fituna sem átti að vera í uppskriftinni, nota hrásykur í staðinn fyrir venjulegan sykur, spelti í stað hveitis, vínsteinslyftiduft í stað venjulega lyftiduftsins.

Þessi uppskrift er:

  • Án mjólkur
  • Án hneta

Engiferbrauð

Gerir 1 brauð

Innihald

  • 225 g spelti
  • Smá klípa salt (Himalaya eða sjávarsalt)
  • 3 tsk engifer
  • 1 tsk kanill
  • 1 tsk múskat (enska: nutmeg)
  • 2 tsk vínsteinslyftiduft
  • 100 g rapadura hrásykur (eða annar hrásykur)
  • 175 ml lífrænt framleiddur barnamatur án sykurs; epla-, peru-, eða aprikósumauk
  • 1 egg
  • 3 msk hrein sojajógúrt eða venjuleg jógúrt
  • 1 msk kókosolía

Aðferð

  1. Sigtið saman í stóra skál, spelti, vínsteinslyftiduft, salt, kanil, múskat og engifer. Hrærið vel.
  2. Í aðra skál skuluð þið hræra saman eggi, sojajógúrti og barnamat. Bætið kókosolíunni út í og hrærið vel. Hellið út í stóru skálina og rétt svo veltið deiginu til (ekki hræra of mikið).
  3. Deigið á að vera það blautt að það leki af sleif í stórum kekkjum og ekki t.d. það þurrt að hægt sé að hnoða það.
  4. Klæðið brauðform að innan með bökunarpappír. Hellið deiginu út í og gætið þess að það fari vel í öll horn.
  5. Bakið við 160°C í 50-60 mínútur.

Gott að hafa í huga

  • Þegar kökubrauðið hefur kólnað er best að skera það í sneiðar og frysta hverja sneið fyrir sig. Þannig er auðvelt að kippa einni og einni sneið út og setja t.d. í brauðrist eða bakaraofn.
  • Nota má AB mjólk eða jógúrt í staðinn fyrir sojajógúrt.
  • Ef kókosolían er hörð má stinga krukkunni í heitt vatn í nokkrar mínútur þar til hún verður fljótandi.
  • Ég nota Hipp Organic, Organix eða Holle barnamat. Þessi merki eiga það sameiginlegt að vera lífrænt framleidd og eru ekki með viðbættum sykri.
  • Í staðinn fyrir barnamat má nota eplamauk (enska: Apple sauce) úr heilsubúð eða heilsudeildum matvöruverslana.
  • Ef afgangur er af barnamatnum má frysta hann í ísmolabox og nota í drykk síðar (smoothie).
  • Notið hamingjuegg ef þið mögulega getið.

Ummæli um uppskriftina

jovina
17. jún. 2014

Get ég notað sukrin í staðinn og hvernig eru þá hlutföllin?

sigrun
17. jún. 2014

Sæl. Ég hef ekki prufað það sjálf en ætli þú þurfir ekki sama magn bara.

Skrifa ný ummæli

Vinsamlegast athugið að reiti merkta með * þarf að fylla út.
 
Innihald þessa svæðis verður ekki sýnilegt almenningi.
Þessi spurning hér að neðan er til að varna því að spamvélar geti sett inn sjálfvirkar færslur.
Vinsamlegast leggðu saman tölurnar og skrifaðu niðurstöðurnar. T.d. fyrir einn plús þrír, skaltu skrifa 4.
átta plús fjórir eru