Avocado og bananamauk

Þegar maður blandar saman avocadoi og banana þá verða einhverjir töfrar til. Þetta er svo góð blanda og hin fullkomna næring, sérstaklega fyrir lítil börn því avocadoið er fitumikill ávöxtur (já hann er ávöxtur, ekki grænmeti) en hann inniheldur holla og góða fitu. Elva vinkona mín notaði avocado mjög mikið og þetta mauk var eitt af uppáhaldsmaukunum hennar Freyju, dóttur hennar. Ég hafði það í huga með dóttur mína sem bókstaflega elskar avocado, jafnvel eintómt. Þess skal samt gæta að báðir ávextirnir séu vel þroskaðir því annars gæti maukið endað alls staðar annars staðar en í munni og maga! Maukið er líka fljótlegt því það þarf ekki að sjóða hráefnið. Það má spila með hlutföllin að vild, þetta eru bara viðmið, ég gætti þess að hafa meira avocado en banana til að venja dóttur mína strax á ekki of sætt bragð.

P.s. maukið er afar gott sem ís fyrir eldri krakka. Hendið því í frospinnabox og frystið, borðið innan sólarhrings (frostpinnarnir verða annars leiðinlegir á litinn).

Athugið að skammtastærðin er einungis viðmið. Sum börn þurfa meira og önnur minna. Einnig getur skipt miklu máli hvort barn er byrjað að skríða og hreyfa sig, varðandi hversu mikið það borðar.