Indverskur fiskiréttur
18. apríl, 2003
Þetta er einn af uppáhalds fiskiréttunum hans Jóhannesar. Sósan hentar einnig fyrir kjúkling og grænmeti því hún er mild og bragðgóð.
Þessi uppskrift er:
- Án glúteins
- Án eggja
- Án hneta
Indverskur fiskiréttur
Fyrir 2-3
Innihald
- 500 g ýsuflök, roð- og beinhreinsuð
- 1 laukur, afhýddur og saxaður gróft
- 1 hvítlauksrif, söxuð smátt
- 1 tsk ferskt engifer, afhýtt og rifið eða saxað smátt
- 2 lárviðarlauf
- 1 tsk kókosolía
- 2-3 msk mangomauk (enska: mango chutney)
- 2 tsk maísmjöl (eða arrow root)
- 200 g magur rjómaostur (t.d. Philadelphia Light) eða Curd ostur (hleypiostur, ystingur)
- 100-200 ml léttmjólk
- 2 tsk nigella fræ
- 1 tsk salt (Himalaya eða sjávarsalt)
- 1 tsk steinselja
- 2 tsk karrí
- 1 tsk fish masala (má sleppa)
- Smá klípa svartur pipar
Aðferð
- Afhýðið lauk, engifer og hvítlauk og saxið smátt.
- Hitið kókosolíu á stórri pönnu og látið karrí, lauk, hvítlauk, engifer og lárviðarlauf krauma í u.þ.b. 3 mínútur. Notið vatn til viðbótar ef þarf meiri vökva á pönnuna.
- Takið lárviðarlaufið upp úr og fleygið því.
- Setjið magra rjómaostinn (eða curd ostinn) út í og hrærið í þar til hann bráðnar
- Bætið mjólk, maísmjöli, nigella fræjum og mangomauki saman við.
- Sjóðið við vægan hita í 2 mínútur. Hrærið í allan tímann. Ef ykkur finnst sósan of þykk bætið þá meiri mjólk út á pönnuna.
- Kryddið með steinselju, karríi, fish masala, salti og pipar.
- Skerið fiskiflökin í bita.
- Setjið fiskinn út í sósuna og látið sjóða við vægan hita í 7-10 mínútur með lokinu yfir pönnunni.
Gott að hafa í huga
- Berið fram með chapati brauði og Coriander og papya raita.
- Sósan þynnist aðeins eftir að fiskurinn er kominn út í en ef ykkur finnst hún ennþá of þykk, bætið þá svolítilli mjólk út í.
- Berið fram með byggi eða hýðishrísgrjónum.
- Það er líka gott að bera fram gróft snittubrauð með þessum rétti.
- Nigella fræ (svört fræ sem eru eins og tár í laginu og eru oft í naan brauðum) fást í verslunum sem sérhæfa sig í austurlenskum matvörum).
- Curd ostur fæst stundum í sælkeraverslunum.
- Nota má hrísmjólk, möndlumjólk, sojamjólk eða haframjólk í staðinn fyrir léttmjólk.
- Nota má jurtasmurost í staðinn fyrir rjómaost.
Tengdar uppskriftir
© CafeSigrun 2024
Ummæli um uppskriftina
18. nóv. 2010
Svaka góður fiskréttur sem er í miklu uppáhaldi og hefur verið reglulega á mínum borðum frá því ég smakkaði hann fyrst ;o)
http://www.flickr.com/photos/gudnyar/3250847661/in/set-72157613331335979/
25. feb. 2014
Flott að heyra og fín myndin með, takk :)
25. feb. 2014
Þessi réttur er rosalega góður, mun vera eldaður oft á mínu heimili framvegis :)
25. feb. 2014
Æðislegt, takk fyrir að deila með okkur :)