Sambaro gulrætur frá Tanzaníu

Gulrætur og sætar kartöflur eru mikið notaðar sem meðlæti í Tanzaníu og reyndar víðar í Afríku og oftar en ekki er hráefnið kryddað aðeins en ekki bara borið fram soðið eins og til dæmis víða í Evrópu. Ég elska grænmetið í Afríku, það er alltaf svolítið saltað þegar það er soðið og það er einmitt það sem maður þarf eftir heitan dag. Margir eru hræddir við að borða grænmeti og ávexti í Afríku en yfirleitt eftir að hafa séð mig með kúfaða diska af hvoru tveggja á hverjum degi í 10 daga …róast samferðarfólk og stingur upp í sig soðinni gulrót og jafnvel ananas. Í Afríku fær maður besta ananas í heimi, og mango, og banana, og ástaraldin og avocado. Málið er að treysta stöðunum sem maður er að borða grænmeti og ávexti á og kaupa aldrei, aldrei, neitt við vegkantana sem maður getur ekki skrælt.