Bloggið

Þessi orð glumdu yfir hverfið í gær sem og Aannnnnnd CUT. Það er rosa gaman að fá beina útsendingu svona í gegnum stofugluggann. Ég get upplýst að í myndinni Penelope verður atriði þar sem Christina Ricci hleypur út af ískri krá og þar bíða hennar ljósmyndarar og aðdáendur (leikarar) og hún hoppar upp í svartan bíl (amerískan dreka) og kallað er á eftir henni Penelope, Penelope!! Þetta atriði var sem sagt endurtekið nokkrum sinnum og við sáum Christinu Ricci hlaupa nokkrum sinnum út í bílinn. Kráin er bara í 20 sekúndna göngufjarlægð svo við vorum með gott útsýni. Svo nota aukaleikararnir pöbbinn á móti sem bækistöð svo ég er farin að þekkja nokkra þeirra í sjón. Ekki góð vinna fyrir alkahólista he he. Við erum annars svo posh að við erum ekki með sjónvarp, við látum bara leika allt fyrir okkur beint. Er að vona að við sjáum Reese Witherspoon líka, væri gaman. Verst að vera ekki með fínu, góðu linsurnar okkar, hefðum alveg getað náð góðum myndum.

Bjó annars til rosa góðan rétt í gær, gerði svona franskar pönnukökur (Crepes) með grænmeti og bygggrjónum innan í, í sinnepssósu. Rooosa gott og hollt. Mæli alveg með þeim. Ekkert flókið að búa til ef maður býr til nokkrar aukapönnsur þegar maður bakar pönnsur (sleppa bara vanilludropunum og kaffinu í pönnsuuppskriftina).

Loksins, loksins. Nú getum við farið út úr húsi án þess að naga neglurnar og svitna. Við erum sem sagt búin að tryggja innbúið okkar en innbúið okkar samanstendur reyndar af myndavélum og tölvum. Tryggingarkonan spurði okkur um sjónvörp, dvd spilara, græjur og þess háttar en við eigum ekkert svoleiðis. Við eigum heldur ekkert inni í íbúðinni (svo sem eins og sófasett, stofuborð, rúm o.s.frv.) nema kannski í eldhúsinu því þar er eiginlega allar okkar eigur (fyrst þeir tóku ekki kaffivélina hans Jóhannesar síðast þá taka þeir hana varla næst he he). Við höfum reyndar falið dótið okkar þegar við förum út úr húsi (segi ekki hvar) svo þetta sé ekki ALVEG eins auðvelt og það var fyrir þá síðast (allt dótið okkar var á stofuborðinu) en það er mikill léttir að allt sé orðið rammlega tryggt. Það þýðir auðvitað að það verður ekkert brotist inn. Sem er svo sem ágætt. Svo spurði konan okkur voða mikið um hurðina okkar og komst að því að hún væri líklega orðin brynvarin, svo örugg væri hún, myndi sennilega þola allt nema sprengjuárás.

Sáum í morgun að upptökur á Penelope eru byrjaðar hérna úti. Ég slétti á mér hárið og setti á mig auka gloss og maskara en allt kom fyrir ekki, var ekkert gripin sem extra sko. Ekki Jóhannes heldur (hann reyndar setti ekki á sig maskara eða gloss). Spurning um að vera heima á morgun og baka bara. Get þá látið hárið flaksast dáldið í leiðinni, út um eldhúsgluggann. Hlýtur að virka.

Ætla að baka pönnukökur í kvöld (var búin að lofa Jóhannesi að kaupa alvöru rjóma á Íslandi og baka fyrir hann pönnukökur) og koma þær í staðinn fyrir pönnukökurnar á Pancake Day (sem Jóhannes missti af) og bollurnar á bolludaginn íslenska (ég vil ekki búa til bollur, þær eru svo óhollar og mér hefur ekki tekist að gera þær hollar OG góðar). Reese Witherspoon og Christina Ricci hljóta að falla fyrir íslenskum pönnsum og rjóma.

Jæja loksins verðum við uppgötvuð...kannski allavega. Við fengum miða inn um lúguna okkar í gær og á honum stóð "Penelope". Ég ætlaði að fara að henda miðanum, hélt þetta væri ruslpóstur en þá var þetta póstur sem var dreift í alla götuna. Það á sem sagt að loka götunni eitthvað í þessari viku þar sem upptökur fyrir bíómynd eiga að fara fram. Myndin heitir sem sagt Penelope og það er frægasta kvikmyndaver Bretlands (Pinewood Studios) sem sér um upptökurnar og allt það. Þetta verður rosa spennandi. Það á að taka upp á pöbbnum við hliðina á okkur og svo í götunni sjálfri. Leikararnir eru til dæmis Christina Ricci, Reese Witherspoon, Catherine O'Hara og Richard E. Grant ásamt mörgum fleirum.

Sko er svona að spá í einu... á maður ekki bara að baka eitthvað rosa gott og opna eldhúsgluggann upp á gátt. Eru ekki allar Hollywood leikkonurnar hálfsveltar og svona hvort eð er. Svo þegar þær finna lyktina af einhverju hollu og góðu er þá ekki bara bein leið fyrir mig á toppinn. Kannski að maður fari að elda bara hollar kökur fyrir Reese Witherspoon og fjölskyldu. Ég verð að vera með viftu í eldhúsinu og blása góðu lyktinni út. Held að þetta muni svínvirka.

Verður ekkert smá gaman svo að sjá myndina þegar hún verður tilbúin!!! Verðið að muna eftir að kíkja eftir mér og Jóhannesi. Ég verð með skilti "CafeSigrun" í bakgrunni einhvers staðar. Langar svo að sjá svona "special thanks to CafeSigrun" í credit listanum. Væri rosa gaman sko :)

Jæja þá fer ég að trítla til London aftur. Búin að hafa það mjög gott á Skóló og meira að segja náði 2 sushiboðum þar!!! Einu með Borgari og Svani bræðrum mínum og Elínu konu Borgars (ásamt Mána og Steini strákunum þeirra, miklir sushimenn líka (6 og 9 ára). Svo náði ég öðru með Jónsa, Auðni og Axeli og Arnari vinum þeirra. Það er magnað hvað hægt er að gera gott sushi með lélegum aðbúnaði. Þetta var svona hallærissushi þ.e. ljótir diskar, ömurlegir hnífar og þar fram eftir götunum en niðurstaðan var rosalega góð. Ég er enn þá að skilja hvernig Auðun getur skorið lax í svona þunnar sneiðar með ónýtum hníf. Ég er farin að hallast að því að hann hafi svona leysigeislasjón, geti sneitt niður laxinn með augunum. Hef engan séð skera lax í jafn þunnar, jafnar og flottar sneiðar. Jónsi er svo snillingurinn í að móta laxabitana. Jónsi og Auðun eru allavega útskrifaður úr sushiskóla CafeSigrun, held ég geti ekki kennt þeim meira hí hí.

Svo er ég búin að vera í kaffivellystingum hjá Röggu á Kaffitári, sakna þess alltaf jafn mikið þegar ég er í London að geta ekki rölt yfir á hverjum morgni og fengið mér latte. Jú ég hef svo sem Starbucks en það slær ekkert latteinu út hjá Röggu og co.

En já fréttir vikunnar eru þær að ég fjárfesti í nýrri ísvél. Auðun var svo sætur að kaupa hana með afslætti þannig að nú eigum við geggjaða Philips vél sem ég hlakka ekkert smá til að prófa, mmmmmm. Ég vona bara að Icelandair skemmi hana ekki fyrir mér. Er búin að fylla hana af nærbuxum og sokkum (hreinum of course) og bólstra hana með fötum og cheeriosi. Ég á líka Handle with Care miða frá Jónsa og ég ætla að setja hana á áberandi stað á töskunni he he.

Það er annars að hlýna aðeins hérna og mér skilst að sé aðeins hlýrra í London en var um daginn. Mátti líka við því, var skítkalt þar. Finnst alveg ógó fyndið samt eitt. Ég var að labba upp Laugaveginn um daginn í þvílíkum skítakulda, frosti og norðanroki, dagblöðin fjúkandi framan í mig, skiltin frá búðunum lágu á hliðinni alls staðar og kannski 2 manneskjur á ferð. Í götunni var ís, einhver hafði verið að borða bleikan ís í formi og greinilega misst hann. Hann sem sagt bráðnaði pínu en fraus svo fastur. HVAR annars staðar en á Íslandi myndi maður sjá þetta? Hvar annars staðar en á Íslandi myndi einhver vera nógu klikk til að borða ís í þessum kulda? Í London þekkjast Íslendingar vel úr. Það eru þeir sem labba um og borða ís þó að sé vetur, helbláir í framan og með bláa putta en skælbrosandi.

En já nú er það bara London og hitti loksins Jóhannes. Við ætlum sko að halda ærlega upp á að Kenya Railways sé no more (þeir sem þekkja mig vita hvað það þýðir :) fyrir forvitna er hægt að senda mér póst.