Banana- og döðlu skyrdrykkur

2. mars, 2003

Eitt kvöldið þegar ég var ein heima hérna í London (Jóhannes var í viðskiptaferð í Portúgal), var ekkert til í ísskápnum nema skyr (ótrúlegt en satt því skyr fæst jú ekki hér) og jógúrt. Ég átti líka banana og döðlur og ákvað að gera tilraun. Hún heppnaðist mjög vel og þetta varð kvöldmaturinn minn það kvöldið (verulega saðsamur drykkur get ég sagt ykkur). Mér leiðist nefnilega að elda fyrir mig eina og þessi drykkur (smoothie) var því fín lausn.

Athugið að þið þurfið blandara til að útbúa drykkinn.

Senda uppskrift

Prenta uppskrift

Setja í uppskriftabox

Seðjandi og próteinríkur drykkur

0 ummæli

Þessi uppskrift er:

Án glúteins
Án eggja
Án hneta

Banana- og döðlu skyrdrykkur

Fyrir 2

Innihald

10 Medjool döðlur (eða þurrkaðar döðlur lagðar í bleyti í klukkustund)
2 vel þroskaðir bananar
120 ml jógúrt
200 ml hreint skyr
1 tsk vanilludropar (úr heilsubúð)

Aðferð

Saxið döðlurnar gróft og setjið þær í blandara ásamt bönunum. Blandið í um 10 sekúndur.
Setjið skyr, jógúrt og vanilludropa út í blandarann og blandið í um 20 sekúndur eða þangað til silkimjúkt.
Berið fram strax.

Gott að hafa í huga

Það má þynna blönduna með sojamjólk, hrísmjólk, möndlumjólk, haframjólk eða undanrennu ef þarf.
Medjool döðlur fást stundum í matvöruverslunum og/eða heilsubúðum. Þær eru mýkri en þurrkaðar döðlur og þær þarf ekki að leggja í bleyti.
Ef þið hafið mjólkuróþol getið þið notað sojajógúrt í staðinn fyrir jógúrt og skyr.