Hitt og þetta

Þetta er sannkallaður vítamíndrykkur. Í bláberjum eru sterk andoxunarefni, B og C vítamín ásamt kalín og kalki og fleira. Í ananas er hellingur af C vítamíni, fólinsýra, A vítamíni og B vítamínum, kalín og kalki, magnesíum og fleira. Ananas inniheldur ensímið bromelain sem hjálpar niðurbroti á próteinum og er því gott fyrir meltinguna.
 
Ananas-bláberjadrykkur
Fyrir 2-3

• 200 ml hreinn ananassafi
  
• 150 gr fersk bláber
  
• 1 dl sojajógúrt (hægt að nota hreina jógúrt eða ab mjólk)
  
• 1 vel þroskaður, stór banani
  
• Nokkrir klakar
  
• 1 msk hreint agavesíróp eða hlynsíróp (enska: maple syrup) ekki víst að þurfi, en smakkið til
  
  Aðferð:
  
• Blandið fyrst klakana vel.
  
• Bætið banananum út í ásamt sojajógúrtinu og blandið vel.
  
• Bætið bláberjum og ananassafa saman við.
  
• Smakkið til með hlynsírópi (eða agavesírópi) ef þarf.
  
  
  

Prenta þessa uppskrift     -     Senda þessa uppskrift

Þetta er hollur og góður drykkur, ananas á að hreinsa þvagfærakerfið, bæta meltinguna (inniheldur meltingarensímið bromelain), styrkja beinin, lækka blóðþrýsting, er trefjaríkur og ég veit ekki hvað. Ananassafi á víst að vera góður fyrir hjartasjúklinga. Bananar eru fullir af B6 vítamíni, potassium (kalíum/kalín), kalki, C og A vítamínum og auðvitað trefjum og flóknum kolvetnum sem hjálpa til við meltingu og jöfnum blóðsykri. Kalíum er mikilvægt til að sporna við hjartasjúkdómum. Í einum meðalstórum banana er um 11% dagsþörf af kalíum. Appelsínur er óþarft að kynna :) Hreinn snilldardrykkur, þarf ég að segja meira hí hí. Ægilega góður drykkur, svona þykkur alvöru "smúðí" (smoothie).
 
Ananasdrykkur (þykkur)
Fyrir 2-3

• 400 gr ferskur, mjög vel þroskaður ananas
  
• 1 stór, mjög vel þroskaður banani
  
• 1 dl hreinn appelsínusafi (meira eftir smekk)
  
  Aðferð:
  
• Setjið ananasbitana ásamt appelsínsafa í blandarann (blender). Blandið vel saman.
  
• Bætið banana út í og blandið vel saman.
  
• Berið fram strax.
  
  
• Til að þynna drykkinn má setja smá undanrennu eða soyamjólk út í.
  
• Ef drykkurinn er ekki nógu sætur (hann ætti að vera það með þroskuðum ávöxtum), má setja um 2 msk af hreinu hlynsírópi (enska: maple syrup) eða agavesírópi út í.

Prenta þessa uppskrift     -     Senda þessa uppskrift

Þessi drykkur er fullur af c vítamínum og er hreinsandi líka. Engiferið róar magann og oft hefur engifer verið talið betra en sjóveikistöflur á sjó. Ég hef þó ekki prófað sjálf. Þetta er upplagður drykkur í byrjun árs, eftir allan jólamatinn þegar líkaminn er farinn að öskra á eitthvað hollt og vítamínríkt. Þennan drykk má gera í safapressu en einnig má kaupa ferskan appelsínusafa og lífrænan gulrótarsafa í heilsubúðum.
 
Appelsínu, gulrótar og engifersdrykkur
Fyrir 2

• 200 ml nýkreistur appelsínusafi
  
• 50 ml gulrótarsafi
  
• 1 cm. bútur ferskt engifer, rifið á rifjárni (má vera meira eftir smekk)
  
  Aðferð:
  
• Blandið öllu saman í blandara.
  
• Berið fram strax.
  
  
• Gætið þess að gulrótarsafinn sé ekki of kaldur því þá er hann svolítið bragðlaus.

Prenta þessa uppskrift     -     Senda þessa uppskrift

Þetta te er eitt af mínum uppáhalds og er bæði hreinsandi og auðvitað koffeinlaust. Ferskur og hollur drykkur og upplagður þegar mann langar í eitthvað heitt, hollt og mátulega sætt.
 
Appelsínu- og kanilte
Fyrir 2

• 500 ml vatn
  
• 1 kanilstöng
  
• 10 cm. bita bútur af appelsínuberki. Gætið þess að hvíta húðin fari ekki með (hún er bitur á bragðið)
  
• 1 tsk safi úr appelsínu
  
• 1 tsk agavesíróp eða hunang
  
  Aðferð:
  
• Sjóðið vatnið og bætið kanilstönginni og berkinum út í.
  
• Látið malla í pottinum í 5-7 mínútur. Sigtið allt í gegnum sigti og ofan í bolla (mér finnst allt í lagi þó teið sé svolítið gruggugt).
  
• Bætið appelsínusafanum og agavesírópinu saman við.
  
  

Prenta þessa uppskrift     -     Senda þessa uppskrift

Þessi drykkur er Afríka í glasi (eða að minnsta kosti Tanzanía og Kenya í glasi). Það er ekkert sem hefur minnt mig jafn mikið á þessa staði eins og fyrsti sopinn sem ég tók af þessum drykk þegar ég var að búa hann til. Hann er alveg hreint dásamlega frískur og góður, mitt á milli þess að vera súr og sætur og er upplagður sem sumardrykkur. Á ferðalögum okkar um þessar slóðir kaupum við gjarnan ferska safa hvers konar, og það er fátt betra en að koma t.d. úr morgunsafaríi, svolítið syfjaður en upprifinn eftir ævintýri morgunsins (t.d. eftir að hafa séð ljón, fíla eða blettatígur!!!) og koma beint í morgunmat þar sem svalandi ávaxtadrykkur bíður manns. Fyrir utan að vera frískandi þá er safinn afar hollur því mango er fullt af andoxunarefnum, trefjum, A, K og E vítamíni og inniheldur kalíum (potassium) eins og bananar en kalíum leikur stórt hlutverk í að halda blóðþrýstingi í lagi o.fl. Ástaraldin (sem heitir á ensku Passion Fruit) inniheldur svipaða vítamínbombu. Athugið að þegar þið veljið ástaraldin á ávöxturinn að virka svolítið þungur miðað við stærð og hýðið á að vera svolítið krumpað (virkar ekki girnilegt en þannig er það þroskað). Ef ykkur finnst steinarnir í ástaraldinum ekki góðir (þeir eru ætir) má láta safann renna fyrst í gegnum sigti.
 
Ástaraldins- og mangodrykkur
Fyrir 2

• 1 mango (lítið), vel þroskað
  
• 6 ástaraldin (lítil)
  
• 200 ml hreinn appelsínusafi
  
  Aðferð:
  
• Afhýðið mangoið og skerið í litla bita (þó þeir fari í blandara er best að skera það í litla bita vegna trefjanna sem eru í mangoi).
  
• Skerið ástaraldinin í helminga.
  
• Setjið mangobitana í blandara ásamt appelsínusafanum og blandið í 10 sekúndur eða þangað til allt er vel maukað. Bætið meiri appelsínusafa út í ef ykkur finnst þurfa.
  
• Skafið kjötið úr ástaraldin helmingunum með skeið ofan í blandarann.
  
• Blandið áfram í 2 sekúndur.
  
  
• Einnig má nota ananassafa eða eplasafa.
  
• Ef þið viljið drykkinn ískaldan má blanda ísmola fyrst í blandaranum. Bragðið nýtur sín hins vegar best ef drykkurinn er ekki alveg ískaldur.

Prenta þessa uppskrift     -     Senda þessa uppskrift

Þessi drykkur er í raun heil máltíð. Hann er fullur af trefjum, próteini, A, C og E-vítamínum, kalki og hollri fitu. Sannkölluð vítamínsprengja. Drykkurinn hentar vel þeim sem eru jurtaætur (enska: vegan) því hann er kalkríkur, próteinríkur og fullur af nauðsynlegum vítamínum. Þeir sem eru jurtaætur myndu samt sleppa hunanginu og undanrennunni og nota hlynsíróp og soyamjólk í staðinn.
 
Avacado- hnetudrykkur
Fyrir 2-3

• 6-8 afhýddar brasilíuhnetur
  
• 2 msk sítrónusafi
  
• 1 vel þroskaður, stór banani
  
• 1 vel þroskað avacado, lítið
  
• 1 msk hlynsíróp (eða fljótandi acacia hunang)
  
• 300 ml sojamjólk (eða undanrenna)
  
• 2 tsk hveitiklíð (má sleppa)
  
  Aðferð:
  
• Blandið fyrst hneturnar mjög fínt en ekki samt þannig að verði að hnetusmjöri. Setjið 3 tsk til hliðar.
  
• Afhýðið avacadoið og saxið gróft.
  
• Afhýðið bananann og saxið gróft.
  
• Setjið allt saman í blandara og blandið mjög vel.
  
• Berið fram í glösum með smávegis af brasilíuhnetumulningi ofan á.
  
• Bætið meiri mjólk við ef ykkur finnst drykkurinn of þykkur.
  
• Berið fram strax.
  
  

Prenta þessa uppskrift     -     Senda þessa uppskrift

Þessi er frábær fyrir alla fjölskylduna. Ananasinn inniheldur ensímið Bromelain sem er frábært fyrir meltinguna og avacado er stútfullt af hollustu. Avacado inniheldur einómettaða fitu, inniheldur mikið af E vítamíni og ekki nóg með það þá inniheldur það oleic sýru sem er talin sporna gegn brjóstakrabbameini. Avacado er stundum kölluð "krókódílapera" vegna áferðarinnar en það er alveg örugglega ekkert krókódílakjöt í þessarri uppskrift! Drykkurinn er góður fyrir krakka en ef þið gefið mjög ungum börnum drykkinn, sleppið þá sítrónusafanum. Drykkurinn er nokkuð þykkur en hann má þynna með því að setja aðeins meiri ananassafa.
 
Avacado- og ananasdrykkur
Fyrir 2

• 1/2 ananas (um 400 gr) eða 300 ml hreinn ananassafi
  
• 1 avacado, vel þroskað
  
• Safi af 1 sítrónu
  
  Aðferð:
  
• Maukið avacadoið í blandara ásamt sítrónusafanum (notið sítruspressu eða kreistið með höndunum. Passið að steinarnir fari ekki með).
  
• Pressið ananasinn í safapressu.
  
• Hellið ananassafanum í blandarann og maukið vel ásamt avacadoinu.
  
• Berið fram í stórum glösum með klaka.
  
  
  

Prenta þessa uppskrift     -     Senda þessa uppskrift

Eitt kvöldið þegar ég var ein heima hérna í UK (Jóhannes var í viðskiptaferð í Portúgal), var ekkert til í ísskápnum nema skyr (ótrúlegt en satt því skyr fæst jú ekki hér) og vanillujógúrt. Ég átti líka banana og döðlur og ákvað að gera tilraun. Hún heppnaðist mjög vel og þetta varð kvöldmaturinn minn það kvöldið (verulega saðsamt get ég sagt ykkur). Mér leiðist nefnilega að elda fyrir mig eina og þetta var því fín lausn.
 
Banana- og döðlu skyrdrykkur
Fyrir 2

• 1 dós (120 ml) fitulaus, jógúrt
  
• 10 þurrkaðar döðlur lagðar í bleyti í nokkra klukkutíma
  
• 2 dl hreint skyr
  
• 2 þroskaðir bananar
  
• 1 tsk vanilludropar eða vanilluduft
  
• 1 msk agavesíróp
  
• Allt hrært vel saman í blandara og borið fram í háum glösum.
  
  
• Það má þynna blönduna með undanrennu ef þarf.
  

Prenta þessa uppskrift     -     Senda þessa uppskrift

Nammi nammi. Hnetusmjör og bananar. Fínt eftir ræktina, fullt af próteinum. Munið að hnetusmjör er ekki svo óhollt (í litlu magni), kaupið bara það sem er án viðbætts sykurs og helst lífrænt framleitt. Þetta er heimsins einfaldasti drykkur.
 
Banana- og hnetusmjörshristingur
Fyrir 2

• 4 ísmolar
  
• 2 vel þroskaðir bananar
  
• 1-2 msk mjúkt hnetusmjör, hreint, án viðbætts sykurs, helst lífrænt framleitt
  
• 200 ml soyamjólk (má einnig nota hrísmjólk, haframjólk eða undanrennu)
  
  Aðferð:
  
• Setjið ísmolana í blandara ásamt 50 ml af soyamjólk og blandið vel.
  
• Setjið hnetusmjörið, bananana og restina af soyamjólkinni út í og blandið í 2-3 mínútur.
  
  

Prenta þessa uppskrift     -     Senda þessa uppskrift

Bragðgóður drykkur, upplagður þegar maður kemur heim úr vinnunni og langar í eitthvað sætt en hollt.
 
Banana- og kókosdrykkur
Fyrir 2

• 1 dós kókosmjólk (coconut milk, án bragð- eða aukaefna, helst lífrænt framleidd)
  
• 2 meðalstórir, mjög vel þroskaðir bananar
  
• 50 ml hreinn appelsínusafi
  
• 1/2 tsk vanilludropar eða vanilluduft
  
• 1 msk kókosmjöl
  
• Ísmolar
  
  
• Blandið öllu saman í matvinnsluvél og skreytið með smávegis af kókosmjöli ofan á. Drykkurinn ætti að vera það þykkur að kókosmjölið sökkvi ekki (samt ekki of þykkur).
  
  
• Það er gott að vera búin að kæla kókosmjólkina í ísskáp og jafnvel að frysta hana létt þannig að úr verði krap!

Prenta þessa uppskrift     -     Senda þessa uppskrift

Það var um haustið 2007 þegar við Jóhannes vorum (oft sem áður) í Nairobi. Við vorum nýkomin frá Zanzibar en þar áður höfðum við verið að lóðsa nokkra hópa fólks um Kenya. Við vorum með 7 tíma aflögu fyrir næsta flug (til London). Ég hringdi í James sem er innfæddur leigubílstjóri (eða réttara sagt strákpjakkur sem leigir gamla druslu og rúntar með fólk og fær um 500 krónur á dag fyrir). Ég hafði fengið James nokkrum sinnum til að skutla mér og líkaði vel við þennan hægláta en duglega strák. Nú, hann fór með okkur inn til Nairobi og við ákváðum að eyða tímanum í bókabúð, að kaupa hnetur og ávexti í flugvélina (í nesti) og fara á nokkur kaffihús. Við fórum í Sarit Centre sem er stór verslunarmiðstöð í Westlands hverfinu í Nairobi en þar er öruggt og þægilegt að versla. Þó að ég sé ekki hrifin af verslunarmiðstöðvum þá er eitthvað öðruvísi við að versla þar sem varðmenn vopnaðir AK 47 rifflum eru á sveimi….ekki alveg Smáralindsstemmningin. Nú við versluðum nokkrar bækur, þó ekki uppskriftabækur (því ég á þær flestar um afríska matargerð), fengum okkur ljúffengt kaffi á Dorman’s og rétt áður en við ætluðum að hitta James aftur ákváðum við að hendast upp á efstu hæð og grípa með okkur bananadrykkinn góða sem ég fæ mér alltaf þegar á leið þarna um. Við þeystumst upp, þeystumst aftur niður með bananadrykk í hönd (risaglös) og út í bíl. Það vildi ekki betur til en svo að Jóhannes náði að hella yfir sig allan um 400 ml af klístruðum bananadrykk. Það var 30 stiga hiti og engin loftkæling, við á leið út á flugvöll, fötin í töskunni, ekki einu sinni pappír uppi við og bílsætið óóóóóógeðslegt. Aumingja James…. Við vorum alveg miður okkar en tókst að ná í hreinan bol, þurrka það mesta úr sætum og af buxum og hendast út á flugvöll. Jóhannes var svo svekktur að ég gat ekki annað en gefið honum eiginlega allan minn drykk (allt of mikið fyrir mig hvort eð var). Við skildum við James á flugvellinum með fullt af þjórfé og pening fyrir þrifum. Hann brosti bara og sagði "Hakunamatata". En sem sagt þetta er uppskriftin af bananadrykknum og á meðan þið drekkið hann, ímyndið ykkur að þið hellið rúmlega 400 ml yfir ykkur í bíl í 30 stiga hita og með enga loftkælingu. Veeeeel klístrað!

Uppskriftin inniheldur hunang en því má skipta út fyrir agavesíróp ef þið eruð jurtaætur.
 
Bananadrykkur frá Nairobi
Fyrir 2

• 2 vel þroskaðir, stórir bananar
  
• 1 msk acacia hunang eða agavesíróp
  
• 150 ml sojamjólk (einnig má nota haframjólk, hrísmjólk, möndlumjólk eða undanrennu)
  
• 4 ísmolar
  
  Aðferð:
  
• Setjið ísmolana í blandara.
  
• Hellið 50 ml af sojamjólk út á ísmolana.
  
• Blandið vel eða þangað til mjólkin fer að freyða.
  
• Setjið bananana, hunangið og afganginn af sojamjólkinni út í.
  
• Blandið vel eða upp undir mínútu.
  
• Berið fram strax.
  
  

Prenta þessa uppskrift     -     Senda þessa uppskrift

Þetta er reglulega svalandi og frískur sumardrykkur. Uppskriftin kemur úr bók frá Grænum Kosti (Grænn kostur Hagkaupa) og eins og með allar uppskriftirnar úr þeirri bók, þá er þessi frábær.
 
Bananashristingur (Banana og ananas hristingur)
Fyrir 2

• 3 dl ab mjólk (eða súrmjólk, það er reyndar talað um sojajógúrt í bókinni)
  
• 2 stk vel þroskaðir bananar
  
• 100 gr ananas í bitum, í náttúrulegum safa, ekki sírópi
  
• Smá bútur (um 1 cm) engifer, rifið
  
• 1/2 tsk vanilluduft eða vanilludropar (ég set aðeins meira, mér finnst vanillubragðið svo gott)
  
  
• Setjið allt í blandara og blandið vel saman. Ég set einnig fullt af klökum út í til að hafa þetta kalt og gott.
  
  

Prenta þessa uppskrift     -     Senda þessa uppskrift

Þessi drykkur er stútfullur af hollustu eins og andoxunarefnum úr berjunum ásamt próteinum og C vítamíni. Mmmmmmm. Ekki vera hrædd við að nota tófú, það finnst nánast ekkert bragð af því en gerir drykkinn bara þykkari. Hægt er að nota hreint skyr í staðinn.
 
Berja-tofudrykkur (smoothie)
Fyrir 2-3

• 50 gr tofu, smooth (mjúkt, má nota skyr í staðinn)
  
• 60 gr bláber, fersk eða frosin
  
• 1 vel þroskaður banani
  
• 100 gr hindber, fersk eða frosin
  
• 1-2 dl undanrenna
  
• 1/2 dl appelsínusafi, hreinn
  
• 3 msk agavesíróp eða hreint hlynsíróp (enska: maple syrup) eða meira eftir smekk.
  
  
• Ef ekki eru til fersk ber, má nota sykurlausa sultu t.d. frá St. Dalfour (í háu, mjóu krukkunum, fást í öllum verslunum).
  
• Til að hafa drykkinn þykkari skal bæta meira tofu við.
  
• Hægt að nota acacia hunang í staðinn fyrir agave- eða hlynsíróp.

Prenta þessa uppskrift     -     Senda þessa uppskrift

Perur hafa hreinsandi eiginleika og bláber eru hollustuheimsmeistarar, full af andoxunarefnum og járni. Þetta er sannkallaður hollustudrykkur og upplagt að nota bláberin úr berjamó haustsins.

 
Bláberja- og perudrykkur
Fyrir 2

• Safi úr 1/2 sítrónu
  
• 1 pera, vel þroskuð
  
• 115 gr bláber
  
• 175 ml AB mjólk (einnig má nota sojajógúrt, venjulega jógúrt eða hreint skyr)
  
• 2 tsk agavesíróp
  
• Smá klípa kanill (má sleppa)
  
• 4 ísmolar
  
  Aðferð:
  
• Setjið ísmolana fyrst í blandarann. Blandið í nokkrar sekúndur.
  
• Hreinsið steinana úr perunni og setjið í blandarann ásamt sítrónusafa, bláberjum og AB mjólk.
  
• Blandið í um 10 sekúndur.
  
• Bætið agavesírópinu saman við og blandið aðeins áfram.
  
• Dreifið kanil yfir ef þið viljið.
  
  
  

Prenta þessa uppskrift     -     Senda þessa uppskrift

Hvað get ég sagt…ef keppt væri í hollustu drykkja (svona eins og í t.d. 100 metra hlaupi) þá væri þessi drykkur í fyrsta sæti (og sennilega öðru og þriðja líka). Hann fengi einnig heiðursverðlaun í hollustu. Bláberin eru full af andoxunarefnum sem hjálpa til við að sporna gegn krabbameini, og drykkurinn inniheldur kókosvatn sem er svo dæmalaust gott fyrir okkur, t.d. potassíum sem hjálpar hjartanu sem og að halda blóðþrýstingnum í lagi. Vissuð þið að í kókosvatni eru sömu efni og í blöðflögum í líkama okkar...svo ef við erum eitthvað slöpp er gott ráð að drekka kókosvatn. Drykkurinn inniheldur líka sesammauk sem inniheldur fullt af kalki, kopar og járni svo fátt eitt sé nefnt. Koparinn er mikilvægur fyrir þá sem hafa gigt eða eru slæmir í liðunum.
 
Bláberjadrykkur með kókosvatni
Fyrir 2

• 100 gr fersk bláber (eða frosin)
  
• 200 ml kókosvatn
  
• 4 tsk agavesíróp
  
• 1 banani eða pera
  
• 2 tsk sesammauk (tahini)
  
  Aðferð:
  
• Blandið bláberin fyrst ásamt smá slettu af kókosvatninu. Maukið vel.
  
• Bætið öllu öðru út í og maukið mjög vel (2-3 mínútur á hæsta styrk).
  
• Hægt er að útbúa drykkinn að morgni og bera fram síðar um daginn.
  
• Ef þið notið fersk en ekki frosin bláber er gott að setja nokkra ísmola í blandarann með drykknum.
  
  

Prenta þessa uppskrift     -     Senda þessa uppskrift

Bláber eru flokkuð sem súperfæða (ofur holl) og ekki skrýtið þar sem þau eru algjörlega pakkfull af andoxunarefnum og vítamínum. Dökkblái liturinn er greinilegt merki um það. Bláber innihalda einnig járn og trefjar, eru góð fyrir hjarta, heila og sjón og þykja góð í að sporna gegn ýmsum tegundum krabbameins. C vítamínið hjálpar svo með upptöku á járninu svo útkoman verður reglulega hollt og gott te sem er bæði járnríkt, bragðgott og á að virka bakteríudrepandi ef við erum t.d. með einhverja slæmsku í maganum. Þetta er uppáhaldsteið mitt á haustin þegar bláberin eru glæný. Ef þið eigið ekki ný bláber má nota lífræna bláberjasultu eða frosin bláber.
 
Bláberjate
Fyrir 2

• 2 msk bláber, fersk eða frosin. Einnig má nota lífræna bláberjasultu
  
• 600 ml vatn
  
• 2 tsk agavesíróp eða acacia hunang
  
• 2 tsk sítrónusafi
  
  Aðferð:
  
• Setjið bláber (eða bláberjasultu), agavesíróp og sítrónusafa í lítinn pott.
  
• Látið suðuna koma upp án þess að bullsjóði.
  
• Ef notuð eru fersk eða frosin bláber er gott að kremja þau með matskeið í pottinum. Ef notuð er sulta er hún látin leysast upp í vökvanum.
  
• Bætið vatninu saman við og hitið að suðu.
  
• Hellið vökvanum í gegnum fíngatað sigti.
  
• Hellið í glös.
  
• Berið fram strax.
  
  
• Drykkurinn er einnig afbragð ískaldur. Kælið í ísskáp þangað til hann er orðinn ískaldur og berið fram með ísmolum.

Prenta þessa uppskrift     -     Senda þessa uppskrift

Ekki ÚR blóði (ég er ekki vampíra) heldur FYRIR blóðið...því þegar maður er lágur í járni þá er þessi drykkur upplagður. Sveskjurnar eru sérlega járnríkar og appelsínusafinn aðstoðar við upptöku járnsins í líkamanum. Ef þið fáið soyajógúrt er best að nota hana því mjólkurvörur geta hindrað upptöku járns en engu að síður er gott að hjálpa meltingunni við að nýta allt sem hún getur svo þess vegna er ab mjólkin góð.
 
Blóðdrykkurinn góði
Fyrir 2

• 6-8 þurrkaðar sveskjur
  
• 100 ml hreinn appelsínusafi
  
• 2 msk ab mjólk, hrein jógúrt eða soyajógúrt
  
• klípa af kanil
  
  Aðferð:
  
• Setjið allt í blandara og blandaið vel saman eða 1-2 mínútur.
  
• Bætið við meira af ab mjólk ef þið viljið drykkinn þykkari.
  
  

Prenta þessa uppskrift     -     Senda þessa uppskrift

Þessi drykkur er unaðslegur, hann er hreinlega eins og flauel upp í manni (ég hef ekki smakkað fljótandi flauel en er viss um að það bragðast svona). Drykkurinn er upplagður eftir ræktina eða sem léttur morgunmatur því hann inniheldur bæði holla fitu, prótein og kolvetni. Um 75% fituinnihalds í cashewhnetum er einómettaðar fitusýrur (oleic acid) og sýnt hefur verið fram á að þessar sýrur hjálpa til við að sporna gegn hjartasjúkdómum og sagt er að cashewhnetur séu sérlega góðar fyrir þá sem hafa sykursýki. Cashewhnetur innihalda einnig mikið af kopar og kalki. Kalkið er auðvitað gott fyrir beinin okkar en koparinn skiptir máli líka, sérstaklega fyrir járnbúskapinn en einnig hefur kopar andoxunareiginleika. Kopar er einnig mikilvægur fyrir æðar, bein og liði. Það er samt ekki sniðugt að fara í Byko og kaupa koparrör til að bryðja…cashewhnetur eru sniðugri!
 
Cashewmauks- og bananamjólk
Fyrir 2

• 4 ísmolar
  
• 2 msk cashewmauk (cashew butter), fæst í heilsubúðum
  
• 1 vel þroskaður banani
  
• 1 tsk agavesíróp
  
• 250 ml soyamjólk (einnig má nota hrísmjólk, haframjólk eða undanrennu)
  
  Aðferð:
  
• Setjið ísmolana í blandara ásamt smá slettu af soyamjólk og blandið í nokkrar sekúndur.
  
• Bætið helmingnum af soyamjólkinni út í ásamt banananum, cashewmaukinu og agavesírópinu.
  
• Blandið í allt að 30 sekúndur eða þangað til drykkurinn hefur blandast vel.
  
• Bætið afgangnum af soyamjólkinni saman við og blandið í nokkrar sekúndur.
  
• Berið fram strax.
  
  

Prenta þessa uppskrift     -     Senda þessa uppskrift

Þetta er einföld og holl uppskrift og hentar vel fyrir þá sem hafa mjólkuróþol. Í uppskriftina þarf frosinn banana en ef þið eruð ekki búin að frysta bananann, setjið þá nokkra klaka út í. Drykkurinn er nokkuð þykkur en hann má þynna eftir smekk.
 
Döðlu-tofuhristingur
Fyrir 2

• 1 bolli tofu (smooth þ.e. mjúkt)
  
• 1 stór vel þroskaður frosinn banani, í bitum eða 2 litlir
  
• 1 dl soyamjólk eða vatn
  
• 10 döðlur, látið þær liggja í sjóðandi vatni í um 30 mínútur
  
• 1 msk (eða meira eftir smekk) af byggmaltsírópi (enska: barleymalt syrup). Einnig má nota hreint hlynsíróp eða fljótandi hunang. Það má líka nota ávaxtasykur eða appelsínusafa
  
• smá múskat og kanill
  
  Aðferð:
  
• Leyfið frosna bananabitunum að þiðna aðeins og setjið þá svo út í blandara. Blandið vel.
• Hellið vatninu af döðlunum og setjið þær út í. Blandið vel.
  
• Setjið soyamjólkina eða vatnið út í og því næst tofuið. Látið vélina ganga í um 2 mínútur.
  
• Bætið byggmaltsírópinu (eða því sem þið notið) saman við ásamt kanil og múskati.
  
• Ef blandan er of þykk má bæta meira við af sojamjólk (eða appelsínusafa) saman við.
  
  
• Fyrir smá súkkulaðifíling má setja 1 msk af hreinu, góðu kakódufti (ekki sykurbættu) eða carobdufti.

Prenta þessa uppskrift     -     Senda þessa uppskrift

Þessi drykkur er bara fullur af hollustu. Engifer er hreinsandi og gott fyrir meltinguna og melónan er full af vítamínum. Nota má bæði Galia melónu (ljósgræn að innan) eða hunangsmelónu. Lime er afar frískandi en það má sleppa því ef þið viljið sætari safa. Gott er að nota safapressu fyrir þessa uppskrift en fyrir þá sem ekki eiga svoleiðis má kaupa gulrótarsafa og blanda restina í blandara (rífa engiferið fyrst) og hræra svo saman. Safinn verður þá þykkari.
 
Engifer- og melónudrykkur
Fyrir 2

• 2 gulrætur
  
• 1 Galia melóna eða hunangsmelóna, fræhreinsuð og afhýdd
  
• 2 lime (best að nota sítruspressu en annars má kreista safann með höndunum)
  
• Smá bútur af engiferi (um 3cm bútur), afhýddur
  
  Aðferð:
  
• Setjið allt í safapressu nema limeið.
  
• Berið fram í háum glösum með klökum og lime sneiðum.
  
  
• Það má líka nota vatnsmelónu í þennan safa.

Prenta þessa uppskrift     -     Senda þessa uppskrift

Engiferöl er mín þýðing á “Ginger Ale” sem er drykkur sem margir sem hafa búið erlendis þekkja. Á Íslandi er það ekki svo mikið þekkt en er mikið drukkið á heitum sumardögum t.d. á Bretlandi, í Bandaríkjunum og víðar. Engifer er sérlega hressandi, hefur bólgueyðandi áhrif og er afar gott fyrir meltinguna, kemur t.d ró á magann hjá þeim sem er flökurt (gott fyrir ófrískar konur eða bílveika). Þessi drykkur, ískaldur er alveg ferlega hressandi og upplagður til að drekka á heitum sumardegi (eða kannski volgum íslenskum sumardegi…þeir verða nú ekki svo heitir). Drykkurinn er líka frábær detoxdrykkur og líka afar góður ef maður er með hálsbólgu eða einhverja slæmsku því hann bókstaflega rífur í kverkarnar! Meira að segja Jóhannes sem vill ekki sjá neinar hóstamixtúrur þegar hann er með hálsbólgu/hósta er farinn að biðja um engiferte og engiferdrykki og segir að virki vel.
 
Engiferöl
Fyrir 2

• 2x10 cm. bútar af engiferi
  
• 400 ml vatn
  
• 1/2 tsk sítrónusafi
  
• 2 msk agavesíróp
  
• Nokkrir ísmolar
  
  Aðferð:
  
• Afhýðið engiferið og sneiðið í mjóar sneiðar.
  
• Hitið vatn í litlum potti að suðu.
  Sjóðið engiferið í nokkrar mínútur.
  
• Fjarlægið engiferið fyrir frekar milt engiferbragð en látið sitja í um 30 mínútur fyrir sterkara bragð.
  
• Hellið vökvanum í skál.
  
• Kælið í ísskáp.
  
• Hellið í 2 glös (hellið um 50-100 ml af engifersafa í hvort glas, getið fryst afganginn og notað síðar. Magn fer eftir smekk á styrkleika engiferbragðsins).
  
• Bætið sítrónusafanum við.
  
• Bætið agavesírópinu við.
  
• Fyllið glösin með ísköldu vatni.
  
• Hrærið vel og berið fram ískalt með ísmolum.
  
• Berið fram með skeiðum svo að fólk geti hrært í glasinu sínu (því engiferið sest aðeins á botninn).
  
  
• Ef ykkur finnst engiferbragðið of sterkt má þynna drykkinn með meira af köldu vatni. Mér finnst ekki gott að hafa hann of bragðmikinn heldur á drykkurinn að vera meira svalandi en sterkur.
  
• Bæta má hreinu sódavatni við ef þið viljið "gosfíling".
  
• Gott er að sjóða meira magn í einu og eiga í ísskápnum. Geymist í u.þ.b. viku og um 3 mánuði í frystinum.

Prenta þessa uppskrift     -     Senda þessa uppskrift

Einn ægilega einfaldur og góður. Nota má blá eða rauð vínber í staðinn en þau verða að vera steinalaus. Best er að nota safapressu fyrir þennan safa en einnig er hægt að kaupa vínberjasafa og eplasafa og blanda saman. Þó það sé aldrei eins gott og ferskur safi má bjarga sér svoleiðis! Þetta er líklega ein stysta uppskrift á CafeSigrun!

 
Epla- og vínberjasafi
Fyrir 2

• 2 epli
  
• 3 fullar lúkur græn, rauð eða blá vínber, steinalaus
  
  Aðferð:
  
• Skerið eplin í mátulega stóra búta og setjið í safapressuna ásamt vínberjunum.
  
  
  

Prenta þessa uppskrift     -     Senda þessa uppskrift

Gulrætur eru yfirfullar af A vítamíni (Beta Carotene) ásamt B1, B3, B6, fólinsýrum og Kalíum (Potassium), járni og svo mætti lengi telja. Gulrætur örva meltinguna og virka einnig hreinsandi á innvolsið í okkur. Það góða við svona safa er að maður er að fá ofsalega mikið af hollustu án þess að líkaminn þurfi að reyna á sig við að brjóta matinn niður. Svona drykkir eru því eins og vítamínsprautur! Perur og nektarínur eru ekki síðri vítamínbomba en gulrætur!
 
Gulrótar- og ávaxtadrykkur
Fyrir 2

• 2 dl kaldur gulrótarsafi, hreinn og lífrænt framleiddur(hægt að fá í Yggdrasli eða búinn til í safapressu ef þið eigið svoleiðis)
  
• 1 nektarína, vel þroskuð
  
• 1 pera, vel þroskuð (lífrænt ræktuð, þessar sem eru óreglulegar í laginu með mjög þunnt hýði)
  
  Aðferð:
  
• Skerið nektarínuna og peruna gróft og setjið í blandarann ásamt um hálfum desilítra af gulrótarsafa. Blandið vel.
  
• Bætið restinni af gulrótarsafanum saman við og blandið vel.
  
• Berið fram strax.
  
  
• Bæta má hreinum eplasafa eða perusafa til helminga við gulræturnar til að fá smá tilbreytingu.

Prenta þessa uppskrift     -     Senda þessa uppskrift

Þessi safi er frægur í safaheimum (sennilega jafn frægur og Madonna í mannheimum) en líklega þarf hann samt ekki lífverði og svoleiðis. Þetta er ákaflega hollur og góður drykkur og mátulega sætur ef maður vill ekki sætan safa heldur svona rétt keiminn sem kemur af gulrótunum. Traustur og góður, einfaldur og ódýr. Það er alltaf góð blanda. Nauðsynlegt er að nota safapressu við að útbúa þennan drykk (veit ekki til þess að sé hægt að kaupa sellerísafa). Breyta má hlutföllunum þannig að meira selleríbragð sé í staðinn fyrir gulrótarbragðið.
 
Gulrótar- og sellerísafi
Fyrir 2

• 3 gulrætur
  
• 2 sellerístilkar
  
  Aðferð:
  
• Setjið í safapressu og berið fram strax.
  
• Sumum finnst gott að setja 1/2 epli með enda gerir það safann aðeins sætari.
  
  

Prenta þessa uppskrift     -     Senda þessa uppskrift

Ég krækti mér í svæsna hálsbólgu um daginn og vantaði eitthvað til að mýkja hálsinn sem var eins og sandpappír af grófleika 12. Þessi drykkur gerði nákvæmlega það. Hann er bæði frískandi og bragðgóður og inniheldur engin skrýtin efni eins og hóstasaft gerir yfirleitt. Ef maður er með kvef er gott að setja smávegis af afhýddu, fersku engiferi (1cm bút) út í og sjóða með.
 
Hálsbólgudrykkur
Fyrir 1-2

• 300 ml vatn
  
• 2 msk agavesíróp
  
• 1 negulnagli
  
• 1 kanilstöng
  
• Safi úr 1 sítrónu
  
  Aðferð:
  
• Sjóðið agavesíróp og vatn í nokkrar mínútur.
  
• Bætið negulnaglanum og kanilstönginni út í og látið malla í 20 mínútur með lokinu á.
  
• Fjarlægið negulnaglann og kanilstöngina.
  
• Setjið sítrónusafann út í.
  
• Berið fram heitt.
  
  

Prenta þessa uppskrift     -     Senda þessa uppskrift

Þennan hreinsandi (detox) drykk má líka gera í safapressu en fyrir þá sem eiga ekki slíkt er alveg hægt að mauka perurnar í blandara en þá er drykkurinn aðeins þykkari. Lífrænt framleiddan gulrótarsafa má kaupa í heilsubúðum. Bæði perurnar og engiferið hafa hreinsandi eiginleika fyrir innyflin og gulrótarsafinn inniheldur helling af Beta Karótíni (sem breytist í A vítamín í líkamanum) og K og C vítamínum en perurnar innihalda mikið af C vítamíni. A vítamín er sérstaklega gott fyrir lungnastarfsemi. Perur eru líka trefjaríkar og eru sá ávöxtur sem hvað síst kemur af stað ofnæmisviðbrögðum. Þær eru því heppilegar fyrir ung börn. Þetta er upplagður drykkur yfir háveturinn því þarf líkaminn einmitt á þessum vítamínum að halda.
 
Hreinsandi peru, gulrótar- og engifersdrykkur
Fyrir 2

• 2 meðalstórar, vel þroskaðar perur (þessar óreglulegu í laginu með þunna hýðinu. Lífrænt ræktaðar)
  
• 50 ml gulrótarsafi
  
• 1 cm. bútur ferskt engifer, rifið á rifjárni (má vera meira eftir smekk)
  
  Aðferð:
  
• Afhýðið perurnar og skerið í grófa bita.
  
• Blandið perurnar í blandara ásamt helmingnum af gulrótarsafanum.
  
• Blandið restinni af gulrótarsafanum saman við ásamt engiferinu.
  
• Berið fram strax.
  
  
  
• Það er mjög gott að nota í þessa uppskrift perur sem eru farnar að slappast.

Prenta þessa uppskrift     -     Senda þessa uppskrift

Þessi drykkur minnti mig alveg svakalega á Afríku og sérstaklega Kenya þegar ég var að smakka hann til. Ástæðan er nefnilega sú að í Kenya eru appelsínur eilítið súrari en þessar sem við eigum að venjast á Íslandi sem koma frá Spáni eða Bandaríkjunum. Ég man í fyrsta skipti sem ég sá appelsínur í Kenya. Þær eru aðeins stærri en límónur og eiturgrænar að lit (en reyndar gular að innan sem ég vissi ekki þá). Í fyrsta skipti sem við komum þangað var ég búin að velta því fyrir mér alveg svakalega oft hvers vegna Kenyabúar borðuðu svona oft límónur. Mér fannst það beinlínis stórfurðulegt. Það var ekki fyrr en í næsta skipti sem ég fór þangað að ég fór að spyrjast fyrir um þetta. Ég spurði einn Kenyabúa hvers vegna þessu sætti. Hann horfði á mig eins og ég væri eitthvað ruuuugluð. Já en þetta eru appelsínur!!! Ég sagði að það gæti ekki verið? Þær væru appelsínugular? Hann svaraði á móti að það hlyti að vera eitthvað að appelsínunum okkar þar sem þær væru appelsínugular..kannski væru þær skemmdar? Þetta sýndi glögglega hversu fastheldin við erum á ýmislegt í lífi okkar, hvort sem það er Kenyabúi eða Íslendingur. Í fyrsta skipti sem ég smakkaði appelsínu í Kenya vorum við að sigla á Indlandshafi, í gamalli tréskútu sem notuð hafði verið fyrir krydd, þræla og ýmsan varning milli Mombasa og Zanzibar. Um borð var matur sem við borðuðum með bestu lyst enda orðin svöng. Í eftirmat voru….límónur (sem ég nú vissi að voru appelsínur) og ég borðaði þær auðvitað líka. Þær voru sérlega gómsætar en aðeins súrari en okkar (ekki óþroskaðar súrar heldur svona sterksætsúrar) sem pössuðu vel þarna eftir matinn. Þegar farið er með fólk í köfun á Indlandshafi fá kafarar alltaf appelsínubáta til að hreinsa munninn þegar upp er komið!Þetta var ég sem sagt að hugsa um á meðan ég bjó til drykkinn á köldum vetrardegi á Íslandi. Hann er einstaklega hressandi og hreinsandi og sprengfullur af C vítamínum. Engiferið er einnig gott fyrir meltinguna og við flökurleika (magakveisum). Ef þið viljið meira engiferbragð má rífa engiferið á rifjárni og setja út í drykkinn. Í þennan drykk þarf safapressu eða hreinan gulrótarsafa.
 
Hreinsandi sítrusdrykkur
Fyrir 2

• Safi úr 2-3 appelsínum (eða 250 ml hreinn appelsínusafi)
  
• 1 límóna
  
• 1 tsk sítrónusafi
  
• 2 gulrætur
  
• 1/2 cm. bútur engifer
  
  Aðferð:
  
• Afhýðið gulrótina og setjið hana í gegnum safapressuna. Hellið í könnu.
  
• Sumar safapressur þola appelsínur og þið getið sett appelsínurnar í gegn eftir að þið eruð búin að skræla þær. Annars getið þið notað sítruspressu (ég á bara svona litla úr plasti sem er með lítilli skál undir, dugar mjög vel).
  
• Hellið í könnuna.
  
• Gerið það sama með límónuna.
  
• Kreistið safann úr sítrónunni út í.
  
• Afhýðið engiferið og skerið í tvo bita.
  
• Látið engiferið liggja í könnuni í um 30 mínútur. Geymið í kæli ef þið viljið drykkinn kaldan.
  
• Fjarlægið engiferið og hrærið vel í drykknum.
  
  

Prenta þessa uppskrift     -     Senda þessa uppskrift

Þessi kemur manni af stað á morgnana. Það er smá leyniinnihald í uppskriftinni en það er sæt kartafla! Það er gaman að bjóða gestum upp á þennan drykk og leyfa þeim að geta upp á innihaldinu. Ég get lofað ykkur að engum dettur í hug sæt kartafla! Nauðsynlegt er að nota safapressu fyrir þessa uppskrift. Sæt kartafla er það grænmeti sem hvað oftast gleymist þegar talað er um ofurhollt grænmeti. Hún er stútfull af andoxunarefnum og er talin hafa góð áhrif á blóðsykurinn (og jafnvel lækka insúlínmótstöðu hjá sykursjúkum). Það´er mikið af A og C vítamínum í sætum kartöflum ásamt fjölmörgum öðrum vítamínum og öðru góðu fyrir okkur.
 
Hressandi morgundrykkur með sætri kartöflu
Fyrir 2

• Safi af einni nýkreistri appelsínu (einnig má nota góðan, hreinan appelsínusafa)
  
• 1 gulrót
  
• 1 sæt kartafla, stór
  
• 1 epli
  
  Aðferð:
  
• Skrælið kartöfluna.
  
• Setjið allt í safapressu.
  
• Berið fram í háum glösum með klökum.
  
  
• Gott er að nota peru á móti eplinu en það þarf samt ekki.
  
• Gætið þess að nota hart og safaríkt epli. Ekki er gott að nota mjúk né of súr epli.

Prenta þessa uppskrift     -     Senda þessa uppskrift

Ég fékk svona latte fyrst á kaffihúsi sem heitir Englen í Árhúsum sumarið 2006. Setið var úti í ógnarhita í garðinum bak við kaffihúsið. Freysi vinur okkar sagði rogginn að hann gæti búið til álíka gott heima hjá sér en ég var nú ekki svo tilbúin að trúa honum. Pressan á honum var því mikill er heim var komið. En viti menn, þetta tókst hjá stráknum! Danska mjólkin er reyndar mögnuð og ég fæ ekki sömu áferð á mjólkina í Englandi nema með því að nota gerilsneydda mjólk (g-mjólk). Ég hef ekki prófað með íslenskri mjólk reyndar. Starbucks má vara sig sko með sinn Frappuchino he he. Ég hef notað soyamjólk líka og hún er allt í lagi en hún freyðir reyndar lítið.
 
Íslatte að hætti Freysa Í Árhúsum
Fyrir 2

• 1,5-2 dl koffeinlaust kaffi (venjulegt fyrir þá sem vilja)
  
• 2 dl léttmjólk. Soyamjólk má nota en hún freyðir ekki mikið
  
• 4 msk hreint hlynsíróp eða sykurlaust síróp frá Da Vinci
  
• Nokkrir klakar
  
  Aðferð:
  
• Lagið kaffið, hafið það frekar sterkt (setjið til hliðar).
  
• Setjið klakana í blandara og blandið mjög vel.
  
• Blandið restinni útí (nema kaffinu) og blandið á fullum hraða í nokkrar mínútur eða þangað til mjólkurblandan er orðin silkimjúk og rjómakennd og farin að freyða vel.
  
• Blandið einum klaka til viðbótar út í og setjið á fullan hraða.
  
• Hellið mjólkinni í há glös (um tvo þriðju hluta glassins). Passið að þykki hlutinn (froðan) fari líka ofan í glösin.
  
• Hellið kaffinu varlega í mjórri bunu ofan á froðuna í hvoru glasi.
  
• Bætið 2 klökum út í hvort glas.
  
• Berið fram strax.
  
  
• Fyrir hressandi mjólkurdrykk má blanda saman 2 dl léttmjólk eða soyamjólk, 1 msk hreint hlynsírópi og fullt af klökum. Klakarnir eru blandaðir fyrst og hinu blandað saman saman við á mesta hraða í um 2 mínútur. Borið fram ískalt

Prenta þessa uppskrift     -     Senda þessa uppskrift

Þessi drykkur er fullur af próteinum og vítamínum og er upplagður eftir ræktina eða í eftirmiðdaginn þegar mann vantar orkuskot. Þessi drykkur hentar vel fyrir þá sem eru með mjólkuróþol en einnig þeim sem eru jurtaætur (enska: vegan), þá myndu þeir reyndar ekki nota hunang heldur nota t.d. hlynsíróp eða byggmaltsíróp!
 
Jarðarberja- og banana tofudrykkur
Fyrir 1-2

• 10-15 íslensk jarðarber
  
• 1-2 meðalstórir, vel þroskaðir bananar
  
• 1-2 dl hreinn appelsínusafi (ef þið viljið þynnri drykk, bætið þá meiri appelsínusafa við)
  
• 2-3 msk hreint, hlynsíróp (enska: maple syrup) eða acacia hunang
  
• 300 gr mjúkt tofu (smooth ekki firm)
  
  Aðferð:
  
• Setjið jarðarberin og appelsínusafann í matvinnsluvél og maukið vel.
  
• Blandið bönununum saman við.
  
• Bætið tofuinu við og blandið vel.
  
• Smakkið til með hlynsírópi (eða hunangi).
  
  
• Það má vel nota ab mjólk eða skyr í staðinn fyrir tofu en prófið endilega tofuið, það finnst ekkert bragð af því, gerir drykkinn bara skemmtilega þykkan. Ef notuð er ab mjólk verður drykkurinn þynnri.

Prenta þessa uppskrift     -     Senda þessa uppskrift

Sumardrykkur, fullur af vítamínum!!!
 
Jarðarberjahristingur
Fyrir 2

• 250 gr jarðarber, fersk eða frosin
  
• 1-2 vel þroskaðir bananar
  
• 100 ml sojamjólk eða undanrenna (einnig má nota hrísmjólk, haframjólk eða möndlumjólk)
  
• 1 msk agavesíróp ef jarðarberin eru ekki nógu sæt
  
  
• Setjið jarðarberin í blandara og hellið undanrennu eða sojamjólkinni út í. Ef berin eru frosin, látið þau þá standa í nokkrar mínútur í mjólkinni til að þau þiðni aðeins, annars er hætta á að blandarinn skemmist.
  
• Bætið bönunum og agavesírópinu saman við og blandið vel.
  
• Berið fram kalt.
  
  

Prenta þessa uppskrift     -     Senda þessa uppskrift

Þurrkaðar aprikósur innihalda helling af járni og appelsínusafinn hjálpar til við upptöku járnsins í líkamanum. Ég get svo svarið fyrir það að eftir að ég drakk þennan fína drykk hresstist ég við til muna…en kannski er það ímyndun (eða óskhyggja). Hann er allavega mjög bragðgóður og hollur og inniheldur C vítamín og trefjar sem halda meltingunni í lagi, fólinsýrur (sem er gott fyrir ófrískar konur) og A vítamín sem passar upp á sjónina okkar.
 
Járnríkur aprikósudrykkur
Fyrir 1-2

• 150 ml ferskur greipaldinsafi (úr um 2 stórum greipaldin)
  
• 150 ml appelsínusafi, ferskur
  
• 4-5 þurrkaðar aprikósur (þessar dökkbrúnu, ekki þessar appelsínugulu)
  
• Smá klípa múskat (enska: nutmeg)
  
• 2 tsk agavesíróp (eða Acacia hunang)
  
• Nokkrir ísmolar
  
  Aðferð:
  
• Látið apríkósurnar liggja í heitu vatni í um 30 mínútur.
  
• Setjið ísmolana í blandara ásamt smá slettu af appelsínusafanum. Blandið vel.
  
• Hellið vatninu frá aprikósunum (ekki notað).
  
• Setjið aprikósurnar út í blandarann ásamt agavesírópinu og smá slettu af greipaldinsafanum.
  
• Blandið mjög vel eða í allt að 1 mínútu.
  
• Hellið afgangnum af safanum út í blandarann ásamt múskatinu.
  
• Blandið á hæsta styrk í um 1 mínútu.
  
• Berið fram strax.
  
  
• Einnig má nota lífrænt framleidda aprikósusultu án viðbætts sykurs í staðinn fyrir þurrkuðu aprikósurnar.

Prenta þessa uppskrift     -     Senda þessa uppskrift

Ég er sko ekkert að ýkja með því að skíra þennan drykk vítamíndrykk því hann er stútfullur af hollustu. Ég ætti kannski að skíra þennan drykk frekar konudrykk þar sem hann er sérstaklega góður fyrir konur! Þið getið annað hvort búið til ykkar eiginn safa í djúspressu (sem er auðvitað best) en það næst besta væri að kaupa lífrænt framleidda safa í heilsubúð og blanda svo saman í blandara. Rauðrófusafinn er mjög járnríkur og ásamt appelsínusafanum gerir drykkinn súper járnríkann. Rauðrófusafi er líka góður til að hreinsa lifrina og meltingarfærin og inniheldur fólin sem er gott fyrir ófrískar konur. Ekkert grænmeti og enginn ávöxtur inniheldur jafn mikið af andoxunarefnum og bláber. Þau hjálpa til við að sporna gegn alls kyns sjúkdómum, þar með talið hjartasjúkdómum og krabbameini. Perur og ananas hjálpa til við að hreinsa innyflin sem og meltingarfærin. Bananar gefa manni góða orku og innihalda allar 8 af þeim aminósýrum sem líkaminn getur ekki framleitt sjálfur. Það væri hreinlega vitleysa að byrja daginn ekki á þessum drykk! Ég miða uppskriftina við blandara.
 
Járnríkur og hreinsandi vítamíndrykkur
Fyrir 2

• 1 vel þroskuð pera, lífrænt ræktuð (þessar sem eru óreglulegar í laginu, ljósgular með þunnu hýði)
  
• 1 lítill vel þroskaður banani
  
• 25 ml hreinn rauðrófusafi (enska: betroot juice)
  
• 100 ml hreinn ananassafi
  
• 1 lúka bláber
  
• 25 ml hreinn appelsínusafi
  
  Aðferð:
  
• Maukið bananann og peruna í blandara ásamt appelsínusafanum.
  
• Bætið bláberjum út í og blandið mjög vel.
  
• Bætið rauðrófusafanum og ananassafanum út í og blandið áfram.
  
• Berið fram strax.
  
  
• Nota má eplasafa í stað ananassafans

Prenta þessa uppskrift     -     Senda þessa uppskrift

Ég smakkaði í fyrsta skipti jólaglögg (óáfenga að sjálfsögðu) í jólaboði hjá yfirmanni mínum í verslun sem ég vann í með skóla í mörg ár. Ég gleymi því ekki hvað mér fannst hún góð og eitthvað svo "traustvekjandi", að halda utan um heitan bollann og finna kanellyktina stíga upp í nef. Þessi glögg er það góð að mig langar alltaf upp í sófa, undir teppi með bók þegar ég bý hana til (bara um jól auðvitað). Það besta er, að glöggin er auðvitað óáfeng og pakkfull af C vítamínum og andoxunarefnum og því verulega holl. Það má að sjálfsögðu sletta rauðvíni út í (og auka þar með andoxunaráhrifin) ef maður vill. Svo er glöggin frábær ef maður er með blöðrubólgu....og myndi þá jafnvel kallast blöðrubólguglögg... en það er nú kannski önnur saga!
 
Jólaglögg (óáfengt)
Fyrir 2-3

• 1/2 lítri hreinn trönuberjasafi (enska: cranberry juice)
  
• 1/2 lítri hreinn eplasafi
  
• 1 lófafylli heilar möndlur
  
• 1 lófafylli rúsínur
  
• 2 kanelstangir
  
• 4 negulnaglar
  
• 1 tsk agavesíróp (einnig má nota rapadura hrásykur)
  
• Safi úr 1/2 sítrónu
  
  Aðferð:
  
• Setjið allt nema sítrónu, möndlur og rúsínur í pott og sjóðið í um 5-10 mínútur.
  
• Takið þá negulnaglana og kanelstangirnar úr og setja safann af sítrónunni út í.
  
• Setjið möndlur og rúsínur út í.
  
  
• Mér finnst allt í lagi þó að negulnaglarnir og kanilstangirnar fái að vera lengur en sumum finnst það kannski of sterkt bragð.
  
• Ekki láta rúsínurnar og möndlurnar liggja mjög lengi í pottinum (setjið frekar oftar út í) nema þær megi verða mjög mjúkar. Sumum finnst það allt í lagi en öðrum finnst það ógirnilegt.

Prenta þessa uppskrift     -     Senda þessa uppskrift

Þegar Jóhannes smakkaði þennan drykk sagði hann: "Þennan drykk væri ég til í að kaupa". Svo sem gott að fá góð viðbrögð og allt það en hvað með hinar tæpar fjögur hundruð uppskriftirnar á vefnum mínum sem hann hefur þurft að smakka (og ekki boðist til að kaupa)? Makes you wonder!!! Nú fer ég að rukka gaurinn sko, hmmm. Allavega, hvort sem hann er til sölu eða ekki er þetta ferskur, hreinsandi og nærandi drykkur, yfirfullur af C vítamíni. Best er að nota safapressu fyrir safann.
 
Kiwi- og límónusafi
Fyrir 2

• 3 kiwi, afhýdd
  
• 2 lúkur græn vínber
  
• 1 epli
  
• Safi úr einni límónu
  
  Aðferð:
  
• Setjið eplið og vínberin í safapressu.
  
• Setjið kiwiið í blandara og blandið í 2 sekúndur (steinarnir mega ekki maukast í sundur því þá verður drykkurinn bitur á bragðið).
  
• Bætið límónusafanum út í.
  
• Setjið epla- og vínberjsafann út í blandarann.
  
• Blandið í aðrar 2 sekúndur og berið fram.
  
  

Prenta þessa uppskrift     -     Senda þessa uppskrift

Bara svona tilraun einn laugardaginn með ávexti úr ísskápnum. Saðsamur og hollur drykkur, fullur af vítamínum og skemmtilega grænn á litinn.
 
Kiwi-og bananadrykkur
Fyrir 2

• 1 vel þroskað kiwi
  
• 1 dl hrein jógúrt eða soyajógúrt
  
• 1 vel þroskaður banani
  
• 1/2 dl appelsínusafi, hreinn
  
• 1/2 dl undanrenna
  
• Öllu blandað saman í blandara og borið fram í háum glösum
  
  
  
• Ef kiwiið er ekki nógu vel þroskað, er ágætt að setja eina msk af agavesírópi út í drykkinn svo hann verði ekki súr.
  
• Gætið þess að blanda drykkinn ekki mjög lengi því ef steinarnir í kiwiinu fara að brotna gæti drykkurinn orðið bitur á bragðið.

Prenta þessa uppskrift     -     Senda þessa uppskrift

Ferskur og frísklegur haustdrykkur, fullur af andoxunarefnum úr dökkbláa hýði krækiberjanna en einnig eru krækiber full af trefjum og afar járnrík. Ég hjálpaði svo aðeins upptöku járnsins með því að bæta appelsínusafa í drykkinn. Ef ykkur finnst engifer ekki gott má sleppa því. Krækiber fá ekki alltaf uppreisn æru því yfirleitt eru þau bara nefnd í sambandi við saft og hlaup en fátt annað. Hér njóta krækiberin sín til fulls, óbreytt frá náttúrunnar hendi (nema maukuð).
 
Krækiberja- og engiferdrykkur
Fyrir 2

• 100 ml appelsínusafi (meira eftir smekk)
  
• 1 cm. biti af fersku engiferi
  
• 2 lúkur krækiber
  
• 1 banani, vel þroskaður eða pera
  
• 1 tsk agavesíróp (má sleppa)
  
• 4 ísmolar
  
  Aðferð:
  
• Blandið banana eða peru ásamt appelsínusafa í blandara.
  
• Rífið engiferið á rifjárni yfir blandaranum þannig að safinn leki ofan í.
  
• Setjið krækiberin út í ásamt agavesírópi ef þið viljið.
  
• Malið í nokkrar sekúndur.
  
• Ef þið viljið drykkinn vel fjólubláan, látið hann þá standa í blandaranum í um 30 mínútur.
  
• Bætið ísmolum út í og blandið vel.
  
• Hellið í 2 glös.
  
  
• Sigta má hratið og hýðið frá í sigti en í hýðinu er þó afar mikið af andoxunarefnum svo endilega drekkið það með.

Prenta þessa uppskrift     -     Senda þessa uppskrift

Upplagt að búa til þennan drykk þegar maður á mangó sem er alveg að renna út á tíma! Þessi drykkur er mjög líkur Mangó- og hnetusmjörsdrykknum hér á vefnum en með appelsínum í staðinn fyrir banana og með viðbættum appelsínusafa
 
Mango- og appelsínudrykkur
Fyrir 2 stór glös

• 1 mangó, mjög vel þroskað, skorið í grófa bita
  
• 1/2 appelsína, afhýdd og rifin í nokkra bita/báta
  
• 1 dl appelsínusafi
  
• 1 dl undanrenna
  
• 1 msk hnetusmjör (án viðbætts sykurs)
  
  
• Blandið öllu saman í matvinnsluvél og hellið í glös
  
• Bætið klaka saman við ef þið viljið og ef matvinnsluvélin ykkar þolir það
  
  
• Fyrir þá sem eru með mjólkuróþol þá má nota soyamjólk eða jafnvel tófú.
  
• Einnig má nota skyr.is vanilluskyr

Prenta þessa uppskrift     -     Senda þessa uppskrift

Varð að henda þessari uppskrift inn. Ég var að nota mango og banana sem var á síðasta snúningi og úr varð alveg voðalega góður drykkur. Hann er fullur af hollum vítamínum, upplagður eftir ræktina eða sem morgundrykkur. Ekki vera hrædd við að nota hnetusmjör því það inniheldur holla og nauðsynlega fitu og í litlu magni er það afar sniðugt (og svooooo gott). Munið bara að kaupa lífrænt framleitt hnetusmjör án viðbætts sykurs.
 
Mango- og hnetusmjörsdrykkur
Fyrir 2

• 1 vel þroskað, frekar stórt mangó, skorið í grófa bita
  
• 2 vel þroskaðir bananar, skornir í grófa bita
  
• 3-4 dl sojamjólk eða undanrenna(ég vil hafa drykkinn þykkari en þynnri)
  
• 1-2 tsk kúfullar af hnetusmjöri (án viðbætts sykurs)
  
• Nokkrir ísmolar.
  
  Aðferð:
  
• Setjið ísmola í blandara ásamt smá slettu af sojamjólkinni. Blandið í nokkrar sekúndur.
  
• Setjið allt í blandarann og blandið áfram (í um 30-60 sekúndur á fullum krafti).
  
• Berið fram strax.
  
  
• Það er gott að geyma mangóið í kæli áður en það er sett í drykkinn því þá verður drykkurinn enn þá kaldari.
  
• Gott er að setja smá klípu af kanil í drykkinn til tilbreytingar.
  
• Einnig má nota hrísmjólk eða haframjólk í drykkinn.

Prenta þessa uppskrift     -     Senda þessa uppskrift

Hreinsandi og nærandi drykkur, fullur af vítamínum. Upplagður í morgunsárið eða að loknum krefjandi vinnudegi þegar mann langar í eitthvað sætt... en hollt.
 
Melónu- og jógúrtdrykkur
Fyrir 2

• Nokkrir klakar
  
• 1/2 þroskuð kantalópu melóna (þær eru bleik-appelsínugular að innan).
  
• 1 vel þroskaður banani eða pera.
  
• 1 dl hrein jógúrt (soya eða venjulegt, einnig má nota AB mjólk)
  
• 1 dl hreinn appelsínu eða eplasafi
  
  Aðferð:
  
• Blandið klakana fyrst.
  
• Skerið melónuna í bita og bætið út í blandarann.
  
• Skerið bananann eða peruna í bita og bætið út í.
  
• Bætið appelsínusafanum og jógúrtinni út í.
  
• Blandið öllu vel saman,
  
  
• Einnig er gott að nota hreinan ananassafa.

Prenta þessa uppskrift     -     Senda þessa uppskrift

Þessi drykkur er einstaklega nærandi og hreinsandi. Góður fyrir sál og líkama!
 
Melónu- og perudrykkur
Fyrir 2

• Nokkrir klakar
  
• 1/2 vel þroskuð galia melóna (þessar sem eru gular að innan). Það má líka nota Cantaloupe melónu (þær eru grænar að innan)
  
• 1 vel þroskuð pera (þessar sem eru lífrænt ræktaðar, óreglulegar í laginu og með þunnu hýði)
  
• 200 ml hreinn ananassafi (eða eplasafi)
  
  Aðferð:
  
• Blandið klakana fyrst.
  
• Skerið melónuna í bita og bætið út í.
  
• Skerið peruna í bita og bætið út í.
  
• Hellið ananassafanum eða eplasafanum saman við.
  
• Blandið öllu vel saman.
  
• Berið fram strax.
  
  
• Það er líka gott að bæta 1/2 banana út í ef maður vill breyta til.

Prenta þessa uppskrift     -     Senda þessa uppskrift

Þetta er hollur og næringarríkur drykkur sem hentar vel sem létt máltíð á daginn. Meginuppistaðan er "kremið" af gulrótarkökunni hollu sem ég baka stundum og það er semsagt enginn sykur og engin fita í þessum drykk!
 
Mjólkurhristingur með döðlum og aprikósum
Fyrir 2

• 100 gr skyr
  
• 1/2 tsk vanilludropar eða vanilluduft
  
• 40 gr döðlur
  
• 40 gr aprikósur (ósúlfúríseraðar, þær eru dökkbrúnar að lit)
  
• 1/2 dl appelsínusafi, hreinn
  
• 1/4 tsk kanill
  
• 1-2 dl undanrenna
  
• 220 ml hrein jógúrt
  
• 1 msk agavesíróp
  
  Aðferð:
  
  
• Leggið döðlurnar & aprikósurnar í bleyti í sjóðandi vatn í ca 10 mín
  
• Hellið öllu vatninu af.
  
• Maukið allt saman í matvinnsluvél og hellið í há glös, dreifið pínu meiri kanil yfir ef ykkur finnst það gott.
  
  

Prenta þessa uppskrift     -     Senda þessa uppskrift

Þessi drykkur er beint úr bókinni Innocent smoothie recipe book frá Innocent fyrirtækinu hér í London sem gerir bestu smoothie drykki í heimi (að mínu mati!!). Fyrirtækið er dásamlegt því það hugsar ekki bara um gróða og skjótan pening heldur greiða þeir 10% af öllum gróða beint til bænda og þeirra sem rækta það sem fyrirtækið þarf. Þeir styðja líka alls kyns verkefni í þróunarlöndum og skapa þar vinnu og sanngjarna viðskiptahætti. Allt hráefni er lífrænt ræktað. Fyrir þá sem fíla ekki hafragrautinn á morgnana þá er þessi drykkur fullkominn því í honum eru hafrar, döðlur, banani, hunang og jógúrt. Fullkomin byrjun á deginum.
 
Morgunverður í glasi
Fyrir 2

• Nokkrir klakar
  
• 5 döðlur (þessar mjúku, lífrænt ræktuðu)
  
• 1/2 banani
  
• 125 ml hreinn eplasafi
  
• 2 tsk Acacia hunang (eða annað fljótandi hunang)
  
• 200 ml hrein jógúrt (eða soyajógúrt). Einnig má nota AB mjólk
  
• 20 gr haframjöl
  
  Aðferð:
  
• Blandið klakana fyrst.
  
• Bætið döðlunum og eplasafanum út í og blandið í nokkrar mínútur.
  
• Bætið banananum og jógúrtinu saman við og blandið vel.
  
• Bætið haframjölinu og hunanginu saman við og blandið vel.
  
• Berið fram strax.
  
  
• Í stað hunangs má nota hreint hlynsíróp (enska: maple syrup) eða agavesíróp.
  
• Fyrir þá sem eru jurtaætur (enska: vegan) má nota soyajógúrt og hlynsíróp í stað venjulega jógúrtsins og hunangsins.

Prenta þessa uppskrift     -     Senda þessa uppskrift

Þessi uppskrift er úr bókinni Lean Food sem er frá The Australian Women’s Weekly seríunni sem ég held mikið upp á. Meiriháttar sumardrykkur og einstaklega hollur því hann er góður fyrir meltinguna og er pakkfullur af C vítamínum og andoxunarefnum. Gætið þess bara að ávextirnir séu vel þroskaðir. Þennan drykk má gera að morgni og geyma í ísskáp yfir daginn sem er upplagt ef maður er til dæmis með boð síðar um daginn.

 
Myntu, kiwi og ananasdrykkur
Fyrir 4 (gerir 1 lítra)

• 300 gr ferskur ananas, vel þroskaður
  
• 3-4 kiwi, vel þroskuð (um 250 gr)
  
• Ein kúfull lúka fersk myntulauf
  
• 250 ml ferskur appelsínusafi
  
• 12 ísmolar
  
• Nokkur fersk myntublöð, söxuð
  
  Aðferð:
  
• Blandið ananasinn í blandara (eða matvinnsluvél) þangað til hann er orðinn að silkimjúku mauki. Setjið í skál.
  
• Blandið kiwiið og myntublöðin mjög vel en án þess að steinarnir í kiwiinu fari að merjast því þá getur drykkurinn orðinn rammur. Gott er að blanda í svona 5-7 sekúndur. Setjið í skál.
  
• Blandið ísmolana og appelsínusafann þangað til ísmolarnir eru orðnir að krapi.
  
• Setjið ananasinn og kiwi-myntublönduna út í blandarann ásamt ísmolunum og blandið vel.
  
• Hellið í karöflu.
  
• Geymið í ísskáp ef ekki á að bera drykkinn fram strax.
  
• Dreifið söxuðum myntublöðum yfir hvert glas áður en drykkurinn er borinn fram.
  
  
• Ef þið viljið mikið myntubragð má auka magn myntunnar um helming.
  

Prenta þessa uppskrift     -     Senda þessa uppskrift

Þetta er nú varla uppskrift, meira bara leiðbeiningar. Ég mæli með því að þið útbúið myntute enda fátt betra en myntute úr ferskum myntublöðum. Ef maður er með hálsbólgu og kvef er rosa gott að fá sér myntute með smá sítrónusafa og hunangi út í…læknar mann kannski ekki en myntan losar aðeins um í nefholinu og hunangið fer vel í hálsinn.
 
Myntute
Fyrir 2

• 2 kúfullar lúkur af ferskum myntublöðum (ég fjarlægi stilkana en það má sjóða þá með)
  
• 500 ml soðið vatn
  
• 2 tsk agavesíróp eða Acacia hunang ef þið viljið sætt te
  
  Aðferð:
  
• Sjóðið vatnið.
  
• Hellið vatninu yfir myntulaufin og látið standa í um 5 mínútur.
  
• Sigtið myntulaufin frá og hellið vökvanum í 2 bolla.
  
• Bætið agavesírópi eða hunangi út í ef þið viljið sætt te.
  
  

Prenta þessa uppskrift     -     Senda þessa uppskrift

Þessi uppskrift kemur úr bók sem ég á sem heitir Healing Drinks og er hreint út sagt frábær. Möndlur eru algjör undraafurð en í möndlum leynist mikið kalk, E vítamín, magnesíum, B2 vítamín og margt fleira. Þær eru einnig próteinríkar. Bæði magnesium og E vítamín stuðla að heilbrigðu hjarta og æðarkerfi. Ég notaði soyamjólk í staðinn fyrir hrísmjólk en nota má hvoru tveggja eða jafnvel haframjólk, möndlumjólk eða það sem hentar best. Fyrir þá sem eru sérstaklega að styrkja beinin væri möndlumjólk góður kostur. Drykkurinn er bæði léttur og frískur og þeir sem hafa mjólkuróþol geta drukkið hann með góðri samvisku.
 
Möndlu-döðlu- og engiferdrykkur
Fyrir 2

• 300 ml soyamjólk, hrísmjólk eða möndlumjólk
  
• 100 gr döðlur
  
• 1 msk möndluduft (malaðar möndlur)
  
• 1 tsk malað engifer eða 1/2 tsk ferskt, saxað mjög fínt
  
  Aðferð:
  
• Leggið döðlurnar í sjóðandi vatn í um 20 mínútur.
  
• Hellið vatninu af og setjið döðlurnar í blandara.
  
• Bætið 100 ml af vökvanum saman við og blandið vel eða í nokkrar mínútur.
  
• Bætið möndluduftinu og engiferinu saman við ásamt afgangnum af mjólkinni.
  
• Blandið vel.
  
• Berið fram strax í háum glösum
  
• Ef mikið af döðlum er í botninum má dreifa þeim jafnt á milli glasanna.
  
  
  

Prenta þessa uppskrift     -     Senda þessa uppskrift

Perur eru trefjaríkar og fullar af C og K vítamínum. Fæstir vita að perur er sá ávöxtur sem veldur hvað minnsta fæðuofnæmi af öllum ávöxtum. Þess vegna er hann talinn hentugur ávöxtur fyrir ungabörn. Í nektarínum er mikið af A vítamíni og í bönunum er einnig A vítamín sem og Kalíum (enska: Potassium) sem er mikilvægt í baráttu við of háan blóðþrýsting. Mikið er af steinefnum í bæði perum og nektarínum og þessir ávextir innihalda einnig járn og kalk ásamt því að virka hreinsandi á innvolsið í okkur. Þessi drykkur er hreinlega yfirfullur af vítamínum og hollustu!!
 
Nektarínu- og perudrykkur
Fyrir 2

• Nokkrir klakar
  
• 1 vel þroskuð nektarína (enska: nectarine)
  
• 1 vel þroskuð pera (lífrænt ræktuð, þessar sem eru óreglulegar í laginu, með þunnu hýði)
  
• 1 vel þroskaður, stór banani
  
• 1 dl undanrenna eða soyamjólk
  
  Aðferð:
  
• Blandið klakana fyrst.
  
• Skerið banana, nektarínu og peru gróft og bætið út í ásamt smá slettu af mjólkinni.
  
• Bætið meira við af mjólk eftir smekk.
  
• Ef drykkurinn er ekki nægilega sætur má bæta við smá slettu af hreinu hlynsírópi (enska: maple syrup) eða agavesírópi.
  
  
  
• Það má sleppa mjólkinni og nota t.d. appelsínusafa í staðinn.
  
• Til að búa til góðan krapís má frysta þessa blöndu í um 3 tíma og skella svo í blandarann.

Prenta þessa uppskrift     -     Senda þessa uppskrift

Ég átti papaya sem var að skemmast, og ákvað að skera það í bita og frysta það, var reyndar ekki viss um hvort yrði í lagi með það en ákvað að prófa. Ég ákvað að prófa papayað í "hristing" og það var rosalega gott, næringarríkt og frískandi, næstum eins og "hollt sjeik"!!!
 
Papaya-og bananahristingur
Fyrir 2

• Miðlungsstórt papaya, skorið í bita og fryst
  
• 3 miðlungsstórir bananar, vel þroskaðir
  
• 125 ml hreint skyr eða AB mjólk
  
• 1 msk agavesíróp eða hreint hlynsíróp (enska: maple syrup)
  
• 2 dl hreinn appelsínusafi
  
• 1 dl undanrenna
  
  Aðferð:
  
• Blandið öllu saman í blandara og berið fram strax, gjarnan með röri og skreytt með appelsínusneið á glasbrúninni.
  
  

Prenta þessa uppskrift     -     Senda þessa uppskrift

Þessi safi er afar hreinsandi og vítamínríkur þar sem perur innihalda helling af c vítamíni. Til dæmis inniheldur ein pera 11% af ráðlögðum dagskammti af c vítamíni ásamt álíka af kopar. Perur innihalda einnig mikið af trefjum (þó aðallega í hýðinu) sem og andoxunarefnum. Engiferið er gott fyrir meltinguna og sumir segja engifer hafi bólgueyðandi áhrif hjá þeim sem hafa gigt. Það er einnig talið hafa hamlandi áhrif gegn krabbameinsfrumum. Engifer er líka mjög gott fyrir ónæmiskerfið og hjálpar okkur þegar við erum með kvef og hálsbólgu. Það er að lokum afar gott fyrir þá sem þjást af ógleði, t.d. ófrískar konur. Sem sagt algjör galdradrykkur og er einstaklega frísklegur og góður.
Þennan drykk má gera í safapressu en ef þið eigið ekki slíka getið þið maukað perurnar í matvinnsluvél og rifið engiferið mjög smátt út í. Rífið fyrst pínulítið og bætið svo út í ef þið viljið sterkara engiferbragð. Drykkurinn verður þó mun þykkari en ef hann fer í gegnum safapressu og þið getið þynnt með smá epla- eða appelsínusafa.
 
Peru- og engifersafi
Fyrir 2

• 2 vel þroskaðar perur
  
• 1 lítill bútur af fersku engifer (eins og þumall að stærð)
  
  Aðferð:
  
• Setjið perurnar í safapressu.
  
• Bætið engiferinu saman við.
  
• Berið fram ískalt.
  
  

Prenta þessa uppskrift     -     Senda þessa uppskrift

Frábær morgundrykkur, mátulega sætur og afar saðsamur. Gefið ykkur nokkra tíma fyrirvara áður en þið gerið drykkinn því það er gott að mýkja pistachiohneturnar upp í vatni.
 
Pistachiomjólk
Fyrir 2

• 4 ísmolar
  
• 50 gr pistachiohnetur, ósaltaðar
  
• 1 vel þroskaður banani
  
• 1 msk agavesíróp
  
• 300 ml sojamjólk (einnig má nota hrísmjólk, haframjólk eða undanrennu)
  
  Aðferð:
  
• Hellið sjóðandi heitu vatni yfir pistachiohneturnar og látið þær liggja í 2-3 tíma.
  
• Fjarlægið brúna hýðið af hnetunum ef eitthvað er eftir (hægt að nudda af með fingrunum).
  
• Þegar hneturnar eru orðnar mjúkar og lausar við hýði, setjið þær þá í matvinnsluvél ásamt 50 ml af sojamjólk og malið þangað til pistachiohneturnar eru orðnar að mauki. Því meira malaðar því betri og mýkri verður drykkurinn.
  
• Setjið ísmolana í blandara ásamt 50 ml af soyamjólkinni og malið vel.
  
• Setjið pistachiomaukið og allt annað innihald út í blandarann og blandið í 2-3 mínútur af fullum krafti.
  
• Berið fram strax.
  
  

Prenta þessa uppskrift     -     Senda þessa uppskrift

Þessi drykkur er mjög próteinríkur og hollur fyrir hjartað sem og beinin. Upplagður að morgni eftir ræktina, sérstaklega fyrir þá sem vilja ekki neinar mjólkurvörur. Best er að nota góða matvinnsluvél eða kryddmalara til að hneturnar malist sem best því þannig er drykkurinn bestur. Drykkurinn inniheldur nokkuð mikla fitu svo það er ágætt að drekka hann ekki á hverjum morgni en einnig getur maður líka minnkað skammtinn og drukkið minna í einu! Hafið þó í huga að fitan er holl þ.e. hún samanstendur af einómettuðu fitusýrum sem eru góðar fyrir hjarta og æðar.
 
Prótein- og kalkrík hnetu- og möndlumjólk
Fyrir 1-2

• 25 gr möndlur (einnig má nota möndlumauk- almond butter)
  
• 25 gr pecanhnetur
  
• 1 msk graskersfræ (má sleppa)
  
• 300 ml kalt vatn, hrísmjólk eða soyamjólk
  
• 1 tsk agavesíróp
  
• 1/4 tsk kanill (meira eftir smekk)
  
  Aðferð:
  
• Malið möndlurnar, pecanhneturnar og graskersfræin mjög fínt í matvinnsluvél eða blandara (Einnig má mala hnetur o.fl. í hreinum kryddmalara eða kaffibaunamalara).
  
• Hellið vökvanum út í matvinnsluvélina eða blandarann ásamt agavesírópinu.
  
• Setjið kanilinn út í og blandið vel (í a.m.k. 1 mínútu).
  
• Berið fram strax.
  
  

Prenta þessa uppskrift     -     Senda þessa uppskrift

Ég veit að drykkurinn lítur ekki sérstaklega girnilega út svona ljósbrúnn en trúið mér...hann er dásamlega góður og fyrirgefst alveg ljótleikinn. Drykkurinn er ofurhollur, fullur af trefjum, C vítamíni, andoxunerefnum o.fl. Einnig er hann góður fyrir blóðrás og hjartað. Rabarbari á að minnka hættu á myndun krabbameinsfruma og á að vera góður við bólgum í liðum, ofnæmum og til að lækka háan blóðþrýsting. Drykkurinn er mildur, sætur og passar eiginlega á hvaða tíma dags sem er, fínn að morgni en líka góður eftir vinnu eða ræktina. Það má sleppa því að sjóða döðlur og rabarbara og láta döðlurnar liggja í bleyti í sólarhring og mauka svo vel með rabarbaranum.

 
Rabarbara- og bananadrykkur
Fyrir 2

• 180 gr döðlur
  
• 120 gr rabarbari
  
• 100 ml appelsínusafi, hreinn
  
• 1 stór banani, vel þroskaður
  
• 150 ml sojamjólk (einnig má nota haframjólk, möndlumjólk hrísmjólk eða undanrennu)
  
  Aðferð:
  
• Setjið döðlur, rabarbara og 50 ml af appelsínusafa í pott.
  
• Sjóðið í 10 mínútur eða þangað til hægt er að mauka döðlurnar og rabarbarann með gaffli.
  
• Kælið vel.
  
• Setjið rabarbara- og döðlumaukið í blandara.
  
• Bætið banana og afganginum (50 ml) af appelsínusafa út í.
  
• Blandið vel.
  
• Bætið mjólkinni saman við og blandið þangað til vel maukað.
  
  
• Nota má eplasafa í staðinn fyrir appelsínusafa.

Prenta þessa uppskrift     -     Senda þessa uppskrift

Elva vinkona mín lagði til að ég prófaði þennan drykk en hann er úr bókinni Innocent Smoothie Recipe Book sem ég held mikið upp á. Við eigum báðar bókina en ég hafði aldrei prófað drykkinn. Þegar Elva gaf mér svo fullt af rabarbara gat ég ekki annað en prófað og sá ekki eftir því enda er drykkurinn ferskur og bragðgóður. Hann er líka meinhollur, fullur af A og C vítamínum, trefjum, andoxunarefnum o.fl. Jarðarber eru einnig svo góð fyrir heilsu augnanna og þau eiga einnig að hjálpa til við að sporna gegn gigt. Ég útbjó uppskriftina nánast alveg eftir þeirri upprunalegu en notaði agavesíróp í stað hunangs (því ég átti ekki hunang). Uppskriftin gaf einnig upp eplasafa úr safapressu en ég notaði lífrænt framleiddan eplasafa í staðinn.
 
Rabarbara- og jarðarberjadrykkur
Fyrir 2

• 1 stilkur rabarbari, þveginn og saxaður
  
• 6 jarðarber (frosin eða fersk)
  
• 4 msk AB mjólk (einnig má nota jógúrt/sojajógúrt)
  
• 1 tsk hunang (ég nota yfirleitt acacia hunang) eða agavesíróp
  
• 1 epli eða 125 ml hreinn eplasafi
  
  Aðferð:
  
• Ef þið notið safapressu, setjið eplið þá í gegnum hana.
  
• Setjið eplasafann í pott.
  
• Sjóðið rabarbarann í eplasafanum þangað til hann verður mjúkur (um 10 mínútur).
  
• Kælið vel.
  
• Setjið allt í blandara og setjið á hæstu stillingu í um 30 sekúndur.
  
• Setjið í tvö glös og geymið í ísskáp í um 30 mínútur þangað til drykkurinn verður kaldur.
  
• Ef þið hafið ekki tíma til að bíða eftir því að drykkurinn kólni setjið þá ísmola í blandarann áður en þið setjið drykkinn í glös. Blandið í nokkrar sekúndur.
  
  

Prenta þessa uppskrift     -     Senda þessa uppskrift

Nammi nammi. Það er fátt betra en hristingur (sjeik) á heitum sumardegi og þá er ég auðvitað að meina hollur hristingur. Sá hristingur sem þið getið keypt í ísbúðum og þess háttar (eða skyndibitastöðum) er hlaðinn sykri og fitu og maður ætti að forðast í lengstu lög að láta slíkt ofan í sig. Oft innihalda þeir fleiri hitaeiningar, sykur og fitu en nokkuð annað á matseðlinum. Þessi rabarbara- og jarðarberjahristingur er aftur á móti afar hollur og góður og inniheldur einómettaðar fitusýrur, trefjar, C vítamín og andoxunarefni. Athugið að leggja þarf cashewhneturnar í bleyti í sólarhring áður en hristingurinn er búinn til svo gefið ykkur góðan tíma. Það þarf 250 gr af ísnum fyrir hristinginn svo ef þið eigið hann til er nóg að bæta bara mjólkinni út í.
 
Rabarbara- og jarðarberjaíshristingur (sjeik)
Fyrir 2

• 50 gr cashewhnetur, sem búnar eru að liggja í bleyti í sólarhring
  
• 50 gr rabarbari
  
• 50 gr jarðarber (fersk eða frosin)
  
• 50 ml vatn
  
• 50 ml agavesíróp
  
• 50-100 ml sojamjólk (einnig má nota haframjólk, hrísmjólk, undanrennu eða möndlumjólk)
  
  Aðferð:
  
• Hellið vatninu af cashewhnetunum og setjið í matvinnsluvél. Blandið í 2 mínútur eða þangað til hneturnar eru orðnar vel maukaðar. Gott er að skafa hliðar matvinnsluvélarinnar nokkrum sinnum og blanda áfram.
  
• Hellið 100 ml af vatni út í ásamt helmingnum af agavesírópinu. Blandið í eina mínútu eða lengur eða þangað til blandan er eins og þykk mjólk að áferð. Mikilvægt er að hneturnar maukist vel.
  
• Setjið í skál og geymið í ísskápnum í klukkutíma.
  
• Skolið rabarbarann og skerið í grófar sneiðar.
  
• Setjið rabarbarann í matvinnsluvélina.
  
• Bætið jarðarberjunum út í ásamt afganginum af agavesírópinu.
  
• Blandið á fullum krafti í eina mínútu eða þangað til allt er vel maukað. Setjið í skál og geymið í ísskápnum í klukkutíma.
  
• Ef þið eigið ísvél, setjið þá cashewblönduna í ísvélina í um 30 mínútur. Bætið þá jarðarberjablöndunni saman við og látið vélina ganga í um eina mínútu.
  
• Fyrir þá sem eiga ekki ísvél þá þarf að setja cashewblönduna í stórt plastbox og hræra í blöndunni á um klukkutíma fresti í nokkra klukkutíma eða þangað til erfitt er orðið að hræra meira. Þegar cashewblandan er nánast alveg frosin, bætið þá jarðarberjablöndunni út í og hrærið nokkrum sinnum.
  
• Setjið í frystinn og frystið í nokkra klukkutíma.
  
• Setjið ísinn í blandara ásamt mjólkinni (byrjið með 50 ml og bætið svo meira út í eftir því hvað þið viljið hafa hristinginn þykkan).
  
• Berið fram ískalt, gjarnan með röri.
  
  

Prenta þessa uppskrift     -     Senda þessa uppskrift

Þessi er stútfullur af vítamínum og hollustu. Rauðrófur eru fullar af járni og gulrætur eru yfirfullar af A vítamíni (Beta Carotene) ásamt B1, B3, B6, fólinsýrum og Kalíum (Potassium), járni og svo mætti lengi telja. Gulrætur örva meltinguna og virka einnig hreinsandi á innvolsið í okkur. Sama má segja um engiferið og peruna. Eplið er nú bara til að geta sagt "epli á dag kemur heilsunni í lag" en það er samt voða gott í þennan safa! Hægt er að útbúa drykkinn án þess að eiga safapressu (kaupa þá rauðrófusafa, gulrótarsafa, eplasafa, perusafa og mauka engiferið sjálfur t.d. í matvinnsluvél) en alltaf er best að pressa ávextina sjálfur.

 
Rauðrófu- og gulrótarsafi
Fyrir 2

• 1 lítil rauðrófa
  
• 1 pera
  
• 1 epli
  
• 3 litlar gulrætur (eða 2 stórar)
  
• Lítill engiferbútur (um 1-2 cm)
  
  Aðferð:
  
• Skerið rauðrófuna í tvennt eða þrennt, setjið í safapressuna.
  
• Skrælið gulræturnar (eða setjið beint í safapressuna).
  
• Bætið engiferinu út í.
  
• Fræhreinsið peruna og eplið og bætið saman við.
  
• Berið fram strax.
  
  
• Nota má fleiri epli í stað perunnar.
  
  

Prenta þessa uppskrift     -     Senda þessa uppskrift

Ég fann þessa uppskrift aftan á einum drykk sem ég keypti frá Innocent hér í London og var einmitt detox drykkur. Þetta er eitt af mínum uppáhalds fyrirtækjum þ.e. þeir framleiða aðallega drykki og djúsa og eru umhverfisvænir, nota aðeins 100% lífrænt framleitt og ræktað hráefni, skipta ekki við framleiðendur sem eru siðferðilega ekki í lagi (t.d. að nota börn í þrælavinnu, láta fólk vinna á eitruðum ökrum o.s.frv.) svo ég kaupi vörur frá þeim með glöðu geði. Ef þið eruð á ferð í Bretlandi svipist þá um eftir þessum vörum. Þessi drykkur er svo sannarlega hollur því hann er pakkfullur af vítamínum. Rauðrófur innihalda náttúrulega litarefnið betacyanin sem hjálpa til við að sporna gegn krabbameini (sérstaklega ristilkrabbameini), hjartasjúkdómum og innihalda B vítamínið fólin sem er gott fyrir ófrískar konur að neyta því það hjálpar til við eðlilegan þroska fósturs. Þennan safa má gera í safapressu en einnig má kaupa alla safana í drykkinn og búa hann til þannig ef maður á ekki safapressu. Ég miða uppskriftina við blandara. Rauðrófusafa má yfirleitt finna í heilsuvörubúðum.
 
Rauðrófudetoxdrykkur
Fyrir 2

• 2 pressuð epli eða 200 ml eplasafi
  
• 1 pera (þessar lífrænt ræktuðu, ljósgulu, óreglulegu í laginu með þunna hýðinu)
  
• 1/2 maukaður banani
  
• 50 ml appelsínusafi
  
• 20 ml rauðrófusafi (enska: betroot juice)
  
• Smá engifer 1 cm. biti, rifinn á rifjárni
  
  Aðferð:
  
• Skerið peruna og bananann í bita og setjið í blandara ásamt appelsínusafanum. Blandið mjög vel.
  
• Setjið allt annað saman við og blandið vel.
  
• Berið fram strax.
  
  
• Nota má ananassafa í staðinn fyrir epli/eplasafa

Prenta þessa uppskrift     -     Senda þessa uppskrift

Þessi kemur beint af beljunni svo að segja eða réttara sagt úr bókinni Innocent smoothie recipe book: 57 1/2 recipes from our kitchen to yours. Þessi bók er ein af mínum uppáhaldsbókum. Þessi drykkur er bara hollusta út í eitt. Eitt svona glas á morgnana er góð byrjun á góðum degi. Rauðrófur eru fullar af járni og gulrætur innihalda A vítamín (Beta Carotene) ásamt B1, B3, B6, fólinsýrur og Kalíum (Potassium), járn og margt fleira gott fyrir okkur. Sellerí inniheldur mikið af K og C vítamínum sem hjálpa til við upptöku járnsins. Sellerí inniheldur líka efnið phalides sem er talið hjálpa til við að lækka blóðfitu og coumarins sem á að vera gagnlegt til að sporna við krabbameini. Það er svo mikið járn í drykknum að ef Drakúla væri grænmetisæta myndi hann sennilega drekka þennan safa (uppskriftin er samt ekki frá honum). Þennan safa er best að gera með safapressu þar sem erfitt er að fá hreinan sellerísafa. Annan safa í uppskriftinni er hægt að kaupa í heilsubúðum.
 
Sellerí- rauðrófu og gulrótarsafi
Fyrir 2

• 2 gulrætur
  
• 1 rauðrófa, meðalstór
  
• 1 sellerístilkur
  
• 1 epli
  
  Aðferð:
  
• Skerið í hæfilega stóra bita og setjið allt í safapressuna.
  
  
  

Prenta þessa uppskrift     -     Senda þessa uppskrift

Þetta te fékk ég á Zanzibar. Þar fórum ég og Jóhannes að skoða kryddskóg, svonefndur af því að í honum vaxa kryddjurtir eins og negull, kanill, kardimommur, vanilla, pipar, sítrónugras, turmeric, múskat og margt, margt fleira. Það eru nokkrir svona um Zanzibar ásamt kaffiskógum sem við skoðuðum líka. Að vera í svona kryddskógi er eins og að vera í ævintýri og maður trúir því varla að maður sé að horfa á vanillujurtina eða að maður hafi óþroskaða negulnagla í höndunum, að klóra börkinn af kaniltrénu o.s.frv. Maður nuddar blöðum kryddjurtanna á milli fingranna og búmm...kryddlyktin stígur upp eins og fyrir galdur. Í tæpum 40 stigum og steikjandi sól er ekkert skrýtið þó að skógurinn angi eins og kryddbúð. Dásamlegt. Í þessum skógi býr fólk sem vinnur við að rækta kryddplöntur og selja. Við vorum með leiðsögumann með okkur sem sýndi okkur alla töfra kryddanna og þegar við vorum alveg að verða búin í kryddferðinni (sem tók alveg 2 tíma) þá fór hann með okkur í hús þar sem kona kom með heitan vökva í bolla (bollann sem þið sjáið á myndinni). Fyrst fannst mér skrýtið að drekka heitan vökva í þessum hita en af því að við vorum farin að venjast hitanum vel eftir 3ja vikna veru í Afríku þá var þetta allt í lagi og meira en það. Drykkurinn var dásamlega ferskur. Aðeins heitt vatn, sítrónugras og hrásykur (ég nota agave síróp). Þennan drykk á ég eftir að gera oft, ekki síst á veturna.
 
Sítrónugraste úr kryddskóginum á Zanzibar
Fyrir 2

• Tveir stilkar sítrónugras (enska: lemon grass), saxaðir gróft
  
• 400 ml vatn
  
• 1-2 msk agavesíróp
  
  Aðferð:
  
• Sjóðið sítrónugrasið í vatninu í um 5 mínútur.
  
• Sigtið sítrónugrasvatnið í stóra mælikönnu. Hendið sítrónugrasinu.
  
• Blandið agavesírópinu út í eftir smekk.
  
• Berið fram heitt.
  
• Til að fá auka sítrusbragð má setja smá skvettu af límónu út í.
  
  

Prenta þessa uppskrift     -     Senda þessa uppskrift

Í rúmlega 40 stiga sátum við Jóhannes ásamt fleira fólki á Ginger sem er veitingastaður í bænum Jinja. Jinja er alveg við upptök Nílar í Uganda, þar sem Níl byrjar og Viktoríuvatn endar. Við vorum að bráðna, það var nánast óbærilegur hiti og við vorum að borða hádegismatinn á heitasta tíma dagsins. Maturinn á Ginger var frábær, meiriháttar blanda af afrískum og evrópskum mat og matseðillinn sérstakur. Það var eitt á matseðlinum sem vakti athygli okkar allra (svona miðað við ástandið á okkur) og það var Tropical Cooler. Í drykknum var meðal annars ísmolar, ananas (í Uganda er besti ananas í heimi) og kókosvatn. Okkur var lofað að ísmolarnir væru öruggir (þ.e. vatnið hreint) og að drykkurinn væri ÍSkaldur. Það var svo sannarlega tónlist í okkar eyrum. Eftir smástund komu þjónarnir með heila hrúgu af drykkjum á borðið okkar og þetta var svo sannarlega svalandi, suðrænt og frábært. Ekki skemmir fyrir að drykkurinn er afar hollur og vítamínríkur. Kókosvatn (vatnið úr óþroskaðri kókoshnetu inniheldur enga fitu, er hitaeiningasnautt en inniheldur kalk, magnesíum, potassíum og fleira sem er gott fyrir bein og taugar. Vissuð þið að vatn úr óþroskuðum kókoshnetum hefur verið notað í blóðgjafir t.d. í Afríku þar sem kókosvatnið er víst sambærilegur blóðvökvanum í okkur J Að drekka kókosvatn virkar á suma eins og að fá blóð beint í æð! Sem sagt…ef ég væri vampíra en samt grænmetisæta…myndi ég sennilega drekka kókosvatn he he.
 
Suðrænn og svalandi ananas- og kókosdrykkur frá Uganda
Fyrir 2

• 4 ísmolar
  
• 100 gr ferskur, vel þroskaður ananas
  
• 330 ml kókosvatn (úr óþroskaðri kókoshnetu), fæst í fernum í heilsubúðum
  
• 1 msk agavesíróp
  
  Aðferð:
  
• Setjið ísmolana í blandara og blandið í nokkrar sekúndur.
  
• Bætið ananas út í og smá slettu af kókosvatninu og blandið í nokkrar sekúndur (á að vera vel maukað).
  
• Setjið restina af kókosvatninu og agavesírópinu út í og blandið í nokkrar sekúndur í viðbót.
  
• Berið fram strax (hrærið í drykknum ef einhver tími líður þangað til þið berið fram því það sest til í honum).
  
  

Prenta þessa uppskrift     -     Senda þessa uppskrift

Ég gleymi aldrei þegar við komum til Mombasa vorið 2006 í kæfandi hita og fengum ískaldan melónudrykk í glasi þegar við komum á hótelið okkar. Nammmmmm. Það er fátt meira hressandi í sumarhita. Ananasinn inniheldur mikilvæg ensím fyrir meltinguna og vatnsmelónur eru fullar af C vítamínum. Hreinsandi og nærandi drykkur og afar svalandi.
 
Svalandi melónudrykkur

• Kjötið af 1/2 stórri, þroskaðri vatsnmelónu eða 1 lítilli. Allir steinar fjarlægðir
  
• 100 ml ananassafi, hreinn
  
• 4 klakar
  
  Aðferð:
  
• Blandið klakana vel saman fyrst í blandara.
  
• Setjið vatnsmelónubitana út í ásamt ananassafanum.
  
• Berið fram strax.
  
  
• Nota má appelsínusafa í staðinn en hann gæti yfirgnæft melónurnar.

Prenta þessa uppskrift     -     Senda þessa uppskrift

Þessi er einstaklega vítamínríkur og hressandi. Í spergilkáli (brokkolíi) er mikið af C og K sem og A vítamínum. Spergilkál er líka járnríkt og hefur verið sýnt fram á að það berst kröftuglega gegn myndun krabbameins. Einnig er spergilkál trefjaríkt. Drykkurinn ber einungis keim af spergilkálsbragði svo það er afar sniðugt að bjóða krökkum upp á þennan drykk til að koma í þeim vítamínum! Hann er mildur en samt hæfilega sætur. Perur og epli eru einnig sjaldan ofnæmisvaldar svo drykkurinn hentar vel ungum börnum (segið þeim bara að hann heiti "risaeðludrykkur"!!). Nauðsynlegt er að eiga safapressu fyrir þennan drykk.

 
Sætur og járnríkur spergilkálssafi (risaeðludrykkur)
Fyrir 2

• 2 litlir spergilkálshausar (brokkolí)
  
• 2 stór epli
  
• 2 perur
  
  Aðferð:
  
• Fræhreinsið eplin og perurnar og setjið í safapressuna ásamt spergilkálinu. Berið fram strax.
  
• Nota má hunangsmelónu eða fleiri epli í stað þess að nota perur.
  
  
  

Prenta þessa uppskrift     -     Senda þessa uppskrift

Þessi er heldur betur upplagður fyrir krakka. Litirnir eru svo skemmtilegir og ef maður hrærir í drykknum þá verða litirnir eins og í töfradrykk. Fullur af vítamínum og andoxunarefnum ásamt kalki úr mjólkinni.
 
Töfradrykkur fyrir krakka
Fyrir 2-3 krakka

• 2 klakar
  
• 1,5 dl léttmjólk, (eða soyamjólk, undanrenna eða fjörmjólk). (Ath að mjög ung börn ættu ekki að drekka soyamjólk nema í samráði við lækna eða næringarfræðinga)
  
• 100 gr bláber
  
• 1 banani, vel þroskaður
  
• 1 vel þroskuð, lífrænt ræktuð pera (þessar sem eru óreglulegar í laginu með mjög þunnu hýði)
  
  Aðferð:
  
• Byrjið á því að mala klakana í blandara.
  
• Bútið bananann og peruna og setjið 1 dl af mjólk út í. Blandið mjög vel þangað til allt er orðið mjög vel maukað. Blandan á að vera nokkuð þykk.
  
• Hellið þessu í skál.
  
• Skolið blandarann.
  
• Setjið bláberin í blandarann og afganginn af mjólkinni. Blandan á að vera mjög þykk en ef hún blandast illa, blandið þá nokkrum matskeiðum af mjólk saman við.
  
• Hellið nú bananablöndunni í stórt glas, fyllið aðeins meira en helminginn af glasinu.
  
• Hellið nú bláberjablöndunni ofan á (notið stóra matskeið og hellið bláberjablöndunni varlega ofan á bakliðina á skeiðinni. Bláberjablandan á nefnilega að liggja ofan á bananablöndunni svo það þarf að vanda sig svolítið eða fá pínu aðstoð hjá fullorðnum).
  
• Leyfið drykknum að standa í 5 mínútur.
  
• Berið fram með mjórri teskeið og hrærið í drykknum áður en hann er drukkinn. Hann verður ofsalega fallegur á litinn!!! Hver veit nema maður geti galdrað eitthvað líka!
  
  
• Nota má hunangsmelónu í stað peru.

Prenta þessa uppskrift     -     Senda þessa uppskrift

Þessi hristingur er jafn ótrúlega góður og hann er einfaldur. Upplagður á heitum sumardegi í staðinn fyrir að fara í ísbúðina, og milljón sinnum hollari líka. Ég þarf þó að viðurkenna að bíómjólkin inniheldur sætuefni en ég lofa því að það eru aðeins tvær uppskriftir á vefnum mínum sem innihalda sætuefni og það er vegna þess að ég nota vanillubíómjólk í báðar uppskriftirnar. Það er nefnilega ekki til hrein bíómjólk en ég hefði notað hana í staðinn fyrir þessa með vanillubragðinu (og sett vanilluduft sjálf) því ég jú alltaf hreinar afurðir frekar en þær sem eru með tilbúnu bragði. Ég mæli ALLS ekki með því að nota sætuefni en ég geri stundum undantekningu BARA með vanillubíómjólk (ok svona 2var á ári...thats it, búin að skripta).
 
Vanillumjólkurhristingur (sjeik)
Fyrir 2 -3

• 500 ml hálffrosin vanillubíómjólk (þessi sykurlausa). Má nota aðra bíómjólk ef þið viljið.
  
• 1 vel þroskaður banani
  
• 1/2 dl undanrenna
  
  Aðferð:
  
• Frystið 500 ml af vanillubímjólk þannig að hún verði nánast öll frosin (hægt að kreista aðeins en ekki of mikið, verður að vera vel frosin). Einnig má frysta og afþýða út á borði (tekur marga klukkutíma).
  
• Setjið allt í blandara.
  
• Berið fram strax.
  
  
• Það má alveg bæta t.d. ferskum jarðarberjum eða bláberjum út í.
  
• Til að fá meira vanillubragð má setja 1 tsk af vanilludufti eða vanilludropum út í.

Prenta þessa uppskrift     -     Senda þessa uppskrift

Þetta salat er frískandi og sumarlegt og alveg frábært til að bera fram sem öðruvísi salat hvort sem þið berið fram hefðbundið grænt salat líka eða ekki. Stundum er gaman að breyta til, sérstaklega á sumrin! Uppskriftin er úr frábærri bók sem ég hef átt í mörg ár og heitir North African Cooking.
 
Appelsínu- og ólífusalat frá Morocco
Fyrir 2 sem meðlæti

• 1 appelsína
  
• 1/4 rauðlaukur
  
• 6-8 svartar ólífur, steinalausar
  
• Smá klípa cayenne pipar
  
• 1 msk ólífuolía
  
• 1/2 tsk agavesíróp
  
• Fersk corianderlauf til skreytingar (má sleppa)
  
  Aðferð:
  
• Skrælið appelsínuna og hreinsið allt hvíta hýðið utan af henni sem og himnuna sem umlykur appelsínuna. Best er að skera appelsínuna á bakka með börmum því þið þurfið að nota safann sem kemur af appelsínunni.
  
• Skerið rauðlaukinn í örþunnar sneiðar og aðskiljið hringina í sneiðunum.
  
• Raðið appelsínusneiðunum á disk.
  
• Dreifið laukhringjunum yfir sneiðarnar.
  
• Dreifið ólífunum yfir sneiðarnar.
  
• Í litla skál skuluð þið blanda saman ólífuolíunni, cayenne piparnum og agavesírópinu.
  
• Hrærið vel og blandið appelsínusafanum saman við.
  
• Hellið yfir salatið.
  
• Látið standa við stofuhita í um klukkutíma til að bragðið nái að “taka sig”.
  
  

Prenta þessa uppskrift     -     Senda þessa uppskrift

Ef þessir bitar koma ykkur ekki upp síðustu metrana á fjallinu þá veit ég ekki hvað gerir það. Stútfullir af próteinum, flóknum kolvetnum, hollri fitu og meira að segja kalki! Þetta er líka gott og hollt nesti í vinnuna svona þegar maður er orðinn svangur og langar í eitthvað í sætari kantinum þegar líða fer á daginn. Mér finnst þessir algjört æði.
 
Banana-, döðlu og möndlustangir
Gerir 20 stangir

• 460 gr þurrkaðir bananar (fást t.d. í Yggdrasli og fleiri stöðum)
  
• 200 gr möndlur (heilar)
  
• 120 gr þurrkaðar döðlur
  
• 4 msk appelsínu- eða eplasafi
  
  Aðferð:
  
• Maukið möndlurnar í matvinnsluvél þangað til þær eru orðnar frekar fínlegar (ekki alveg að dufti samt). Setjið í stóra skál.
  
• Maukið banana og döðlur með appelsínusafanum (gætuð þurft að mauka í tveimur skömmtum). Bætið við meira ef ykkur finnst þurfa. Þetta ætti ekki að vera að algjöru mauki samt, meira eins og þétt deig.
  
• Blandið öllu saman með höndunum og hnoðið vel eða notið hrærivél og deigkrók.
  
• Mótið stangir (ég miða við 40 grömm) og pakkið hverri og einni inn í plast.
  
• Það má auðvitað móta kúlur, kubba o.s.frv. allt eftir smekk.
  
  
  
• Það er góð tilbreyting að setja eins og 1 tsk af kanil saman við.

Prenta þessa uppskrift     -     Senda þessa uppskrift

Þessi uppskrift er auðveld í undirbúningi því mest af hráefninu fer í matvinnsluvél. Uppskriftin er líka mjög holl því í túnfisknum eru Omega 3 fitusýrur sem hjálpa til að sporna við hjartasjúkdómum. Einnig eru túnfiskur og kjúklingabaunir ríkar af E vítamíni sem eru sterk andoxunarefni og hjálpa til við að sporna t.d. við krabbameini, hjartasjúkdómum og ýmsu öðru. Það er sniðugt að búa til tvöfaldan skammt og frysta rest því borgararnir geymast í um mánuð í frysti.
 
Bauna- og túnfiskborgarar
Gerir um 10 borgara

• 2 x 420 gr dósir kjúklingbaunir (sigtið vatnið frá)
  
• 1 búnt vorlaukar (6-7 stykki), saxaðir gróft (notið miðjuhlutann og grænu blöðin líka)
  
• 400 gr túnfiskur í dós í eiginn vökva eða vatni (ekki olíu). Kaupið aðeins "Dolphin friendly" túnfisk
  
• 1 tsk chillipipar (má sleppa og nota svartan pipar fyrir þá sem þola ekki sterkan mat). Einnig má nota paprikuduft
  
• 1 tsk cumin
  
• 1 hvítlauksrif, saxað gróft
  
• 30 ml sítrónusafi
  
• Hnefafylli corianderlauf, söxuð gróft
  
• 150 ml hrein jógúrt eða ab mjólk (sojajógúrt fyrir þá sem nota ekki mjólkurvörur)
  
• Steinselja, coriander eða eitthvað annað ferskt krydd
  
  Aðferð:
  
• Setjið kjúklingabaunirnar og vorlaukinn í matvinnsluvél og maukið. Ekki samt mauka alveg í spað.
  
• Bætið túnfisknum, vorlauknum, chillipiparnum, cumin, hvítlauk, sítrónusafa og corianderlaufunum út í, blandið í nokkrar sekúndur þannig að blandist allt vel saman án þess þó að verða að mauki.
  
• Skiptið deiginu í 10-12 hluta og notið hendurnar til að búa til buffin.
  
• Hitið í ofni í um 20-25 á hvorri hlið við um 200°C. Hitið lengur ef þið viljið harðari skorpu.
  
• Fyrir sósuna skuluð þið blanda saman jógúrti eða ab mjólk og fersku kryddi. Einnig er gott að setja hvítlauk út í ásamt smá pipar.
  
  Sósan:
  
• Blandið saman jógúrti eða ab mjólk og fersku kryddi. Einnig er gott að setja hvítlauk út í ásamt smá pipar.
  
  
• Berið fram með salati (t.d. spínati eða lambhagasalati, þurrristuðum furuhnetum, kirsuberjatómötum, ólífum o.fl.).
  
• Hægt er að nota Borlotti baunir eða Cannellini baunir í stað kjúklingabaunanna.

Prenta þessa uppskrift     -     Senda þessa uppskrift

Þessi er fullkominn að hausti þegar maður getur notað fínu nýju kartöflurnar og ef maður býr svo vel að eiga blómkál úr garðinum þá er það sko ekki verra. Súpan er mild og fín, afar mögur þannig að hún hentar vel fólki sem vill létta máltíð en seðjandi. Mér finnst rosalega gott að setja smávegis af rifnum osti og jafnvel rifnum parmesan út í til að fá meira bragð en það er allt eftir smekk hvers og eins auðvitað. Ég veit fátt betra á köldum haustdegi en að borða súpu úr fersku, nýuppteknu grænmeti. Þessi uppskrift kemur upprunalega úr litlum ítölskum bæklingi en ég er aðeins búin að breyta henni þó og gera hana hollari.
 
Blómkáls og kartöflusúpa
Fyrir 2-3

• 1/2 stór blómkálshaus
  
• 1/2 stór kartafla, skorin í teninga
  
• 375 ml léttmjólk (eða nýmjólk fyrir þá sem vilja)
  
• 500 ml grænmetissoð (500 ml soðið vatn + 1-2 grænmetisteningar t.d. frá Rapunzel)
  
• Nokkrir vorlaukar
  
• 1 msk kókosfeiti eða ólífuolía
  
• 13 gr spelti (kartöflumjöl fyrir þá sem hafa glúteinóþol)
  
• 20 gr rifinn, magur ostur
  Lítill bútur ferskur parmesan (má sleppa), rifinn á rifjárni
  
• Heilsusalt (Herbamare)
  
• Pipar
  
  Aðferð:
  
• Brjótið blómkálið í litla jafn stóra sprota.
  Setjið blómkálið í stóran pott ásamt mjólkinni, kartöfluteningunum, grænmetissoðinu og hvíta partinum af vorlauknum (sá græni er notaður ofan á súpuna).
  
• Sjóðið allt í 20 mínútur eða þangað til grænmetið er orðið mjög mjúkt.
  
• Síið vökvann í stóra skál og geymið grænmetið í annarri skál.
  
• Hitið kókosfeitina í stóra pottinum og bætið speltinu saman við. Hrærið allan tímann og mjög hratt í 1 mínútu eða svo (þangað til að úr verður smá grautur).
  
• Bætið vökvanum (sem var síaður frá) hægt saman við, smátt og smátt í einu þangað til allt blandast vel saman.
  
• Látið suðuna koma upp og látið malla í 2-3 mínútur.
  
• Bætið grænmetinu saman við og smakkið til með salti og pipar.
  
• Notið nú töfrasprota til að mauka súpuna eða setjið í nokkrum skömmtum í matvinnsluvél eða blandara. Blandið þangað til súpan er orðin silkimjúk (þið getið geymt nokkra bita af blómkálinu til að hafa grófari áferð ef þess er óskað).
  
• Bætið rifna ostinum saman við og hrærið þangað til hann bráðnar.
  
• Bætið parmesan ostinum út á.
  
• Saxið græna hlutann af vorlauknum og dreifið yfir.
  
• Berið fram strax.
  
• Gott er að hafa nýbakað brauð með súpunni.
  
  

Prenta þessa uppskrift     -     Senda þessa uppskrift

Þetta er svoooo, svoooo, svoooo gott og ekki versnar það með vel þroskuðu avacado söxuðu ofan á tómatana. Namm. Ítalir myndu sennilega fórna höndum yfir þessari útgáfu af bruschetta (brúsketta), með heimabökuðu speltsnittubrauði en mér er alveg sama he he. Fyrir þá sem vilja vera voða ítalskir þarf að kaupa venjulegt snittubrauð en þetta dugar allavega vel fyrir mig. Það sem er svo frábært við bruschetta er að það er einfalt, yfirþyrmandi hollt (tómatar, extra virgin ólífuolía, hvítlaukur) og svo hressandi. Það er sko ekkert skrýtið að Ítalir lifi svona lengi! Bruschetta er upplagt sem létt snarl eða forréttur en við borðum það reyndar oft sem léttan kvöldmat líka....bara nógu mikið af því..enda erfitt að hætta!
 
Bruschetta (snittubrauð með tómötum, hvítlauk og ólífuolíu)
Fyrir 5-6 sem forréttur

• Snittubrauð (um 8-10 sneiðar, og 1,5 cm. þykkar)
  
• 4 vel þroskaðir plómutómatar (eða tómatar on the vine, saxaðir frekar fínt
  
• 2-3 stór hvítlauksrif skorin í tvennt
  
• Góð ólífuolía (extra virgin)
  
• Sjávarsalt eða Himalaya salt
  
• Svartur, grófur pipar
  
  Aðferð:
  
• Sneiðið snittubrauðið.
  
• Ristið í brauðrist.
  
• Nuddið hvítlauknum aðeins í brauðið (má ekki vera of sterkt hvítlauksbragð).
  
• Raðið tómötum ofan á sneiðarnar í hrúgu.
  
• Dreypið nokkrum dropum af ólífuolíu á hverja sneið (ofan á tómatana).
  
• Saltið og piprið eftir smekk.
  
  
• Það er algjörlega æðislegt að saxa vel þroskað avacado ofan á líka.
  
• Hægt er að saxa ferskt basil og dreifa ofan á en einnig er gott að setja þunna mozarella sneið undir tómatana.

Prenta þessa uppskrift     -     Senda þessa uppskrift

Ef Jóhannes fær að ráða hvað eigi að vera í matinn (hann fær stundum að ráða) þá segir hann án undantekningar "bara Borritos!!" :) Honum finnst þessi réttur sem sagt verulega góður og svipurinn á honum þegar hann borðar hann er alveg þess virði. Þetta er voða einfalt og gott svo sem og ég geri alltaf tvöfaldan skammt svo ég geti haft hann í matinn daginn eftir líka (þá er best að gera allt tilbúið og geyma vefjurnar sem þið ætlið ekki ða nota í kæli, óhitaðar).
 
Burritos
Fyrir 3-4 (8 vefjur)

• 250 gr maísbaunir, ósykraðar (gott að nota frosnar)
  
• 1 rauð eða græn paprika skorin í fína strimla
  
• 2 tómatar skornir í sneiðar
  
• 8 tortilla speltpönnukökur
  
• 1 dós baunamauk (refried beans)
  
• 6 sveppir sneiddir (eða lítil dós niðursoðnir) og steiktir upp úr vatni og miklum pipar
  
• salat – icebergblöð
  
• 200 gr rifinn, magur ostur
  
• 1 krukka salsasósa (holl, ekki með neinum aukaefnum eða sykri, bara grænmeti)
  
• 1 dós guacamole, fituskert (eða heimatilbúin)
  
• 1 dós hrein jógúrt
  
  Aðferð:
  
• Setja 2 kúfullar matskeiðar af baunamauki á hverja pönnuköku, 1 msk af gulum baunum, 3 strimla af papriku, 1 msk af sveppum ásamt osti og loks setja nokkur salatblöð ofan á.
  
• Pakka kökunum saman varlega þannig að sé örugglega lokað og leggið á hvolf í eldfast mót (þannig að samskeytin séu undir kökunni). Þetta er smá dúllerí en þetta helst alveg lokað ef pakkað vel.
  
• Hita í ofni við 180°c í 15-20 mínútur.
  
  
• Borið fram með salsasósu, guacamole og jógúrti sem er allt sett í sína hverja skálina þannig að hver og einn geti sett á sitt borritos sjálfur.

Prenta þessa uppskrift     -     Senda þessa uppskrift

Þessi réttur er rosa góður. Hver man ekki eftir pönnukökunum á Cafe París eða á Nýja Kökuhúsinu!! Þessar eru ekkert ósvipaðar nema það er ekkert smjörbragð af grjónunum og sinnepssósan er mjög fitulítil. Ég nota magran ost líka. Þegar ég geri venjulegar pönnsur geri ég aðeins fleiri en ég þarf og nota svo í þennan rétt (sleppi þá vanilludropunum og kaffinu). Þegar grjónablandan er svo tilbúin set ég blönduna í hverja pönnuköku og baka aðeins inn í ofni. Pönnsurnar verða aðeins stökkar en mér finnst það bara ekkert verra.
 
Crepes með grænmeti og bygggrjónum
Gerir 8 crepes

Pönnukökur

• 1 bolli spelti
  
• 1 msk vínsteinslyftiduft
  
• 1 egg
  
• 1 bolli undanrenna
  
• 1 msk kókosfeiti
  
  Aðferð:
  
• Blandið öllu saman og hitið pönnu (á um það bil næst hæsta hitastigi) og setjið smá kókosfeiti á pönnuna. Það gæti þurft að lækka á hitanum.
  
• Bakið 6-8 frekar þykkar pönnukökur (setja eina ausu á pönnuna snögglega, þekjið pönnuna og hella restinni af deiginu aftur ofan í skálina með deiginu í, á að taka um 7 sekúndur í allt).
  
  Fylling
  
• 2 dl hýðishrísgrjón eða bygggrjón (enska: Pearl Barley)
  
• 100 gr sveppir, saxaðir frekar fínt
  
• 7 vorlaukar, eða einn stór blaðlaukur
  
• 2 hvítlauksrif, marin
  
• 1/2 tsk karrí
  
• 1 rauð eða gul paprika í bitum
  
• 1/2 tsk salt (Himalaya eða sjávarsalt) og smá pipar
  
• 100 gr rifinn, magur ostur
  
• 2 msk tamarisósa
  
  Sinnepssósa
  
• 4 msk sætt sinnep (það er samt enginn viðbættur sykur)
  
• 1 tsk sinnepsfræ, svört en má líka nota ljós með (enska: mustard seeds)
  
• 2 tsk agavesíróp
  
• 3 msk eða meira af majonesi. Einnig má nota 5% sýrðan rjóma frá Mjólku (hann er án gelatíns). Hægt er að kaupa létt-majones (6% fita) í flestum búðum en það inniheldur yfirleitt sykur og viðbætt efni
  
• 4 msk eða meira af AB-mjólk eða hreinu, fitulausu jógúrti
  
  Aðferð:
  
• Sjóðið hrísgrjónin eða bygggrjónin.
  
• Steikið laukinn og hvítlaukinn úr smá kókosfeiti og vatni ef þarf.
  
• Steikið sveppina upp úr tamarisósu og vatni, bætið paprikunni saman við.
  
• Í stórri skál, blandið saman grjónunum, sveppunum og bætið ostinum, paprikunni, sinnepsblöndunni, lauknum og kryddinu. Búið til meiri sinnepssósu ef ykkur finnst þessi ekki nóg (á að vera frekar mikið af henni, blandan má vera frekar blaut).
  
• Setjið 3-5 msk af hrísgrjónafyllingunni (eftir því hvað þið viljið mikið) á hverja pönnuköku, rúllið þeim upp í böggla eða rúllið þeim upp eins og þykkum pönnukökum og leggið á bökunarpappír.
  
• Bakið í 15-20 mínútur við 180°C.
  
  
• Mjög gott að útbúa deginum áður, henda í ísskápinn og hita daginn eftir.
  
• Líka upplagt í nestið ef þið getið hitað pönnukökurnar upp.
  
• Fylltar pönnukökur má gjarnan frysta og hita svo upp í ofni.
  
• Gott er að eiga frosnar pönnukökur til að nota í þennan rétt því tímafrekt getur verið að baka pönnsur.

Prenta þessa uppskrift     -     Senda þessa uppskrift

Frábær í skólann, ræktina, vinnuna, gönguna. Allsherjar orkubiti!
 
Döðlu- og hnetubiti
Gerir um 10 stykki

• 2 dl cashewhnetur
  
• 1/4 dl möndlur
  
• 2 dl puffed rice (úr brúnum hrísgrjónum, ef þetta fæst ekki, má nota puffed spelt í staðinn sem fæst í Yggdrasli)
  
• 2 tsk kúfullar tahini (sesammauk)
  
• 2 tsk kúfullar hnetusmjör (hreint, án viðbætts sykurs)
  
• 2 msk hreint hlynsíróp (enska: maple syrup)
  
• 15-20 döðlur
  
• 2 msk hreinn appelsínusafi
  
• 2 msk byggmaltsíróp (enska: barley malt syrup) eða hrísgrjónasíróp (enska: brown rice syrup). Fæst í heilsubúðum.
  
• 20 gr undanrennuduft (má sleppa en gott að nota fyrir þá sem eru að byggja upp vöðva. Ég er hrifin af Solgar vörunum en einnig má nota bara venjulegt undanrennuduft)
  
  Aðferð:
  
• Malið cashewhneturnar, möndlur og puffed rice í matvinnsluvél. Bætið undanrennuduftinu við ef það er notað.
  
• Blandið tahini, hnetusmjör, hlynsírópi og byggmaltsírópi saman við.
  
• Færið þetta í stóra skál.
  
• Saxið döðlurnar gróft og setjið í matvinnsluvél ásamt appelsínusafanum. Blandið vel eða þangað til döðlurnar eru orðnar að mauki.
  
• Blandið saman við hnetublönduna.
  
• Gott að setja í hrærivél í smá stund en annars hnoðið þið bara með höndunum (fín líkamsrækt :)
  
• Mótið litlar kúlur (aðeins minni en golfkúlu) og fletjið út í eins konar borgara.
  
• Pakkið hverjum bita inn í plastfilmu til að geta stungið í nestisboxið.
  
  
• Börn ættu ekki að borða undanrennuduft til líkamsræktar nema í samráði við næringarfræðinga eða lækna.

Prenta þessa uppskrift     -     Senda þessa uppskrift

Þessi súpa er voðalega einföld og þægileg, upplögð svona í miðri viku. Ég veit aldrei hvað ég á að hafa með súpunni (væri örugglega best að hafa "prawn-crackers" en ég myndi frekar borða málningu heldur en að borða það ógeð, hvoru tveggja stíflar æðarnar sennilega jafnmikið). En allavega, þessi súpa er holl, próteinrík og góð og upplögð í forrétt ef þið eruð með austurlenska veislu á borðum. Hún er líka mjög ódýr og heppileg ef buddan er ekki þung.
 
Eggjadropa og maískornasúpa
Fyrir 2-3

• 250 gr maískorn (án viðbætts sykurs)
  
• 2 eggjahvítur
  
• 1 tsk sesamolía (má sleppa)
  
• 1,5 stórir gerlausir grænmetisteningar frá Rapunzel
  
• 6 dl sjóðandi vatn
  
• 2 msk maísmjöl (þ.e. sósujafnari. Má líka nota arrowroot)
  
• 1 msk tamarisósa (eða soyasósa) til að bragðbæta ef þarf
  
• 1 tsk agavesíróp
  
  Aðferð:
  
• Hrærið eggjahvítuna vel.
  
• Blandið maísmjöl saman við 1-2 msk af vatni hrærið mjög vel þangað til kekkirnir eru horfnir.
  
• Hellið sjóðandi vatni yfir grænmetisteningana (í potti).
  
• Hleypið suðunni upp og blanda maískornunum saman við.
  
• Setjið agavesírópið út í.
  
• Látið malla (ekki sjóða) í 15 mínútur, ekki með lokinu á.
  
• Blandið eggjahvítunum saman við maísmjölsblönduna og hrærið vel.
  
• Hellið eggjahvítu/maísmjölsblöndunni út í, í lítilli, en stöðugri bunu og hrærið í súpunni allan tímann (án þess að sjóði í súpunni). Eggjadroparnir þykkna og verða að mjóum, hvítum ræmum. Gætið þess að ekki sjóði í súpunni.
  
• Setjið sesamolíuna útí.
  
• Smakkið til með tamarisósunni, ekki víst að þurfi.
  
  
• Það er líka hægt að setja rifinn kjúkling út í, bætið bara aðeins af soði við svo súpan verði ekki alltof þykk. Ef kjúklingur er notaður, má nota kjúklingakraft í stað grænmetiskrafts.

Prenta þessa uppskrift     -     Senda þessa uppskrift

Bara svona hversdagsmatur, ekkert neitt spari en engu að síður bragðgóður, hollur og verulega þægilur réttur. Fyrir þá sem borða kjúkling má setja 100 gr reykta kalkúna eða kjúklingaskinku í réttinn.
 
Eggjaréttur í ofni
Fyrir 2

• 250 gr blómkál eða broccoli
  
• 1 laukur skorinn í sneiðar
  
• 2 litlir tómatar skornir í sneiðar
  
• 50 gr reykt tófú, skorið í bita
  
• 1/2 paprika skorin í strimla
  
• 3 egg
  
• 2 dl undanrenna
  
• 1 msk spelti
  
• 1 tsk karrí
  
• 1/2 tsk paprika
  
• Rifinn, magur ostur (11%)
  
• Heilsusalt (Herbamare) og svartur pipar
  
  Aðferð:
  
• Skerið broccoliið og blómkálið í bita og sjóðið í 8-10 mínútur.
  
• Þegar grænmetið er soðið raðið því þá í eldfast mót.
  
• Raðið lauknum yfir.
  
• Setjið tófúið yfir laukinn.
  
• Raðið tómatsneiðum og paprikustrimlum yfir.
  
• Þeytið saman eggin, mjólkina, speltið og kryddið og hellið yfir réttinn.
  
• Bakið við 200°C í 20 mínútur, dreifið svo ostinum yfir og bakið í 10 mínútur.
  
  
• Til að gera meiri mat úr þessum rétt má hafa hýðishrísgrjón og eitthvað gott salat með.
  
• Berið fram með tamarisósu.

Prenta þessa uppskrift     -     Senda þessa uppskrift

Þetta er nú eiginlega forréttur, mjög spes á bragðið og hentar ekki með öllu. Ég hafði smjörbaunasalat í aðalrétt og það var allt í lagi með. Þessi uppskrift er upprunalega komin frá Waitrose, búðinni okkar góðu sem við verslum í hérna í London en ég breytti henni þó aðeins. Best er að kaupa aspars á vormánuðum því þá er hann "in season".
 
Ferskur aspars með appelsínu-sesamdressingu
Fyrir 2

• 500 gr ferskur aspars
  
• 1 msk sesamfræ
  
• 2 msk hrísgrjónaedik
  
• 2 tsk Dijon sinnep
  
• 1 tsk tamarisósa
  
• 1 tsk rifin, fersk engiferrót
  
• 1 tsk rifinn appelsínubörkur
  
• 1 hvítlauksrif pressað
  
• 1/4 tsk agave síróp
  
• 1 msk sesamolía
  
• 1 msk ólífuolía
  
  Aðferð:
  
• Skerið u.þ.b. 5 cm. bita af endanum af hverjum aspars og skafið síðan neðri hlutann með kartöfluflysjara.
  
• Sjóðið asparsinn í léttsöltu vatni í u.þ.b. 5 mínútur.
  
• Hellið vatninu varlega af og skolið asparsinn undir rennandi, köldu vatni.
  
• Þerrið asparsstönglana og geymið í kæli í 30 mínútur eða lengur.
  
• Léttbrúnið sesamfræin á þurri pönnu og kælið.
  
• Þeytið saman edikið, sinnepið, sojasósuna, engiferrótina, appelsínubörkinn, hvítlaukinn og agavesírópið.
  
• Bætið olíunum smátt og smátt saman við og þeytið vel á meðan svo allt blandist vel.
  
• Bragðbætið með salti og pipar eftir smekk og geymið dressinguna í kæli fram að framreiðslu.
  
• Leggið nokkra asparsstöngla á forréttardiska (má hafa salatblöð með) dreypið dressingunni yfir og stráið sesamfræjum svo yfir.
  
  

Prenta þessa uppskrift     -     Senda þessa uppskrift

Þetta er frekar einfaldur indverskur fiskiréttur. Goa er eyja rétt við utan Indland sem að Portúgalar réðu einu sinni yfir. Það skiptir svo sem engu máli, rétturinn er fínn og hollur. Ekki láta hráefnið hræða ykkur en best er að nálgast þau í austurlenskum matvörubúðum. Ef þið finnið ekki curry leaves er best að sleppa þeim (það kemur ekkert annað í staðinn). Ef þið finnið ekki cuminfræ og corianderfræ má nota malaðar útgáfur af fræjunum. Ef þið eruð viðkvæm fyrir chilli, skuluð þið bara nota einn í staðinn fyrir þrjá.
 
Fiskiréttur frá Goa
Fyrir 4-5

• 35 gr kókosmjöl (gróft), ristað á pönnu
  
• 2 hvítlauksgeirar, afhýddir og saxaðir gróft
  
• 3 litlir chilli (rauðir), saxaðir gróft
  
• 2 tsk corianderfræ
  
• 2 tsk cumin fræ (ekki kúmen)
  
• 1/2 tsk malað turmeric
  
• 1 msk tamarisósa
  
• 1 msk ferkst engifer, afhýtt og saxað gróft
  
• 1 laukur saxaður meðalgróft
  
• 1 laukur saxaður gróft
  
• 75 ml kalt vatn
  
• 1 msk kókosfeiti
  
• 2 meðalstórir tómatar, saxaðir meðalgróft
  
• 8 curry lauf (fæst í austurlenskum búðum og sumum matvöruverslunum). Ef þau fást ekki má sleppa þeim
  
• 175 ml grænmetissoð (1 gerlaus teningur frá Rapunzel) eða fiskisoð fyrir þá sem vilja
  
• 300 ml kókosmjólk (enska: coconut milk)
  
• 1 kg ýsa (eða þorskur fyrir þá sem borða þorsk) skorin í bita
  
  Aðferð:
  
• Maukið saman í matvinnsluvél; kókosmjöl, hvítlauk, chilli, coriander- og cuminfræin, turmeric, tamarisósu, engifer og gróft saxaða laukinn ásamt kalda vatninu þangað allt er maukað saman. Gætuð þurft að láta matvinnsluvélina ganga í 1 mínútu.
  
• Hitið kókosfeitina (ásamt smá vatni ef þarf) á stórri pönnu (eða grunnum potti).
  
• Hitið smátt saxaða laukinn þangað til hann er orðinn örlítið gulleitur (í um 5 mínútur).
  
• Bætið kókosblöndunni úr matvinnsluvélinni saman við og hitið þangað til kemur góð lykt eða í nokkrar mínútur. Hrærið reglulega í öllu á pönnunni.
  
• Bætið tómötunum, curry laufunum, grænmetisteningnum og sjóðandi heita vatninu út á pönnuna.
  
• Látið malla, ekki með lokinu á í um 10 mínútur þangað til sósan fer að þykkna.
  
• Bætið kókosmjólkinni út í.
  
• Bætið fiskinum við og látið malla við vægan hita í um 10 mínútur með lokinu á eða þangað til fiskurinn er orðinn hvítur og laus í sér.
  
  
• Berið fram með bygggrjónum, hýðishrísgrjónum, basmati hýðishrísgrjónum, naan brauði, gúrkusósu o.s.frv. Athugið að þeir sem hafa glúteinóþol mega ekki borða bygggrjón eða naan brauð.

Prenta þessa uppskrift     -     Senda þessa uppskrift

Þetta er mjög fínn réttur til að búa til í miðri viku því hann er fljótlegur en saðsamur.
 
Fyllt eggaldin
Fyrir 3-4

• 225 gr speltpasta. Einnig hægt að nota heilhveitipasta
  
• 2 stór eggaldin eða 3 minni
  
• 1 stór laukur
  
• 2 hvítlauksgeirar, kramdir
  
• 400 gr saxaðir, ferskir tómatar (eða í dós)
  
• 2 tsk oregano, þurrkað
  
• Heilsusalt (Herbamare) og pipar
  
• 55 gr mozarella ostur (magur ef hann er til) skorinn í þunnar sneiðar
  
• 25 gr parmesan ostur, helst ferskur
  
• 5 msk brauðmylsnur, spelti eða heilhveiti
  
• 1 msk kókosfeiti eða ólífuolía
  
  Aðferð:
  
• Sjóðið pastað í 8-10 mínútur eða þangað til það er næstum tilbúið, sigtið, kælið með köldu vatni og setjið til hliðar.
  
• Skerið eggaldin í helminga (lárétt), hreinsið innan úr þeim með beittum hnífi, án þess þó að skemma hýðið.
  
• Skafið kjötið úr og saxið.
  
• Steikið laukinn úr kókosfeiti eða ólífuolíu í um 5 mínútur eða þangað til hann er orðinn mjúkur.
  
• Bætið hvítlauknum við og hitið í 1 mínútu, bætið saxaða aldinkjötinu út í.
  
• Bætið tómötunum og oregano kryddinu við og smakkið til með salti og pipar.
  
• Látið suðuna koma upp og leyfið þessu að malla í um 10 mínutur eða þangað til blandan fer að þykkna.
  
• Bætið pastanu út í og hrærið vel.
  
• Raðið eggaldinskeljunum á bökunarpappír.
  
• Setjið helminginn af pastablöndunni í hverja skel.
  
• Raðið mozarella sneiðunum ofan á.
  
• Setjið afganginn af pastablöndunni ofan á.
  
• Blandið saman brauðmylsnunni og parmesan ostinum og dreifið yfir.
  
• Bakið í ofni við 200°C í 25-30 mín eða þangað til eggaldinkjötið er orðið mjúkt og osturinn bráðinn.
  
  
• Athugið að það er einnig hægt að nota magran brauðost (11%) í staðinn fyrir mozarella.
  
• Parmesan ostinn má einnig minnka, notið þá meira af brauðosti í staðinn.

Prenta þessa uppskrift     -     Senda þessa uppskrift

Þessa uppskrift smakkaði ég fyrst á námskeiði hjá Sólveigu á Grænum kosti. Þetta er mjög saðsamur matur en hollur og góður þar sem í honum eru t.d. hnetur, tófú, grænmeti o.fl. Uppskriftin birtist nánast eins og ég fékk hana en ég breytti bara smá. Ég reyndi þó að taka fram hvar ég breytti henni svo að upprunalega uppskriftin komi fram líka.
 
Fylltar paprikur
Fyrir 3-4

• 4 rauðar eða appelsínugular paprikur (bara talað um rauðar paprikur í uppskriftinni en mér finnst fínt að nota gular og appelsínugular paprikur líka)
  
• 150 gr sólþurrkaðir tómatar (ég nota tómata án olíu)
  
• 150 gr þistilhjörtu (ég nota sama magn af kjúklingabaunum...þistilhjörtu eru of dýr!)
  
• 150 gr möndlur eða hnetur t.d. cashew eða heslihnetur
  
• 150 gr magur ostur (eða soja-mosarella ostur)
  
• 10-20 gr parmesan (ég nota venjulegan en má nota soja parmesan)
  
• 150 gr tófú, hellið vatninu af og kreistið aðeins með eldhúsþurrku
  
• 1/2 tsk salt (Himalaya eða sjávarsalt) og smá klípa svartur pipar
  
• 1 hnefi ferskt, grænt krydd t.d. kóríander, basil, graslaukur, timian (ég notaði þurrkað basil og það var allt í lagi líka)
  
  Aðferð:
  
• Skerið paprikurnar í tvennt og hreinsið fræin og himnurnar úr.
  
• Saxið tómatana smátt og leggið í bleyti í 20 mínútur. Hellið vatninu af.
  
• Setjið hneturnar í matvinnsluvél og látið vélina vinna í 10-15 sekúndur.
  
• Setjið allt í matvinnsluvélina nema ostinn og paprikurnar og maukið vel.
  
• Blandið helmingnum af ostinum saman við fyllinguna og blandið áfram í nokkrar sekúndur.
  
• Fyllið paprikurnar (gott að nota matskeið).
  
• Dreifið afganginum af ostinum ásamt parmesan ostinum yfir paprikurnar.
  
• Bakað við 200°C í 20-25 mínútur eða þangað til paprikurnar eru aðeins farnar að mýkjast og osturinn að bráðna.
  
• Skreytið með fersku grænu kryddi.
  
  
• Gott er að bera fram með þessu hýðishrísgrjón eða bygg og salat (hægt að nota alls konar salöt).
  
  

Prenta þessa uppskrift     -     Senda þessa uppskrift

Nammi namm, við fórum einu sinni á veitingastað í Nice og fengum okkur "crepes", svona fylltar pönnukökur. Þær voru rosalega góðar nema þeim var algjörlega drekkt í ólífuolíu svo ég gat bara borðað brot af minni pönnuköku og svo var ég bara södd. Mér fannst algjör óþarfi að setja ólífuolíu yfir því pönnukakan og innihaldið var svo gott. Hérna er holl útgáfa af "crepés". Ég rúlla reyndar pönnukökunum upp í einsskonar aflanga böggla en það er allt í lagi að brjóta þær eins og alvöru "crepes" líka
 
Fylltar pönnukökur með bygggrjónum og sinnepssósu
Fyrir 3-4

Pönnukökur

• 1 bolli spelti
  
• 1 msk lyftiduft
  
• 1 egg
  
• 1 bolli undanrenna
  
• 1 msk kókosfeiti og smá til viðbótar á pönnuna
  
  Aðferð:
  
• Blandið öllu saman.
  
• Hitið pönnu (um það bil næst hæsta hitastigið) og setjið smávegis af kókósfeiti á pönnuna.
  
• Bakið 6-8 frekar þykkar pönnukökur.
  
  Fylling
  
• 2 dl bygggrjón (sjóðið 1/2 bolla á móti 3 bollum af vatni í 40 mínútur)
  
• 100 gr sveppir
  
• 1/2 saxaður blaðlaukur (ljósi hlutinn)
  
• 1/2 tsk karrí
  
• 1/4 rauð paprika í bitum
  
• 1/2 tsk lauksalt eða hvítlaukssalt
  
• 100 gr rifinn, magur ostur
  
  Sinnepssósa
  
• 3 msk sætt sinnep
  
• 1 tsk sinnepsfræ
  
• 1 tsk ávaxtasykur
  
• 2 msk eða meira af sýrðum rjóma án gelatíns frá Mjólku (5%). Einnig má nota létt-majones en það er þó með aukaefnum sem eru ekki sniðug fyrir mann
  
• 3 msk eða meira af AB-mjólk
  
  Aðferð:
  
• Sjóðið bygggrjónin.
  
• Steikið sveppina upp úr vatni.
  
• Í stórri skál, blandið saman grjónunum, sveppunum og bætið ostinum, paprikunni, sinnepsblöndunni, blaðlauknum og kryddinu saman við.
  
• Setjið 3 msk af grjónafyllingunni á hverja pönnuköku, rúllið þeim upp í böggla og leggið í smurt eldfast mót og bakið í 12-15 mínútur við 180°C.
  
  
• Berið fram með salati og jafnvel meira af sinnepssósunni

Prenta þessa uppskrift     -     Senda þessa uppskrift

Hljómar fáránlega kannski en er alveg jafn fáránlega gott! Þessi réttur er hið fullkomna snarl í miðri viku því hann er fljótlegur og einfaldur og kostar heldur ekki mikið. Hann er líka upplagður fyrir krakka bæði að búa til og borða því flestir krakkar elska tómatsósu! Þetta er líka fín leið til að koma C vítamínum ofan í kroppinn bæði á börnum jafnt sem fullorðnum. Í tómötum eru líka andoxunarefni sem eru nauðsynleg svona í skammdeginu (og reyndar alltaf). Þessi réttur er afrískur þó ótrúlegt megi virðast en hann er úr bókinni Safari Kitchen sem ég held mikið upp á. Ég get ekki lagt nógu mikla áherslu á það að nota ekki venjulega tómatsósu.....hún er mjög óholl. Ég nota tómatsósuna frá Himneskri hollustu og hún er alveg svakalega góð. Þið getið notað hana eða einhverja aðra sem ykkur líst vel á og er án aukaefna, bragðefna, sykurs eða annars sem skemmir fyrir okkur. Þetta brauð er líka æðislegt sem forréttur. Diskinn á myndinni keypti ég í Stone Town, Zanzibar í rykugri antíkbúð. Diskurinn er meira en 100 ára gamall og á hann eru rituð 4 nöfn af 99 nöfnum Allah. Konan tók af mér loforð um að ég myndi ekki nota diskinn sem öskubaska. Ég var fljót að lofa henni því (enda nákvæmlega ekkert heimskulegra en að reykja sígarettur). Diskurinn er yfirleitt notaður í húsum fólks til að draga fram meiri gæfu o.s.frv. Ég verð bara að vona að gamla konan sé sátt við að diskurinn sé notaður undir grillaða brauðið mitt.
 
Grillað brauð með tómatsósu, gulrótum og osti
Fyrir 2

• 10 sneiðar af snittubrauði eða öðru brauði
  
• 2 stórar gulrætur, rifnar á rifjárni
  
• 150 gr rifinn, magur ostur
  
• 4-5 msk holl tómatsósa t.d. frá Himneskri hollustu (hollar tómatsósur fást yfirleitt í heilsubúðum eða eru í hillum heilsudeilda í matvöruverslunum)
  
• Heilsusalt (Herbamare) og pipar.
  
  Aðferð:
  
• Blandið saman ostinum, tómatsósunni, gulrótunum og kryddinu í stórri skál.
  
• Dreifið jafnt á brauðsneiðarnar.
  
• Bakið efst í ofninum við 200°C í um 15 mínútur eða þangað til osturinn er farinn að bráðna.
  
• Berið fram heitt.
  
  
• Minnkið kryddmagnið ef brauðið á að vera fyrir krakkana.

Prenta þessa uppskrift     -     Senda þessa uppskrift

Það er voðalega freistandi fyrir marga að leggjast í snakkát um helgar..fá sér tortillaflögur með quacamole og salsa! Það er svo sem skiljanlegt að fólk vilji gera vel við sig öðru hvoru en málið er að við erum ekki að hugsa vel um okkur þegar við kaupum quacamole, salsa og kartöfluflögur út í búð... Það er mikið af fitu, sykri, aukaefnum, bragðefnum, bindiefnum o.fl. í þessarri samsetningu (svona yfirleitt) og afleiðingin er oft líkamleg vanlíðan (eftir á) og andleg (fyrir suma!). Þetta er holl útgáfa af slíkum mat, með heimatilbúnu guacamole og salsa. Það eru engin aukaefni, enginn hvítur sykur og ekkert rugl.... Þetta er alveg svakalega léttur matur og sérlega hollur. Eins og þið sjáið hérna fyrir neðan er matseldin ekki flókin og innihaldslýsingin ekki löng bara kartöflur, smá olía og salt!
 
Grillaðir kartöflubátar með guacamole og salsa
Fyrir 2 sem forréttur

• 2 x 150 gr kartöflur (helst bökunarkartöflur)
  
• 1 tsk kókosfeiti eða ólífuolía blandað saman við 1 tsk vatn
  
• 1 tsk heilsusalt (Herbamare)
  
  Aðferð:
  
• Bakið kartöflurnar á bökunarpappír (án þess að skera þær neitt, bara eins og þær koma úr jörðinni) í 45-60 mínútur við 180°C-200°C.
  
• Takið kartöflurnar út, skerið þær mjög varlega í báta. Gætið þess að þær eru MJÖG heitar.
  
• Hreinsið allt nema um 5 millimetra af kartöflukjötinu innan úr.
  
• Leggið bátana (hýðismegin) niður.
  
• Penslið bátana með olíunni.
  
• Saltið.
  
• Bakið í 20 mínútur til viðbótar eða þangað til kartöfluhýðin eru farin að dökkna mikið á endunum (og næstum því brenna).
  
• Berið fram með guacamole og salsa.
  
  
• Gott er að krydda með alls konar kryddi t.d. Töfrakryddinu eða Best á allt frá Pottagöldrum.
  

Prenta þessa uppskrift     -     Senda þessa uppskrift

Heitið á uppskriftinni ætti eiginlega að vera "Grjónagrauturinn hans Jóhannesar..en mín uppskrift er samt betri". Málið er að Jóhannes kunni að elda grjónagraut þegar við byrjuðum að búa (en ég ekki því ég kunni ekki einu sinni að sjóða pasta) og þetta var eitt af því sem ég bað hann um að elda. Við skiptumst algjörlega í tvennt með blessaða grjónagrautinn. Grjónagrautur eru eins og trúarbrögð. Ég vil ALLS ekki hafa rúsínur í hafragraut, finnst það ekkert gott en Jóhannes var alinn upp við það og stendur gallharður á sínu. Ég vil hafa mjólkina vel fljótandi yfir og ég vil að mjólkin sé sjóðandi heit. Hann vill hafa grautinn hnausþykkan og svo setur hann kalda mjólk út á. Það er gjörsamlega allt rangt við hans útgáfu af grjónagraut. Þetta er eiginlega það eina sem við rífumst um..nokkurn tímann. Við rífumst aldrei en við getum röflað um grjónagraut út í eitt. Jóhannes er með uppskriftina sína alltaf á hreinu því hann eldaði svo oft grjónagraut heima hjá sér og ég verð að viðurkenna að það er fátt betra en heitur grjónagrautur á köldum vetrardegi (mín útgáfa auðvitað), það er BARA best. Það endar alltaf á því að við þurfum að sjóða grautinn í 2 pottum en þetta hefst allt að lokum og við brosum bæði út að eyrum með skál af rjúkandi grjónagraut í tveimur útgáfum. Ég nota brún hrísgrjón fyrir hollari útgáfu af grjónagraut (annars eru yfirleitt notuð hvít í grjónagraut) og það má auðvitað nota hýðishrísgrjón líka en þau eru jú aðeins grófari og þurfa lengri suðu.
 
Grjónagrautur
Fyrir 2

• 1 bolli brún, löng grjón
  
• 1 bolli vatn
  
• 1/2 tsk heilsusalt (Herbamare)
  
• 3 bollar mjólk (léttmjólk eða nýmjólk. Þeir sem hafa mjólkurofnæmi geta notað hrísmjólk)
  
• 2 lúkur rúsínur (ég nota þær aldrei eins og áður hefur komið fram. Amen)
  
• 1 tsk rapadura hrásykr
  
• 1/2-1 tsk kanill
  
  Aðferð:
  
• Hellið grjónunum í pott.
  
• Hellið vatninu yfir og saltið.
  
• Hafið lokið á pottinum.
  
• Látið sjóða þangað til allt vatn er gufað upp (í um 20 mínútur).
  
• Hellið mjólkinni út í og látið malla með lokinu á í um 40 mínútur eða þangað til grauturinn hefur þykknað mikið.
  
• Hér eru rúsínurnar settar út í (fyrir þá sem eru kreisí og nota rúsínur í grjónagraut) og þær mýktar í svona 5 mínútur.
  
• Setjið aðeins meiri mjólk og svo fer eftir því hvað þið viljið hafa grautinn þykkan hversu lengi þið látið hann malla. Mér finnst best að hafa vel fljótandi af heitri mjólk yfir grautinn en það er smekksatriði. Ég helli sem sagt um 1 dl af mjólk yfir grautinn rétt áður en hann er borinn fram og læt nánast sjóða en Jóhannes vill hann hnausþykkann og hann setur kalda mjólk út á (það er ekki hægt að breyta karlmönnum með sumt...það er alveg víst).
  
• Blandið hrásykrinum og kanilnum saman og setjið út á ef þið viljið.
  
  
  

Prenta þessa uppskrift     -     Senda þessa uppskrift

Þessir klattar eru komnir frá konu að nafni Sigga Rúna en var send mér af Lísu sem á uppskriftina að Frönsku súkkulaðikökunni hér á vefnum. Ég fékk að birta uppskriftina enda alveg stórgóð og auðveld og mjög 2009 þ.e. ódýr, sannkallaðir Kreppuklattar!! Þetta er einstaklega góð aðferð við að drýgja grautarafganga t.d. af hafragraut eða grjónagraut. Ef nota á uppskriftina sem brauð setur maður aðeins 1 tsk af agavesírópi og sleppir vanilludropum en annars fylgir maður uppskriftinni hér fyrir neðan. Þessi uppskrift virðist laða að sér bæði tví- og ferfætlinga því einu sinni þegar Lísa var að baka klattana kom þar aðvífandi hundahópur (tík með hvolpa) og hreinlega lagðist á gluggana. Uppskriftin laðar gjarnan að sér tvífætlinga í formi svangra gesta líka sem og eiginmanna hef ég tekið eftir. Við Lísa breyttum aðeins uppskriftinni (tókum út smjör, notum 1 eggjahvítu en ekki rauðuna) og ég nota sojamjólk í stað undanrennu. Hugmyndina á þó Sigga Rúna og ég þakka henni fyrir að fá að birta uppskriftina og Lísu fyrir að senda mér uppskriftina. Tillögurnar hér að neðan eru okkar Lísu en ég efast ekki um að Sigga Rúna hafi hugsað um svipaðar samasetningar.
 
Grjónaklattar
Gerir 6-8 klatta

• 150 gr spelti
  
• 150 gr soðin hýðishrísgjrón (eða bygggrjón). Einnig má nota afgang af grjónagraut eða hafragraut og þá má nota minna af sojamjólk
  
• 50 ml sojamjólk (einnig má nota möndlumjólk, haframjólk, hrísmjólk eða undanrennu). Má nota minna ef notaður er tilbúinn hafragrautur eða grjónagrautur
  
• 2 msk kókosfeiti
  
• 1 eggjahvíta
  
• 100-150 ml sojamjólk (einnig má nota möndlumjólk, haframjólk, hrísmjólk eða undanrennu)
  
• 1 tsk vanilludropar eða vanilluduft úr heilsubúð
  
• 2 msk agavesíróp
  
• 1/2 tsk salt (Himalaya eða sjávarsalt)
  
  Aðferð:
  
• Setjið soðnu hrísgrjónin og 50 ml af sojamjólk í matvinnsluvél og blandið vel. Setjið til hliðar.
  
• Setjið spelti og salt í skál.
  
• Blandið saman eggjahvítu, agavesírópi og kókosfeiti í litla skál. Hrærið vel og hellið út í grautinn.
  
• Hellið grautnum út í speltið og hrærið saman.
  
• Blandið mjólkinni saman við, smátt og smátt þannig að deigið líkist að lokum grófu vöffludeigi. Deigið ætti að vera það fljótandi að það leki hratt af sleif.
  
• Hitið pönnu í meðalhita.
  
• Hellið tæplega einni ausu af deigi á pönnuna. Hitið í nokkrar mínútur.
  
• Snúið við með flötum, breiðum spaða og hitið í nokkrar mínútur.
  
• Einnig má hita klattana á flötu samlokugrilli.
  
  
• Til að nota klattana sem “brauð” má sleppa agavesírópinu (eða nota 1 tsk eingöngu).
• Klattarnir henta vel með osti, sultu, hnetusmjöri o.fl.
  
• Til að gera klattana meira kryddaða má sleppa agavesírópinu og setja ferskar eða þurrkaðar kryddjurtir út í deigið.
  
• Einnig er gott að setja t.d. 100 gr af ýmsu fínt söxuðu hráefni t.d. rauðlauk, papriku, sveppi o.fl.
  
• Gott er að setja 1 tsk af kanil í deigið ef nota á klattana undir sætt meðlæti.
  
• Til að gera klattana alveg svakalega djúsí er gott að setja 50 grömm af söxuðum döðlum út í deigið. Einnig má nota rúsínur.
  
• Gott er að setja 50 gr af söxuðum möndlum eða heslihnetum í deigið (og ekki verra að hafa saxaðar döðlur líka).

Prenta þessa uppskrift     -     Senda þessa uppskrift

Mig vantaði uppskrift að einhverju sem var ekki of sterkt, ekki með lauk eða hvítlauk, eða tómötum því við vorum að fá mömmu og pabba mat og hvorugt borðar sterkan mat og mamma borðar ekki ofangreint grænmeti. Ég gróf upp þessa uppskrift sem ég átti sem var með lauk og hvítlauk en tók það út og setti kjúklingabaunir og kartöflur í staðinn. Svo bætti ég við karrí og cumindufti og osti og útkoman var bara fínir grænmetisborgarar. Athugið að auðvitað má setja hvítlauk og lauk saman við ef þess er óskað.
 
Grænmetisborgarar án lauks
Gerir 20 borgara

• 500 gr gulrætur
  
• 1/2 dl grænar, frosnar baunir
  
• 250 gr kjúklingabaunir í dós, sigtið vökvann vel frá
  
• 2 stórar kartöflur, soðnar í mauk
  
• 3 egg
  
• 50 gr rifnn, magur ostur (11%)
  
• 1 dl spelti
  
• 1 tsk karríduft
  
• 1 tsk heilsusalt (Herbamare)
  
• 1 tsk pipar
  
• 1/2 tsk chillipipar
  
• 2 tsk karríduft
  
• 1/2 tsk cumin duft
  
  Aðferð:
  
• Gulræturnar rifnar fínt.
  
• Sjóðið kartöflurnar í mauk.
  
• Öllu blandað vel saman og meira spelti bætt við ef þetta er of blautt.
  
• Búið til frekar lítil og ekki of þykk buff í höndunum, þau eru svolítið laus í sér en það er allt í lagi.
  
• Setjið buffin í ofn og hitið við 200°c í svona 20-25 mínútur svo að þau verði örugglega bökuð í gegn (út af eggjunum).
  
• Það er gott að bera fram, tamarisósu (eða soyasósu), brún grjón og salat með þessum grænmetisborgurum.
  
  
• Það má setja allskyns grænmeti í þennan borgara, gular baunir, lauk auðvitað og svo tófú eða hrísgrjón t.d. í stað kartaflna.

Prenta þessa uppskrift     -     Senda þessa uppskrift

Mmm alveg ferlega góð uppskrift (frá Deliu Smith, bresku matreiðslukonunni sem er í miklu uppáhaldi hjá mér). Það var reyndar ekkert gaman að rífa hálft kíló af gulrótum með litla rifjárninu okkar úr Ikea (svona dúkkurifjárn) en það var alveg þess virði, útkoman verður rosalega góð get ég lofað ykkur, ég er reyndar búin að kaupa nýtt rifjárn núna!!!
 
Gulrótarbuff úr hráum gulrótum
Fyrir 2-3

• 500 gr gulrætur
  
• 1/2 dl grænar, frosnar baunir (enska: peas)
  
• 1-2 hvítlauksgeirar
  
• 2 vorlaukar (eða 1/2 blaðlaukur)
  
• 3 egg
  
• Smá appelsínusafi, hreinn
  
• 1/2 dl spelti
  
• 1 dl brauðmylsna (best að setja 1-2 brauðsneiðar (spelti eða heilhveiti) í matvinnsluvél. Athugið að í bakarísbrauðum er oft sykur og alltaf ger nema keypt sé gerlaust brauð).
  
• 1/2 tsk karríduft
  
• 1/2 tsk heilsusalt (Herbamare)
  
• 1 tsk pipar
  
• 1/4 tsk chillipipar
  
  Aðferð:
  
• Gulræturnar rifnar fínt og hvítlaukurinn pressaður.
  
• Vorlaukarnir saxaðir smátt.
  
• Öllu blandað vel saman og meira spelti bætt við ef þetta er of blautt. Gott er að kæla deigið í ísskáp í klukkutíma eða meira, buffin verða auðveldari í meðhöndlun.
  
• Búið til buff í höndunum, þau eru svolítið laus í sér en það er allt í lagi.
  
• Setjið buffin í ofn (á bökunarplötu með bökunarpappír) og hitið við 180°c í svona 15-20 mínútur svo að þau verði örugglega bökuð í gegn (út af eggjunum).
  
• Það er gott að bera fram léttsinnepssósu, brún grjón og salat með buffunum.
  
  
• Það má nota svolítinn appelsínusafa í staðinn fyrir eitt eða tvö af eggjunum og svo er voða gott að blanda nokkrum cashewhnetum eða furuhnetum saman við.
  

Prenta þessa uppskrift     -     Senda þessa uppskrift

Þessi uppskrift er líka frá Deliu Smith og ekkert síðri en hin "gulrótarbuffsuppskriftin".
 
Gulrótarbuff úr soðnum gulrótum
Fyrir 2-3

• 2 dl soðnar og stappaðar gulrætur
  
• 3 dl soðnar og stappaðar kartöflur
  
• 1 msk kókosfeiti eða ólífuolía
  
• 4 msk nýrifinn parmesan ostur
  
• 2 msk rasp (meira ef þarf). Best að nota speltbrauð (2ja daga gamalt er upplagt) og setja í smástund í matvinnsluvél. Athugið að speltbrauð í bakaríum er yfirleitt með geri sem og sykri svo best er að kaupa gerlaust speltbrauð.
  
• 1 tsk ítalskt krydd (t.d. frá Pottagöldrum)
  
• Heilsusalt (Herbamare), pipar
  
• 2-3 msk söxuð steinselja (má sleppa)
  
• Nokkrar matskeiðar spelti
  
  Aðferð:
  
• Öllu nema speltinu blandað saman og búin til 8 buff sem er svo velt upp úr spelti.
  
• Áður en buffin eru mótuð er gott að geyma deigið í ísskáp í um klukkutíma til að auðveldara verði að móta buffin.
  
• Bökuð í ofni í um 30-40 mínútur við 200°C.
  
  
• Berið fram með létt-sinnepssósu, hýðishrísgrjónum og fersku salati

Prenta þessa uppskrift     -     Senda þessa uppskrift

Hafragraut er nú óþarft að kynna. Hann er einfaldur, saðsamur, fullur af hollri og góðri orku og er eitt besta bensín sem maður getur fengið fyrir daginn. Maður getur bætt út á grautinn brytjuðum, þurrkuðum eða ferskum ávöxtum, kanil, hlynsírópi og svo mætti endalaust telja. Besti hafragrautur sem ég hef smakkað var í hálöndum skotlands sumarið 2006. Mitt í fjallendinu (tók 8 tíma með lest þangað frá London) var vin í eyðimörk, smá lestarstopp í Corrour (þar sem Trainspotting myndin var tekin), ég var svöng, mér var ískalt og rétt áður en við lögðum stað í gönguna fékk ég mér fulla skál af hafragraut við opinn arineld. Grauturinn var æði, enda eru Skotar þekktir fyrir hafragrautana sína. Það besta var að hann var búinn til í pottinum hjá Beth sem sá um staðinn og hann var búinn til með umhyggju og aðeins besta fáanlega hráefni. Hafragrauturinn dugði mér vel upp í fjallshlíðina enda er hann eins og áður segir frábært bensín.
 
Hafragrautur
Fyrir 2

• 100 gr haframjöl
  
• 600 ml undanrenna. Má nota vatn en mér finnst undanrenna eða mjólk betri.
  
• Smá heilsusalt (Herbamare)
  
• 1 tsk kanill (má sleppa)
  
• 1 msk hlynsíróp (enska: maple syrup), má sleppa. Einnig má nota 1 msk agavesíróp í staðinn.
  
  Aðferð:
  
• Setjið allt innihaldið í lítinn pott og sjóðið í um 7 mínútur. Standið við pottinn og hrærið í honum svo ekki sjóði upp úr.
  
• Hrærið smá kanil út í (má sleppa).
  
• Hrærið hlynsírópi út í (má sleppa).
  
• Bætið kaldri mjólk eða undanrennu út á eða borðið bara eins og hann er, soðinn.
  
• Bætið því út í sem ykkur dettur í hug, t.d. söxuðum döðlum eða fíkjum, rúsínum, aprikósum, ferskum ávöxtum eins og niðurskornum eplum, perum, bönunum o.s.frv.
  
  

Prenta þessa uppskrift     -     Senda þessa uppskrift

Þetta er uppskrift, tekin nánast beint frá Deliu Smith. Hún var "prófuð" á Jóhannesi og mömmu hans, Sigrúnu Sig. þar sem við bjuggum í Harrow (Bretlandi) 2002. Þau lifðu bæði af og kvörtuðu ekki svo mikið svo ég ákvað að setja uppskriftina inn. Það er smá dútl við uppskriftina svo það hentar vel að búa hana til t.d. á laugardagskvöldi.
 
Heslihnetu- og grænmetisborgarar með papriku- og coriandermauki
Fyrir 3-4

Fyrir borgarana:

• 75 gr heslihnetur
  
• 2 meðalstórar gulrætur, afhýddar og rifnar
  
• 2 sellerístönglar, saxaðir smátt (má nota gula papriku í staðinn)
  
• 1 meðalstór laukur, saxaður
  
• 2 msk fínt saxað hvítkál (má sleppa)
  
• 2 msk brauðmylsna (úr gerlausu speltbrauði en má nota gerlaust, heilhveitibrauð)
  
• 1 msk saxað, ferskt parsley (steinselja)
  
• Nokkrar klípur af cayenne pipar
  
• Smá klípa af múskatdufti
  
• 1 stórt egg
  
• 1 msk tómatpurée
  
• 1 msk hrein jógúrt
  
• salt og nýmalaður pipar
  
  Utan um borgarana:
  
• 1 stórt egg, lausþeytt (slegið með gaffli)
  
• 75 gr brauðmylsna (úr gerlausu speltbrauði en má nota gerlaust, heilhveitibrauð)
  
• Til að flýta fyrir má blanda þessu tvennu saman og blanda saman við borgarablönduna.
  
  Fyrir coriander- og paprikumaukið
  
• 1 rauð eða appelsínugul paprika
  
• 1 lítill grænn chillipipar
  
• 1/2 lítill rauðlaukur
  
• 2 msk ferskt coriander
  
• 2 msk safi úr lime (límóna)
  
• 1 stór tómatur, afhýddur og saxaður (til að afhýða tómat er best að setja hann í sjóðandi heitt vatn í 5 mínútur, setja hann svo í plastpoka, loka fyrir í 5 mínútur og taka svo hýðið af
  
• 1/2 tsk agavesíróp (var ekki í upphaflegu uppskriftinni)
  
  Aðferð:
  
• Forhitið ofninn í 200°c
  
• Fyrst þarf að búa til borgarana.
  
• Byrjið á því að dreifa heslihnetunum á litla bökunarplötu og grillið þá í ofninum í 5-6 mínútur, ekki lengur.
  
• Takið hneturnar úr ofninum og kælið. Nuddið hýðinu af.
  
• Setjið svo hneturnar í blandara þegar þær eru orðnar kaldar og malið í fínt duft.
  
• Setjið heslihnetuduftið í skál með rifna og saxaða grænmetinu, brauðmylsnunum, stenseljunni, cayenne piparnum, múskatduftinu og hrærið vel.
  
• Í annari lítilli skál, setjið eggið, tómat puréeið og jógúrtina saman og blandið vel.
  
• Bætið svo við í grænmetisblönduna.
  
• Kryddið með salti og pipar og hrærið vel að lokum.
  
• Búið til 8 borgara (gott að kæla blönduna í klukkutíma áður en klattar eru mótaðir). Þetta er gert svo að borgararnir verði stífir og og brotni ekki við eldun.
  
• Dýfið hverjum borgara í egg fyrst, svo í brauðmylsnu og setjið á bökunarplötu með bökunarpappír undir.
  
• Bakið í 20 mínútur, snúið þá og bakið í aðrar 20 mínútur (má gjarnan vera aðeins lengur ef maður vill harða skorpu).
  
  
• Á meðan, skuluð þið setja allt hráefnið fyrir coriander- og paprikumaukið (nema agavesírópið) í matvinnsluvél og blandið í nokkrar sekúndur þannig að verði fínt saxað en ekki þannig að það verði að algeru mauki. Kælið. Ef mikil bleyta er í maukinu má sigta það aðeins.
  
• Bætið agavesírópinu saman við og kælið.
  
• Gott er að búa til maukið deginum áður.
  
  
  
  
• Gott að bera fram með salati og létt-sinnepssósu
  

Prenta þessa uppskrift     -     Senda þessa uppskrift

Það er eitthvað alveg stórkostlegt við að búa til sitt eigið hnetusmjör og um leið spara helling af peningum. Jóhannes borðar mikið af hnetusmjöri (hann borðar ekki kaldan ost (aðeins bræddan) og vantar því oft álegg ofan á brauð o.fl.). Hnetusmjör hentar honum líka vel því það er prótein í því, holl fita og er því ákaflega seðjandi. Hnetusmjör passar líka bara í svo margt. Alls kyns drykki, til ísgerðar, í smákökur, ofan á brauð og margt fleira. Hnetusmjör er líka hollt (í hóflegu magni auðvitað) og ég tala nú ekki um ef maður hleður ekki í það sykri, hellings salti o.fl. eins og í sumu keyptu hnetusmjöri. Jarðhnetur innihalda helling af manganese og eru góðar fyrir hjarta, geta hindrað myndun gallsteina, eru góðar fyrir heilasellurnar og margt fleira. Það er minna en ekkert mál að búa svona hnetusmjör til heima hjá sér. Það eina sem þið þurfið er matvinnsluvél eða blandari. Ef þið eruð ekki með góðar græjur borgar sig að skipta magninu í tvennt og vinna með helminginn í einu. Eini gallinn við jarðhnetur er að margir hafa alvarlegt ofnæmi fyrir þeim (bráðaofnæmi), maður ætti því alltaf að fara varlega í að gefa ungum börnum jarðhnetur/hnetusmjör nema ef þið eruð viss um að þau þoli hneturnar. Vissuð þið að jarðhnetur tilheyra baunum (pea) en ekki hnetum! Athugið að ef þið kaupið saltaðar hnetur getið þið skolað saltið af þeim og bakað við 160°C í 10-12 mínútur.
 
Hnetusmjör
Gerir 500 gr

• 500 gr jarðhnetur (peanuts), ósaltaðar, óristaðar og ekki í skel. Nota má ristaðar og saltar hnetur líka (sjá aðferðarlýsingu)
  
• 3-4 msk hnetuolía (eða ólífuolía), gæti þurft meira
  
• 2 msk agave síróp
  
• Smá klípa salt (Himalaya eða sjávarsalt). Ef þið notið hnetur sem áður voru saltaðar, þarf ekki auka salt
  
  Aðferð:
  
• Ef hneturnar eru í hýðinu þarf að fjarlægja það (mér finnst það a.m.k. betra).
  
• Hitið stóra pönnu.
  
• Þurristið hneturnar í 10 mínútur eða þangað til þær eru farnar að taka lit (brúnast).
  
• Látið hneturnar kólna.
  
• Nuddið hýðið af hnetunum með lófanum. Það ætti að fara auðveldlega af. Athugið að þetta er eitthvað sem er gott að láta krakka dunda sér við!
  
• Ef þið viljið gróft hnetusmjör, takið þá 2 lúkur af hnetum frá og setjið til hliðar.
  
• Setjið hneturnar í matvinnsluvél.
  
• Maukið í 3 mínútur samfleytt. Ef vélinni gengur illa að vinna hneturnar (hoppar til og frá eða erfiðar) skiptið magninu þá í tvennt.
  
• Setjið olíuna og agavesírópið út í skálina í mjórri bunu á meðan vélin vinnur.
  
• Bætið afganginum af jarðhnetunum út í (ef þið viljið hnetumsjörið gróft) og maukið í 30 sekúndur.
  
• Bætið saltinu út í (ef þið notið ósaltaðar hnetur) og maukið í 3-5 mínútur (með hléum ef þarf). Þið gætuð þurft að skafa hliðar skálarinnar öðru hvoru.
  
• Hnetusmjörið ætti að vera orðið alveg maukað, aðeins glansandi og nánast alveg slétt. Það verður ekki fljótandi heldur meira eins og þykkt mauk.
  
• Smakkið til með meira salti og agave sírópi ef þarf. Ef það er of þurrt, bætið þá aðeins af olíu út í. Ekki nota vatn því hneturnar mygla fljótt af því.
  
  
• Athugið að ef þið kaupið saltaðar hnetur getið þið skolað saltið af þeim með rennandi vatni (skolið 5-6 sinnum í sigti og látið svo renna af þeim í 10 mínútur). Dreifið hnetunum á bökunarplötu og bakið þær við 160°C í 10-12 mínútur. Slökkvið á ofninum og látið hneturnar kólna alveg inni í honum. Setjið svo hneturnar í matvinnsluvélinna eins og stendur hér í lýsingunni fyrir ofan. Ef þið notið hnetur sem búið er að salta, skuluð þið ekki bæta við meira af saltinu.
  
• Þessa uppskrift má einnig nota fyrir cashewhnetur, möndlur, heslihnetur o.fl.

Prenta þessa uppskrift     -     Senda þessa uppskrift

Þetta poppkorn er alveg örugglega hollasta poppkorn sem þið getið búið til. Það er nauðsynlegt að eiga loftpoppvél (air popper) en þeir fást í flestum heimilistækjabúðum. Best er að kaupa þannig vél að hægt sé að poppa beint í skál. Svoleiðis græja kostar ekki mikið og er frábær fjárfesting. Svo þarf maður olíuúðabrúsa (ég blanda saman smá ólífuolíu og vatni. Svoleiðis fæst í t.d. Pipar og Salt og ég get lofað ykkur að það verður ein mest notaða græjan á heimilinu! Í 100 gr af venjulegu poppkorni sem keypt er geta verið um 400 hitaeiningar og allt að 40 grömm af fitu svona til viðbótar við saltið sem er svo mikið að það gæti hækkað blóðþrýstinginn í grjóti. Í þessu poppi er kannski 1 gramm af fitu, um 2 gr af salti (helmingurinn af því verður eftir í skálbrúnunum) og svona um 50-100 hitaeiningar. Ég ætla ekki einu sinni að nefna "bíópopp" á nafn (bannað á þessu heimili...það er eiginlega blótsyrði he he). Þetta poppkorn er líka sniðugt fyrir krakka því það er mun minna salt í þessu en venjulegu poppi.
 
Hollustupoppkorn
Fyrir 1-2

• 90 gr poppmaís (best er að kaupa lífrænt ræktaðan maís)
  
• Olíuúði (ólífuolía og vatn)
  
• 1/2 tsk (um það bil) Heilsusalt (Herbamare)
  
  Aðferð:
  
• Spreyið nokkrum olíumbunum í hliðarnar innan í skálinni og dreifið með fingrunum (gott að vera í þunnum plasthönskum)
  
• Dreifið smávegis af saltinu vel, gott að dreifa með fingrum ef það lendir allt á einum stað.
  
• Poppið poppmaísinn og hafið skálina undir.
  
• Hreyfið poppkornið vel í skálinni til þess að hann nái salti og olíu/vatni í sig.
  
• Þegar um helmingur skálarinn er fullur, endurtakið þá með olíuúða og salti (spreyið nokkrum bunum og stráið salti yfir).
  
• Þegar skálin er full, endurtakið þá aftur.
  
• Bætið meira salti við ef þið viljið hafa poppið saltara.
  
  

Prenta þessa uppskrift     -     Senda þessa uppskrift

Hörfræ eru alveg sérstaklega holl. Þau eru trefjarík og losa um þarna í pípulögninni á neðri hæðinni þannig að ekkert á að stíflast (hvernig getur maður útskýrt hægðir án þess að það hljómi fáránlega?)! Þess vegna eru hörfræ mikilvæg í baráttunni við að sporna gegn krabbameini t.d. í blöðruhálskirtli. Hörfræ eru líka stútfull af Omega 3 fitusýrum sem eru milvæg fyrir bein okkar, hjarta sem og í að sporna gegn of háum blóðþrýstingi(sérstaklega hjá karlmönnum). Fyrir konur á breytingaskeiðinu eru hörfræ gagnleg til að hamla gegn hitakófum. Eða svo er sagt. Þessar kexkökur eru frábærar í stað hefðbundinna brauðsneiða og eru kjörin tilbreyting þegar mann langar í eitthvað hollt en gott og saðsamt.
 
Hörfræskex
Gerir um 40-45 kexkökur

• 3 bollar hörfræ
  
• 1/4 bolli tamarisósa
  
• 4 msk krydd (notið það sem ykkur finnst best) t.d. steinselja, paprika, karrí
  
• 4 msk lífrænt framleidd tómatsósa
  
• 4 msk vatn (ef þarf)
  
  Aðferð:
  
• Setjið fyrst 1 bolla af hörfræjunum í matvinnsluvél eða blandara og malið fínt án þess að fræin verði olíukennd. Ætti að vera nóg að blanda í u.þ.b. 15 sekúndur.
  
• Setjið í skál.Bætið ómöluðu hörfræjunum (2 bollum) og kryddinu út í skálina og hrærið vel.
  
• Bætið tamarisósunni og tómatsósunni saman við og hrærið vel.
  
• Ef blandan virkar þurr getið þið sett vatnið út í.
  
• Setjið bökunarpappír í botninn á 40x44cm bökunarplötu (eða um það bil).
  
• Hellið öllu úr skálinni ofan á plötuna og þrýstið með höndunum vel ofan á blönduna þannig að hún verði jafnþunn alls staðar og nái eins vel út í kantana og þið getið. Kexið ætti að verða um 1 mm á þykkt eða svo.
  
• Bakið í um 20-25 mínútur við 160°C.
  
• Látið kólna í ofninum og skerið í bita.
  
  
• Athugið að aðeins mylst af köntunum af kexinu en safnið því bara saman í dós og notið í næsta skammt eða sem krydd út á salat.
  
• Kexið er gott með t.d. osti, smurosti, grænmetiskæfu, túnfisksalati o.fl.
  

Prenta þessa uppskrift     -     Senda þessa uppskrift

Kartöfluflögur.....algerlega fitulausar? Jábbs. Prófið bara sjálf. Þessar getið þið borðað fyrir framan sjónvarpið með góðri samvisku!! Ég veit ekkert hversu lengi þessar geymast því þær klárast alltaf á fyrstu 5 mínútum eftir að þær koma út úr ofninum! Ok það vantar djúsí fitubragðið en hverjum er ekki sama. Þessar má allavega borða svona hvunndags og geyma þessar óhollu þá fyrir nammidagana!!
 
Kartöfluflögur
Fyrir 1-2

• 2 stórar kartöflur (þessar með mjög þunnu hýði, mjög þéttar í sér, helst nýjar)
  
• Heilsusalt (Herbamare)
  
  Aðferð:
  
• Skerið kartöfluna í ör, ör, næfurþunnar sneiðar, eins þunnar og þið mögulega getið (tæpan hálfan millimetra). Gott að nota lítinn grænmetishníf með riffluðu blaði eða mandolin skera.
  
• Raðið á ofnplötu, með bökunarpappír undir.
  
• Saltið eftir smekk.
  
• Hitið í bakaraofni á um 80°C í 1 klukkutíma.
  
• Hækkið hitann í 100°C í um 30 mínútur (bakað samtals í um 1,5 klukkutíma)
  
• Berið fram strax.
  
  
• Hægt er að krydda með einhverju öðru en salti t.d. papriku eða lauk/hvítlauk. Passið að nota holl og góð krydd eins og t.d. frá Rapunzel eða Pottagöldrum.
  
• Hægt er að sneiða sætar kartöflur, rófur og hvers kyns rótargrænmeti til að baka.
  
• Það er rosa gott að nota kartöfluhýði líka. Eitthvað sem er sniðugt að láta eldri krakka bardúsa við og sjá um þ.e. skræla soðnar kartöflur og henda þeim inn í ofn!!

Prenta þessa uppskrift     -     Senda þessa uppskrift

Þessi uppskrift kemur upprunalega úr bók sem ég á sem heitir Delia’s Vegeterian Collection og er ein af uppáhalds uppskriftabókunum mínum. Ég er aðeins búin að breyta uppskriftinni með tímanum en meginuppistaðan er sú sama, kjúklingabaunir. Ég prófaði þessi buff í fyrsta skipti í útilegu! Ég var búin að hafa allt til og meira að segja búin að baka þau og svo hituðum við buffin bara á gasi í tjaldinu okkar undir Sólheimajökli. Það var skrýtinn svipur á lömbunum og mæðrum þeirra fyrir utan tjaldið og satt best að segja var ég mjög fegin því að vera ekki að grilla ættingja þeirra, ég hefði örugglega fengið martraðir og samviskubit. Ég borða hvort eð er ekki lambakjöt, finnst það hrikalega vont og JÁ ég er búin að fá allar heimsins útgáfur, lambalundir, læri, heilt, grillað, marinerað, soðið, hitað, steikt o.s.frv. Mér finnst það alltaf jafn vont og fólki finnst það alltaf jafn mikil landráð og reynir alltaf jafn mikið að sannfæra mig um að það SÉ í rauninni gott (þó mér finnist það ekki):) Svona er maður nú skrýtinn.
 
Kjúklingabaunabuff með hvítlauksjógúrtsósu
Fyrir 3-4 (10-12 buff)

• 450 gr niðursoðnar kjúklingabaunir (athugið að vatnið reiknast ekki með, einungis baunirnar sjálfar)
  
• 1 kúfull skeið af coriander fræjum
  
• 1 kúfull skeið af cumin fræjum (ekki kúmen heldur cumin)
  
• 1 lítill laukur, saxaður gróft
  
• 1 græn paprika, söxuð gróft
  
• 2 stórir hvítlauksgeirar
  
• 2 rauðir, litlir chilli pipar, saxaðir gróft
  
• 5 sólþurrkaðir tómatar (olían þerruð af)
  
• 50 gr rifinn magur ostur (má sleppa)
  
• 1/2 tsk turmeric
  
• 1 tsk karrí
  
• 1 msk sítrónusafi
  
• 10 gr ferskt coriander
  
• 100-200 gr AB mjólk eða hrein jógúrt (meira eftir þörfum)
  
• 1 stórt egg, hrært lauslega
  
• 3 msk spelti
  
• 1 msk kókosfeiti eða ólífuolía
  
• 1 tsk heilsusalt (Herbamare)
  
• 1/2 tsk pipar
  
  Aðferð:
  
• Þurrristið corianderfræin og cuminfræin á pönnu þangað til þau fara að ilma og hoppa til á pönnunni. Malið fræin í kryddkvörn eða malið þau í mortéli.
  
• Setjið laukinn, chillipiparinn, paprikuna og hvítlaukinn í matvinnsluvél og malið frekar fínt, ekki samt alveg í mauk.
  
• Bætið fræjunum við ásamt karríinu og turmericinu og malið í nokkrar sekúndur. Setjið í stóra skál.
  
• Næst skal setja kjúklingabaunirnar í matvinnsluvél, ásamt ferska coriandernum og sólþurrkuðu tómötunum og látið saxast aðeins. Ekki mauka alveg því það á að vera smá til að bíta í.
  
• Setjið þetta í stóru skálina og blandið öllu saman.
  
• Bætið egginu saman við ásamt kókosfeitinni.
  
• Bætið speltinu saman við.
  
• Bætið jógúrtinu/AB mjólkinni saman við ásamt sítrónusafanum. Ef deigið er of stíft, setjið þá aðeins meira af jógúrt/AB mjólk, ef það er of lint, bætið þá meira af spelti saman við.
  
• Ef ostur er notaður, bætið honum þá út í hér.
  
• Kælið í smástund í ísskáp.
  
• Mótið í u.þ.b. 12 flöt buff.
  
• Hitið við 190°C í um 30-40 mínútur, snúið a.m.k. einu sinni.
  
  Hvítlauksjógúrtsósa
  
• 400 ml hreint jógúrt eða ab mjólk.
  
• 1 tsk heilsusalt (Herbamare).
  
• 1 tsk hvítlauksduft frá Pottagöldrum eða 1 pressað hvítlauksrif.
  
• 1/4-1/2 tsk svartur pipar.
  
• Blandið öllu saman og kælið.
  
  
• Upphafleg uppskriftin var þannig að coriander og rauðlaukssalat ásamt jógúrti átti að vera sem meðlæti í stað jógúrtsósunnar.

Prenta þessa uppskrift     -     Senda þessa uppskrift

Þetta er sama uppskrift og að "Korma kjúklingi með frönskum baunum" hér á síðunni. Ég er semsagt bara búin að skipta út kjúklingi fyrir grænmeti.
 
Korma grænmetiréttur með raita gúrkusósu
Fyrir 3-4

• 1 tsk kókosfeiti eða ólífuolía + smá vatn
  
• 150 gr blómkál, léttsoðið og í litlum sprotum
  
• 150 gr spergilkál, léttsoðið og í litlum sprotum
  
• 150 gr kartöflur, léttsoðnar og í litlum bitum
  
• 150 gr gulrætur, léttsoðnar og í litlum sneiðum
  
• 150 gr kúrbítur (zucchini), skorið í litla bita
  
• 2 laukar, sneiddir fínt
  
• 5 msk corma curry powder (Korma karrí krydd)
  
• 300 ml grænmetissoð
  
• 2 tsk tomate puree (tómatkraftur)
  
• 3 tsk ávaxtasykur eða strásæta
  
• 125 gr tómatar, skornir í bita
  
• 300 ml léttmjólk eða fitulaus jógúrt
  
• 2 msk kornsterkja (corn starch eða arrow root), hrært út í mjólkinni
  
• 250 gr "French Beans" (langar og mjóar baunir, sem eru bara eins og stönglar þ.e. ekki með eiginlegum "baunum" innan í og maður getur borðað þær hráar). Snyrtið og skerið í 1 cm. langa bita
  
• 30 gr möndluduft
  
• 20 gr möndlur, þurristaðar á pönnu
  
  Aðferð:
  
• Hitið kókosfeitina eða ólífuolíuna og vatnið á stórri pönnu.
  
• Bætið lauknum við og hitið í u.þ.b. 6 mínútur eða þangað til laukurinn er orðinn mjúkur.
  
• Hrærið korma karríinu saman við og hitið í aðrar 2 mínútur.
  
• Bætið við kjúklingasoðinu, tómatkraftinum, sykrinum, tómötunum, mjólkinni/jógúrtinu og smávegis af salti.
  
• Hrærið vel og látið sjóða í um 10 mínútur.
  
• Bætið baununum, kúrbítnum, gulrótunum, kartöflunum, blómkálinu og spergilkálinu saman við og hitið í 20 mínútur.
  
• Að síðustu skal bætt við möndluduftinu og látið hitna í nokkrar mínútur.
  
• Dreifið þurristuðu möndlunum yfir réttinn.
  
• Berið fram með brúnum hrísgrjónum og raita gúrkusósu.
  
  Raita gúrkusósa
  
• 1 meðalstór gúrka
  
• 1 tsk cumin fræ (ekki kúmen)
  
• 500 ml hreint, fitusnautt jógúrt
  
• 1 hvítlauksgeiri, kraminn eða skorinn fínt
  
• 2 msk ferskt coriander, saxað
  
• Notið cayenne eða paprikuduft til skreytingar
  
  Aðferð:
  
• Flysjið gúrkuna og skerið langsum í 1 cm. lengjur og svo í litla bita.
  
• Þurrkið bleytu með þurrku.
  
• Ristið cumin fræin í nokkrar sekúndur á heitri pönnu.
  
• Hrærið saman cumin, hvítlauk og coriander í skál.
  
• Blandið gúrkunni saman við og kryddið með papriku eða cayenne.
  
• Kælið áður en þið berið raita sósuna fram.
  
  
• Það má nota alls kyns grænmeti í þennan rétt, um að gera að prófa.
  
• Það er gott að bera fram chapati brauð með þessum rétti.

Prenta þessa uppskrift     -     Senda þessa uppskrift

Þessir eru alveg svakalega fínir og alveg æðislegir eftir ræktina til að hjálpa vöðvunum aðeins til að stækka. Það er góð orka og holl fita í bitunum og þeir eru því upplagðir líka í skólann, í vinnuna, í gönguna o.s.frv. Gætið að því að börn ættu ekki að borða undanrennuduft (fyrir vaxtarrækt) nema í samráði við lækni eða næringarfræðing. Börn ættu því ekki að borða þessa bita. Það má líka auðvitað sleppa undanrennuduftinu!
 
Kraftaköggull - fyrir ræktina
Gerir um 10 -12 stykki

Kraftaköggull

• 1 bolli cashewhnetur (um 2,5 dl bolli)
  
• 1/4 bolli möndlur
  
• 1/2 bolli kókosmjöl
  
• 1 bolli puffed rice sem fæst í Heilsuhúsinu eða puffed spelt, (puffed spelt) fæst í Yggdrasli (má sleppa en gefur góða fyllingu)
  
• 15-20 gráfíkjur (um 250 gr), skerið litla stubbinn á endanum af, saxið gróft
  
• 8-10 döðlur, saxið gróft
  
• 1/2 bolli rúsínur
  
• 2-4 msk hreinn appelsínusafi
  
• 1-2 msk hreint hlynsíróp (enska: maple syrup) eða agavesíróp
  
• 4 msk carobduft (má nota kakóduft, notið þá lífrænt framleitt og gott kakó)
  
• 2 msk undanrennuduft (mér finnst Solgar (lífræn framleiðsla og fyrir grænmetisætur) mjög gott en einnig má nota venjulegt, íslenskt undanrennuduft). Einnig má nota eitthvað annað próteinduft sem þið eruð vön að nota fyrir vaxtarækt/líkamsrækt.
  
  Aðferð:
  
• Malið möndlur og hnetur og kókos (og puffed rice eða puffed spelt ef notað) í matvinnsluvél.
  
• Bætið carobdufti saman við ásamt undanrennudufti og malið aðeins áfram.
  
• Setjið í stóra skál.
  
• Maukið döðlur, gráfíkjur og rúsínur með hlynsírópinu og appelsínusafanum þangað til allt er orðið að mauki.
  
• Blandið öllu vel saman, jafnvel í hrærivél (gott að vera í þunnum plasthönskum ef þið notið hendurnar).
  
• Mótið stórar kúlur (álíka stóra og litlar golfkúlur) og fletjið svo út þannig að verði um 1 cm. að þykkt.
  
• Áferðin á deiginu á að vera nokkuð þétt, alls ekki blaut en allt á samt að festast vel saman.
  
• Gott að láta blönduna bíða aðeins í kæli, betra að móta bitana þannig.
  
  Próteinkrem:
  
• 20 gr undanrennuduft. Ef notað eru próteinduft til líkamsræktar (til dæmis Solgar) skal nota 40 gr. Þau eru léttari en hefðbundið undanrennuduft.
  
• 2 tsk carobduft
  
• 2-3 msk hlynsíróp (enska: maple syrup)
  
  Aðferð:
  
• Blandið varlega saman, smyrjið um 1/2 tsk á hvern bita og látið harðna í ísskáp (harðnar alveg á 2-3 dögum en fer eftir því hvað kremið er blautt).
  
• Kremið ætti að leka smá en ekki mjög mikið samt, á að vera frekar stíft þegar það er sett á bitana.
  
• Þegar kremið er orðið hart má pakka bitunum inn í plast.
  
  
• Það er ofsalega gott svona til tilbreytingar að bæta við rifnum appelsínuberki (af einni appelsínu) og 3 msk af appelsínumarmelaði eða appelsínusultu (hreinu, án viðbætts sykurs, án gelatíns og án auka- og bragðefna.
  
• Notið aðeins hlynsíróp þ.e. ekki byggmaltsíróp eða hunang því það harðnar ekki eins og hlynsírópið og því erfiðara að pakka bitunum inn.

Prenta þessa uppskrift     -     Senda þessa uppskrift

Þetta salat þekkja eflaust margir sem hafa verið á Ítalíu og er líklega ein af ástæðunum fyrir því að Ítalir lifa svona lengi því það er nefnilega svo óskaplega hollt. Þetta er dásamlega einfalt, bragðgott og upplagt sem forréttur eða sem léttur hádegismatur með hvítlauksbrauði. Mér finnst rosa gott að nota avacado líka.
 
Mozzarella salat með tómötum og basil
Fyrir 2 sem forréttur

• 3 vel þroskaðir, stórir og fallegir tómatar
  
• 150 gr mozzarella ostur, léttur ef hann er til
  
• 1 msk extra virgin ólífuolía
  
• 10 basilblöð
  
• 1/2 vel þroskað avacado (má sleppa)
  
• Heilsusalt (Herbamere)
  
• Svartur pipar
  
  Aðferð:
  
• Setjið tómatana í skál, hellið sjóðandi vatni yfir þá og liggja í 1-2 mínútur.
  
• Fjarlægið skinnið af tómötunum og skerið þá í sneiðar.
  
• Skerið mozzarella ostinn í sneiðar.
  
• Afhýðið avacadoið og skerið í sneiðar.
  
• Setjið tómatsneið á stóran disk og mozzarella ost ofan á. Endurtakið þangað til allt er búið.
  
• Dreifið avacado sneiðunum yfir.
  
• Dreifið basil blöðunum yfir.
  
• Hellið ólífuolíunni yfir.
  
• Saltið og piprið.
  
• Berið fram strax.
  
  

Prenta þessa uppskrift     -     Senda þessa uppskrift

Grunninn að þessari uppskrift fékk ég um daginn hjá Smára bróður sem er kokkur mikill. Hún er örlítið breytt en ekki mikið, aðal uppistaðan er sú sama. Þetta er MJÖG gott muesli og mun betra en það sem maður kaupir út í búð, fyrir utan það að vera milljón sinnum hollara. Það er nú bara brandari að skoða innihald morgunkorna. Af hverju er það ekki sett í nammideildina? Súkkulaði, hunang, sykur og síróp á ekki heima í morgunmat!!
Þetta muesli er sem sagt með afskaplega lítilli viðbættri fitu (einungis holl fita) og alveg pakkfullt af vítamínum. Það er heldur ekki of sætt og það besta er að maður getur sjálfur stjórnað því hversu sætt það er.
 
Muesli (eiginlega granóla)
Dugar í rúma viku

• 2 bollar stórar hafraflögur (haframjöl), má líka nota spelthafra
  
• 1 bolli spelthafrar (lítur út eins og gróft haframjöl)
  
• 1/2 bolli sólblómafræ
  
• 1/4 bolli heslihnetur, þurristaðar í ofni í u.þ.b. 5 mínútur á mjög háum hita, efst í ofninum. Hýðið tekið af og hneturnar svo saxaðar gróft (má sleppa hnetunum)
  
• 2 msk kókosfeiti og vatn. Best að setja saman í úðabrúsa.
  
• 6 msk ávaxtasykur (eða agavesíróp og vatn í úðabrúsa. Einnig má nota hreint hlynsíróp (enska: maple syrup))
  
• 4 msk gróft kókosmjöl (má sleppa en er mjög gott samt)
  
• 3/4 bolli rúsínur
  
• 3/4 bolli döðlur
  
• 1/2 bolli aprikósur
  
  Aðferð:
  
• Forhitið ofninn í 160°C.
  
• Saxið ávextina.
  
• Þurrefni hrærð saman og kókosolíunni dreift yfir. Best er að nota 50/50 vatn og kókosfeiti og nota úðabrúsa.
  
• Dreifið mueslinu á plötu með bökunarpappír undir og sáldrið smá vatni yfir með úðabrúsa eða fingrunum.
  
• Dreifið 3 msk af ávaxtasykri yfir og hrærið vel í blöndunni.
  
• Bakið þurrefnin fyrst í 25-30 mínútur en gætið þess að hræra að minnsta kosti einu sinni í blöndunni á meðan. Þegar þið takið hana út, skuluð þið úða smá vatni yfir og setja 3 msk af ávaxtasykri yfir.
  
• Blandið söxuðu ávöxtunum, kókosmjölinu (ef notað) og hnetunum saman við og hitið í um 10 mínútur eða þangað til rúsínurnar eru orðnar svolítið bólgnar (þær skreppa saman aftur). Einnig má sleppa því að baka ávextina og dreifa þeim óbökuðum saman við.
  
  
• Það má setja allt mögulegt í mueslið og um að gera að prófa sig áfram. T.d. mætti nota sesamfræ, valhnetur, cashewhnetur, fíkjur, þurrkaðan ananas, þurrkað mangó, þurrkuð epli o.s.frv.
  
• Einnig má hita ávextina sér og blanda þeim saman seinna. Ávextirnir munu skreppa saman en þið losið það bara þegar þeir eru orðnir kaldir.
  

Prenta þessa uppskrift     -     Senda þessa uppskrift

Hrikalega hollt og heimatilbúið fyrir utan að vera bæði ódýrara og betra en út úr búð (að mínu mati að minnsta kosti). Eftir langa leit að muesli sem ég gat hugsað mér að kaupa gafst ég upp og bjó til mína eigin útgáfu..ég þoli nefnilega ekki svona kusk og mulning í muesli og það verður að innihalda fullt af gómsætu dóti eins og þurrkuðum ávöxtum og hnetum, þoli ekki eitthvað rugl á morgnana, er nógu úrill fyrir he he. Pakkfullt af vítamínum og hollri fitu, þetta er gott bensín að morgni! Svona okkar á milli er þetta uppáhalds mueslið mitt.
 
Muesli með hnetum, fræjum og þurrkuðum ávöxtum
Fyrir 1-2 í nokkrar vikur

• 2 bollar haframjöl (ég miða við 250 ml bolla)
  
• 1 bolli spelthafrar (eða tröllahafrar)
  
• 1 bolli speltflögur (spelt kornflakes), fæst í heilsubúðum. Líta út eins og útflattar, svolítið krumpaðar og brúnar flögur.
  
• 1/2 bolli þurrkaðir bananar, fást í heilsubúðum
  
• 1/2 bolli þurrkaðar aprikósur (þessar brúnu, ekki þessar appelsínugulu). Þessar brúnu fást í heilsubúðum og heilsuhornum matvöruverslana (þær eru ekki sulphurizeraðar)
  
• 1/2 bolli döðlur
  
• 1 bolli rúsínur
  
• 1/2 bolli möndluflögur
  
• 1/2 bolli sólblómafræ
  
• 1/2 bolli heslihnetur, þurrristaðar á pönnu. Fjærlægið hýðið og saxið hneturnar gróft
  
• 1/4 bolli graskersfræ
  
• 1/4 bolli hörfræ
  
• 2 tsk kúfullar byggmaltsíróp, blandað saman við 2 msk af vatni. Má sleppa en gefur gott bragð og alls ekki of sætt
  
  Aðferð:
  
• Saxið þurrkuðu ávextina (nema rúsínúr) í litla bita og setjið til hliðar.
  
• Blandið haframjölinu og spelthöfrunum eða tröllahöfrunum saman í skál.
  
• Sigtið allt mjöl í fíngötuðu sigti því þá fer allt kusk úr (sem ég þoli ekki við muesli sem maður kaupir út í búð).
  
• Blandið þurrkuðu ávöxtunum saman við ásamt möndluflögunum, fræjunum öllum og söxuðu hnetunum.
  
• Ef byggmaltsíróp er ekki notað getið þið hrært vel í mueslinu með höndunum og sett í glerkrukku til að geyma (geymist í margar vikur).
  
• Ef byggmaltsíróp er notað:
  
• Blandið byggmaltsírópið saman við vatnið og blandið mjög vel með teskeið.
  
• Dreifið byggmaltsírópinu í mjórri bunu yfir hafrablönduna og hrærið vel í á meðan.
  
• Dreifið á nokkrar bökunarplötur með bökunarpappír undir og látið þorna í nokkra klukkutíma eða yfir nótt eða hitið í ofni á um 50°C í 30 mínútur.
  
  
• Gott er að nota kókosflögur út í.
  
• Skipta má út þurrkuðu ávöxtunum fyrir aðra t.d. má nota döðlur og þurrkuð epli í staðinn fyrir banana og rúsínur svo dæmi sé tekið. Einnig er gott að setja ristaðar kókosflögur út í.
  
• Einnig má nota sesamfræ og margt annað í staðinn fyrir sólblómafræ.

Prenta þessa uppskrift     -     Senda þessa uppskrift

Þetta er nú eiginlega engin uppskrift heldur frekar upptalning. Ég hef aldrei skilið þetta að kaupa sér rúsínur og hnetur í poka því maður getur gert svona blöndu heima hjá sér á innan við 5 mínútum. Svo er líka miklu ódýrara að útbúa svona nemendanasl heima heldur en að kaupa tilbúið nasl í búð. Fyrir utan það að með eigin nemendanasli getur maður blandað nákvæmlega því sem maður vill saman og þarf sem dæmi ekki að tína sykraða banana úr pokanum. Það er afar mikilvægt að námsfólk borði hollt snakk á meðan á lestri stendur og það er einmitt upplagt að borða einómettaðar fitusýrur eins og eru í hnetunum og ef þið eigið valhnetur er það ekki verra því þær eru súper hollar og innihalda omega 3 fitusýrur sem eru góðar fyrir heilasellurnar og allt hitt í líkamanum (æðar og hjarta o.fl.)! Þetta nemendanasl er próteinríkt, inniheldur holla fitu, náttúrulegan sykur úr þurrkuðum ávöxtum og fjölmörg vítamín auðvitað. Einnig er gott að henda út í blönduna svona eins og lúku af möndlum en þær eru auðvitað afar kalkríkar. Sem extra bónus fyrir góða frammistöðu á bókasafninu er súkkulaði í blöndunni en þið getið auðvitað sleppt því (ef þið hafið ekki verið nógu dugleg). Blandan hentar afar vel í prófunum (næg og góð orka) og hentar líka vel í ferðalög, göngur og nesti í vinnuna o.fl.
 
Nemendanasl
Fyrir einn svangan nemanda

• 1 lúka rúsínur
  
• 1 lúka döðlur, saxaðar gróft
  
• 1 lúka gráfíkjur, saxaðar gróft
  
• 1/2 lúka graskersfræ
  
• 1/2 lúka heslihnetur (gott að rista þær og losa hýðið af), saxaðar gróft
  
• 1/4 lúka aprikósur, saxaðar gróft
  
• 1/4 lúka cashewhnetur
  
• 1/4 lúka dökkt, gott lífrænt framleitt súkkulaði með hrásykri
  
  Aðferð:
  
• Blandið í box eða poka.
  
  
• Einnig má nota valhnetur, möndlur, brasilíuhnetur, pecanhnetur, þurrkaða banana (ekki sykraða), þurrkuð epli, sólblómafræ og margt fleira.

Prenta þessa uppskrift     -     Senda þessa uppskrift

Verulega, verulega hollt, saðsamt, næringarríkt, fullt af vítamínum, hollri fitu og flóknum kolvetnum. Þetta er eldsneyti sem dugar manni vel yfir daginn, fullkomið í nestisboxið í skólann, vinnuna, í gönguna og í raun hvar sem er. Ég þarf ekki að taka fram að best er að nota lífrænt framleitt/ræktað hráefni. Það má sleppa kreminu en það gefur gott bragð og mótvægi við sætt innihaldið í kökunni. Bitarnir geymast vel í ísskáp í um 2 vikur. Kakan hentar vel fyrir þá sem hafa mjólkuróþol og eins fyrir þá sem eru jurtaætur (enska: vegan).
 
Orkubiti með carobkremi
Gerir um 10 bita

• 200 gr haframjöl
  
• 30 gr kókosmjöl
  
• 50 gr cashewhnetur (má nota jarðhnetur eða macadamiahnetur eða blanda öllu saman)
  
• 40 gr möndlur
  
• 3 msk byggmaltsíróp (enska: barley malt syrup) eða hrísgrjónasíróp (enska: brown rice syrup) eða agavesíróp
  
• 2 msk hreint hlynsíróp
  
• 30 gr rúsínur
  
• 110 gr döðlur
  
• 2 msk carobduft
  
  Kremið:
  
• 3 tsk carobduft
  
• 3 msk hreint hlynsíróp
  
  Aðferð:
  
• Setjið haframjölið í matvinnsluvél og malið þangað til það er orðið að grófu mjöli.
  
• Blandið kókosmjölinu og carobduftinu saman við. Setjið til hliðar.
  
• Blandið saman hnetunum og möndlunum. Setjið til hliðar.
  
• Maukið döðlur og rúsínur vel saman. Bætið við byggmaltsírópi og hlynsírópi.
  
• Setjið allt í stóra skál og blandið vel saman með höndunum. Setjið svo í hrærivél eða ef hún er ekki við hendi, setjið þá smá búta í einu í matvinnsluvélina og blandið saman. Þetta verður dáldið klístrað og leiðinlegt. Ekki örvænta samt!
  
• Geymið í kæli í um klukkutíma.
  
  
• Blandið saman innihaldinu í kremið saman.
  
• Ef kremið er rammt má bæta aðeins meira hlynsírópi saman við. Ef kremið er of þunnt má setja það inn í ísskáp í nokkra klukkutíma, það mun harðna.
  
  
• Mótið kúlur og fletjið út í kringlótta bita (eins og litla hamborgara). Gott er að nota hanska við þetta þar sem deigið er afar klístrað.
  
• Setjið smá af kreminu ofan á hvern bita (má líka sleppa).
  
• Setjið á disk og geymið í kæli yfir nótt.
  
• Þegar kremið er orðið hart, pakkið þá hverjum og einum bita inn í plastfilmu og geymið í ísskáp.
  
  
• Hægt væri að móta kökubotn úr deiginu og nota kremið sem kökukrem (bæta 1 maukuðum banana saman við kremið) ef maður vill gera öðruvísi, holla köku.

Prenta þessa uppskrift     -     Senda þessa uppskrift

Þetta er indversk uppskrift og nokkuð flókin en alltaf gaman að prófa eitthvað nýtt og spennandi!!! Frekar bragðmildar bollur. Bollurnar eru yfirleitt djúpsteiktar en við gerum nú ekki svoleiðis hér og bæ og því eru þær bakaðar.
 
Palak Koftas (Kryddaðar spínatbollur)
Fyrir 3-4

Fyrir sósuna

• 1/2 tsk cumin fræ (ekki kúmen)
  
• 1 laukur, saxaður
  
• 1 cm. bútur ferskt engifer, rifið eða saxað fínt
  
• 1 hvítlauksgeiri, marinn
  
• 2 msk cashewhnetumauk (hægt að kaupa í krukkum en getið líka sett cashewhnetur og smá vatn í matvinnsluvél)
  
• 1/2 tsk turmeric
  
• 1 tsk chilliduft
  
• Heilsusalt (Herbamare)
  
• 240 gr tómatar, saxaðir
  
• 1 tsk ferskt coriander
  
• 1 tsk kókosfeiti eða ólífuolía og smávegis af vatni
  
  Fyrir bollurnar
  
• 175 gr niðursoðið spínat
  
• 1 msk birkifræ (enska: poppy seeds)
  
• 2 msk cashewhnetur, muldar
  
• 1/2 tsk corianderduft
  
• 1/2 tsk cuminduft
  
• 1/2 tsk chilliduft
  
• Heilsusalt (Herbamare)
  
• 100 gr gram flour (kjúklingabaunamjöl)
  
• 140 gr spelti
  
  Aðferð-Bollurnar:
  
• Blandið poppy fræjum og cashewhnetum saman í matvinnsluvél með smá heitu vatni þangað til það er orðið að mauki.
  
• Blandið öllu öðru saman við í stóra skál og skiptið svo í 8 hluta. Rúllið í litlar bollur í höndunum.
  
• Hitið bollurnar í ofni á 200°C í um 20 mínútur.
  
  Aðferð-Sósan:
  
• Þurrsteikið cumin fræin á heitri pönnu. Setjið til hliðar.
  
• Bætið kókosfeitinni eða ólífuolíunni ásamt vatninu ef þarf, út á pönnuna.
  
• Bætið lauknum við og mýkið.
  
• Bætið engiferi, hvítlauk, cashewhnetum, turmeric, chilliduftinu og salti við. Hitið í um 2-3 mínútur.
  
• Bætið niðurskornu tómötunum við og hitið í 8-10 mínútur. Bætið 100 ml af vatni út í og látið krauma.
  
• Áður en maturinn er borinn fram, setjið þá bollurnar og cuminfræin út í sósuna og hitið í nokkrar mínútur.
  
• Skreytið með corianderlaufum.
  
  
• Það er gott að hafa jógúrtsósu með þessum rétti sem og indversk brauð eins og chapati.

Prenta þessa uppskrift     -     Senda þessa uppskrift

Ok þetta hljómar kannski pínu skrítið, pítu-pizzur en það sem málið snýst um er sko að nota pítubrauðin sem pizzubotna því það sparar tíma og fyrirhöfn svona þegar maður er að flýta sér. Ég fann þessa uppskrift í grænmetisbók sem Smári og Anna Stína (bróðir minn og konan hans) gáfu mér en þau eru mikið grænmetisfólk (hún er grænmetisæta) og góðir kokkar. Það er auðvitað betra að búa til sína eigin pizzubotna en svona í miðri viku, eftir vinnu þá finnst mér þetta góð lausn. Svo finnst mér líka sniðugt að geta búið til alls konar pizzur með lítilli fyrirhöfn þ.e. maður setur bara það sem maður vill ofan á hverja og eina!! Ef þið viljið búa til ykkar eigin pizzusósu þá er það bara frábært, margir eiga "sína" pizzusósu sem þeir nota alltaf. Ég hef keypt lífrænar pizzusósur sem eru mjög góðar. Upplagt er fyrir krakka að raða ofan á sínar eigin pizzur. Athugið að í pítubrauðum sem maður kaupir út í búð er yfirleitt ger.
 
Pítu-pizzur
Fyrir 2-3

• 6 speltpítubrauð, sykurlaus (og gerlaus ef þið finnið slíkt). Ef ekki eru til speltpítubrauð, kaupið þá gróf pítubrauð
  
• 200 ml pizzasósa, sykurlaus og án bragð-og litarefna (má vera holl pastasósa líka). Kaupið helst lífrænt framleidda sósu
  
• 1 rauðlaukur sneiddur fínt og steiktur upp úr vatni
  
• 12 sveppir sneiddir fínt og steiktir upp úr vatni
  
• 1 lítil dós gulur maís
  
• 12 svartar ólífur sneiddar
  
• 12 capers eða meira, skornir í helminga
  
• 6 kirsuberjatómatar skornir í helminga
  
• 1 búnt af basilikublöðum, skorið í ræmur
  
• 300 gr létt-mozzarella (má vera meira og má líka blanda mögrum, rifnum osti með)
  
• Fullt af svörtum pipar
  
• Smá pizzakrydd (frá Pottagöldrum) eða ítalskt krydd
  
• Aðrar áleggshugmyndir: Rauðar eða grænar paprikur, ruccola, jalapeno pipar, grænar ólífur
  
  Aðferð:
  
• Skerið niður allt grænmeti sem á að nota, steikið það sem á að steikja.
  
• Setjið allt í skálar fyrir framan ykkur svo það sé auðvelt að ná í allt áleggið og raða á.
  
• Smyrjið hvert pítubrauð vel með pizzusósu (má vera gott lag af sósu ofan á).
  
• Raðið álegginu eftir smekk á hverja pítu. Endið á ostinum
  
• Hitið í ofnininum við 180°C í 5-10 mínútur eða þangað til osturinn er bráðnaður.
  
  
• Það eru margir sem eiga sína uppáhaldspizzu og um að gera að setja sitt uppáhaldsálegg ofan á þessar pítu-pizzur.
  
• Það er frábært að frysta pizzurnar og ég geri reglulega heilan helling af þeim og hita svo upp eina og eina eða tek í nestið til að hita upp í vinnunni.

Prenta þessa uppskrift     -     Senda þessa uppskrift

Þessir bitar eru hið fullkomna nesti í bíltúrinn, gönguna eða vinnuna (svo lengi sem maður er ekki með hnetuofnæmi). Það má gera úr þessu stangir, stórar kúlur, kubba, litlar konfektkúlur nú eða bita. Dísætir, enginn sykur samt í þeim og fullir af próteinum og kalki, andoxunarefnum og hollri fitu. Það þarf enginn að fara í sjoppuna í þessum bíltúr, nammi namm. Um að gera að búa til helling og geyma innpakkaða í plasti í ísskápnum. Þeir geymast vel í 2-3 vikur.
 
Próteinbiti með carob
Gerir um 15 bita

• 2 dl cashewhnetur
  
• 1/4 dl möndluflögur
  
• 1/4 dl kókosmjöl
  
• 15-20 gráfíkjur, snúið litla stubbinn á endanum af, saxið gróft
  
• 8-10 döðlur, saxið gróft
  
• 2-4 msk hreinn appelsínusafi
  
• 1-2 msk hreint hlynsíróp (enska: maple syrup)
  
• 3 msk carobduft (má nota kakóduft, notið þá lífrænt framleitt og gott kakó með háu kakóinnihaldi)
  
  Aðferð:
  
• Malið möndlur og hnetur og kókos í matvinnsluvél.
  
• Bætið carobdufti saman við og malið aðeins áfram.
  
• Setjið í stóra skál.
  
• Maukið döðlur, gráfíkjur með smá appelsínusafa þangað til orðið að mauki.
  
• Blandið öllu vel saman, jafnvel í hrærivél (gott að vera í þunnum plasthönskum ef þið notið hendurnar).
  
• Mótið stórar kúlur (álíka stóra og litlar mandarínur) og fletjið svo út þannig að verði um 1 cm. að þykkt.
  
• Veltið upp úr kókosmjöli (má sleppa) en bitarnir þurfa að vera frekar klístraðir til að kókosmjölið haldist utan á.
  
• Pakkið hverjum bita inn í plastþynnu og geymið í ísskáp.
  
  
• Áferðin á deiginu á að vera nokkuð þétt, alls ekki blaut en allt á samt að festast vel saman.
  
• Gott að láta blönduna bíða aðeins í kæli, betra að móta bitana þannig.
  
  
• Má setja appelsínudropa/möndludropa út í. Hægt að nota sem konfektmassa og móta kúlur og velta upp úr kókosmjöli.
  
• Má einnig frysta og borða hálffrosið!
  
• Einnig er hægt að gera litla kubba eða stangir í stað þess að fletja út kúlur.
  

Prenta þessa uppskrift     -     Senda þessa uppskrift

Þessir bitar eru eingöngu hugsaðir fyrir þá sem eru að bæta á sig vöðvum eða eru í líkamsrækt og eru ekki hentugir fyrir t.d. börn eða þá sem hreyfa sig lítið. Þetta eru afar sniðugir próteinbitar með hnetum, flóknum kolvetnum og vítamínum ásamt undanrennudufti og henta vel fyrir þá sem eru að huga að því að stækka vöðvana. Þessir próteinbitar eru mun hollari en efnahernaðurinn sem maður kaupir út úr búð (próteinstangirnar).
 
Próteinbiti með undanrennudufti
Gerir um 10-12

• 120 gr cashewhnetur eða jarðhnetur (án hýðis)
  
• 50 gr sólblómafræ
  
• 100 gr haframjöl
  
• 40 gr undanrennuduft (fæst í búðum sem selja líkamsræktarvörur en einnig má fá hreint undanrennuduft hjá Mjólkursamsölunni eða Himneskri hollustu)
  
• 4 msk hreint hlynsíróp (enska: maple syrup)
  
• 3 msk kúfaðar hrísgrjónasíróp (enska: brown rice syrup)
  
  Aðferð:
  
• Malið fyrst haframjölið mjög fínt, setjið til hliðar.
  
• Malið hneturnar og sólblómafræin mjög fínt en ekki þannig að verði að olíukenndu mauki.
  
• Setjið nú allt saman í matvinnsluvél og hrærið vel eða þangað til þetta hefur blandast mjög vel samt.
  
• Mótið um 40 gr kúlur og fletjið út.
  
• Pakkið hverjum bita inn í plast.
  
  
• Mjög sniðugt er að setja auka prótein sem krem ofan á:
  
  Próteinkrem
  
• 20 gr undanrennuduft
  
• 1 tsk carobduft
  
• 1 msk hlynsíróp
  
  Aðferð:
  
• Blandið varlega saman, smyrjið um 1 tsk á hvern próteinbita og látið harðna í ísskáp.
• Kremið ætti að leka smá en ekki mjög mikið samt.
  
• Þegar kremið er orðið hart má pakka bitunum inn í plast.
  
  

Prenta þessa uppskrift     -     Senda þessa uppskrift

Þetta krem er EINGÖNGU hugsað fyrir þá sem eru að bæta á sig vöðvum og ætti ekki að vera notað fyrir börn eða þá sem hreyfa sig lítið. Það er sem sagt ekki hugsað sem krem á kökur eða þess háttar heldur eingöngu fyrir þá sem eru á fullu í líkamsrækt.
 
Próteinkrem
Á 10 próteinbita

Próteinkrem:

• 20 gr undanrennuduft (eða 40 gr próteinduft til líkamsræktar t.d. frá Solgar. Það er léttara en hefðbundið undanrennuduft)
  
• 2 tsk carobduft
  
• 2-3 msk hlynsíróp (enska: Maple syrup)
  
  Aðferð:
  
• Blandið varlega saman, smyrjið um 1 tsk á hvern próteinbita og látið harðna í ísskáp (harðnar alveg á 2-3 dögum).
  
• Kremið ætti að leka smá en ekki mjög mikið samt. Það ætti að vera svolítið stíft þegar það er sett á bitana.
  
• Þegar kremið er orðið hart má pakka bitunum inn í plast.
  
  
• Notið ekki í öðrum tilgangi en til að bæta á ykkur vöðvum eða til að auka próteininntöku.

Prenta þessa uppskrift     -     Senda þessa uppskrift

Sesamfræ eru kalk- og próteinrík og valhnetur eru fullar af omega 3 fitusýrum sem eru svo góðar til að sporna gegn hjartasjúkdómum og of háum blóðþrýstingi og af því að líkaminn framleiðir ekki þessar mikilvægu fitusýrur er nauðsynlegt fyrir okkur að hjálpa honum aðeins með því að borða t.d. lúku af valhnetum öðru hvoru. Valhnetur hafa einnig þótt hjálpa einstaklingum með exem og önnur húðvandamál sem og fólki með asthma. Valhnetur innihalda einnig ellagic acid sem hjálpa til við að sporna gegn krabbameini en einnig styðja þær við ónæmiskerfið. Þessir bitar eru upplagðir þegar mann langar í eitthvað hollt en gott svona á milli mála. Mér finnst best að frysta bitana og borða þá nánast frosna. Það má einnig nota deigið sem kökubotn. Nota má sólblómafræ á móti sesamfræjunum.

 
Sesam- og döðlu orkubitar
Gerir 12-16 bita

• 1 bolli valhnetur
  
• 1/2 bolli sesamfræ
  
• 1,5 bolli döðlur (mjúkar).
  
• 1,5 bolli rúsínur
  
  Aðferð:
  
• Blandið fyrst valhnetur og sesamfræ í matvinnsluvél. Blandið í nokkrar sekúndur (má ekki verða að mauki, best að hafa frekar fínt saxað). Setjið í stóra skál.
  
• Blandið döðlur og rúsínur í matvinnsluvélinni (getið bætt 1 msk af appelsínusafa út í ef gengur illa að blanda).
  
• Blandið öllu saman í stóru skálina.
  
• Setjið bökunarpappír eða plastfilmu ofan í 20cm x 20cm form.
  
• Þrýstið blöndunni ofan í.
  
• Frystið í 30 mínútur.
  
• Takið út og skerið í 12-16 bita.
  
• Geymið í frysti eða kæli.
  
  
• Það má einnig nota deigið sem kökubotn.
  
• Nota má sólblómafræ á móti sesamfræjunum.
  
• Nota má pecanhnetur í staðinn fyrir valhnetur.
  
• Gott er að leggja döðlurnar í bleyti í nokkra klukkutíma (eða sjóða þær í svolitla stund), auðveldara er að vinna bitana þannig.

Prenta þessa uppskrift     -     Senda þessa uppskrift

Pizzur eru alltaf góðar, heimagerðar eru samt bestar því þá veit maður nákvæmlega hvað er sett ofan á þær og inn í þær. Ég þoli ekki pizzur sem fljóta í olíu enda kaupi ég aldrei nokkurn tímann pizzur frá stórum keðjum. Þessi fína uppskrift er úr Nýkaupsbókinni hans Sigga Hall (nema hann notar ger, venjulegt lyftiduft, hveiti o.fl. en ég breytti því). Það er sjálfsagt að nota botninn svo með einhverju öðru áleggi en því sem er hér að neðan. Uppskriftin er nokkuð tímafrek og best að gera hana á laugardagskvöldi eða þegar maður hefur nógan tíma. Maður getur flýtt fyrir sér og keypt holla pizzusósu.
 
Speltpizza með grænmeti, heimalagaðri tómatsósu og Mozarella osti
Fyrir 2-3

Pizzubotn

• 1-2 dl vatn (notið fyrst 1 dl og bætið við ef þarf)
  
• 1 msk kókosfeiti eða ólífuolía
  
• 250 gr spelti
  
• 1 msk vínsteinslyftiduft
  
• Smá klípa salt (Himalaya eða sjávarsalt)
  
• (Ég bæti svo við 1 tsk af pizzakryddi frá Pottagöldrum eða oregano). Einnig er gott að nota ferskar kryddjurtir í botninn
  
  Aðferð:
  
• Blandið saman vatni og kókosfeiti eða ólífuolíu
  
• Setjið spelti smátt og smátt út í ásamt salti, vínsteinslyftidufti og kryddi og hnoðið vel saman, eða þar til það er orðið vel samlagað.
  
• Deigið á að vera létt og aðeins blautt en má samt ekki klessast
  
• Fletjið deigið út þunnt og setjið það annað hvort í sérstakt pizzuform eða á ferkantaða ofnskúffu (með bökunarpappír undir). Líka er ágætt að leggja disk ofan á útflatt deigið og skera utan um, búa jafnvel til nokkrar smærri.
  
• Bakið við 150°c í u.þ.b. 15 mínútur eða þangað til brauðið er orðið dekkra og aðeins stökkt. Takið út úr ofninum og geymið þangað allt er orðið tilbúið. Athugið að sumum finnst ekki nauðsynlegt að forbaka botninn en ef þið viljið hafa botninn frekar stökkan og harðan er gott að forbaka.
  
  Pizzusósa
  
• 1 dós flysjaðir tómatar
  
• 1 msk tómatpurree
  
• 2-4 hvítlauksgeirar
  
• 2 msk balsamic edik úr heilsuhúsi
  
• 3/4 msk hrásykur
  
• Heilsusalt (Herbamare) og pipar
  
• ítalskt krydd, t.d. pizzukrydd frá Pottagöldrum
  
  Álegg
  
• 300 gr létt-mozarella skorinn í sneiðar. Ef ekki fæst léttur mozarella má nota mozarella á móti 11% osti í staðinn (minna magn af mozarella og meira af hinum ostinum)
  
• 150 gr kirsuberjatómar skornir í tvennt
  
• 50 gr sveppir í sneiðum
  
• 1 búnt basil, skorið í ræmur
  
• svartur pipar
  
  Aðferð:
  
• Fletjið deigið vel út.
  
• Látið það sem á að fara í pizzusósuna í skál og merjið í mauk, saltið vel og piprið.
  
• Smyrjið jafnt yfir pizzuna. Látið mozarellasneiðarnar og annan ost jafnt yfir, og hálfa kirsurberjatómatana á milli.
  
• Dreifið sveppasneiðunum jafnt yfir.
  
• Dreifið basilræmunum vel yfir.
  
• Bakið í ofni við 220°c í u.þ.b. 15-18 mínutur eða þar til pizzan er orðin gullinbrún og stökk.
  
  
• Leyfið pizzunni að kólna í nokkrar mínútur áður en hún er skorin. Best er að nota sérstakt pizzahjól.

Prenta þessa uppskrift     -     Senda þessa uppskrift

Það er löng saga að segja frá þessum rétti og hvernig ég fékk "uppskrift" að honum. Það atvikaðist þannig að í september 2007 var ég stödd alein í Nairobi. Ég var að taka á móti ferðafólki morguninn eftir frá Íslandi sem voru á leið í safarí. Jóhannes var með annan hóp í Mombasa. Borgar bróðir minn hafði ætlað að redda fyrir mig hótelherbergi en var aðeins of seinn þannig að ég var eiginlega á vergangi sem er ekkert endilega sniðugt í Nairobi. Nú... bróðir minn þekkir marga í Afríku og Stephanie sem vinnur fyrir hann mundi að vinkona hennar býr einmitt í Nairobi, rétt fyrir utan eða í Karen hverfinu sem heitir eftir Karen Blixen og liggur rétt við þjóðgarð Nairobi (þar sem má finna fíla, ljón, nashyrninga og mörg fleiri dýr). Cornelius, innfæddi bílstjórinn minn sem var að rúnta með mig á glænýja, flotta Land Cruiser safaríbílnum hans Borgars fékk það verkefni að keyra mig til þessarrar konu. Ég vissi ekkert hvert ég var að fara (nema til Karen), hvernig húsið væri, hvort konan væri ein, hvort hún væri almennileg eða hvað. Það var farið að rökkva og Cornelius ákvað að stytta sér leið í Nairobi. Hann keyrði langt inn í eitthvað hverfi Nairobi og þar sátum við í umferðarteppu. Það fór að skyggja og Cornelius að ókyrrast aðeins í sætinu. Þarna eru ekki götuljós nema á stöku stað og alls staðar er verið að selja varning á götunni. Þegar líða tók á umferðarteppuna voru einhverjir pörupiltar farnir að horfa inn um bílgluggann og kalla Mzungu eitthvað....Ég veit hvað mzungu þýðir (hvít manneskja) en ég skildi ekki hitt. Ég spurði Cornelius að því en hann sagði bara "þú vilt ekki vita restina". Hann sagði mér að læsa bílhurðunum. Ekkert sérlega róandi svona í miðri Nairobi að vera á glæ, glænýjum rándýrum safaríjeppa þegar skyggja tekur. Það var eftir klukkutíma, í umferðarteppunni sem ég áttaði mig á því að ég hafði ekki séð eina einustu hvíta manneskju allan þennan tíma í teppunni. Það er mjög óvenjulegt í Nairobi þar sem margir stunda viðskipti frá öllum heimshornum.
Nú við losnuðum loksins úr teppunni og keyrðum í kolniðamyrkri eitthvert út í buskann. Ég kannaðist reyndar við mig sums staðar en svo loksins keyrði Cornelius eitthvert út í skóg....Ég treysti bílstjóranum sem betur fer því annars hefði ég orðið sturluð úr hræðslu svona alein. Við keyrum í skóginum eftir kræklóttum stíg og í fjarska heyrum við gelt (eða þess vegna öskur úr flóðhesti svo djúp voru hljóðin). Þegar við komum nær heyrðum við geltið magnast og drottinn minn dýri ég hef aldrei heyrt önnur eins hljóð í hundi. Þetta var það dýpsta gelt sem ég hef heyrt og beinlínis öskraði "risa, risa stór hundur". Ég er ekki hrædd við hunda, síður en svo en ég þorði ekki að hreyfa mig út úr bílnum (hundar í Afríku er yfirleitt ekki gæludýr, þeir eru varðhundar og í orðsins fyllstu merkingu). Þetta reyndist vera blanda af Grate Dane og Rhodesian Ridge Back sem þýðir að hann var huge stór.

Þarna kemur kona á móti okkur sem sussar á hundana og segist vera vinkona Stephanie að nafni Lumman. Hún var sænsk og bauð mig velkomna á heimili sitt. Hún vísaði mér í gestahúsið sem var við hliðina á stóra húsinu og þar var nýbúið að gera upp flotta gistiaðstöðu með dýnu á gólfinu, sturtu en ekkert annað, ekki einu sinni stól. Það hentaði vel því ég var þreytt og þurfti að vakna snemma, Cornelius ætlaði að sækja mig klukkan 4.45. Lumman tók ekki annað í mál en að ég fengi að borða og hún sagði mér að hún ætlaði að sækja mig eftir klukkutíma. Sem hún gerði. Hún dró mig í gegnum kolniðamyrkur (það er verið að gera húsið upp og allt rafmagnslaust) og leiddi mig út á verönd. Þar var búið að dekka borð með kertaljósum, nýbakað brauð ilmaði, ég fann lykt af meiri, dásamlegum mat og ég fann að ég var orðin glorhungruð.

Ég sest til borðs og af því að þögnin var algjör, tunglið var nánast fullt en samt stjörnubjart þá bæði sá ég og heyrði í fullt af dýrum, bæði antilópum, kanínum, bjöllum, engisprettum o.fl., o.fl. Þetta var svo súrrealískt. Eftir smá stund fóru fjölskyldumeðlimirnir að tínast að borðinu. Þar voru þrjár stúlkur á mismunandi aldri, eiginmaðurinn sem er frá austurríki en fæddur í Kenya og svo fjölskylduvinurinn sem gat ekki borið fram r og sagði l í staðinn. Það gat verið hrikalega fyndið en ég gat auðvitað ekki hlegið. Fjölskylda þessi var einstaklega gestrisin og spurði mig í þaula um Ísland, hvað ég væri að gera í Kenya o.s.frv. Það kom upp úr kafinu að yngsta dóttirin 8 ára (sem í skólaferðalögum fer í kamel safarí og gistir í tjaldi í eyðimörkinni...) var með áhuga á íslenskum hestum og fannst mikið til koma að ég vissi allt um íslenska hestinn og væri nýkomin úr viku hestaferð á fjöllum.

Það var margt fleira forvitnilegt sem ég bæði heyrði og þau sögðu mér frá. Til dæmis er aðal atvinna húsfreyjunar að smíða húsgögn úr gömlum (100 ára) dhow skipum (skip sem notuð voru til að sigla með krydd, þræla og ýmsan varning frá Zanzibar og áleiðis). Húsgögnin voru þannig að mig langaði til að kaupa nákvæmlega allt. Ég hugsaði með mér "hér er minn stíll". Nú...elsta dóttirin (eitthvað um 17 ára) er að berjast við hvítblæði og fjölskyldan fór í ár til Austurríkis til að fá bestu meðhöndlun fyrir dótturina. Þau sögðu að lokum að steinsteypan hefði verið að drepa þau öll og þau voru farin að þrá Afríku aftur. Sem ég skil svo að mörgu leyti. Þegar þau voru að segja mér allt um þetta mál kom kisi að mér og straukst við fótinn á mér. Eins og alltaf þegar maður borðar undir beru lofti í myrkrinu í Afríku þá bregður manni..."vertu alveg róleg" sagði Lumman...."þetta er bara kisi....þeir voru tveir....en það var hlébarði sem át hina kisuna fyrir ári síðan hérna í garðinum".

Þetta var fáránlega löng lýsing á uppskrift, sú lengsta sem ég hef skrifað en þetta var svo furðuleg upplifun og ég hugsaði með mér undir stjörnubjörtum himninum...þessu verð ég að deila með ykkur hinum....Húsfreyjan átti ekki uppskrift að réttinum en ég bað hana um innihaldslýsingu og uppskriftin er nokkuð nærri lagi...nema það vantar hlébarða og engisprettuhljóð.
 
Spínatrétturinn úr dularfulla húsinu í skóginum í Nairobi
Fyrir 2 sem aðalréttur

• 1 tsk kókosfeiti eða ólífuolía
  
• 1 poki ferskt eða frosið spínat. Ef frosið afþýðið þá og kreistið vatnið úr
  
• 1 hvítlauksgeiri, marinn
  
• 1/2 blaðlaukur, saxaður (má sleppa)
  
• 1 laukur, saxaður gróft
  
• 1 tsk karrí
  
• 2 msk kókosmjólk
  
• 3/4 stór grænmetisteningur (kraftur) frá Rapunzel
  
  Aðferð:
  
• Steikið allan laukinn úr olíunni og smá vatni ef þarf. Steikið þangað til laukurinn fer að linast.
  
• Bætið kryddi og grænmetiskrafti saman við.
  
• Bætið spínatinu saman við og hitið vel.
  
• Bætið kókosmjólkinni saman við og hitið aðeins meira.
  
• Berið fram með heimabökuðu brauði.
  
  

Prenta þessa uppskrift     -     Senda þessa uppskrift

Við fáum okkur stundum alveg bláspari, samloku (chiabatta) á Starbucks. Þetta er svo sem enginn hollustumatur enda fáum við okkur afskaplega sjaldan mat á kaffihúsum, bæði dýrt og óhollt!! Þessi samloka hérna að neðan er svona hollari útgáfa af Starbucks samlokunni. Athugið að ég nota annað hvort speltpítubrauð eða grófa brauðhleifa en hægt er að nota alls kyns brauð. Þeir sem þola ekki ger þurfa að vara sig á pítubrauðum og keyptum brauðum nema þau séu merkt gerlaus. Ég nota fitusnautt majones og fitusnauðan mozarella eða magran, venjulegan ost.
 
Starbucks samloka
Fyrir 2-3

• 3 stórir, spelt brauðhleifar, skornir í tvennt (þannig að verði lok og botn). Athugið einnig að það er mjög gott að nota pítubrauð í þessar samlokur.
  
• 1/4 krukka grænt pestó t.d. frá Sacla
  
• 4 msk majones. Einnig má nota 10% sýrðan rjóma (án gelatíns) og AB mjólk. Hægt er að kaupa létt-majones (6% fita) en það er yfirleitt með sykri og viðbættum efnum
  
• Nokkrar svartar ólífur í sneiðum
  
• Létt mosarella ostur, 1 stykki skorinn í sneiðar (um 150 gr) eða annar magur ostur
  
• 10 sólþurrkaðir tómatar, (olían þerruð af með eldhúspappír), skornir í mjóar sneiðar
  
  Aðferð:
  
• Blandið saman pestóinu og majonesinu.
  
• Pestóblöndunni smurt á, allt hitt lagt ofan á .
  
• Grillað í nokkrar mínútur á samlokugrilli þangað til osturinn er orðinn bráðinn.
  
  
• Hægt er að nota alls kyns grænmeti og líka t.d. rautt pestó.

Prenta þessa uppskrift     -     Senda þessa uppskrift

Þetta er nú varla uppskrift því aðferðin er svo einföld að það er næstum því hlægilegt. Inniheldur einungis sætar kartöflur. Nákvæmlega ekkert annað. Þetta meðlæti hef ég fengið hjá Smára bróður og Önnu Stínu konunni hans. Ég hafði notað sætar kartöflur í mat áður en aldrei prófað að baka þær beint í ofni eins og þau gera. Þetta er alveg sjúklega gott og maður endar oft á því að borða þessar kartöflur bara sem snakk, mjög erfitt að hætta. Þær eru svo sætar að það lekur stundum úr þeim eins konar síróp við baksturinn (enda er sterkjan stundum notuð sem náttúrulegt sætuefni). Sætar kartöflur eru brúnbleikar á lit, oft ílangar og er hægt að finna þær í grænmetisdeildum í flestum matvörubúðum. Kartöflurnar þarf ekki að skola né skræla bara skera þær í báta og inn í ofn.
 
Sætar kartöflur bakaðar í ofni
Fyrir 2 sem meðlæti

• 1-2 sætar kartöflur frekar stórar (fer eftir því hversu mikið meðlætið á að vera)
  
  Aðferð:
  
• Skerið kartöflurnar í meðalstóra bita (báta) um 2cm á lengd og 1cm á breidd
  
• Dreifið á plötu með bökunarpappír undir og hitið í um 30-40 mínútur á um 180-200°C eða þangað til hýðið er orðið nokkuð hart og kartöflurnar hafa dökknað aðeins.
  
  
• Þetta meðlæti er hægt að nota með nánast öllum mat t.d. indverskum mat, pakistönskum mat, alls kyns kjöti (þó ég borði það nú ekki þá hef ég heimildir fyrir því að það passi vel við til dæmis lambakjöt).

Prenta þessa uppskrift     -     Senda þessa uppskrift

Ég notaði soyakjötshakk í þennan rétt og það var mjög gott. Maður þarf bara að vera búinn að láta hakkið liggja í smá mareneringu áður en maður útbýr réttinn (eins og þarf alltaf með soyakjöt). Það er best að láta hann liggja í grænmetiskrafti (t.d. einum teningi) og svo einhverri sterkri mexikanskri sósu (hægt að kaupa tilbúna en gætið þess að sósan sé sykurlaus og fitusnauð og án bragð-og litarefna. Hún ætti að vera lífrænt framleidd.
 
Tacos með soyakjöti
Fyrir 3-4

• 150 gr af soyakjöts "hakki" (mulið, dökkt soyakjöt og lítur út eins og hakk)
  
• 12 Tacoskeljar (þær hollustu sem þið finnið og án MSG eða annarra aukaefna). Kaupið helst lífrænt framleiddar.
  
• 200 gr mexikönsk sósa (sjá athugasemdir hér fyrir ofan)
  
• 4-6 sveppir sneiddir þunnt
  
• 1/4 úr salatshaus, t.d. jöklasalat
  
• 1 lítil dós af hreinu, fitulausu jógúrti (má vera fitulaust grískt jógúrt líka)
  
• 1 dós af fitusnautt guacamole, helst lífrænt framleitt (hægt að útbúa sitt eigið líka)
  
• 1 krukka salsasósa (fitusnauð og sykurlaus, lífrænt framleidd). Það er líka hægt að búa til sína eigin ef þið kunnið góða uppskrift.
  
• 100 gr rifinn, magur ostur
  
• 1 grænmetisteningur
  
• Smávegis af svörtum pipar
  
  Aðferð:
  
• Látið soyakjötið liggja í grænmetissoði, sjóðandi vatni (þannig að soyahakkið nái að draga vel vökva í sig) og mexikönsku sósunni í nokkra tíma.
  
• Steikið sveppina upp úr smá vatni og kryddið með pipar.
  
• Hreinsið salatið og rífið smátt og setjið í skál.
  
• Setjið guacamole, salsasósu og jógúrt í sérskálar.
  
• Setjið rifna ostinn í skál.
  
• Setjið sveppina í skál.
  
• Hitið hakkið á pönnu og kryddið meira með salti og pipar ef ykkur finnst það þurfa.
  
• Hitið tacoskeljarnar á hvolfi í ofninum (alls, alls, alls ekki steikja þær því þær innihalda nógu mikla fitu fyrir).
  
• Berið allt fram á borð í sér skálum og með sér skeiðum og hver og einn raðar fyrir sig í skeljarnar.
  
• Setjið ekki meira en svona 1/3 af hakki því annars kemst ekkert annað fyrir.
  
  
  
• Það er auðvitað best að búa allar sínar sósur til sjálfur en maður er bara svo oft að flýta sér að það er erfitt viðfangs nema kannski um helgar.

Prenta þessa uppskrift     -     Senda þessa uppskrift

Þessi uppskrift er bara býsna góð, tófú og kartöflur er bragðlaust í sjálfu sér, en allt kryddið bætir það upp. Ég hef ekki prófað það, en ég gæti trúað að þessir borgarar væru góðir sem "hamborgarar", þ.e. í brauði með öllu saman.
 
Tófú-og kjúklingabaunabuff
Fyrir 2-3

• 250 gr tófú, stíft (þ.e. firm)
  
• 2 stórar bökunarkartöflur (200 gr), soðnar, afhýddar, kældar og stappaðar
  
• 3 msk fínt saxaður graslaukur (má sleppa)
  
• 200 gr kjúklingabaunir í dós, helst ósaltaðar
  
• 100 gr magur, rifinn ostur
  
• 50 gr fínt muldar hnetur t.d. þurrristaðar möndlur eða cashewhnetur
  
• 7-10 sólþurrkaðir tómatar (olían þerruð af) skornir í litla bita
  
• 1/2 tsk turmeric
  
• 1/2 tsk cumin duft (ekki kúmen)
  
• Smá cayennepipar
  
• 1 tsk heilsusalt t.d. Herbamare (notið aðeins 1/8 tsk af salti ef kjúklingabaunirnar eru með viðbættu salti)
  
• 1 tsk hvítlauksduft t.d. frá Pottagöldrum (eða 1 marið hvítlauksrif)
  
  Aðferð:
  
• Öllu hnoðað saman í höndunum í skál.
  
• Skiptið deiginu í um 15 hluta og rúllið á milli handanna, myndið litla bolta.
  
• Fletjið boltana aðeins út og hafið þá u.þ.b. 1 cm. á þykkt.
  
• Setjið borgarana á bökunarplötu (á bökunarpappír).
  
• Bakið hvora hlið á 180-200°C í um 20-25 mínútur.
  
  
• Ef þið viljið hafa borgarana stökkari, þá skulið þið baka þá í lengri tíma á hvorri hlið.
  
• Gott er að bera fram létt-sinnepssósu með borgurunum eða hvítlauksjógúrtsósu.

Prenta þessa uppskrift     -     Senda þessa uppskrift

Ég hef lengi átt þessa uppskrift en ekki birt hana fyrr en nú því ég er alltaf aðeins að breyta henni. Hún er núna orðin fín að mér finnst. Ég er þó ekki sérstaklega klár í að gera tortilla kökur þunnar og flottar en það skiptir engu því þær eru bragðgóðar. Svo eru þær afskaplega fljótlegar svona þegar maður er búinn að fletja þær út. Þær verða tilbúnar á nokkrum mínútum eftir það. Spelti passar afar vel í uppskriftina en ég hef líka notað rúgmjöl. Ég nota alltaf gróft spelti en það má gjarnan nota fínt líka ef ykkur finnst það betra. Ég hef líka notað ljós hörfræ í staðinn fyrir sesamfræ (eða með) og það er líka gott. Þá mala ég hörfræin aðeins fyrst í blandara. Ég hætti að kaupa tortilla kökur úr búð fyrir langa löngu síðan því þær eru frekar óspennandi og þar fyrir utan rándýrar og með fullt af alls kyns aukaefnum og sykri. Ekki minn tebolli eins og Bretarnir myndu segja. Hægt er að frysta bakaðar tortilla kökur og eiga í frystinum. Það flýtir mikið fyrir manni og bara um að gera að baka nógu mikið þegar maður hefur loksins tíma til! Tortilla kökurnar eru frábærar með t.d. hummus, alls kyns niðurskornu grænmeti, pottréttum o.fl. og þær eru líka frábærar í nestið, í garðveisluna og útileguna. Það er kannski svolítið mikið af kókosolíu í uppskriftinni en mér gengur illa að fletja þær út annars og magnið er heldur ekki svo mikið miðað við 3 bolla af spelti. Ég næ 10 tortilla kökum úr uppskriftinni en ef þið getið flatt kökurnar þynnra út, náið þið auðvitað fleirum.
 
Tortilla kökur (vefjur)
Gerir 10 tortilla kökur

• 3 bollar spelti (gott að nota rúgmjöl í bland)
  
• 2 tsk vínsteinslyftiduft
  
• 1 tsk salt (Himalaya eða sjávarsalt)
  
• 1 tsk agavesíróp
  
• 5 msk kókosfeiti
  
• 1 1/4 bolli heitt vatn
  
• 1 tsk sesamfræ (eða hörfræ)
  
  Aðferð:
  
• Blandið saman spelti, salti, lyftidufti og sesamfræjum í skál.
  
• Bætið agavesírópinu og kókosfeitinni saman við og hnoðið létt.
  
• Bætið vatninu við smám saman og hnoðið þangað til deigið er orðið mjúkt og teygjanlegt og ekki of klístrað (ætti ekki að klístrast við fingurna).
  
• Leyfið deiginu að jafna sig í 10-15 mínútur undir plasti eða röku viskustykki.
  
• Skiptið deiginu í 10 kúlur og geymið undir röku viskustykki.
  
• Fletjið tortilla kökurnar út frekar þunnt með kökukefli (eða stórri flösku), eins þunnt og þið treystið ykkur til og deigið þolir. Setja þarf svolítið spelti á borðið á meðan þið eruð að fletja út því annars klístrast deigið svolítið við borðið.
  
• Setjið 20cm disk að þvermáli á hvolf ofan á deigið og skerið út hring (má sleppa og hafa óreglulega í laginu).
  
• Raðið hverri tortilla köku á disk en gætið þess að teygja ekki á kökunum þegar þið lyftið þeim.
  
• Hitið stóra pönnu í næstum því hæsta hitastig.
  
• Hitið kökurnar þangað til þær taka aðeins lit (í nokkrar mínútur á hvorri hlið), þær ættu ekki að brenna eða verða harðar en mega fá nokkra "brunabletti". Oft bólgna kökurnar út við að hitna en það er allt í lagi, þær falla saman aftur.
  
• Berið fram strax eða geymið þær volgar í plastpoka eða undir röku viskustykki.
  
• Geymið óbakaðar vefjur í plastpoka í ísskápnum (í lagi að geyma í einn dag). Einnig má raða bökuðum (köldum) tortilla kökum ofan á hverja aðra með bökunarpappír eða plastfilmu á milli og frysta).
  
  

Prenta þessa uppskrift     -     Senda þessa uppskrift