Safar
Ef maður býr svo vel að eiga safapressu er æðislega gaman að útbúa sína eigin safa. Yfirleitt finnst mér best að nota sætan ávöxt á móti grænmeti (t.d. epli eða peru á móti gulrótum eða rauðrófum) og það gildir með safana eins og svo margt annað að maður á að vera óhræddur við að gera tilraunir. Athugið að suma safana er hægt að gera án þess að maður eigi safapressu. Til dæmis má kaupa rauðrófusafa, eplasafa og gulrótarsafa í heilsubúð og blanda saman í glas. Ef maður vill hafa engiferbragð er hægt að kaupa engifer, afhýða það og skafa með beittum hnífi yfir glasið þannig að safinn dropi ofan í.
Mér finnst best að drekka ekki sæta safa of oft því þeir innihalda jú töluvert mikið af náttúrulegum sykri. Mér  finnst best að hafa hærra hlutfall af grænmeti heldur en ávöxtum svo að drykkurinn verði ekki of sætur en það er persónulegt mat. Alltaf er best að drekka safana þegar þeir eru nýpressaðir og almennt ætti ekki að geyma safana í meira en nokkrar mínútur áður en þeirra er neytt.
Appelsínu, gulrótar og engifersdrykkur
Þessi drykkur er fullur af C vítamíni og er hreinsandi líka. Engiferið róar magann og oft hefur engifer verið talið betra en sjóveikistöflur þegar maður er sjóveikur.
Engifer- og melónudrykkur
Þessi drykkur er bara fullur af hollustu. Engifer er hreinsandi og gott fyrir meltinguna og melónan er full af vítamínum. Nota má bæði Galia melónu (ljósgræn að innan) eða hunangsmelónu.
Epla- og vínberjasafi
Þessi drykkur er nú eins einfaldur og þeir gerast helst. Nota má blá, græn eða rauð vínber (blá eru hollust því þau innihalda mest af andoxunarefnum) en mikilvægt er að þau séu steinalaus.
Gulrótar- og sellerísafi
Þessi safi er frægur í safaheimum (sennilega jafn frægur og Madonna í mannheimum) en líklega þarf hann samt ekki lífverði og svoleiðis.
Hreinsandi peru-, gulrótar- og engifersafi
Þennan hreinsandi (detox) drykk er gott að gera í safapressu en fyrir þá sem eiga ekki slíka græju er alveg hægt að mauka perurnar í blandara en þá er drykkurinn aðeins þykkari.
Hreinsandi sítrusdrykkur
Þessi drykkur minnti mig alveg svakalega á Afríku þegar ég var að smakka hann til og sérstaklega á Kenya en þar eru appelsínur eilítið súrari en þessar sem við eigum að venjast á Íslandi.
Hressandi morgundrykkur með sætri kartöflu
Þessi drykkur kemur manni af stað á morgnana. Það er smá leyniinnihald í uppskriftinni en það er sæt kartafla! Það er gaman að bjóða gestum upp á þennan drykk og leyfa þeim að giska á innihaldið.
Járnríkur sellerí-, rauðrófu- og gulrótarsafi
Þessi kemur beint af beljunni svo að segja eða réttara sagt úr bókinni Innocent smoothie recipe book: 57 1/2 recipes from our kitchen to yours og er ein af mínum uppáhalds.
Kiwi- og límónusafi
Þegar Jóhannes smakkaði þennan drykk sagði hann: „Þennan drykk væri ég til í að kaupa oft”.
Peru- og engifersafi
Þessi safi er afar hreinsandi og vítamínríkur þar sem perur innihalda helling af C vítamíni. Til dæmis inniheldur ein pera 11% af ráðlögðum dagskammti af C vítamíni (og sama gildir um kopar).
Rauðrófudetoxdrykkur
Ég fann þessa uppskrift aftan á umbúðum drykkjar sem ég keypti frá Innocent hér í London en sá var einmitt detox drykkur.
Sætur og járnríkur spergilkálssafi (risaeðludrykkur)
Þessi drykkur er einstaklega vítamínríkur og hressandi. Í spergilkáli (brokkolíi) er mikið af C og K sem og A vítamínum.
