Hnetusmjör

Það er eitthvað alveg stórkostlegt við að búa til sitt eigið hnetusmjör og um leið spara helling af peningum. Jóhannes borðar mikið af hnetusmjöri (hann borðar ekki kaldan ost (aðeins bráðinn) og vantar því oft viðbit ofan á brauð o.fl.). Hnetusmjör hentar honum líka vel því það er prótein í því, holl fita og er því ákaflega seðjandi. Hnetusmjör passar líka bara í svo margt eins og t.d. í alls kyns drykki, til ísgerðar, í smákökur, ofan á brauð og margt fleira. Það er líka frábært í gönguferðina því það er mjög orkuríkt og geymist vel. Hnetusmjör er líka hollt (í hóflegu magni auðvitað) og ég tala nú ekki um ef maður hleður ekki í það sykri, hellings salti o.fl. eins og er að finna í sumum tegundum af keyptu hnetusmjöri.

Jarðhnetur innihalda helling af manganese og eru góðar fyrir hjarta, geta hindrað myndun gallsteina, eru góðar fyrir heilasellurnar og margt fleira. Það er minna en ekkert mál að búa svona hnetusmjör til heima hjá sér. Það eina sem þið þurfið er matvinnsluvél. Ef þið eruð ekki með góðar græjur borgar sig að skipta magninu í tvennt og vinna með helminginn í einu. Eini gallinn við jarðhnetur er að sumir hafa alvarlegt ofnæmi fyrir þeim og jafnvel lífshættulegt bráðaofnæmi, maður ætti því alltaf að fara varlega í að gefa ungum börnum jarðhnetur/hnetusmjör nema ef þið eruð viss um að þau þoli hneturnar.

Vissuð þið að jarðhnetur tilheyra baunum (pea) en ekki hnetum! Athugið að ef þið kaupið saltaðar hnetur getið þið skolað saltið af þeim og bakað við 160°C í 10-12 mínútur áður en þið maukið þær.