Glúteinlaust

Þetta er fyrsta glúteinlausa brauðið sem ég set inn á vefinn og þau eiga eftir að verða miklu fleiri því það eru mjög margir sem hafa óþol eða ofnæmi fyrir glúteini og ég er mjög oft spurð hvort ég eigi einhverjar uppskriftir í handraðanum. Ég gerði þetta bauð örugglega 100 sinnum því það misheppnaðist alltaf en þessi uppskrift á að vera skotheld! Það er mjög gott nýbakað og alveg eðalgott í brauðristina.
 
Brauð með graskers- og sólblómafræjum
Gerir 1 brauð

• 150 gr hrísmjöl (enska: rice flour) (mér finnst best að nota þetta lífræna framleidda frá Holle sem er sniðið fyrir barnagrauta, mér finnst það mun bragðbetra en hefðbundið hrísmjöl
  
• 150 gr kartöflumjöl (enska: potato flour)
  
• 150 gr kjúklingabaunamjöl, heitir gramflour og chickpea flour á ensku
  
• 50 gr hirsimjöl (enska: millet grain)
  
• 50 gr graskersfræ
  
• 50 gr sólblómafræ
  
• 15 gr salt (Herbamare) (mér finnst það heldur mikið salt og hef ég yfirleitt notað um 12 gr)
  
• 3 msk vínsteinslyftiduft
  
• 250 ml vatn
  
• 2 msk kókosfeiti eða ólífuolía
  
  Aðferð:
  
• Hitið ofninn í 200°C og klæðið stórt brauðform með bökunarpappír.
  
• Blandið saman öllu hráu þurrefnunum í stórri skál. Gott er að nota sigti þar sem kartöflumjölið er stundum í kekkjum.
  
• Bætið vatninu saman við.
  
• Bætið kókosfeitinni eða ólífuolíunni saman við.
  
• Deigið verður svolítið þurrt en ef það helst alls ekki saman setjið þá aðeins meira vatn. Það má ekki verða of blautt samt.
  
• Þrýstið nú deiginu í brauðformið, frekar þétt.
  
• Bakið í um 30-40 mínútur eða þangað til brauðið hljómar holt að innan þegar bankað er í það að neðan.
  
• Ef þið viljið fá brúna skorpu (brauðið verður frekar ljóst) má pensla smávegis af kókosfeiti eða ólífuolíu yfir brauðið um 10 mínútum áður en brauðið verður tilbúið.
  
  
• Pakkið brauðinu inn í plast þegar það hefur kólnað.
  
• Skerið með beittum, riffluðum hnífi þegar brauðið hefur kólnað.
  
• Það getur molnað svolítið þegar það er skorið svo skerið varlega.
  
• Brauðið er mjög gott ristað.
  
• Nota má önnur fræ í uppskriftina t.d. sesamfræ, hirsifræ, hörfræ o.fl.

Prenta þessa uppskrift     -     Senda þessa uppskrift

Ég veit ekki alveg hvernig ég á að lýsa þessum glúteinlausu brauðum, þetta eru ekki bollur, ekki brauð heldur meira svona eins og vasar. Skiptir svo sem ekki máli hvað brauðið heitir því það er ofsalega gott og glúteinlaust í þokkabót! Það er lang, lang best beint úr ofninum með bráðnum osti á milli en líka getur maður gert pítubrauð úr deiginu nú eða bara gert litla nestisvasa með hummus eða sultu eða bara osti! Skorpan verður hörð en brauðið er mjúkt að innan. Brauðvasarnir eru glúteinlausir.
 
Brauðvasar
Gerir um 20 stykki

• 150 gr hrísmjöl (enska: rice flour) (mér finnst best að nota þetta lífræna framleidda frá Holle sem er sniðið fyrir barnagrauta, mér finnst það mun bragðbetra en hefðbundið hrísmjöl
  
• 150 gr kartöflumjöl (enska: potato flour)
  
• 150 gr maísmjöl (enska: mais flour)
  
• 50 gr hirsimjöl (enska: millet grain)
  
• 15 gr salt (Herbamare) (mér finnst það heldur mikið salt og hef ég yfirleitt notað um 12 gr)
  
• 3 msk vínsteinslyftiduft
  
• 250 ml AB mjólk (prófið súrmjólk ef AB mjólk er ekki til)
  
  Aðferð:
  
• Hitið ofninn í 200°C
  
• Blandið saman þurrefnunum í stóra skál, gott er að nota sigti.
  
• Blandið AB mjólkinni saman við.
  
• Hnoðið lauslega.
  
• Mótið kúlur, álíka og tennisbolta og fletjið gætilega út með höndunum.
  
• Dreifið á bökunarplötu með bökunarpappír undir.
  
• Bakið í um 30-40 mínútur.
  
  
  
  
  
• Gott er að skera brauðin nýbökuð og setja ost á milli, algjört nammi því osturinn bráðnar.
  
• Hægt er að nota þessi brauð sem glúteinlaus pítubrauð með því að hafa þau stærri, þynnri þ.e. fletja meira út.

Prenta þessa uppskrift     -     Senda þessa uppskrift

Hörfræ eru alveg sérstaklega holl. Þau eru trefjarík og losa um þarna í pípulögninni á neðri hæðinni þannig að ekkert á að stíflast (hvernig getur maður útskýrt hægðir án þess að það hljómi fáránlega?)! Þess vegna eru hörfræ mikilvæg í baráttunni við að sporna gegn krabbameini t.d. í blöðruhálskirtli. Hörfræ eru líka stútfull af Omega 3 fitusýrum sem eru milvæg fyrir bein okkar, hjarta sem og í að sporna gegn of háum blóðþrýstingi(sérstaklega hjá karlmönnum). Fyrir konur á breytingaskeiðinu eru hörfræ gagnleg til að hamla gegn hitakófum. Eða svo er sagt. Þessar kexkökur eru frábærar í stað hefðbundinna brauðsneiða og eru kjörin tilbreyting þegar mann langar í eitthvað hollt en gott og saðsamt.
 
Hörfræskex
Gerir um 40-45 kexkökur

• 3 bollar hörfræ
  
• 1/4 bolli tamarisósa
  
• 4 msk krydd (notið það sem ykkur finnst best) t.d. steinselja, paprika, karrí
  
• 4 msk lífrænt framleidd tómatsósa
  
• 4 msk vatn (ef þarf)
  
  Aðferð:
  
• Setjið fyrst 1 bolla af hörfræjunum í matvinnsluvél eða blandara og malið fínt án þess að fræin verði olíukennd. Ætti að vera nóg að blanda í u.þ.b. 15 sekúndur.
  
• Setjið í skál.Bætið ómöluðu hörfræjunum (2 bollum) og kryddinu út í skálina og hrærið vel.
  
• Bætið tamarisósunni og tómatsósunni saman við og hrærið vel.
  
• Ef blandan virkar þurr getið þið sett vatnið út í.
  
• Setjið bökunarpappír í botninn á 40x44cm bökunarplötu (eða um það bil).
  
• Hellið öllu úr skálinni ofan á plötuna og þrýstið með höndunum vel ofan á blönduna þannig að hún verði jafnþunn alls staðar og nái eins vel út í kantana og þið getið. Kexið ætti að verða um 1 mm á þykkt eða svo.
  
• Bakið í um 20-25 mínútur við 160°C.
  
• Látið kólna í ofninum og skerið í bita.
  
  
• Athugið að aðeins mylst af köntunum af kexinu en safnið því bara saman í dós og notið í næsta skammt eða sem krydd út á salat.
  
• Kexið er gott með t.d. osti, smurosti, grænmetiskæfu, túnfisksalati o.fl.
  

Prenta þessa uppskrift     -     Senda þessa uppskrift

Þetta glúteinlausa brauð er alveg prýðilegt og sérlega hollt. Það eru sólblómafræ, hörfræ og sesamfræ í því og maður getur sett hvaða fræ sem er í staðinn t.d. kúmen, sinnepsfræ, birkifræ o.fl. Mjög auðvelt og þægilegt og tekur einungis 15 mínútur að setja saman. Brauðið geymist ekki lengi og því er best að neyta þess sama dag og það er búið til en einnig má sneiða brauðið, frysta og rista svo í brauðrist síðar. Þessi uppskrift er úr bók sem ég á sem heitir Gluten-Free French Desserts and Baked Goods.
 
Þriggja korna hirsibrauð
Gerir 1 brauð

• 1/3 bolli sólblómafræ
  
• 2 msk sesamfræ
  
• 1 msk hörfræ
  
• 1 1/3 bolli hrísmjöl (enska: rice flour)
  
• 2/3 bolli hirsi semolina (enska: millet semolina) sem er mjög fínmalað hirsi
  
• 4 tsk vínsteinslyftiduft
  
• 3/4 tsk heilsusalt (Herbamare)
  
• 1 bolli soyamjólk eða vatn
  
• 1 tsk agavesíróp
  
  Aðferð:
  
• Blandið saman þurra hráefninu.
  
• Hrærið saman agavesírópinu og mjólkinni eða vatninu.
  
• Hrærið öllu saman þangað til deigið verður blautt en létt.
  
• Smyrjið kringlótt form (um 22cm) að innan með kókosfeiti.
  
• Dreifið fræjunum yfir botninn.
  
• Látið matskeið af deigi dropa í einu yfir fræin þannig að hver sletta snerti hina. Brauðið mun blandast saman í bakstri.
  
• Jafnið botninn létt með skeiðinni.
  
• Bakið við 200°C í um 20-25 mínútur.
  
• Takið brauðið út úr ofninum og losið frá brúnunum með beittum hnífi.
  
• Hvolfið brauðinu á vírgrind (þannig að fræin snúi upp) og látið kólna.
  
  

Prenta þessa uppskrift     -     Senda þessa uppskrift

Þetta er einföld og þægileg uppskrift, upplögð fyrir afmælisveisluna. Hægt er að gera hana með nokkurra daga fyrirvara.
 
Afmælisdöðluterta
Gerir 1 köku

• 125 gr döðlur, soðnar í 2 dl eplasafa í u.þ.b. 10-15 mín
  
• 1 dl Hipp Organic eða Holle (barnamatur) eplamauk eða bananamauk
  
• 1 msk kókosfeiti
  
• 50 gr heslihnetur, malaðar
  
• 50 gr cashewhnetur, malaðar
  
• 100 gr möndlur, malaðar (einnig má nota brasilíuhnetur og pecanhnetur á móti)
  
• 1 tsk vínsteinslyftiduft
  
• 1 banani, stappaður
  
• 1 tsk vanilludropar
  
• 1 tsk kanilduft
  
• 1/2 tsk Heilsusalt (Herbamare)
  
• 1 1/2 dl kókosmjöl
  
  Aðferð:
  
• Setjið döðlurnar í matvinnsluvél með u.þ.b. helmingnum af eplasafanum, gætið þess að deigið verði ekki of blautt og bætið frekar út í ef þarf.
  
• Setjið deigið í skál.
  
• Bætið öllu öðru út í (nema barnamatnum) og hrærið aðeins saman.
  
• Setjið í bökunarform (ég nota bökunarpappír í bökunarformið) og bakið við 180°C í um 20-25 mín.
  
• Þegar kakan er komin úr ofninum, leyfið henni þá að kólna.
  
• Smyrjið barnamatnum yfir kökuna og leyfið henni að vera svoleiðis í a.m.k. klukkutíma áður en þið skreytið hana.
  
• Skreytt með ferskum vel þroskuðum ávöxtum t.d. kíwí, mandarínum, jarðarberjum, hálfum vínberjum o.s.frv. Einnig er gott að setja bananasneiðar ofan á sem og kókosflögur.
  
  
• Passið að deigið verði ekki of blautt, því annars endið þið með döðlumús!!

Prenta þessa uppskrift     -     Senda þessa uppskrift

Þessi kaka er án glúteins og hentar því vel fólki sem þolir það illa eða hefur ofnæmi. Kakan er mjög góð með kaffinu og er frískleg á bragðið. Ekki hafa áhyggjur af því að það sé tofu í kökunni, það finnst ekkert bragð af því! Kakan þarf að bakast í rúman klukkutíma svo gerið ráð fyrir því ef þið eruð að fá fólk í kaffi! Þessi uppskrift kemur úr bók sem ég á sem heitir The gluten-free cookbook.
 
Appelsínu- og engiferkaka
Gerir 1 köku

• 150 gr tófú (stíft), vatninu hellt af
  
• 200 gr brasilíuhnetur, heilar
  
• 100 gr möndlur, heilar
  
• Hýði af 2 appelsínum
  
• 325 gr ferskur ananas, afhýddur og saxaður gróft
  
• 40 gr ferskt engifer, saxað gróft
  
• 150 gr ávaxtasykur (Upprunaleg uppskrift gaf 250 gr en ég vildi ekki hafa hana of sæta)
  
• 4 egg
  
• 2 eggjahvítur
  
• 1,5 tsk vínsteinslyftiduft
  
• 125 gr kartöflumjöl
  
  Aðferð:
  
• Hitið ofninn í 180°C.
  
• Klæðið 20 cm. kringlótt smelluform (eða lausbotna form) með bökunarpappír.
  
• Myljið tofuið í stóra skál.
  
• Setjið brasilíuhneturnar og möndlurnar í matvinnsluvél og setjið á hæsta hraðann í 20 sekúndur eða þangað til hneturnar fara að líkjast fínum brauðmylsnum.
  
• Bætið kartöflumjölinu saman við og blandið í 2 sekúndur.
  
• Bætið appelsínuberkinum saman við og blandið í 5 sekúndur.
  
• Bætið nú öllu saman við tofuið í stóru skálinni.
  
• Setjið ananasinn, engiferið og ávaxtasykurinn í matvinnsluvélina (þarf ekki að þrífa hana á milli) og blandið í 10-15 sekúndur eða þangað til allt er orðið svolítið maukað (svona eins og gróft marmelaði).
  
• Blandið saman við tofuið og hneturnar.
  
• Blandið saman eggjahvítunum og eggjunum og blandið saman við deigið í skálinni.
  
• Hellið deiginu í smelluformið og bakið í um 1 klukkustund og 20 mínútur.
  
• Ekki vera stressuð yfir því að deigið sé eins og súrmjólk (þ.e. blautt) því það mun þéttast í bakstri.
  
• Til að athuga hvort kakan er tilbúin er gott að stinga prjóni í hana miðja. Ef prjónninn kemur hreinn út er kakan tilbúin. Ef ekki er gott að baka í 10 mínútur í viðbót og prófa svo aftur. Ef þið bakið kökuna lengur er gott að setja álpappír ofan á hana til að hún bakist ekki meira ofan á.
  
  
• Kakan lyftist ekki mikið heldur verður hún frekar þétt og blaut og er einstaklega góð með t.d. með þeyttum rjóma eða hollum ís. Sérstaklega ef hún er borin fram heit.

Prenta þessa uppskrift     -     Senda þessa uppskrift

Ekki alveg Royal búðingurinn!!! Þessi hentar vel fyrir þá sem vilja gera vel við sig en vilja ekki óhollustuna sem fylgir venjulegum búðingum. Í þessum eftirrétti er holl fita úr avacadoinu, bananinn eplasafinn gefa sætt bragð og svo er carobið mótvægi við sæta bragðið. Mér fannst þetta svakalega góður búðingur þar sem engin aukaefni, litarefni, bragðefni, hleypiefni gelatín eða annað furðulegt innihald er að finna í honum. Hann er fínn fyrir krakka líka. Athugið að á myndinni er búðingurinn dökkur en carob sem fæst hér á Íslandi er aðeins ljósara en það sem fæst í London. Það skiptir ekki máli upp á bragðið að gera, bara útlitslegt atriði. Ég skreytti búðinginn með kókosmjöli en það má skreyta með hverju sem er t.d. söxuðum heslihnetum, jarðarberjum eða smá slettu af rjóma.
 
Avacado- og carobbúðingur
Fyrir 3-4

• 3/4 bolli döðlur
  
• 1 bolli hreinn eplasafi (má vera annar hreinn ávaxtasafi)
  
• 1 lítið, vel þroskað avacado
  
• 2-3 msk carobduft
  
• 1 lítill, vel þroskaður banani
  
• 2 msk agavesíróp
  
  Aðferð:
  
• Látið döðlurnar liggja í ávaxtasafanum í klukkutíma eða meira.
  
• Setjið döðlurnar, safann og allt hitt í matvinnsluvél og blandið vel.
  
• Kælið.
  
• Skreytið með kókosmjöli, kókosflögum, bananasneiðum, söxuðum hnetum, rjóma o.s.frv.
  
  

Prenta þessa uppskrift     -     Senda þessa uppskrift

Ekkert nema vítamín og hollusta. Uppskriftin kemur úr bók sem heitir einfaldlega RAW eftir strák að nafni Juliano. Hann er mjög sérstakur og borðar einungis hráfæði. Mjög sniðugt svo sem en hentar illa fyrir okkur á Íslandi þar sem t.d. ein uppskriftin felst í því að útbúa pizzubotna og þeir eiga að bakast í sólinni í um 8 klukkutíma. Við Íslendingar náum varla 8 tímum af sól yfir allt sumarið heima he he. Það eru samt margar sniðugar uppskriftir í bókinni og þetta er skemmtileg pæling (ekki elda neitt upp fyrir 50°C til að drepa ekki ensímin í matnum o.s.frv.). Hentar vel fyrir þá sem eru með mjólkuróþol því það eru engar mjólkurafurðir í ísnum. Hentar einnig þeim sem eru jurtaætur (enska: vegan).
 
Ávaxta- og cashewhnetuís
Fyrir 3-4

• 1 bolli cashewhnetur
  
• 2 bollar hreinn ávaxtasafi t.d. appelsínusafi
  
• 2 bollar mjúkar döðlur (ef harðar má leggja þær í bleyti með helmingnum af ávaxtasafanum í nokkra klukkutíma)
  
• 1 bolli frosið mango (í litlum bitum)
  
• 1 bolli vel þroskaður, frosinn banani (í litlum bitum)
  
  Aðferð:
  
• Blandið fyrst cashewhnetunum í matvinnsluvél. Setjið í stóra skál.
  
• Blandið saman döðlunum og appelsínusafanum.
  
• Bætið saman við cashewhneturnar.
  
• Blandið frosnu mangoinu og frosna banananum í matvinnsluvélinni.
  
• Blandið öllu saman í stórri skál.
  
• Ef þið eigið ísvél, setjið þá blönduna í ísvél og setjið svo í plastbox í frysti þegar hún er orðin tilbúin.
  
• Fyrir þá sem eiga ekki ísvél þá þarf að setja blönduna í stórt plastbox og hræra í blöndunni á um klukkutíma fresti í nokkra klukkutíma eða þangað til erfitt er orðið að hræra meira.
  
• Látið ísinn þiðna í um 30 mínútur áður en hann er borinn fram.
  
  

Prenta þessa uppskrift     -     Senda þessa uppskrift

Lísa Hjalt vinkona mín gaukaði þessari uppskrift sem hún rakst á í dönsku blaði. Uppskriftin er einföld og ódýr (engar hnetur) og nokkuð fljótleg. Í uppskriftina átti að fara vanillusykur en ég sleppti honum. Ég notaði 2 mtsk af agavesírópi í staðinn. Einnig átti að fara kókosolía (2-3 mtsk) í uppskriftina en ég sleppti henni. Ég bætti við uppskriftina dökku, lífrænt framleiddu súkkulaði með hrásykri. Ég velti kúlunum ekki upp úr neinu því þær voru góðar einar sér en hægt er að velta þeim upp úr kakói eða kókosmjöli. Ef þið sleppið súkkulaðinu, er gott að nota kókosolíuna í staðinn. Mínar kúlur eru 12 grömm að þyngd hver en gera má stærri og færri kúlur eða fleiri og minni. Aprikósur eru fullar af A vítamínum sem skiptir miklu máli fyrir sjónina okkar. Einnig innihalda aprikósur sem og kakó andoxunarefni og stuðla þannig að vörnum líkamans gegn myndun krabbameinsfruma. Svo eru aprikósur, ásamt döðlunum mjög trefjaríkar. Munið að kaupa ekki appelsínugular, þurrkaðar aprikósur því þær er búið að meðhöndla með efnum (sulfur dioxide) sem margir hafa ofnæmi fyrir. Lífrænt ræktaðar aprikósur innihalda ekki þetta efni. Kúlurnar geymast í margar vikur ef þær eru settar í lokað plastílát. Athugið að einnig er gott að dýfa kúlunum í bráðið súkkulaði...algjört nammi.
 
Ávaxtakonfekt
Gerir 40-45 kúlur

• 100 gr þurrkaðar aprikósur (kaupið þessar brúnu, lífrænt ræktuðu ef þið getið)
  
• 100 gr döðlur
  
• 100 gr kókosmjöl
  
• 25 gr kakó
  
• 70 gr dökkt, lífrænt framleitt súkkulaði með hrásykri, saxað smátt
  
• 2 msk agavesíróp
  
• 2 msk kókosolía (má sleppa ef notað er súkkulaði)
  
• Smá kakó eða kókosmjöl til að velta kúlunum upp úr
  
  Aðferð:
  
• Leggið döðlur og aprikósur í bleyti í 30 mínútur.
  
• Hellið vatninu af (ekki notað) og setjið döðlurnar og aprikósurnar í matvinnsluvél.
  
• Látið vélina vinna í upp undir mínútu þannig að allt blandist vel saman.
  
• Setjið agavesírópið, kakóið, kókosmjölið og saxaða súkkulaðið út í. Blandið í nokkrar sekúndur.
  
• Bætið kókosfeitinni út í hér ef hún er notuð og blandið í nokkrar sekúndur.
  
• Hnoðið blönduna aðeins saman með höndunum.
  
• Látið standa í ísskáp í 30 mínútur.
  
• Mótið kúlur sem eru 12 grömm að þyngd hver (mega vera stærri eða minni) en mér finnst þetta fín stærð.
  
  
• Einnig má sleppa því að setja súkkulaðið inn í kúlurnar og bræða frekar súkkulaði til að dýfa konfektinu ofan í. Þá er best að bræða súkkulaðið yfir vatnsbaði. Best er að hita vatn í potti (bara botnfylli) á vægum hita. Setjið skál ofan í sem situr á brúnum pottsins og brjótið súkkulaðið ofan í. Fylgist með því og hrærið öðru hvoru. Gætið þess að það ofhitni ekki og að ekki fari vatn ofan í súkkulaðiskálina.
  
• Nota á carob í stað súkkulaðis.
  
• Nota má fíkjur í staðinn fyrir aprikósur.

Prenta þessa uppskrift     -     Senda þessa uppskrift

Á öllum hótelum sem ég hef komið á í Austur Afríku (og þau eru mörg) er borið fram einhvers konar ávaxtasalat í bland við kökur og pönnukökur og fleira góðgæti fyrir svanga ferðamenn. Ég fer að sjálfsögðu alltaf beinustu leið í ávaxtaskálina enda lítið fyrir mig að hafa á hinum svæðunum. Það gerir þó ekkert til því ávaxtasalötin eru alltaf góð. Reyndar veiði ég alltaf papaya ávöxtinn úr því mér finnst hann aaaaaalgjör viðbjóður og ég nota því mango í staðinn í mitt salat. Mango er þó mikið notað í Afríku svo ég er ekkert að svindla. Eina svindlið í mínu salati er að ég nota vínber en vínber eru sjaldséðir gestir á þessum slóðum. Ástaraldin er ómissandi í þetta salat en það er einmitt afríski punkturinn yfir i-ið. Það er fátt betra en að enda viðburðarríkan og heitan í Afríku á ávaxtasalati og tebolla (sumir reyndar kjósa kökusneið og koníak!). Það er bara ein regla sem ég hef með svona salöt. Hún er: ALDREI, ALDREI skilja eftir steina í melónum eða vínberjum. Það er fátt leiðinlegra en að bíta í gómsætt salat til þess eins að skyrpa út úr sér bragðvondum steinum. Steinar úr ástaraldinum sleppa fyrir horn því þá á að borða. Þetta salat er pakkfullt af vítamínum og trefjum og er sérlega sumarlegt.
 
Ávaxtasalat frá Afríku
Fyrir 3-4 sem meðlæti

• 1/4 ananas, vel þroskaður
  
• 1 mango, vel þroskað. Nota má papaya ef þið viljið í staðinn
  
• 3 ástaraldin (enska: passion fruit), veljið þunga ávexti
  
• 1 banani, ágætlega þroskaður
  
• 1/4 vatnsmelóna, vel þroskuð
  
• 1 lúka græn, steinalaus vínber (bara upp á litinn, má sleppa)
  
  Aðferð:
  
• Gott er að miða við að hafa alla bitana jafn stóra eða álíka og sykurmola að stærð.
  
• Skerið ananasinn í bita og setjið í skál.
  
• Skerið vatnsmelónuna í bita, fræhreinsið og setjið í skál.
  
• Skerið mangoið í bita (sneiðið meðfram steininum með löngum hnífi, afhýðið og notið svo bara það sem þið getið skorið í jafna bita. Afganginn má frysta og nota síðar). Setjið í skál.
  
• Skerið vínberin í helminga, fræhreinsið ef þarf og setjið í skál.
  
• Skerið banana í sneiðar og setjið í skál.
  
• Blandið öllu saman í stóra skál. Til að merja ekki ávextina er gott að hella svolitlu úr skálunum ofan í stóru skálina, þannig þarf maður ekki að hræra mikið.
  
• Skerið ástaraldinin í helminga og skafið allt úr þeim yfir salatið.
  
• Setjið plast yfir skálina ef ekki á að bera salatið fram strax.
  
• Ef salatið er ekki nægilega sætt (t.d. ef ananasinn er ekki nægilega vel þroskaður) má setja eins og 50 ml af hreinum appelsínusafa yfir salatið.
  
  
• Til að velja þroskaðan ananas: ef þið potið í botninn á honum ætti hann að gefa aðeins eftir, lyktin af botninum ætti að vera sæt og þung ananaslykt og þið ættuð að geta plokkað blað úr krónunni auðveldlega.
  
• Til að velja þroskaða melónu: prófið að ýta á endana á melónunni, þeir ættu að gefa aðeins eftir. Melónan á að virka mjög þung miðað við stærð ef þið haldið á henni og ef þið bankið í hana ættuð þið að finna smá hreyfingu í kjötinu og hún ætti að titra örlítið(ekki gott að útskýra ha ha).
  
• Til að velja þroskað ástaraldin: ávöxturinn á að virka þungur eða álíka eins og tómatur. Hýðið má ekki að vera mjög krumpað og ávöxturinn ætti alls ekki að vera loftkenndur eða léttur.
  

Prenta þessa uppskrift     -     Senda þessa uppskrift

Þetta er eftirréttur sem má gera annað hvort heima eða bara úti á grillinu, á ferðalaginu, upp í sumarbústað eða hvar sem er. Það er upplagt að nota heitt grillið fyrir þennan eftirrétt og ef þið eigið gamla banana, og smá sykurlaust, gott súkkulaði þá eruð þið í góðum málum.
 
Bakaðir bananar
Fyrir 2

• 2 stórir vel þroskaðir bananar
  
• 40-50 gr sykurlaust, dökkt súkkulaði. Einnig má nota dökka carob bita
  
• 1 dl hrein jógúrt eða ab mjólk
  
• 2 msk agavesíróp
  
• 1 tsk vanilludropar eða vanilluduft
  
  Aðferð:
  
• Setjið hvern banana í álpappír (þannig að það sé álpappír utan um þá en ekki ofan á).
  
• Ristið endilangt eftir banananum djúpan skurð.
  
• Skerið súkkulaðið í bita og raðið ofan í skurðinn.
  
• Hitið í ofni (gott að láta í eldfast mót svo sé auðvelt að færa til) í um 30 mínútur á 200°C eða þangað til súkkulaðið er bráðnað.
  
• Hrærið saman jógúrtinu, agavesírópinu og vanilludropunum eða duftinu.
  
• Hellið jógúrtblöndunni ofan á bananana.
  
  
• Það er einnig gott að bera þessa banana fram með soyarjóma. Sumum finnst líka gott að hafa vanilluís með.

Prenta þessa uppskrift     -     Senda þessa uppskrift

Þessi er óskaplega einföld og það þarf engan bakaraofn og ekkert vesen. Það er þó nauðsynlegt að eiga matvinnsluvél (eða góðan blandara). Þessi er upplögð þegar þið eruð að fá gesti eftir klukkutíma. Það má vel tvöfalda uppskriftina og gera þykkari köku en þessi er frekar þunn. Ekki láta útlitið fæla frá því kremið virkar svolítið eins og gubb....Ég lofa samt að það er ekki þannig á bragðið því kremið er frísklegt og passlega sætt. Sumarleg og fín kaka. Það er um að gera að skreyta hana með t.d. kókosflögum en ég gerði það reyndar ekki fyrir myndina sem ég tók af henni!

 
Banana- og hnetukaka með sítrónu-kókoskremi
Gerir 1 köku

• 80 gr cashewhnetur
  
• 80 gr möndlur
  
• 110 gr döðlur
  
• 2 msk carobduft (dökkt ef það er til, annars ljóst)
  
• 1/2 tsk kanilduft
  
• 1 tsk vanilludropar
  
• 35 gr kókosflögur (t.d. frá Rapunzel eða Himneskri hollustu)
  
• 1 tsk ólífuolía
  
• 3 msk appelsínusafi
  
• 2 msk sítrónusafi
  
• 2 stórir, vel þroskaðir bananar.
  
  Aðferð:
  
• Setjið cashewhnetur, möndlur, carobduft, kanilduft, vanilludropa og appelsínusafa í matvinnsluvélina. Blandið allt vel. Á ekki að vera maukað en á að haldast frekar vel saman þó. Setjið í skál.
  
• Blandið döðlurnar og bætið saman við hnetublönduna.
  
• Þrífið matvinnsluvélina og blandið saman ólífuolíu, öðrum banananum, sítrónusafa og kókosflögunum. Setjið í skál og geymið í kæli þangað til nota á kremið.
  
• Setjið plastfilmu í bökumót (eða bara kringlótt form um 20-24 cm) og þrýstið hnetublöndunni vel ofan í.
  
• Skerið hinn bananann í sneiðar og raðið ofan á botninn.
  
• Setjið í frysti í 10 mínútur eða lengur (ekki lengur þó en 30 mínútur ef nota á kökuna strax).
  
• Takið úr frystinum og hvolfið varlega ofan á kökudisk.
  
• Smyrjið kreminu ofan á.
  
• Skreytið með kókosflögum.
  
  
• Einnig má skreyta með öðrum ávöxtum eins og rauðum berjum, 1/2 tsk af rifnum sítrónuberki (mikilvægt að nota lífrænt ræktaða sítrónu) eða jafnvel með appelsínusneiðum.
  
  

Prenta þessa uppskrift     -     Senda þessa uppskrift

Þessir klattar eru glúteinlausir og mjög góðir þegar maður á svarta og slappa banana (sem eru orðnir ofþroskaðir). Þessir kláttar eru upplagðir á sunnudagsmorgni, með kaffinu. Mér finnst þeir bestir með sultu eða smá slettu af hlynsírópi. Athugið að ef þið eigið til glúteinlaust hveiti þá getið þið notað það í staðinn fyrir að búa til ykkar eigið.
 
Bananaklattar
Gerir 20-25 klatta

• 450 gr bananar, mjög vel þroskaðir
  
• 120 gr hrísmjöl
  
• 40 gr kartöflumjöl
  
• 30 gr sojamjöl
  
• 30 gr bókhveiti
  
• (einnig getið þið notað 220 gr af glúteinlausu hveiti)
  
• 1 kúfuð tsk vínsteinslyftiduft
  
• 2 msk kókosolía
  
• 1 eggjahvíta
  
• 1 egg
  
• 4 msk agavesíróp (eða 2 ef þið viljið minna sæta klatta)
  
• 1/2 tsk kanill (meira eftir smekk)
  
• 300 ml sojamjólk (einnig má nota möndlumjólk, hrísmjólk eða haframjólk)
  
  Aðferð:
  
• Í stóra skál skuluð þið sigta saman hrísmjöl, kartöflumjöl, sojamjöl, bókhveiti, lyftiduft og kanil.
  
• Í lítilli skál skuluð þið blanda saman agavesírópinu, egginu, eggjahvítunni, kókosolíunni og 200 ml af sojamjólkinni.
  
• Skerið bananana í sneiðar (um 1cm að þykkt).
  
• Hellið blautu hráefnunum yfir í skálina með þurru hráefnunum og hrærið vel þangað til allt er kekkjalaust.
  
• Bætið afgangnum af sojamjólkinni (100 ml) saman við ef þarf. Deigið á að vera eins og vöffludeig að þykkt (eða eins og t.d. súrmjólk).
  
• Bætið bananasneiðunum saman við. Hrærið varlega.
  
• Hitið pönnu í meðalhita.
  
• Setjið nokkra dropa af kókosolíu í eldhúsþurrku og strjúkið pönnuna að innan.
  
• Hitið 2-3 klatta í einu (fer eftir stærð pönnunnar). Hitið í 5-6 mínútur á hvorri hlið eða þangað til klattarnir verða gullbrúnir.
  
• Berið fram strax, með sultu, osti, hlynsírópi eða agavesírópi.
  
• Hægt er að frysta klattana en þeir þurfa að kólna fyrst.
  
• Gott er að setja klattana í brauðrist til að hita þá upp aftur.
  
  

Prenta þessa uppskrift     -     Senda þessa uppskrift

Þessir bananamöffinsar eru glúteinlausir komu aldeilis á óvart og bæði ég og Jóhannes mauluðum þá með góðri lyst. Við þolum bæði glútein vel en mig langaði að prófa þessa og þeir komu bara skemmtilega á óvart, bæði sætir og ekki of þéttir og svo var bara gott bananbragð af þeim. Ég á alveg eftir að gera þessa aftur, þó svo að ég sé ekki með glúteinóþol né ofnæmi!! Þessir eru úr bók sem ég á sem heitir Muffins: Fast and Fantastic eftir Susan Reimer. Það sem ég og Nigella Lawson eigum sameiginlegt (það eina hugsa ég) er að við eigum báðar þessa bók og höldum mikið upp á hana. Uppskriftin er nánast óbreytt nema það átti að vera xanthan gum sem ég veit ekki einu sinni hvað er og langar ekkert að setja út í það sem ég borða :) Ég notaði eina eggjahvítu í staðinn.
 
Bananamuffins
Gerir 12 stykki

• 200 gr hrísgrjónamjöl (enska: rice flour)
  
• 60 gr kartöflumjöl
  
• 30 gr maísmjöl (enska: corn flour)
  
• 2 tsk vínsteinslyftiduft
  
• 1/2 tsk heilsusalt (Herbamare)
  
• 3 - 4 stórir, vel þroskaðir bananar (mega vera orðnir blettóttir/svartir).
  
• 110 gr ávaxtasykur
  
• 1 egg, lauslega hrært
  
• 1 eggjahvíta, lauslega hrærð
  
• 1 msk kókosfeiti eða ólífuolía
  
• 90-120 soyamjólk eða vatn. Gæti þurft meira eða minna.
  
  Aðferð:
  
• Hitið ofninn í 200°C
  
• Sigtið saman allt mjöl ásamt vínsteinslyftiduftinu í stóra skál.
  
• Í annarri skál skuluð þið stappa banana vel. Hrærið sykrinum, egginu, mjólkinni og olíunni saman við.
  
• Hellið blauta hráefninu saman við þurra og blandið þangað til allt er orðið bel blautt (deigið verður nokkuð blautt)
  
• Setjið í möffinsform (siliconform eða venjulegt form með heimatilbúnum möffinsformum, sjá athugasemdir fyrir neðan).
  
• Bakið í 20-25 mínútur.
  
  
  
  
• Það er frábært að bæta söxuðum valhnetum eða pecanhnetum saman við og eins er rosa gott að bæta söxuðu carob fyrir þá sem vilja (einnig má nota eitthvað gott, dökkt súkkulaði án viðbætts sykurs)
  
• Ef maður notar ekki olíu eða smjör í deigið þá getur maður hvorki notað venjuleg pappírsform, né muffinsbökunarplötuna. Það fást sem sé ekki muffinspappírsform sem maður getur sett í án þess að þurfa að nota smjör eða olíu í deigið. Ég er búin að leita út um allt. Ég hef í staðinn sniðið hringi (strika með penna utan um undirskál) úr bökunarpappír og sett í hvert muffinspláss og svo deigið þar ofan í. Það er hægt að nota möffinspappírinn svo um 6 sinnum. Einnig má nota siliconform og þá þarf ekki bökunarpappír.
  

Prenta þessa uppskrift     -     Senda þessa uppskrift

Bláber og banani….namm. Þessi ís er mjólkurlaus og eggjalaus og hentar því vel fólki með þess konar óþol..hann er líka góður þó maður hafi ekkert óþol og er sérlega hollur. Hann er próteinríkur, pakkfullur af andoxunarefnum, inniheldur holla fitu en er samt sætur. Svo er ísinn alveg dæmalaust fjólublár og fallegur. Leggið cashewhneturnar í bleyti í sólarhring áður en þið búið ísinn til.
 
Bláberja- og bananaís
Gerir 1 lítra

• 1,5 dl cashewhnetur, lagðar í bleyti í sólarhring
  
• 300 ml sojamjólk eða haframjólk
  
• 3 msk kókosfeiti
  
• 15 döðlur, saxaðar gróft
  
• 1 vel þroskaður banani
  
• 200 gr bláber (fersk eða frosin)
  
• 6 msk agavesíróp
  
• 1 tsk sítrónusafi
  
  Aðferð:
  
• Sjóðið bláberin í agavesírópi og sítrónusafa í nokkrar mínútur. Kælið vel.
  
• Hellið vatninu af cashewhnetunum og blandið í 2 mínútur eða meira í matvinnsluvél eða þangað til alveg maukaðar.
  
• Bætið 100 ml af mjólkinni út í og blandið áfram þangað til blandan líkist þykkri mjólk.
  
• Skafið hliðar matvinnsluvélarinnar og maukið áfram í 30 sekúndur.
  
• Bætið döðlunum út í og maukið áfram.
  
• Skafið hliðar matvinnsluvélarinnar og maukið áfram í 30 sekúndur.
  
• Blandið afgangnum af mjólkinni og kókosfeitinni saman við.
  
• Setjið bananann út í og maukið vel.
  
• Hellið helmingnum af bláberjamaukinu út í og blandið í nokkrar sekúndur.
  
• Færið yfir í ísvél og látið vélina vinna í 20 mínútur.
  
• Setjið afganginn af bláberjamaukinu út í og látið vélina vinna í nokkrar mínútur.
  
• Hellið í plastílát og frystið.
  
• Ef ekki er notuð ísvél má frysta ísinn í plastboxi og hræra í ísnum á um 30 mínútna fresti í um 3-4 tíma. Setjið seinni bláberjaskammtinn út í ísinn eftir um 2 tíma og hrærið vel.
  
  
• Áður en ísinn er borðaður þarf að láta hann þiðna aðeins í ísskápnum í um 30 mínútur-45 mínútur.

Prenta þessa uppskrift     -     Senda þessa uppskrift

Ohhh ég slefa við tilhugsunina. Bláber og súkkulaði…nammi namm. Þessi ís ætti eiginlega að heita andoxunarís með cashewhnetum. Ísinn er bæði hollur og bragðgóður og stútfullur af eins og áður sagði, andoxunarefnum sem og járni, hollri fitu úr pecan- og cashewhnetunum og svo er hann svo dæmalaust mjúkur og góður líka. Þessi er ekta fyrir haustið í bláberjauppskerunni, svona ef er ekki byrjað að snjóa en er auðvitað frábær vetur, sumar, vor, og haust (og jól líka). Athugið að úr uppskriftinni fást um 8-10 stykki af litlum ístertum (um 400 gr í heildina)
 
Bláberja- og súkkulaðiís
Gerir um 8-10 stykki

• 1 bolli cashewhnetur
  
• 2,5 msk kókosfeiti
  
• 1 banani
  
• 100 gr bláber
  
• 1/2 bolli sojamjólk (einnig má nota möndlumjólk, haframjólk, hrísmjólk eða undanrennu)
  
• 5 msk agavesíróp
  
• 1/4 bolli kakóduft (lífrænt framleitt)
  
  Aðferð:
  
• Setjið cashewhnetur í matvinnsluvél og malið í um 1 mínútu á fullum krafti.
  
• Bætið 1 msk af kókosfeiti út í og látið vélina ganga þangað til hneturnar eru orðnar kekkjóttar og olíukenndar.
  
• Bætið agavesírópinu. sojamjólkinni og banananum út í matvinnsluvélina og maukið vel.
  
• Bætið afgangnum af kókosfeitinni út í og látið vélina ganga í nokkrar sekúndur.
  
• Skiptið blöndunni í tvennt og setjið annan helminginn í skál.
  
• Setjið bláberin út í afganginn af blöndunni sem er í matvinnsluvélinni, blandið mjög vel.
  
• Setjið bláberjablönduna í skál.
  
• Setjið hinn helminginn af cashewblöndunni í matvinnsluvélina ásamt kakóinu, blandið mjög vel.
  
• Notið lítil form úr silikoni eða einhver önnur góð form. Fjöldi formanna fer eftir stærð þeirra. Ég notaði t.d. 10 form sem voru breiðari en muffinsform en lægri.
  
• Hellið súkkulaðiblöndunni í botninn á formunum, dreifið vel yfir botninn.
  
• Frystið eða kælið í 30 mínútur.
  
• Hellið bláberjablöndunni út í eða notið sprautupoka til að sprauta fyllingunni ofan á
• súkkulaðibotninn.
  
• Setjið í frysti.
  
  
• Einnig má setja blönduna alla í eitt form þ.e. súkkulaði á botninn og bláberjablönduna ofan á.
  
• Nota má önnur ber en bláber.

Prenta þessa uppskrift     -     Senda þessa uppskrift

Hafið þið einhvern tímann spáð í hvort að bláber haldi fegurðarsamkeppni? Ég gat ekki annað eftir einn berjamóinn. Ég valdi þátttakendur í keppnina og við Jóhannes dæmdum. Það voru mjög margir keppendur sem áttu skilið að vinna en sigurvegararnir sitja stoltir ofan á bláberjaístertunni á myndinni. Þetta er algjörlega dásamleg ísterta og fullkomin ef maður á nýtínd bláber. Svo er kakan alveg svakalega holl því í henni eru hnetur og auðvitað bláber en hneturnar stuðla að heilbrigðu hjarta og æðakerfi en bláberin eru stútfull af andoxunarefnum og járni. Það eru engar mjólkurvörur og engin egg í uppskriftinni og hentar því þeim sem hafa mjólkur- og/eða eggjaóþol.
 
Bláberjaísterta
Gerir eina tertu

Botn:

• 1,5 bolli hnetur (ég miða við 250 ml bolla). Ég notaði möndlur og cashewhnetur.
  
• 1 lúka döðlur
  
• 3 msk agavesíróp
  
  Ísfylling:
  
• 2 bollar macadamia hnetur (ég notaði brasilíuhnetur og cashewhnetur).
  
• 1,5 bolli möndlumjólk (einnig má nota sojamjólk eða undanrennu). Ef mjólkin er ekki sætt (t.d. með eplasafa) þarf að bæta við 2 msk af agavesírópi
  
• 1 bolli bláber
  
• 1/2 bolli agavesíróp + 2 msk ef þarf
  
• 4 msk kókosfeiti
  
• 1 tsk vanilludropar eða vanilluduft úr heilsubúð
  
• 1/4 tsk salt (Himalaya eða sjávarsalt)
  
  Aðferð:
  
• Leggið döðlur og hnetur/möndlur fyrir botninn í bleyti í nokkra klukkutíma (ef þið hafið tíma…betra fyrir matvinnsluvélina).
  
• Leggið hnetur fyrir fyllinguna í bleyti í nokkra klukkutíma.
  
• Hellið vatninu af hnetum og döðlum.
  
• Setjið döðlur, agavesíróp og hnetur/möndlur í matvinnsluvél og blandið vel (ekki samt þannig að verði að mauki heldur fínkornótt).
  
• Setjið plastfilmu í botninn á lausbotna kökuformi. Formið þarf að vera um 20cm í þvermál.
  
• Þrýstið vel niður og jafnið botninn út.
  
• Setjið möndlumjólk, bláber, agavesíróp, salt, vanilludropa og macadamia hnetur í matvinnsluvél og blandið mjög vel.
  
• Bætið kókosfeitinni saman við og blandið vel.
  
• Hellið í ísvél ef þið eigið slíka og frystið í um 30 mínútur.
  
• Ef þið eigið ekki ísvél, hellið þá ísfyllingunni beint í formið og frystið. Það er ekki nauðsynlegt en er mjög gott fyrir áferðina.
  
• Fjarlægið plastið undan kökunni þegar þið berið hana fram og setjið hana á disk.
• Látið kökuna standa í ísskáp í nokkra klukkutíma eða þangað til hún er orðin nægilega mjúk til að skera hana.
  
• Skreytið með bláberjum en einnig er krydduð bláberjasulta algjört sælgæti með.
  
  

Prenta þessa uppskrift     -     Senda þessa uppskrift

Það tók mig smá tíma að smíða þessa glúteinlausu uppskrift, annað hvort var deigið allt of lint, allt of þurrt eða bara vont. Ég held að ég hafi loksins náð góðri niðurstöðu...hún var að a.m.k. það góð að enginn sem borðaði kökurnar fattaði að þær voru án glúteins og þær gjörsamlega hurfu af bökunarplötunni. Athugið að myndin sýnir mjög dökkar kökur og þær eru EKKI brenndar, ég notaði mjög dökkt carobduft!
 
Carob-döðlubitakökur
Gerir 20 stykki

• 25 gr carobduft (ljóst eða dökkt)
  
• 25 gr kartöflumjöl
  
• 50 gr hrísmjöl (enska: rice flour)
  
• 25 gr kjúklingabaunamjöl (enska: chick pea flour/gram flour)
  
• 25 gr malaðar möndlur
  
• 60 gr saxaðar döðlur
  
• 60 gr demerara sykur (eða ávaxtasykur)
  
• 60 gr kókosfeiti
  
• 1 stórt egg
  
  Aðferð:
  
• Sigtið saman allt þurra hráefnið.
  
• Hrærið eggið aðeins og bætið kókosfeitinni saman við.
  
• Blandið öllu saman og hnoðið í stóra kúlu.
  
• Setjið matskeið af deigi á pökunarplötu (með bökunarpappír undir).
  
• Ýtið létt ofan á hverja köku með gaffli (dýfið í vatn áður).
  
• Bakið í 12-15 mínútur við 180°C.
  
• Gott er að setja hnetur og carobsúkkulaði út í.
  
  

Prenta þessa uppskrift     -     Senda þessa uppskrift

Þetta er einstaklega fljótlegt og upplagt að gera þegar mann langar í eitthvað sætt en ekki neitt allt of óhollt. Best er að kaupa dökkt carob í heilsubúð og hrískökur (enska: rice cakes) fást nánast í öllum búðum. Tekur 10 mínútur að búa til!
 
Carobhrískökur
6 - 8 stykki

• 100 gr Carobella (dökkt eða ljóst). Er í plötum og plastumbúðum svona svipað og súkkulaði. Einnig má nota dökkt, gott lífrænt framleitt súkkulaði
  
• 6-8 hrískökur
  
  Aðferð:
  
• Bræðið carobið í potti á MJÖG vægum hita (minnsta, minnsta mögulega hita), má alls ekki brenna við í pottinum (þá verður það ónýtt). Um leið og hellan volgnar getið þið slökkt undir henni. fylgist vel með carobinu.
  
• Dýfið hrískökunum lárétt ofan í, setjið meira á með skeið ef þið viljið hafa carobið þykkara.
  
• Látið kólna.
  
  
• Hægt er að nota sykurlaust súkkulaði líka. Kaupið þá gott, dökkt, lífrænt framleitt, hreint súkkulaði. Green & Blacks er gott súkkulaði og í það er notaður hrásykur sem er skárri en hvítur, venjulegur sykur. Rapunzel er einnig gott merki.

Prenta þessa uppskrift     -     Senda þessa uppskrift

Þetta er uppskrift sem ég held að komi frá Sólveigu á Grænum Kosti. Þetta er ægilega góður ís og hentar vel fyrir þá sem eru með mjólkuróþol eða vilja engar dýraafurðir/jurtaætur (enska: vegan). Hann er troðfullur af próteinum og vítamínum og það besta er að það er enginn sykur í ísnum. Hann er ekki léttur þ.e. cashewhnetur og sojarjómi er hvoru tveggja fitandi en þessi fita er ekki óholl þ.e. það er tiltölulega lítið af mettaðri fitu og hækkar þar af leiðandi ekki slæma kólesterólið í blóðinu.
 
Cashewís
Fyrir 3-4

• 1,5 dl cashewhnetur
  
• 2,5 dl sojamjólk
  
• 2,5 dl sojarjómi (gott að nota úr sprautubrúsa, ísinn verður léttari. Má líka þeyta sojarjómann).
  
• 15 döðlur, saxaðar gróft
  
• 2 vel þroskaðir bananar
  
• 1 tsk vanilludropar eða vanilluduft (í upphaflegri uppskrift var vanilluduft)
  
  Aðferð:
  
• Malið cashewhneturnar mjög fínt í matvinnsluvél.
  
• Bætið döðlunum saman við.
  
• Blandið sojamjólkinni og sojarjómanum saman við.
  
• Blandið bönunum út í.
  
  
• Færið yfir í ísvél í 40 mínútur og svo inn í frysti. Áður en ísinn er borðaður þarf að láta hann þiðna aðeins í ísskápnum í um klukkutíma.
  
• Ef ekki er notuð ísvél má frysta ísinn í plastboxi og hræra í ísnum á um 30 mínútna fresti í um 3-4 tíma.
  
  

Prenta þessa uppskrift     -     Senda þessa uppskrift

Afar ljúffeng og holl kaka með öllum hnetunum og þurrkuðu ávöxtunum. Í hnetunum er holl fita og í þurrkuðu ávöxtunum eru bæði vítamín og trefjar og maaður ætti eiginlega að borða kökuna í öll mál! Það er sko ekki hægt að segja það sama um óhollar kökur!!! Kosturinn við þessa líka er sá að ekki þarf að baka kökuna og er því hægt að skella henni á borð t.d. í sumarbústaðnum ef maður er með hneturnar tilbúnar og malaðar. Held að ég geti sagt án efa að þetta sé ein uppáhaldskakan mín.

Athugið að carob/súkkulaði getur innihaldið mjólk svo skoðið innihaldið ef þið hafið mjólkurofnæmi.
 
Djúsí kaka með hnetum
Gerir 1 köku

• 1 dl cashewhnetur (og 1 dl í viðbót til að setja ofan á kökuna)
  
• 1 dl þurristaðar heslihnetur (og 1 dl í viðbót til að setja ofan á kökuna).
  
• 0,5 dl möndlur
  
• 2 hrískökur (enska: rice cakes)
  
• 0,5 dl kókosmjöl
  
• 100 gr þurrkaðar apríkósur, saxaðar frekar smátt. Látið liggja í heitu vatni í 15 mínútur
  
• 100 gr þurrkaðar döðlur, saxaðar frekar smátt. Látið liggja í heitu vatni í 15 mínútur
  
• 2 vel þroskaðir og stórir bananar, annar notaður ofan á kökuna, hinn í deigið
  
• 100 gr carobella, dökkt (fæst í heilsubúðum og mörgum matvöruverslunum). Einnig er hægt að nota dökkt/ljóst súkkulaði með hrásykri
  
• 1/2 tsk vanilluduft (eða dropar úr heilsubúð)
  
• Fersk ber og ávextir til að skreyta kökuna með (ég nota yfirleitt hneturnar til að skreyta með)
  
  Aðferð:
  
• Ristið cashewhneturnar, heslihneturnar og möndlurnar í heitum ofni í um 5 mínútur eða á heitri pönnu þangað til hýðið af heslihnetunum fer að losna. Látið kólna og nuddið hýðið af heslihnetunum af. Takið frá 1 dl af cashewhnetum og heslihnetum og saxið gróft). Setjið söxuðu hneturnar til hliðar.
  
• Setjið 1 dl cashewhnetur, 1 dl heslihnetur, möndlur, kókosmjöl og hrískökur í matvinnsluvél og malið mjög smátt (þannig að verði næstum því að dufti).
  
• Setjið í stóra skál.
  
• Hellið vatninu af apríkósunum og döðlunum, setjið þurrkuðu ávextina út í ásamt einum banana og blandið í 7-10 sekúndur.
  
• Rétt hitið carobella eða súkkulaðið yfir vatnsbaði og setjið saman við ásamt vanilludropum/dufti.
  
• Blandið þar til allt er vel límt saman og nánast orðið að mauki.
  
• Setjið deigið í 25cm, kringlótt form og látið smá stund inn í kæli eða frysti.
  
• Einnig getið þið mótað kökuna með sleikju beint á disk og þá þurfið þið ekki form.
  
• Skerið hinn bananann í þunnar sneiðar og raðið ofan á kökuna.
  
• Dreifið söxuðu hnetunum ofan á.
  
• Einnig má skreyta með fullt af alls konar ávöxtum og berjum. Mér finnst best að setja banana í sneiðum ofan á kökuna. Einnig er hægt að nota vínber, sæt jarðarber, bláber, mangó, epli, mandarínur og margt fleira.
  
• Geymið kökuna í ísskáp og takið hana út 30 mínútum áður en á að borða hana til að leyfa henni að jafna sig.
  
  
• Deigið á að vera frekar blautt og klesst og kakan á að vera frekar þunn (eða um um 1,5 cm).

Prenta þessa uppskrift     -     Senda þessa uppskrift

Ég var hér áður fyrr ekki mikið fyrir að búa til ís, því aðaluppistaðan er yfirleitt sykur og rjómi. Ég prófaði þó þessa uppskrift og hún er bara nokkuð góð og svolítið sparileg, ekta fyrir jólin.
 
Döðlu- súkkulaðiís
Fyrir 3-4

• 175 gr döðlur lagðar í bleyti yfir nótt
  
• 400 ml vatn
  
• 150 ml magur rjómi (matreiðslurjómi) eða sojarjómi
  
• 150 ml mjólk
  
• 2 tsk vanilludropar
  
• 3 msk kókosfeiti
  
• 25 gr carob eða gott kakóduft
  
  Aðferð:
  
• Döðlurnar (og vatnið) sett í matvinnsluvél og hakkað þangað til mjúkt.
  
• Blandið carobi/kakói, vanilludropum, kókosmjólk og rjóma/mjólk saman við.
  
• Færið yfir í ísvél ef þið eigið svoleiðis.
  
• Ef þið eigið ekki ísvél, frystið þá í klukkutíma og hrærið í með gaffli til að brjóta upp ískristallana.
  
• Frystið í annan klukkutíma og hrærið aftur.
  
• Endurtakið nokkrum sinnum þangað til ísinn er alveg frosinn.
  
  
• Látið ísinn standa í ísskáp í 40 mín áður en hann er borinn fram.
  
  
• Það er gott að setja 1 dl kaffi út í til tilbreytingar.
  
• Einnig er gott að setja saxað carob eða dökkt, gott lífrænt framleitt súkkulaði út í.
  

Prenta þessa uppskrift     -     Senda þessa uppskrift

Bragðgóð og sykurlaus mús en mjög sæt engu að síður. Fín sem eftirréttur og má bera fram í ísskál með smávegis af rjóma (eða sojarjóma) eða niðurskornum bönunum.
 
Döðlumús
Fyrir 2

• 125 gr, döðlur (soðnar í vatni í u.þ.b. 10-15 mínútur
  
• 125 ml krukka barnamatur (t.d. Hipp Organic eða Organix) eplamauk, bláberjamauk eða ferskjumauk
  
• 100 gr heslihnetur, malaðar fínt
  
• 100 gr möndlur, þurristaðar og malaðar fínt
  
• 1 vel þroskaður banani, stappaður
  
• 1 tsk vanilludropar
  
• 1 tsk kanill
  
• 1/8 tsk salt (Himalaya eða sjávarsalt)
  
• 1 1/2 dl kókosmjöl
  
  Aðferð:
  
• Setjið allt í matvinnsluvél og blandið vel og lengi þangað til músin er orðin létt og loftkennd.
  
  
• Berið fram strax í desertskálum með ferskum ávöxtum og ef til vill soyarjóma.
  

Prenta þessa uppskrift     -     Senda þessa uppskrift

Þetta er bara ansi sniðug uppskrift. Málið er að þessi kaka er ekkert ósvipuð franskri, dökkri súkkulaðiköku svona ef miðað er við áferðina en það er ekki neitt súkkulaði, ekkert smjör, ekkert hveiti, enginn sykur og enginn rjómi í kökunni! Aðalinnihaldið er hnetur og carob. Kremið er svo búið til úr tahini (sesammauki) carob og byggmaltsírópi (enska: barleymalt syrup) eða hlynsírópi fyrir þá sem hafa glúteinóþol. Kakan hentar því mjög vel fyrir þá sem eru jurtaætur (enska: vegan) og fyrir þá sem vilja ekki hveiti eða sykur. Kakan er reyndar alls ekki hitaeiningasnauð, þvert á móti hún er þvílík kaloríubomba en aftur á móti kemur að hún er ansi vítamínrík, próteinrík, kalkrík og svo er mikið af hollri fitu úr öllum hnetunum og möndlunum. Gott er að bera kökuna fram með soyarjóma (eða venjulegum rjóma fyrir þá sem það vilja). Gott er að hafa í huga að ekki þarf að baka þessa köku og hún tekur ekki langan tíma í undirbúning þar sem hráefnið fer mest allt í matvinnsluvél! Þetta er sennilega "frægasta uppskriftin" á CafeSigrun því hún hefur fengið umfjöllun a.m.k. 4 sinnum í blöðunum!
 
Dökk súkkulaðikaka (án súkkulaðis)
Gerir 1 köku

Botninn:

• 1 bolli möndlur (ég miða við 250 ml bolla)
  
• 1,5 bolli cashewhnetur
  
• 1,5 bolli döðlur. Láta liggja í sjóðandi heitu vatni í um 15 mínútur. Ekki henda vatninu eftir á, þið þurfið að nota smávegis af vatninu í kremið.
  
• 1,5 kúfuð msk carob duft (eða gott kakóduft fyrir þá sem það vilja). Fæst í Yggdrasli.
  
• 1/4 tsk heilsusalt (t.d. Herbamare)
  
• 1 banani, vel þroskaður
  
  Aðferð:
  
• Blandið fyrst hneturnar og möndlurnar vel í matvinnsluvél, bætið svo salti og carobi saman við. Geymið í skál.
  
• Blandið saman döðlur og banana þangað til vel maukað.
  
• Blandið saman við innihaldið í skálinni (carobið, saltið og hneturnar).
  
• Kælið í um klukkutíma.
  
• Hellið kökunni á þann disk eða bakka sem bera á kökuna fram á og mótið kökuna með t.d. sleikju. Það má hafa hana ferkantaða, kringlótta (hjartalaga þess vegna!) en aðalatriðið er að hún verði ekki of þykk (fínt að hafa hana svona 2 cm. á hæð).
  
  Kremið:
  
• Nokkrar matskeiðar af vatni (af döðlunum)
  
• 1/2 bolli tahini (sesammauk), hellið olíunni af eins mikið og hægt er
  
• 4 msk byggmaltsíróp (enska: Barley malt syrup). Athugið að þeir sem eru með glúteinóþol ættu að nota agavesíróp eða hreint hlynsíróp, ekki byggmaltsíróp
  
• 1,5 msk carob duft (eða gott kakóduft fyrir þá sem það vilja)
  
• 1 banani, vel þroskaður
  
• Þetta er svolítið meira en þarf af kreminu en þið getið fryst afganginn og borðað sem ís eða notað í drykk (smoothie).
  
  Aðferð:
  
• Setjið innihaldið í kremið í matvinnsluvél og blandið vel. Setjið meira af döðluvatninu ef þarf.
  
• Setjið plastfilmu yfir og geymið í ísskáp í um klukkutíma.
  
• Smyrjið kreminu yfir kökuna og utan á hana og skreytið með ferskum ávöxtum (t.d. vel þroskuðum bönunum og jarðaberjum), kókos eða jafnvel þurristuðum, söxuðum hnetum eða möndlum.
  
  
• Tvöfalda má uppskriftina til að fá þykkari köku. Það er þó gott að hafa í huga að kakan er ansi saðsöm og mikil þannig að mér finnst henta vel að hafa hana í þynnri kantinum.

Prenta þessa uppskrift     -     Senda þessa uppskrift

Þessi er alveg svakalega holl því hún inniheldur holla fitu (omega 3 fitusýrur) úr valhnetunum sem og prótein og annað gott fyrir okkur. Talið er neysla á valhnetum minnki líkur á hjartasjúkdómum sem og fleiri sjúkdómum svo við ættum eiginlega öll að borða svona eins og lúku á hverjum degi (nema ekki þeir sem eru með hnetuofnæmi...það væri ekki svo sniðugt). Bökuna má bera fram kalda en einnig má hita hana í ofni áður en hún er borin fram. Uppskriftin er glúteinlaus og hentar þeim sem eru jurtaætur (þ.e. ef notað er hlynsíróp í stað hunangs).
 
Epla- og valhnetubaka
Gerir eina köku

• 2,5 bollar valhnetur (ég miða við 250 ml bolla)
  
• 1,5 bolli döðlur
  
• 2-3 epli, meðalstór (græn eða ljósrauð)
  
• Safi af 1 sítrónu í 2 bollum af vatni
  
• 1/2 tsk kanill
  
• 1/4 tsk negull
  
• 2 msk hunang (acacia) eða hreint hlynsíróp
  
• 1/2 bolli hreinn eplasafi
  
• 1/4 bolli rúsínur (má nota döðlur)
  
  Aðferð:
  
• Blandið valhnetunum og 1,5 bolla af döðlum saman í matvinnsluvélinni. Blandið í um 40 sekúndur eða þangað til allt er orðið grófhakkað án þess að verða að mauki.
  
• Þrýstið botninum í 20cm kringlótt form (gott að setja bökunarpappír undir). Þrýstið bæði botn og kanta. Kælið í ísskáp í um klukkutíma.
  
• Skerið kjarnann úr eplinu og sneiðið frekar þunnt.
  
• Hellið sítrónuvatninu yfir og geymið í smá stund.
  
• Sigtið sítrónuvatnið vel frá eplunum.
  
• Setjið eplasneiðarnar á stóra pönnu ásamt kanil, negul, rúsínum, hunangi og eplasafa.
  
• Hitið vel í um 15-20 mínútur eða þangað til eplin verða frekar mjúk.
  
• Takið eplasneiðarnar og rúsínurnar af pönnunni með götóttum spaða þannig að vökvinn leki af.
  
• Látið vökvann malla á pönnunni í um 5 mínútur við frekar háan hita.
  
• Kælið.
  
• Dreifið eplasneiðunum jafnt yfir botninn. Hellið eða penslið vökvanum af pönnunni yfir eplin.
  
• Dreifið aðeins meiri kanil yfir ef þið viljið.
  
• Það má stinga bökunni í ofninn og hita í um 20 mínútur. Það er gott að bera fram bökuna með hollum ís eða þeyttum rjóma fyrir þá sem borða slíkt.
  
  

Prenta þessa uppskrift     -     Senda þessa uppskrift

Þetta er ekki svona "alvöru eplabakaka" heldur svona holl eplaböku "útgáfa" en stendur engu að síður vel fyrir sínu. Það er ekki eitt gramm af smjöri í henni þannig að það er óhætt að borða hana með næstum hreina samvisku :)
 
Eplabaka
Gerir eina köku

• 4 sæt, græn epli
  
• 1 kúfull tsk kanill
  
• 1 tsk vanilludropar eða vanilluduft
  
• 3 egg (meðalstór)
  
• 90 gr ávaxtasykur
  
• 75 gr kókosmjöl
  
• 1 tsk vínsteinslyftiduft
  
• 2 msk spelti (eða maísmjöl fyir þá sem eru með glúteinóþol)
  
  Aðferð:
  
• Skerið eplin í litla bita.
  
• Setjið þau í eldfast mót (kringlótt um 23 cm) (óþarfi að smyrja).
  
• Stráið kanil yfir.
  
• Þeytið egg og ávaxtasykur saman.
  
• Blandið þurrefnunum varlega saman við.
  
• Hellið deiginu varlega og jafnt yfir eplin.
  
• Bakið við 175°C í 30 mín.
  
  
• Berið fram heita með vanilluís eða þeyttum rjóma.

Prenta þessa uppskrift     -     Senda þessa uppskrift

He he, fyndið nafn í ljósi þess að ég er minnst trúaða manneskja sem fyrir finnst. Ég fann þessa uppskrift á heimasíðu sem var með trúarlegum uppskriftum og í rauninni voru uppskriftirnar þær sem jesú á að hafa borðað ha ha. Hann á greinilega að hafa verið með hráfæði á hreinu. Sko, ég dreg trúverðugleika uppskriftanna dálítið í efa þar sem ég er nokkuð viss um að jesú hafi ekki átt frystikistu he he. En ok, fyrst hann á að hafa getað breytt vatni í vín, þá hlýtur hann að hafa getað fryst vatn? Nei bara pæling sko. En hvað um það, þetta er afar hitaeiningarík kaka (ekki tómar hitaeiningar samt, fullar af vítamínum, próteinum, kalíum og kalki ásamt fleiru). Hún er rosalega massíf en einnig er hún meinholl. Það eru bananar, döðlur, gráfíkjur og möndlur í henni. Ég bætti kókos við en það má sleppa honum. Athugið að það tekur alveg tvo sólahringa að gera uppskriftina þar sem döðlurnar og gráfíkjurnar þurfa að liggja í bleyti í heilan sólarhring og svo þarf að frysta kökuna í annan. Athugið að nota þarf 20 cm form með háum börmum (10-12 cm).

Þessi kaka er upplögð í saumaklúbbinn á heitum sumardegi, eftir létta máltið (því kakan er svo saðsöm)! Það sem er líka sniðugt við hana er að maður getur búið hana til með margra vikna fyrirvara því hún geymist vel í frysti.
 
Frosin jesúterta
Gerir eina massífa köku

• 450 gr döðlur (lagt í bleyti í sérskál í sólarhring). Ekki þekja alveg döðlurnar, vatnið má ná upp á miðja hrúguna
  
• 450 gr gráfíkjur (lagt í bleyti í sérskál í sólarhring). Ekki þekja alveg döðlurnar, vatnið má ná upp á miðja hrúguna
  
• 5-6 mjög vel þroskaðir bananar (mega vera orðnir svartir)
  
• 350 gr möndluflögur eða heilar möndlur
  
• 1 dl kókosmjöl (má sleppa)
  
  Aðferð:
  
• Hellið döðlunum ásamt vatninu í matvinnsluvél og blandið vel saman. Geymið í sér skál.
  
• Hellið gráfíkjunum ásamt vatninu í matvinnsluvél og blandið vel saman. Geymið í sér skál
  
• Malið möndlurnar fínt í matvinnsluvél (þangað til þær verða að dufti). Geymið í sér skál.
  
• Maukið bananana í matvinnsluvél þangað til þeir verða að mauki. Geymið í sér skál.
  
  
• Setjið möndluduft sem fyrsta lag í kringlótt 20 cm. form. Pressið létt ofan á svo að botninn verði þéttur.
  
• Næsta lag á að vera gráfíkjumauk. Setjið svona 2-3 kúfaðar matskeiðar fyrst og dreifið úr þeim varlega svo að möndluduftið farið ekki út um allt. Hér þarf smá lagni.
  
• Setjið möndluduft og gerið eins og í fyrsta skrefinu.
  
• Næsta lag á að vera döðlumauk. Setjið svona 2-3 kúfaðar matskeiðar fyrst og dreifið úr þeim varlega svo að möndluduftið farið ekki út um allt. Hér þarf smá lagni líka.
  
• Næsta lag á að vera bananamauk, má setja frekar mikið af því.
  
• Bætið kókosmjölinu við hér ef þess er óskað.
  
• Næst á að koma möndluduft.
  
• Þetta skal gera koll af kolli þangað til hráefnið er búið. Byrja skal á möndludufti og enda á fíkjumauki eða döðlumauki.
  
• Frystið í minnst sólarhring.
  
• Áður en á að bera kökuna fram skal láta hana standa á borði í um 30 mínútur en einnig má setja formið í smá vatnsbað (klæðið formið þá í plastpoka) til að losa um kökuna.
• Skellið henni því næst á disk og skreytið með t.d. möndlum, kókos eða bananasneiðum.
  
  
• Þar sem þessi kaka er massíf mætti alveg prófa að helminga uppskriftina og gera hana þar með helmingi minni (þynnri).
  
• Í staðinn fyrir möndlur má nota heslihnetur.
  
• Gætið þess að bera ekki kökuna fram eftir þunga máltíð því það á enginn eftir að geta borðað mikið af henni, hún er svo rosalega saðsöm.
  
• Kakan geymist í frysti í margar vikur (pakkið inn í plast).

Prenta þessa uppskrift     -     Senda þessa uppskrift

Hafið þið séð þættina Arrested Development? Fyrir ykkur sem hafa ekki séð þessa snilldarþætti þá er mikið fjallað um "The Frosen Bananastand" sem er sölubás sem selur frosna banana og ídýfur. Mig langar ALLTAF í svoleiðis þegar ég horfi á þættina og ákvað með sjálfri mér að ég ætlaði að prófa hvort ég gæti ekki útbúið svona girnilega, frosna banana. Ég sem sagt frysti banana og dýfði honum ofan í bráðið súkkulaði (notaði reyndar carob). Þetta var snilldargott…kannski ekki fallegasti eftirmatur í heimi en hann hvarf MJÖG hratt ofan í gesti.
 
Frosnir bananar með súkkulaði og ídýfu
Fyrir 2-3

• 1-2 bananar (mátulega þroskaðir þ.e. ekki orðnir blettóttir og heldur ekki grænir)
  
• 100 gr gott, lífrænt framleitt, dökkt súkkulaði eða carob
  
• Ídýfa (t.d. kókosmjöl, saxaðar heslihnetur, möndluflögur o.fl.)
  
  Aðferð:
  
• Afhýðið bananana og pakkið í plastfilmu.
  
• Frystið bananana í 1 klukkutíma (þannig að þeir verði svolítið harður en ekki eins og gler).
  
• Bræðið súkkulaði eða carob yfir vatnsbaði (setjið í skál, setjið skálina ofan í lítinn pott með vatni ofan í og hitið þangað til súkkulaðið bráðnar). Gætið þess að ekki komist vatn í súkkulaðið (ekki einu sinni einn dropi).
  
• Takið skálina úr vatnsbaðinu og setjið fyrir framan ykkur á borðið.
  
• Setjið ídýfuna í skálar og setjið fyrir framan ykkur á borðið.
  
• Takið bananana úr frystinum og skerið hvern banana í 4-5 bita (mega vera færri og stærri bitar, eftir smekk).
  
• Haldið í endann á hverjum bita og dýfið ofan í súkkulaðið. Notið skeið til að dreifa vel upp eftir öllum bitanum.
  
• Dýfið bitanum ofan í það sem þið viljið (þ.e. kókosmjöl, heslihnetur o.s.frv.).
  
• Setjið bananabitann á disk.
  
• Endurtakið með hina bitana.
  
• Geymið í kæli ef ekki á að bera fram strax.
  
• Geymist í 1-2 sólarhringa.
  
• Áður en þið berið bitana fram er gott að skera endann af bitanum af (þann enda sem sést í bananann því hann verður orðinn brúnn).
  
  

Prenta þessa uppskrift     -     Senda þessa uppskrift

Þetta er með einföldustu eftirréttum sem til er en engu að síður er hann góður og hollur. Mangó er mikið notað í Afríku og ekki síst í Kenya þar sem maður getur týnt það beint af trjánum. Grillað mangó er frábært með hollum ís eða smávegis af þeyttum rjóma fyrir þá sem það vilja! Bragðgóður, einfaldur og hollur eftirréttur, alveg eins og ég vil hafa það! Kanilbörkinn á myndinni keypti ég í kryddskógi á Zanzibar.
 
Grillað mangó
Fyrir 2

• 1 vel þroskað, stórt mangó
  
• 1 tsk agavesíróp eða hreint hlynsíróp
  
• 1/2 tsk kanill
  
  Aðferð:
  
• Að skera út mango: Mangósteinn er flatur og mjór og því þarf að skera meðfram honum til að eftirrétturinn verði sem flottastur. Skoðið mangóið aðeins og finnið út hvor hliðin er flatari. Þegar þið hafið áttað ykkur á því skuluð þið taka beittan, langan hníf og skera aðra "kinnina" af. Þið farið eins nálægt steininum og hægt er. Ágætt er að hafa í huga að steinninn er svona 1-2cm að breidd þar sem hann er breiðastur.
  
• Endurtakið hinu megin og skerið hina "kinnina af".
  
• Nú ættuð þið að vera með 2 "kinnar" og miðjuna úr mangóinu sem inniheldur steininn. Þið getið skorið utan af steininum og borðað kjötið því það er ekki notað í eftirréttinn.
  
• Það er pínulítið vandaverk svona í fyrsta skipti að skera mangoið rétt en æfingin skapar meistarann.
  
• Haldið á annarri "kinninni" þannig að kúpta hliðin snúi í lófann og mangokjötið upp.
  
• Takið lítinn (ekki of beittan) hníf og skerið tengingsmynstur í kjötið. Skerið þannig að þið snertið hýðið en farið ekki í gegnum það. Ímyndið ykkur að þið séuð að skera taflborð út í mangóið. Hver kubbur ætti að vera svona 1cm x 1cm. Ekki hafa áhyggjur af því þó þetta verði ekki fullkomið í fyrsta skipti.
  
• Það sem þið eigið núna að gera, er að gera mangóið "úthverft" þ.e. snúa því út þannig að mangoið verði í svona flottum boga. Þetta verður rosa flott ef þetta tekst og þetta getur orðið næsta partýtrikk hjá ykkur! Mangoið mun nú líta út eins og appelsínugulur broddgöltur með grófa brodda (svona hér um bil).
  
• Endurtakið með hina hliðina og munið að skera ekki í gegnum hýðið!
  
• Penslið agavesírópinu jafnt yfir mangóið.
  
• Dreifið kanilnum jafnt yfir.
  
• Bakið efst í ofninum á hæsta hita í um 10-15 mínútur eða þangað til mangóið er orðið nokkuð dökkt efst.
  
• Berið fram á diskum og berið fram með beittum hnífum (til að hægt sé að skera mangokjötið af).
  
  

Prenta þessa uppskrift     -     Senda þessa uppskrift

Þetta eru svokallaðar grískar möndlukökur. Mér finnst þær nú svipaðar og kransakökur svona í minningunni (tugir ára síðan ég smakkaði kransaköku). Þó að þessar kökur séu frekar hitaeiningaríkar eru þær próteinríkar (möndlur og eggjahvítur) og möndlurnar innihalda helling af kalki fyrir beinin okkar. Upplagðar kökur með kaffinu. Eins eru þetta fínar kökur fyrir þá sem hafa hveiti eða glúteinóþol þar sem þær innihalda ekkert hveiti, spelti eða annað slíkt.
 
Grískar möndlukökur
Gerir 25 kökur

• 375 gr malaðar möndlur (í matvinnsluvél eða kaupið í heilsubúð)
  
• 150 gr rapadura hrásykur
  
• 1 tsk möndludropar úr heilsubúð
  
• 3 eggjahvítur
  
• 80 gr möndluflögur
  
  Aðferð:
  
• Þeytið eggjahvíturnar og bætið sykrinum út í smátt og smátt þangað til eggin eru orðin stífþeytt og glansandi og toppar myndast.
  
• Bætið möndludropunum út í og hrærið í 2 sekúndur.
  
• Veltið (ekki hræra) möluðu möndlunum út í og reynið eins og þið getið að "merja" ekki loftið úr eggjunum.
  
• Mótið um 5-7 cm. lengjur og setjið á bökunarplötu með bökunarpappír.
  
• Dreifið möndluflögunum yfir.
  
• Bakið við 180°C í um 15-20 mínútur eða þangað til bitarnir eru orðnir gullbrúnir.
  
• Ekki opna ofninn fyrr en eftir um 15 mínútur.
  
  

Prenta þessa uppskrift     -     Senda þessa uppskrift

Dásemdarsósa sem er jafn góð út á hollan ís og hún er góð í alls kyns drykki (smoothie), yfir kökur og bara ein og sér upp úr pottinum. Bláber eru full af andoxunarefnum og járni ásamt trefjum og þessi djúpi, blái litur er einmitt það sem gerir þau svona holl en í honum leynast andoxunarefnin. Nota má frosin bláber í sósuna og sósuna má einnig frysta og hita upp síðar.
 
Heit bláberja- og vanillusósa
Gerir um 250 ml af sósu

• 200 gr bláber, fersk eða frosin
  
• 5 msk agavesíróp
  
• 1 vanillustöng
  
• 1 tsk sítrónusafi
  
• 50 ml eplasafi eða annar hreinn ávaxtasafi
  
  Aðferð:
  
• Setjið bláber, agavesíróp, sítrónusafa og eplasafa í lítinn pott.
  
• Látið suðuna koma upp og leyfið þessu öllu að malla í nokkrar mínútur.
  
• Skerið vanillustöngina eftir endilöngu og skafið vanillufræin úr stönginni með oddinum á litlum hnífi. Leyfið stönglinum að sjóða með bláberjunum.
  
• Merjið berin aðeins með litlum gaffli og hrærið vel.
  
• Látið sósuna malla í 10 mínútur.
  
• Fjarlægið vanillustöngina.
  
• Berið sósuna fram heita með t.d. heitum bökum og kökum, ís o.fl.
  
  
• Hægt er að nota sósuna í alls kyns drykki.
  
• Sósan geymist í meira en viku í ísskápnum.
  
• Sósuna má frysta og hita upp síðar.

Prenta þessa uppskrift     -     Senda þessa uppskrift

Nú hugsið þið örugglega..... las ég rétt? Hnetusmjörskökur? Jú þið lásuð rétt. Ég hef notað hnetusmjör í mörg ár og margir hvá við. Hef ekki notað það á hverjum degi auðvitað og ekki í miklu magni því þá hefði ég endað eins og Elvis Prestley..eða verri en ég nota það reglulega í drykki (smoothies), á sólblómabrauð, í bakstur o.fl. Þið getið breytt nafninu í Hnetukökur ef samviskan er mjög slæm! Ef við skoðum dæmið aðeins og spáum í fitumagnið...þá inniheldur smjör helmingi meiri fitu en hnetusmjör svo maður er að spara hellings fitu og hitaeiningar með því að nota hnetusmjör í stað venjulegs smjörs (fyrst maður er að borða smákökur á annað borð). Ég nota að sjálfsögðu lífrænt framleitt hnetusmjör, án aukaefna, bragðefna, sykurs eða viðbættrar fitu. Málið er að jarðhnetur eru sérlega hollar í litlu magni. Þær innihalda einómettaðar fitusýrir sem stuðla að heilbrigðu hjarta. Jarðhnetur innihalda einnig mangan sem er snefilefni, B3, fólinsýru og eru að auki auðvitað próteinríkar. Rúsínan í pylsuendanum er að jarðhnetur innihalda líka mikið af andoxunarefnum (meira en epli, rauðrófur og gulrætur)! Þessar smákökur eru líklega þær kökur á vefnum mínum sem innihalda stystu innihaldslýsinguna eða aðeins þrjú hráefni! Ég notaði milligróft hnetusmjör en það má nota gróft á móti fínu eða einungis fínt (fínmalaðar hnetur). Jarðhnetur eru skyldar baunum frekar en hnetum og þar er nafnið komið Pea-nuts. Þær byrja að vaxa sem blóm en verða svo þungar að þær enda ofan í jörðinni og klára vöxtinn þar. Já og var ég búin að segja ykkur að þessar kökur eru algjört sælgæti og afar bragðmildar svo það má t.d. krydda með kanil ef sá gállinn er á ykkur!
 
Hnetusmjörskökur
Gerir um 30 smákökur

• 1 bolli lífrænt framleitt hnetusmjör án sykurs eða viðbættrar fitu. Þið ráðið grófleikanum en ágætt er að fara milliveginn
  
• 2/3 bolli rapadura hrásykur (fæst í heilsubúðum og heilsudeildum stærri verslana).
  
• 1 egg
  
  Aðferð:
  
• Hrærið allt vel saman með gaffli eða handþeytara.
  
• Hnoðið smávegis (kreista saman deigið svo ekki verði mikið af lofti í því).
  
• Mótið litlar kúlur og setjið þær á bökunarplötu með bökunarpappír undir.
  
• Ýtið létt ofan á hverja kúlu með gaffli.
  
• Bakið í 10-12 mínútur við 200°C eða þangað til kökurnar eru farnar að taka lit.
  
• Kökurnar eru MJÖG linar þegar þær koma beint úr ofninum en þéttast og harðna þegar þær kólna og verða stökkar.
  
  

Prenta þessa uppskrift     -     Senda þessa uppskrift

Ég fékk þessa uppskrift úr ítölsku matreiðslubókinni hennar Elvu vinkonu sem ég var einu sinni með í láni (sko bókina...ekki Elvu). Þetta eru æðislegar smákökur, frábærar með espressoinu!!! Það má sleppa kakóduftinu eða nota carob í staðinn.
 
Ítalskar súkkulaði-möndlusmákökur
Gerir um 24 smákökur

• 150 gr möndluflögur (og smá til viðbótar til skreytingar). Einnig má nota möndluduft (malaðar möndlur)
  
• 70 gr rapadura sykur t.d. frá Rapunzel.
  
• 2 msk hreint, lífrænt framleitt kakó
  
• 2 stórar eggjahvítur
  
• 1 tsk möndludropar úr heilsubúð (má sleppa)
  
  Aðferð:
  
• Þurristið möndlurnar á pönnu þangað til þær eru orðnar gullnar.
  
• Hitið ofninn í 160°C.
  
• Setjið ristuðu möndlurnar (þegar þær eru orðnar kaldar) og 40 gr af sykrinum í matvinnsluvél. Malið fínt en má samt ekki verða kekkjótt eða olíukennt.
  
• Setjið í skál og blandið kakói saman við og 2 msk af sykri.
  
• Hrærið og setjið til hliðar.
  
• Stífþeytið eggin.
  
• Bætið afganginum af sykrinum úti í og þeytið bara matskeið í einu
  
• Bætið möndludropunum saman við.
  
• Setjið möndlu/kakó blönduna varlega út í stífþeyttu eggjahvíturnar og hrærið varlega með sleikju þangað til það blandast saman.
  
• Setjið í rjómasprautupoka með 1 cm. gati.
  
• Búið til um 24 stykki með 2,5 cm. bili.
  
• Setjið 1-2 möndluflögur ofan á hverja köku ef þið viljið.
  
• Bakið í um 15-17 mínútur eða þangað til þær virðast stökkar og brúnar.
  
• Færið á vírgrind og kælið.
  
  
• Berið fram með góðu kaffi.

Prenta þessa uppskrift     -     Senda þessa uppskrift

Þetta eru aldeilis frábærlega hollir íspinnar. Þegar ég dreg þessa úr frystinum brosa bæði krakkar og fullorðnir út að eyrum og sleikja út um. Það er alltaf gaman að borða íspinna og þessir eru líka svo einstaklega léttir og fitusnauðir, fullkomnir sem góðgæti án samviskubits. Jarðarber eru súperholl, innihalda mikið af C vítamíni sem og andoxunarefnum og eru líka góð fyrir augnheilsu okkar. Einnig eru jarðarber talin hafa vörn gegn gigt. Athugið að ef ég nota frosin jarðarber finnst mér betra að sjóða þau með agavesírópi (þannig að úr verði mauk) en ef þið eigið fersk og sæt jarðarber, þarf alls ekki að sjóða þau (þau eru líka mun hollari svoleiðis). Þið getið líka látið frosnu berin þiðna alveg áður en þið blandið þeim við annað hráefni.
 
Jarðarberja- og banana íspinnar
Gerir um 6 íspinna

• 250 gr jarðarber, fersk eða frosin
  
• 1 banani, vel þroskaður
  
• 100 ml sojamjólk (einnig má nota hrísmjólk, haframjólk, möndlumjólk eða léttmjólk)
  
• 1 msk kókosolía
  
• 2-3 msk agavesíróp
  
  Aðferð:
  
• Setjið jarðarberin í pott ásamt agavesírópinu og kókosolíunni. Látið suðuna koma upp og leyfið jarðarberjunum að malla í um 15-20 mínútur.
  
• Kælið vel.
  
• Setjið jarðarberin í blandara eða matvinnsluvél ásamt sojamjólkinni og banananum.
  
• Maukið í um 30 sekúndur á fullum krafti.
  
• Smakkið til með meira agavesírópi ef þarf.
  
• Hellið ísblöndunni í íspinnaform. Sláið formunum niður í borð nokkrum sinnum til að loftbólurnar fari úr.
  
  
• Ef jarðarberin eru ekki soðin, má setja allt saman í matvinnsluvélina/blandarann og mauka á fullum krafti í 1 mínútu.

Prenta þessa uppskrift     -     Senda þessa uppskrift

Þetta er dálítið suðrænn ís þar sem í honum er meðal annar sananas og kiwi. Enginn samt sem segir að maður geti ekki borðað hann í frostinu heima á Íslandi :) Hann er léttur og fínn og upplagður fyrir fólk sem vill hollan og ferskan ís. Hann tekur smá tíma eins og allur ís sem ég geri því ég á ekki ísvél :(
 
Jógúrtís með ananas og kiwi
Gerir 1 lítra

• 200 gr ananskurl í eigin safa
  
• 1 vel þroskað kiwi í bitum
  
• 120 gr hreinn ananassafi
  
• 70 gr agavesíróp
  
• 125 gr matreiðslurjómi eða 10% sýrður rjómi frá Mjólku (hann er án gelatíns). Einnig má nota kókosmjólk
  
• 125 gr hrein, fitulaus jógúrt
  
  Aðferð:
  
• Sigtið ananasinn og hellið safanum í skál.
  
• Geymið kurlið.
  
• Hrærið saman agavesíróp, jógúrt, matreiðslurjóma og ananassafa.
  
• Hellið blöndunni í grunnt plast eða járnílát og frystið í um 4 klukkutíma eða þar til blandan er orðin að þykku mauki.
  
• Hrærið ananaskurlinu og kiwiinu saman við.
  
• Frystið í um klukkutíma.
  
• Setjið blönduna í matvinnsluvél (eða notið töfrasprota) og maukið þangað til allt er orðið vel blandað (þetta er gert til að brjóta ískristallana).
  
• Endurtakið aftur eftir um klukkutíma og frystið. Endurtakið nokkrum sinnum.
  
• Ef þið eigið ísvél getið þið sett blönduna beint í ísvélina og svo í frysti.
  
  
  
• Látið ísinn standa á borði í um 20 mínútur eða þangað til hann er orðinn nógu þiðinn til að hægt sé að skafa úr boxinu.

Prenta þessa uppskrift     -     Senda þessa uppskrift

Ég smakkaði í fyrsta skipti jólaglögg (óáfenga að sjálfsögðu) í jólaboði hjá yfirmanni mínum í verslun sem ég vann í með skóla í mörg ár. Ég gleymi því ekki hvað mér fannst hún góð og eitthvað svo "traustvekjandi", að halda utan um heitan bollann og finna kanellyktina stíga upp í nef. Þessi glögg er það góð að mig langar alltaf upp í sófa, undir teppi með bók þegar ég bý hana til (bara um jól auðvitað). Það besta er, að glöggin er auðvitað óáfeng og pakkfull af C vítamínum og andoxunarefnum og því verulega holl. Það má að sjálfsögðu sletta rauðvíni út í (og auka þar með andoxunaráhrifin) ef maður vill. Svo er glöggin frábær ef maður er með blöðrubólgu....og myndi þá jafnvel kallast blöðrubólguglögg... en það er nú kannski önnur saga!
 
Jólaglögg (óáfengt)
Fyrir 2-3

• 1/2 lítri hreinn trönuberjasafi (enska: cranberry juice)
  
• 1/2 lítri hreinn eplasafi
  
• 1 lófafylli heilar möndlur
  
• 1 lófafylli rúsínur
  
• 2 kanelstangir
  
• 4 negulnaglar
  
• 1 tsk agavesíróp (einnig má nota rapadura hrásykur)
  
• Safi úr 1/2 sítrónu
  
  Aðferð:
  
• Setjið allt nema sítrónu, möndlur og rúsínur í pott og sjóðið í um 5-10 mínútur.
  
• Takið þá negulnaglana og kanelstangirnar úr og setja safann af sítrónunni út í.
  
• Setjið möndlur og rúsínur út í.
  
  
• Mér finnst allt í lagi þó að negulnaglarnir og kanilstangirnar fái að vera lengur en sumum finnst það kannski of sterkt bragð.
  
• Ekki láta rúsínurnar og möndlurnar liggja mjög lengi í pottinum (setjið frekar oftar út í) nema þær megi verða mjög mjúkar. Sumum finnst það allt í lagi en öðrum finnst það ógirnilegt.

Prenta þessa uppskrift     -     Senda þessa uppskrift

Hollt og gott jólakonfekt, fullt af próteinum, trefjum, C vítamínum og fleiru. Maður þarf ekki að hafa samviskubit yfir þessum í kringum jólin. Svo hollt að maður getur meira að segja fengið sér mola með morgunkaffinu.
 
Jólakonfekt
Gerir um 40 konfektmola

• Tæpur 1 bolli (2 dl) cashewhnetur. Ég miða við 250 ml bolla
  
• 1/4 bolli möndlur
  
• 1/2 bolli kókosmjöl
  
• 15-20 gráfíkjur (um 250 gr), snúið litla stubbinn á endanum af, saxið gróft
  
• 8-10 döðlur, saxið gróft
  
• 1/2 bolli rúsínur
  
• 1 bolli puffed rice (sprengd hrísgrjón) eða hrískökur
  
• 3-5 msk hreinn appelsínusafi
  
• 4 msk agavesíróp
  
• 3 msk kakó
  
• 100 gr dökkt súkkulaði, lífrænt framleitt með hrásykri
  
  Aðferð:
  
• Malið möndlur, hrískökur hnetur og kókos í matvinnsluvél.
  
• Bætið kakói út í og malið aðeins áfram.
  
• Setjið í stóra skál.
  
• Maukið döðlur, gráfíkjur og rúsínur með smá appelsínusafa þangað til allt er orðið að mauki.
  
• Blandið öllu vel saman, jafnvel í hrærivél (gott að vera í þunnum plasthönskum ef þið notið hendurnar).
  
• Áferðin á deiginu á að vera nokkuð þétt, alls ekki blaut en allt á samt að festast vel saman.
  
• Gott er að láta blönduna bíða aðeins í kæli, betra er að móta konfektið þannig.
  
• Mótið litlar kúlur (álíka stórar og vínber).
  
• Gott er að slétta botninn á hverri kúlu, það stendur betur á diskinum þannig.
  
• Bræðið súkkulaðið í potti yfir lægsta hita (eða yfir vatnsbaði). Fylgist vel með því og gætið þess að ekkert vatn fari út í pottinn. Um leið og súkkulaðið er farið að bráðna slökkvið þá undir hitanum.
  
• Notið kokteilpinna eða tannstöngla til að dýfa kúlunum ofan í carobið (dýfa toppnum ofan í). Veltið upp úr kókosmjöli eða einhverju öðru ef þið viljið.
  
• Látið súkkulaðið storkna í ísskápnum.
  
• Hægt er að frysta molana en þeir geymast í margar vikur í lokuð íláti í ísskáp.
  
  
  
• Gott er að setja rifinn börk af einni appelsínu í hluta deigsins.
  
• Til tilbreytingar er gott að setja 1/2 tsk engifer og 1/2 tsk kanil í hluta deigsins
  
• Hægt er að velta konfektinu upp úr kókosmjöli, sesamfræjum, möluðum möndlum, carobdufti o.s.frv.
  
• Einnig má nota þurrkaðar aprikósur á móti döðlunum í uppskriftina.
  
• Nota má carob í stað súkkulaðis.
  
• Nota má hreint hlynsíróp í stað agevesíróps.
  
• Til að bræða súkkulaði í vatnsbaði er best að vera með lítinn pott, hálffylla hann af vatni og setja skál ofan í vatnið (eða þannig að liggi á brúnum pottsins). Súkkulaði má aldrei komast í snertingu við vatnið, ekki einu sinni einn dropa, þá skemmist það.

Prenta þessa uppskrift     -     Senda þessa uppskrift

Macadamiahnetur minna mig alltaf á Afríku og þá sérstaklega Kenya því í hvert skipti sem ég fer þangað kaupi ég hrúgu af macadamiuhnetum enda eru þær ódýrar þar. Macadamiahnetur eru dýrustu hnetur í heimi hvorki meira né minna. Þær eru svooo góðar og yfirleitt er ég að maula macadamiahnetur á meðan ég þvælist um í Afríku. Ég sá svo í fyrsta skipti á ævinni avacadotré í Tanzaníu, lengst upp í Usambarafjöllum í mars 2008. Við vorum búin að keyra á kræklóttum fjallvegi í dágóða stund, komin í 2200 metra hæð og þar komum við í fjallaþorp sem var umlukið hitabeltisgróðri, fjöllum og mistri. Ótrúlegur staður. Það var á þessum slóðum sem ég fann lítið kaffihús, lengst í burtu frá öllu og öllum. Það hét Irente’s Farm Shop og seldi m.a. muesli, sultur og passion fruit (ástaraldin) þykkni. Við röltum um þorpið í smá stund og ég rak þá einmitt augun í avacadotré við vegkantinn og gamla, hrukkótta konu sem var að tína nokkur stykki í skjóðuna sína líklega til að hafa í matinn. Límónur eru svo víða notaðar í Austur-Afríku sérstaklega með alls kyns rauðlauks- og tómatsalötum (Kachumbari). Ég veit reyndar ekki alveg hvers vegna ég er að tala um Afríku því þessi samsetning, þ.e. límónukaka er ekki baun afrísk þó að hráefnið sé það.

Ég fann uppskriftina í bók sem heitir Raw Food Real World og er meiriháttar þ.e. bæði bókin og kökurnar. Ég breytti uppskriftinni bara örlítið. Skeljarnar má undirbúa deginum áður og fyllinguna er hægt að útbúa að morgni ef kökurnar eru bornar fram að kvöldi. Kökurnar henta sérstaklega vel t.d. í matar- eða saumaklúbb að sumri (en við borðum þær reyndar yfir allt árið)! Macadamia hnetur innihalda einómettaðar fitusýrur (meiri en í ólífuolíu) sem eru góðar fyrir hjartað og talið er að neysla á þeim geti lækkað kólesteról í blóði. Þær eru einnig próteinríkar, trefjaríkar og innihalda kalk. Avacado þarf ekki að kynna fyrir neinum en þau innihalda andoxunarrík E, C og A vítamín. E vítamín hjálpar einnig til við að halda húðinni fallegri og blóðrásinni góðri. Einnig innihalda avacado holla fitu og B5 vítamín sem er mikilvægt til að hjálpa okkur í streituástandi. Gera má eina stóra köku eða nokkrar minni. Athugið að svolítill afgangur verður af kreminu sem upplagt er að nota t.d. í smoothie, frysta í ís eða borða bara beint upp úr skálinni enda svakalega gott.
 
Límónu- og macadamiukökur
Gerir 4 litlar kökur/1 stóra

Skeljarnar:

• 2 bollar macadamiuhnetur
  
• 1 bolli kókosmjöl
  
• 1 msk fínt rifinn börkur af límónu (enska: lime)
  
• 2 msk límónusafi
  
• 2 tsk vanilludropar eða duft úr heilsubúð (má sleppa)
  
• 1/2 tsk salt (Himalaya eða sjávarsalt)
  
• 3 msk agavesíróp
  
• 1 msk kókosfeiti
  
  Fyllingin:
  
• 5 vel þroskuð avacado, afhýdd
  
• 1/2 bolli límónusafi
  
• 1/4 bolli fínt rifinn börkur af límónu (börkur af 4-5 límónum)
  
• 2 msk kókosfeiti
  
• 1/2 bolli agavesíróp
  
• 2 tsk vanilludropar eða duft úr heilsubúð (má sleppa)
  
• 1/2 tsk salt (Himalaya eða sjávarsalt)
  
• 1 límóna í þunnum sneiðum til að skreyta með (má sleppa)
  
  Aðferð:
  
• Best er að byrja á skeljunum.
  
• Setjið macadamiuhnetur, kókosmjöl, límónubörk, límónusafa, vanilludropa, salt og agavesíróp í matvinnsluvélina.
  
• Malið í 5-10 sekúndur eða þangað til hneturnar hafa molnað vel en eru ekki orðnar að mauki (verða of olíukenndar ef maukaðar of mikið).
  
• Setjið kókosfeitina út í og malið í 2-3 sekúndur.
  
• Klæðið 4 lítil bökuform (10cm í þvermál) eða eitt stórt form að innan með plastfilmu.
  
• Skiptið deiginu í 4 hluta og setjið í bökuformin.
  
• Botn og hliðar ættu að vera um það bil jöfn að þykkt.
  
• Setjið í ísskáp og geymið á meðan þið búið til fyllinguna.
  
• Til að gera fyllinguna skuluð þið setja avacado, límónubörk, agavesíróp, vanilludropa og salt í matvinnsluvélina.
  
• Látið vélina ganga þangað til avacadoið er orðið kekkjalaust og allt hefur blandast vel saman.
  
• Hellið helmingnum af límónusafanum út í og blandið áfram. Hellið restinni út í ef þið teljið þurfa. Maukið má ekki vera of blautt þannig að það renni t.d. af skeið.
  
• Bætið kókosfeitinni saman við og maukið vel.
  
• Setjið plastfilmu yfir og geymið í ísskáp í um 30 mínútur.
  
• Takið skeljarnar og fyllinguna úr ísskápnum.
  
• Fjarlægið plastið og setjið skeljarnar á fallega diska eða einn stóran disk.
  
• Fyllið skeljarnar með avacadomaukinu.
  
• Skreytið með límónusneiðum.
  
• Setjið plastfilmu yfir kökurnar þannig að hylji alveg og geymið í ísskáp ef ekki á að borða þær strax.
  
  
• Hægt er að gera skeljarnar 1-2 dögum áður en bökurnar eru útbúnar.
  
• Best er að gera avacadofyllinguna samdægurs svo hún haldi þessum fallega græna lit sínum.

Prenta þessa uppskrift     -     Senda þessa uppskrift

Það er fátt sem toppar þennan eftirrétt í hollustu. Hann inniheldur holla fitu, trefjar, prótein, vítamín og fleira gott fyrir okkur. Þennan eftirrétt má gera með góðum fyrirvara og jafnvel frysta. Eftirrétturinn er glúteinlaus og hentar líka fyrir þá sem eru jurtaætur (vegan). Botnarnir eru ekki bakaðir og það má útbúa þá vel á undan og taka með sér fyllinguna og kremið og setja saman annars staðar (upplagt í sumarbústaðinn og útileguna til dæmis). Uppskriftin virkar flókin því hún er í þremur bútum en hún er ofureinföld. Athugið að þið getið sett hvaða fyllingu sem er í botninn. Einnig má baka botnana ef þið viljið hafa þá heita.
 
Litlar ávaxtabökur með carob- og cashewkremi
Gerir 6 ávaxtabökur

Botn:

• 100 gr möndlur, lagðar í bleyti í nokkra klukkutíma (gott að nota sjóðandi heitt vatn)
  
• 100 gr döðlur, lagðar í bleyti í nokkra klukkutíma
  
• 1 msk cashnewhnetumauk (fæst í krukkum í heilsubúðum og heitir cashew butter). Einnig má nota möndlusmjör
  
• 1 tsk vanilluduft eða dropar
  
• 3/4 tsk kanilduft
  
  Fylling:
  
• 50 gr döðlur
  
• 50 gr aprikósur
  
• 40 gr þurrkuð epli
  
• 25 gr rúsínur
  
• 3 msk cashewhnetumauk eða möndlusmjör
  
• 2 msk hreint hlynsíróp eða agavesíróp
  
  Krem:
  
• 1 vel þroskaður banani
  
• 1 msk carobduft
  
• 2 tsk hreint hlynsíróp eða agavesíróp
  
• 2 msk cashewhnetumauk eða möndlusmjör
  
  Aðferð:
  
• Hellið vatninu af möndlunum og döðlunum og maukið í matvinnsluvél ásamt cashewhnetumauki, vanilludufti og kanil. Deigið ætti að vera vel maukað en ekki samt of blautt.
  
• Þrýstið deiginu í kanta á muffinsbökunarplötu. Gott er að nota silikonform en annars þarf að nota muffins pappírsform.
  
• Frystið í 1-2 klukkutíma.
  
• Setjið allt sem á að fara í fyllinguna í matvinnsluvél og blandið í smá stund eða þangað til allt er orðið vel hakkað en alls ekki maukað. Geymið í skál.
  
• Setjið allt sem á að fara í kremið í matvinnsluvél og maukið vel.
  
• Takið muffinsbökunarplötuna úr frysti og losið botnana varlega úr.
  
• Setjið fyllinguna ofan í hverja böku með teskeið.
  
• Setjið bökurnar á litla diska og hellið kremi yfir (gott að nota sprautupoka).
  
• Skreytið með söxuðum hnetum eða kókos (má sleppa).
  
  

Prenta þessa uppskrift     -     Senda þessa uppskrift

Þessi ís er afar bragðgóður enda mjög skemmtilegt bragð sem kemur þegar maður blandar mangó og kókos saman. Það verður voða suðrænt og seiðandi bragð. Það má líka sleppa kókosnum fyrir þá sem fíla hann ekki. Einnig má nota banana í staðinn fyrir mangó. Upprunaleg uppskrift kemur úr lítill bók sem ég á en þeirri uppskrift var bæði gelatín (matarlím m.a. unnið úr beinamjöli dýra og ég nota það alls ekki) og feitasti rjómi sem um getur svo uppskriftin er dálítið mikið breytt.
 
Mangó- og kókosís
Gerir rúmlega 1 lítra

• 1 stórt (eða 2 lítil), mjög vel þroskað mangó, saxað gróft
  
• 1/2 dl kókosmjöl
  
• 60 gr agavesíróp
  
• 1 msk hlynsíróp (enska: maple syrup). Má sleppa og nota aðeins meiri agavesíróp í staðinn.
  
• 200 ml matreiðslurjómi (15%) eða sojarjómi. Einnig má nota kókosmjólk)
  
• 150 ml undanrenna
  
  Aðferð:
  
• Blandið öllu vel saman í blandara eða matvinnsluvél.
  
• Ef notuð er ísvél setjið blönduna þá í ísvél í um 40 mínútur og svo inn í frysti. Ísinn er bestur eftir um klukkutíma.
  
• Ef ekki er notuð ísvél, hellið þá blöndunni úr matvinnsluvélinni í kalt plastbox og frystið í klukkutíma.
  
• Takið út úr frysti og hrærið með töfrasprota eða setjið í matvinnsluvél þangað til allt er orðið vel maukað.
  
• Frystið í um klukkutíma og endurtakið þá og frystið aftur.
  
  
• Nota má meira kókosmjöl og jafnvel kókosmjólk fyrir þá sem eru hrifnir af kókosbragðinu.

Prenta þessa uppskrift     -     Senda þessa uppskrift

Þessi kaka er án glúteins og er mjög einföld í smíðum. Ég fann uppskriftina á vef konu sem heitir Jeena og ég held mikið upp á. Upplögð kaka með kaffinu og hún er góð fyrir þau tilefni sem bera þarf á borð köku sem allir geta borðað, líka þeir sem eru með glúteinóþol. Það er ekki ónýtt að nota fersk, íslensk bláber í botninn.
 
Möndlu- kókoskaka með bláberjabotni
Gerir 1 köku

Kakan:

• 2 msk kókosfeiti
  
• 6 msk agavesíróp
  
• 4 msk malaðar möndlur (möndlumjöl)
  
• 2 tsk vanilludropar eða vanilluduft úr heilsubúð
  
• 2 tsk rifinn börkur af appelsínu og sítrónu (má sleppa)
  
• 2 bollar kókosmjöl (ég miða við 250 ml bolla)
  
• 2 msk hrísmjöl (enska: rice flour)
  
• 2 egg
  
• 1/2 tsk vínsteinslyftiduft
  
  Bláberjabotninn:
  
• 2 lúkur möndlur, saxaðar gróft
  
• 4 msk heimatilbúin bláberjasulta (eða t.d. frá St. Dalfour)
  
• 6 tsk agavesíróp
  
• 3 msk hrísmjöl
  
• Nokkrir dropar möndludropar (úr heilsubúð)
  
  Aðferð:
  
• Blandið saman kókosfeiti, möndlumjöli og agavesírópi í skál. Hrærið vel.
  
• Bætið kókosmjölinu og vanilludropunum saman við. Hrærið vel.
  
• Bætið egginu við ásamt hrísmjöli og vínsteinslyftiduftinu.
  
• Setjið skálina til hliðar.
  
• Í annarri skál skuluð þið blanda saman söxuðu möndlunum, bláberjasultunni og agavesírópinu.
  
• Bætið hrísmjölinu og möndludropunum saman við ásamt appelsínu/sítrónuberkinum.
  
• Klæðið lítið brauðform með bökunarpappír.
  
• Dreifið vel úr bláberjablöndunni í botninum á forminu.
  
• Dreifið innihaldinu úr hinni skálinni yfir bláberjabotninn.
  
• Bakið við 180-200°C í um 25 mínútur.
  
  
• Gott er að setja 30 gr af söxuðu, dökku súkkulaði, lífrænt framleiddu með hrásykri (t.d. frá Rapunzel) út í deigið.
  
• Ef þið fáið ekki möndlumjöl í heilsubúð getið þið malað 6-8 möndlur mjög fínt (án þess þó að þær verði að olíukenndu mauki).

Prenta þessa uppskrift     -     Senda þessa uppskrift

Ég átti afganga af sætum kartöflum og vissi af þessari uppskrift frá hinni frægu hráfæðiskonu Nomi Shannon (úr bókinni The Raw Gourmet). Ég bakaði botninn í ofni en það átti að láta hana hitna í sólinni í heilan dag, (aha, einmitt ekki alveg að gera sig heima á Íslandi eða í London að hausti til he he). Hún myndi annað hvort rigna í kaf eða fjúka! Kakan er því ekki raw (hrá) en er engu að síður holl og góð, mjög kalk- og próteinrík og inniheldur einnig A, E og C vítamín, ásamt mikið af trefjum! Kökuna sjálfa má gera með margra daga fyrirvara og geyma í plastfilmu í ísskáp. Skreyta má kökuna rétt áður en hún er borin fram. Þessi er fín um jólin því hægt er að búa botninn til með góðum fyrirvara.
 
Möndlu- og furuhnetukaka með kremi úr sætum kartöflum
Gerir 1 köku

Botn:

• 1 1/4 bolli möndlur, lagt í bleyti í um 30 mínútur
  
• 1 bolli döðlur, saxaðar gróft
  
• 1/2 tsk vanilludropar
  
• 1/2 tsk kanill
  
• 2 tsk kornmjöl (enska: cornflour) til að þykkja
  
  Aðferð:
  
• Hellið vatni af möndlunum.
  
• Setjið möndlurnar í matvinnsluvél og blandið vel.
  
• Bætið döðlunum, vanilludropunum, kanil og kornmjöli saman við og blandið þangað til allt er orðið vel maukað.
  
• Klæðið kringlótt bökunarform með bökunarpappír.
  
• Setjið í lítið tertuform með lausum botni.
  
• Bakið í 25 mínútur við 180°C.
  
• Takið úr ofninum og kælið.
  
• Hvolfið botninum varlega á stóran kökudisk.
  
  Kremið
  
• Á meðan kakan er að bakast er best að útbúa kremið.
  
• 200 gr sætar kartöflur, saxaðar gróft
  
• 3/4 bolli döðlur, saxaðar gróft, lagðar í bleyti í 20 mínútur
  
• 1/4 bolli rúsínur, lagðar í bleyti í 20 mínútur
  
• 1/2 bolli furuhnetur, lagðar í bleyti í 5-10 mínútur
  
• 1/2 tsk kanill
  
• 1/2 tsk vanilludropar
  
• 1/2 tsk negull (enska: clove)
  
• 2 msk kornmjöl
  
• 1 granatepli (enska: pommegranate) til að skreyta með
  
  Aðferð:
  
• Setjð furuhnetur í matvinnsluvél og blandið vel (vatnið á ekki að fara með).
  
• Hellið vatninu af döðlunum og rúsínunum og bætið saman við hneturnar.
  
• Blandið kornmjölinu, kanil, vanilludropum og negul saman við og blandið áfram í nokkrar mínútur.
  
• Blandið mjög vel, lengur frekar en styttra þar sem kremið á að vera alveg mjúkt.
  
• Hellið þessu í stóra skál.
  
• Blandið núna sætu kartöflurnar alveg í mauk og setjið svo í skálina.
  
• Blandið vel saman.
  
• Hellið þessu yfir botninn. Kremið á að vera nokkuð þykkt.
  
• Skreytið með granateplafræjum, rifsberjum, hindberjum eða einhverjum öðrum fallegum berjum.
  
  
• Hægt er að búa til böku (enska: pie) og láta botninn ná upp á hliðarnar. Það er svolítið flott. Þá þarf maður að nota minna bökunarform eða búa til helmingi meira magn af botninum.
  
  
  
• Nota má aðrar hnetur en furuhnetur, til dæmis pecanhnetur

Prenta þessa uppskrift     -     Senda þessa uppskrift

Þetta konfekt myndi seint teljast léttur matur. Eftir kvöldmat, með kaffinu er maður eiginlega saddur eftir hálfa svona kúlu. Þetta er þó voða hollt konfekt því að sesamfræ (tahini er gert úr sesamfræjum) eru ótrúlega kalk- og próteinrík og innihalda einnig mikið af trefjum og járni ásamt magnesíum (sem á að hjálpa til við að lækka blóðþrýsting), zinci (sem er gott fyrir karlmenn) ásamt öðrum vítamínum. Möndlur eru líka mjög kalk- og próteinríkar. Upplagt konfekt eftir ræktina eða eftir léttan kvöldmat. Konfekt þarf nefnilega ekki bara að vera með kaffinu... maður getur alveg borðað hollt konfekt í morgunmat eða tekið með sér í nestisboxið!

Upprunalegt heiti konfektsins er Halvah og á rætur sínar að rekja 3000 árum ”fyrir krist” og er því eitt elsta sælgæti heims. Orðið halvah þýðir í bókstaflegri merkingu sætt kjöt. Ef þið eruð jurtaætur (enska: vegan) getið þið sleppt hunanginu og notað ljóst agave síróp í staðinn.
 
Möndlukúlur frá Miðausturlöndum
Gerir 10 kúlur

• 1,5 bolli möndlur
  
• 0,5 bolli tahini (sesammauk)
  
• 3 msk acacia hunang (eða ljóst agave síróp). Acaciu hunang límir deigið betur saman en agavesírópið
  
• 1 tsk vanilludropar eða vanilluduft
  
• 1 msk carobduft
  
  Aðferð:
  
• Setjið möndlurnar í matvinnsluvél og blandið þangað til þær eru orðnar fínmalaðar, blandið ekki þannig að verði að mauki en samt nóg til að þær haldist saman.
  
• Bætið tahini, hunangi eða agavesírópi og vanillu út í. Blandið vel.
  
• Takið helminginn af blöndunni og setjið í skál.
  
• Bætið carobduftinu saman við blönduna í matvinnsluvélinni og blandið vel.
  
• Þrýstið ljósu blöndunni mjög fast ofan á disk þannig að hún verði um 0,5 cm. á þykkt (þ.e. hæð) og gerið hana eins þétta og ferkantaða og þið getið.
  
• Gerið eins við carobblönduna nema á öðrum diski.
  
• Leggið carobblönduna ofan á þá ljósu og þrýstið vel þannig að úr verði tvílit blanda, um 1 cm. á þykkt (hæð).
  
• Kælið í klukkutíma eða meira.
  
• Skerið í litla bita og rúllið saman þannig að annar helmingurinn verði ljós en hinn dökkur. Blandan mun molna en þá er um að gera að beita smá lagni við að koma helmingunum saman...(spurning um að bjóða upp á gestaþraut í næsta boði og bjóða verðlaun fyrir flottasta molann he he). Galdurinn er að þrýsta helmingunum nógu fast saman.
  
  
• Hægt er að velta bitunum upp úr kókosmjöli, sesamfræjum, möndludufti eða jafnvel carobdufti.
  
• Það má auðvitað sleppa carobinu og hafa kúlurnar bara ljósar.
  
• Gott er að leggja kúlurnar á eldhúspappír og geyma þannig, pappírinn dregur í sig fituna.
  

Prenta þessa uppskrift     -     Senda þessa uppskrift

Möndlur eru mjög kalk- og próteinríkar og macadamiahnetur innihalda holla einómettaða fitu, trefjar og einnig innihalda þær kalk og prótein. Sem sagt afar hollar smákökur og gaman að bjóða upp á öðruvísi og óbakaðar kökur með kaffinu. Nota má möndlur í allan botninn í stað macadamiahneta en þá verður hann aðeins þurrari. Ef þið viljið ekki súkkulaði má nota t.d. bláber í kremið í staðinn. Kremið stífnar í kælinum.
 
Möndlukökur- með súkkulaðikremi
Gerir 12-15 stykki

Botn:

• 50 gr möndlur
  
• 50 gr macadamiahnetur
  
• 2 msk agavesíróp
  
• 1 tsk kókosfeiti
  
  Botn – Aðferð:
  
• Malið möndlur, macadamiahnetur og agavesíróp í matvinnsluvél þangað til allt hefur
• blandast vel saman og er orðið fínkornótt.
  
• Bætið kókosfeitinni út í og maukið í nokkrar sekúndur.
  
• Mótið kúlur úr deiginu og setjið á disk.
  
• Fletjið kúlurnar aðeins út.
  
• Setjið plastfilmu yfir bitana og geymið í ísskápnum.
  
  Krem:
  
• 100 gr cashewhnetur
  
• 1 banani
  
• 1/4 bolli kakó (lífrænt framleitt)
  
• 4 msk agavesíróp
  
• 1/8 tsk salt (Himalaya eða sjávarsalt)
  
• 2 msk kókosfeiti
  
  Krem – Aðferð:
  
• Maukið cashewhnetur í matvinnsluvél á fullum krafti í 10-15 sekúndur eða þangað til þær eru orðnar að algjöru mauki eða fínkornóttar.
  
• Sigtið kakó út í cashewhnetumaukið.
  
• Bætið salti, agavesírópi og banana út í.
  
• Maukið í nokkrar sekúndur þangað til allt er orðið vel blandað saman.
  
• Bætið kókosfeitinni út í og blandið í nokkrar sekúndur.
  
• Leyfið kreminu að stífna í klukkutíma í ísskápnum.
  
• Setjið kremið í sprautupoka og sprautið kremi á hverja köku, frekar þykkt þannig að fallegir toppar myndist.
  
• Ef þið eigið ekki sprautupoka getið þið sett kremið á með teskeið.
  
• Geymið kökurnar í lokuðu íláti í ísskáp.
  
  
• Nota má bláber í staðinn fyrir kakó í kremið (auðvitað ekki alveg eins en er mjög skemmtilegt tilbreyting).

Prenta þessa uppskrift     -     Senda þessa uppskrift

Ég hef stundum gert páskaegg úr súkkulaði í gegnum tíðina. Ég er samt mjög mikill klaufi þegar kemur að páskaeggjagerð og ég held að það sem mér finnist mest pirrandi er að ná skeljunum úr mótinu án þess að þær fari í spað. Ég skil ekki hvers vegna mót úr sílikoni eru ekki fáanleg, það væri 100 sinnum þægilegra að eiga við. Að búa til sitt eigið egg er ekkert endilega sérstaklega ódýrt, nema maður geri lítil egg og noti ódýrt hráefni (sem lífrænt súkkulaði er ekki). Mitt mót er álíka og avocado að stærð og maður þarf nánast 200 gr af súkkulaði til að vel sé með botni, samskeytum og öllu. Fyrir ódýrasta súkkulaðið (lífrænt framleitt með hrásykri t.d. frá Green & Black’s) þá eru það samt tæpar 600 krónur (og þá ekki reiknað það sem fer inn í eggið). Ef maður gerir 2 egg er það fljótt að koma í verði. Það er samt skemmtilegt að búa til egg og maður ætti ekki að sleppa því þó það kosti eitthvað pínulítið meira...það er þess virði. Það sem mér finnst skemmtilegast að gera er að útbúa nokkur lítil egg, ásamt heimatilbúnu konfekti og setja saman í körfu. Það er líka fallegra finnst mér því stærri páskaegg geta verið svolítið klunnaleg (en það er kannski bara af því ég er klaufi). Annað sem ég á alltaf í erfiðleikum með, er að láta súkkulaðið storkna þannig að hægt sé að nota það í skreytingar. Það tekur óratíma svo maður þarf að gefa sér góðan tíma. Þetta á a.m.k. við Green & Black’s og Rapunzel súkkulaðið. Gott er að bræða það tvisvar, það er auðveldara í meðhöndlun þannig. Það er um að gera að prófa og búa til sitt eigið páskaegg, alltaf gaman að föndra! Athugið að plastmótin fyrir páskaegg fást t.d. í Pipar og salt, Klapparstíg. Athugið einnig að páskaeggin verða mött fljótlega eftir að þau koma úr mótinu. Þið getið notað dökkt eða ljóst súkkulaði, allt eftir smekk og þá getið þið stýrt því þannig að það henti t.d. þeim sem hafa mjólkuróþol. Athugið að páskaeggjagerðin virkar hroðalega flókin en hún virkar flóknari en hún er því ég er búin að brjóta undirbúninginn niður í mörg stig til að hún verði sem auðveldust fyrir ykkur, skref fyrir skref.
 
Páskaegg
Fyrir 1-2

• 200 gr dökkt (eða ljóst), lífrænt framleitt súkkulaði með hrásykri (t.d. Rapunzel eða Green & Black’s)
  
• Heimatilbúið konfekt, þurrkaðir ávextir eða annað gotterí t.d. keypt í heilsubúð
  
• 1 eða 2 páskaeggjamót (skeljar álíka stórar og avacado eða minni) og botn (það má sleppa botninum)
  
  Skeljarnar:
  
• Bræðið súkkulaðið yfir vatnsbaði. (Setjið svolítið vatn í lítinn pott. Setjið skál ofan á pott þannig að skálin sitji á brúnunum. Setjið súkkulaðið ofan í skálina og bræðið yfir vægum hita). Gætið þess að ofhita ekki súkkulaðið og það má alls ekki fara dropi af vatni ofan í skálina. Gott er að bræða súkkulaðið tvisvar sinnum (láta storkna alveg og bræða aftur).
  
• Látið súkkulaðið storkna aðeins.
  
• Hellið nokkrum matskeiðum ofan í annað plastmótið, látið súkkulaðið renna vel um mótið. Einnig getið þið penslað súkkulaðinu.
  
• Látið storkna (getið sett í ísskápinn í nokkrar mínútur).
  
• Endurtakið tvisvar í viðbót.
  
• Setjið að lokum eina góða rönd af súkkulaði meðfram brúninni (mesta hættan á broti).
  
• Setjið í ísskáp í nokkrar mínútur.
  
• Endurtakið með hitt plastmótið. Ef þið eruð einungis að nota eitt, þurfið þið að láta súkkulaðið storkna vel áður en þið notið mótið aftur. Gætið þess að enginn raki, fingraför eða ryk sé í mótinu.
  
  Botninn:
  
• Hellið súkkulaði í botninn. Látið það storkna.
  
  Að ná súkkulaðinu úr plastmótunum:
  
• Nú skuluð þið taka mótin tvö og leggja þau á hvolf ofan á disk. Leggið höndina yfir kúpta hlutann þannig að hlýja handarinnar hiti súkkulaðið eilítið. Losið mótið varlega frá (gott er að nota plasthanska eða servíettur til að káma ekki út eggið) og gætið þess að brjóta ekki skeljarnar. Þetta hefur reynst svolítið erfitt stundum og þá er bara að sýna þolinmæði.
• Ef eggið brotnar, má bræða súkkulaðið og byrja aftur.
  
• Endurtakið með hina skelina sem og botninn.
  
  Fyllingin:
  
• Hafið til konfekt, þurrkaða ávexti eða annað gotterí sem þið viljið setja í eggið. Það er hægt að fá alls kyns sælgæti í heilsubúðum sem hentar svona skrítnu fólki eins og t.d. mér. Einnig er gaman að skrifa skemmtilegan og persónulegan málshátt og setja inn í eggið.
  
  Hliðarnar (ekki skreyttar með sprautupoka):
  
• Ef ekki á að skreyta hliðarnar með súkkulaði úr sprautupoka: Setjið konfekt eða annað gotterí í aðra skelina. Penslið súkkulaði á brún skeljarinnar. Leggið hina skelina ofan á. Látið storkna. Penslið svolitlu (nánast storknuðu) súkkulaði ofan á botninn og leggið eggið ofan á. Haldið við í smá stund.
  
  Hliðarnar (skreyttar með sprautupoka)
  
• Ef skreyta á hliðarnar með súkkulaði úr sprautupoka: Setjið konfektið í aðra skelina.
• Setjið nokkra dropa af súkkulaði á brúnir annarrar skeljarinnar. Leggið hina skelina varlega ofan á. Þær ættu að festast aðeins saman.
  
• Leggið allt til hliðar á meðan afgangurinn af súkkulaðinu storknar. Það þarf að vera þannig að hægt sé að draga skeið í gegnum súkkulaðið og það haldi enn þá lagi sínu án þess að vera stíft.
  
• Setjið súkkulaði í sprautupoka og sprautið aðra hlið páskaeggsins. Látið storkna.
  
• Sprautið hina hlið páskaeggsins og látið storkna.
  
• Sprautið smá klessu ofan á botn páskaeggsins og leggið eggið ofan á. Haldið við í smástund á meðan það stífnar.
  
  Skreyting ofan á:
  
• Ef þið viljið setja unga á toppinn (eða strump eða eitthvað annað smádót), setjið þá smá klessu af súkkulaði á toppinn og látið skrautið ofan á. Einnig má skreyta eggið með fallegum borða. Ef þið gerið nokkur lítil egg má raða þeim í fallega körfu, ásamt öðru gotteríi og skreyta svo með borða, páskaliljum eða öðru páskalegu dóti.
  
  
• Gott er að bræða súkkulaðið tvisvar, það er auðveldara í meðhöndlun þannig.
  
• Plastmótin fyrir páskaegg fást t.d. í Pipar og salt, Klapparstíg.
  
• Páskaeggin verða mött fljótlega eftir að þau koma úr mótinu.
  
• Gott er að nota hanska eða servíettu til að meðhöndla súkkulaðið svo ekki komi fingraför.
  
• Þið getið notað dökkt eða ljóst súkkulaði, allt eftir smekk og þá getið þið stýrt því þannig að það henti t.d. þeim sem hafa mjólkuróþol.

Prenta þessa uppskrift     -     Senda þessa uppskrift

Ferlega góðar og öðruvísi kökur sem gaman er að bjóða upp á t.d. í matar- eða saumaklúbbinum. Þær eru afar saðsamar enda fullar af hollustu. Ef þið fáið kakónibbur (cocoa nibs) bætið þið aldeilis við hollustuna því þær eru pakkfullar af andoxunarefnum enda bara muldar kakóbaunir og ekkert annað. Í pecanhnetum og cashewhnetum er holl fita sem hjálpa til við að halda hjartanu heilbrigðu. Nauðsynlegt er að eiga matvinnsluvél eða góðan blandara til að búa kökurnar til. Ég notaði heimatilbúið cashewhnetumauk en hægt er að kaupa það í heilsubúðum. Það er hræðilega dýrt svo ég mæli með að búa það til sjálf enda ekkert mál. Athugið að kökurnar þurfa að stífna í ísskápnum í nokkra klukkutíma áður en þær eru borðaðar. Kökurnar henta vel þeim sem hafa mjólkur-, eða glúteinóþol. Gaman er að skreyta kökurnar með söxuðum jarðarberjum, bláberjum eða öðrum berjum og ávöxtum.
 
Pecanhnetu- og cashewmaukskökur
Gerir 8-10 kökur

Skeljar:

• 1 bolli pecanhnetur
  
• 1/2 bolli fínt malaðar möndlur
  
• 1/2 bolli döðlur (lagðar í bleyti í 20 mínútur)
  
  Fylling:
  
• 100 gr cashewhnetur eða samsvarandi magn af cashewhnetumauki
  
• 1 banani
  
• 4 msk agavesíróp
  
• 2 msk kókosfeiti
  
• 3 msk kakónibbur (cocoa nibs), má sleppa
  
  Aðferð:
  
• Setjið cashewhneturnar í matvinnsluvélina og maukið vel og lengi þ.e. látið matvinnsluvélina ganga í a.m.k. 1 mínútu.
  
• Setjið cashewhnetumaukið til hliðar.
  
• Hellið vatninu af döðlunum og setjið pecanhnetur, möndlur og döðlur í matvinnsluvélina.
  
• Blandið þannig að deigið verði grófkornótt og límist vel saman (ekki of maukað en samt þannig að klessist vel saman og haldist þannig).
  
• Notið lítil form úr silikoni eða klæðið muffinsform að innan með plastfilmu.
  
• Þrýstið blöndunni ofan í botninn og alveg upp á hliðarnar. Skelin verður að vera ágætlega þykk til að halda fyllingunni. Geymið í ísskápnum.
  
• Setjið bananann og cashewhnetumaukið í matvinnsluvélina og maukið vel.
  
• Bætið öllu öðru út í nema kókosfeitinni og látið vélina ganga í nokkrar sekúndur.
  
• Bætið kókosfeitinni saman við og maukið vel.
  
• Setjið í skál með plastfilmu yfir og geymið í ísskápnum í a.m.k. 2-3 klukkustundir.
  
• Takið skeljarnar úr ísskápnum.
  
• Fjarlægið formin.
  
• Hellið blöndunni út í eða notið sprautupoka til að sprauta fyllingunni í skeljarnar.
  
• Geymið í ísskáp í um klukkustund.
  
• Dreifið kakónibbunum yfir hverja og eina.
  
• Berið kökurnar fram kaldar.
  
  
• Nota má valhnetur í staðinn fyrir pecanhnetur.
  
• Nota má peru í staðinn fyrir banana

Prenta þessa uppskrift     -     Senda þessa uppskrift

Þessi er dásamlega holl og góð. Í pecanhnetum og cashewhnetum er holl fita sem hjálpar til við að halda hjartanu heilbrigðu. Það er enginn hrásykur né annar sykur í kökunni fyrir utan agavesírópið en samt er hún sæt og góð. Fyllingin er loftkennd, næstum því eins og súkkulaðimús og ég get lofað ykkur því að bros færist á varir þeirra sem smakka hana! Ég bjó svona köku til um daginn og gestirnir fóru langleiðina með að klára hana í einni svipan. Þetta er svona kaka sem maður sker af smá sneið í viðbót eftir að hafa klárað bitann sem var á diskinum, og svo aðra, og aðra sneið. Hægt er að útbúa þessa köku í lítil form og bera fram sem litlar kökur eða auðvitað sem eina stóra. Athugið að kakan er ekki bökuð. Nauðsynlegt er að eiga matvinnsluvél eða góðan blandara til að búa hana til. Kakan er umtalsvert léttari en margar aðrar kökur því í henni er cashewhnetumauk í staðinn fyrir smjör eins og svo oft er notað. Einnig er maukið fituminna en kókosfeiti svo það sparast hellingur af fitu og hitaeiningum þar (en engar áhyggjur nóg eftir í kökunni he he). Ég notaði heimatilbúið cashewhnetumauk en hægt er að kaupa það í heilsubúðum. Það er svívirðilega dýrt svo ég mæli með að búa það til sjálf. Athugið að kakan þarf að stífna í ísskápnum í nokkra klukkutíma áður en hún er borðuð. Kakan hentar vel þeim sem hafa mjólkur-, eða glúteinóþol. Uppskriftin virkar flókin en er það í raun ekki. Ég mæli samt með því að þið séuð búin að gera cashewhnetumaukið með smá fyrirvara því það sparar tíma.
 
Pecankaka með súkkulaði,- og cashewmauksfyllingu
Gerir 1 köku

Botn:

• 100 gr pecanhnetur
  
• 50 gr möndlur
  
• 90 gr döðlur, saxaðar gróft (leggið í bleyti í 20 mínútur)
  
  Fylling:
  
• 100 gr cashewhnetur
  
• 1 stór, vel þroskaður banani
  
• 30 gr kakó (lífrænt framleitt)
  
• 4 msk agavesíróp
  
• 50- 60 ml sojamjólk (einnig má nota möndlumjólk, hrísmjólk, haframjólk eða undanrennu)
  
• 1 tsk vanilludropar eða duft úr heilsubúð
  
• Smá klípa salt salt (Himalaya eða sjávarsalt)
  
• 1,5 msk kókosolía + 1 tsk kókosolía
  
  
  Aðferð:
  
• Setjið pecanhneturnar og möndlurnar í matvinnsluvél og malið í um 20 sekúndur eða þangað til grófmalað (má ekki vera of fínmalað á þessu stigi), skiljið eftir í vélinni.
  
• Hellið vatninu af döðlunum (ekki notað) og setjið í matvinnsluvélina.
  
• Blandið þannig að deigið verði grófkornótt og límist vel saman (ekki of maukað en samt þannig að klessist vel saman og haldist þannig ef þið klípið deigið með höndunum).
  
• Klæðið 21 cm. lausbotna kökuform með bökunarpappír eða plastfilmu.
  
• Þrýstið blöndunni ofan í botninn og upp á hliðarnar (svona 2 cm. upp á hliðina, botninn þarf ekki að vera mjög þykkur). Geymið í ísskápnum.
  
• Setjið cashewhneturnar í matvinnsluvél og maukið alveg þangað til hneturnar fara að mynda kekki, gæti tekið nokkrar mínútur.
  
• Bætið 1 tsk af kókosolíu saman við í dropatali á meðan vélin vinnur.
  
• Setjið bananann í matvinnsluvélina ásamt sojamjólkinni (byrjið með 50 ml) og blandið vel.
  
• Bætið vanilludropum, salti, agavesírópi og kakói út í og látið vélina vinna í nokkrar sekúndur.
  
• Bætið 1,5 msk af kókosolíu saman við (nokkra dropa í einu) og maukið vel. Athugið að súkkulaðiblandan verður mjög fljótandi en á eftir að stífna í ísskápnum.
  
• Takið formið með botninum úr ísskápnum.
  
• Hellið blöndunni út í og jafnið vel út.
  
• Geymið í ísskáp í 2-3 tíma.
  
• Fjarlægið formið.
  
• Best er að færa kökuna á disk þannig að þið notið lausan botn úr kökuformi til að smeygja undir kökuna og renna henni yfir á diskinn. Passið að hún beyglist ekki.
  
• Berið kökuna fram kalda (verður annars of mjúk).
  
• Kökuna má skreyta með hnetum (t.d. pecanhnetum), berjum, ávöxtum, kókosflögum, kakónibbum o.fl.
  
  
• Nota má valhnetur í staðinn fyrir pecanhnetur.
  
• Gera má kökuna í nokkur minni form.
  
• Í staðinn fyrir 100 gr cashewhnetur getið þið notað sama magn af cashewhnetumauki (cashew butter) ef þið komist í slíkt.
  
• Ef þið eigið kakónibbur (cacao nibs) er gaman að skreyta kökuna með þeim og þær gefa líka skemmtilega áferð.

Prenta þessa uppskrift     -     Senda þessa uppskrift

Ég skora á ykkur að baka þessar og segja engum að þær séu glúteinlausar og ég get alveg staðfest það hér með að þeir fordómar sem ég hafði haft gagnvart glúteinlausum smákökum eru hér með flognir burt. Þetta var smá tilraun sem heppnaðist bara ansi vel. Þessar piparkökur eru kryddaðar og með smá appelsínukeim en það má sleppa appelsínunum ef þið viljið. Piparkökurnar fara vel í maga og það eru engar dýraafurðir í piparkökunum. Þær henta vel þeim sem eru jurtaætur (enska: vegan), þeim sem hafa mjólkuróþol, eggjaóþol og glúteinóþol. Piparkökurnar eru samt ekki óþolandi...ha ha (lélegur brandari).
 
Piparkökur
Gerir 20-25 stykki

• 4 msk kókosfeiti
  
• 1/3 bolli rapadura sykur frá Rapunzel (fæst t.d. í Yggdrasli og víða þar sem seldar eru Rapunzel vörur). Einnig má nota hrásykur
  
• 1 bolli hrísmjöl (enska: rice flour)
  
• 1 tsk vínsteinslyftiduft
  
• 1 tsk kanill
  
• 1 dl soyamjólk (ef þarf)
  
• 1/2 tsk negull (ekki negulnaglar heldur malaður negull)
  
• 1 tsk appelsínubörkur, rifinn fínt á rifjárni (Notið lífrænt ræktaða appelsínu). Má sleppa en gefur svakalega góða jólalykt!
  
  Aðferð:
  
• Hrærið saman kókosfeitinni og sykrinum þannig að úr verð mjúk blanda.
  
• Í annarri skál skuluð þið blanda saman öllu hinu nema soyamjólkinni (hrísmjöli, lyftidufti, kanil, negul og appelsínuberki ef hann er notaður).
  
• Blandið öllu saman og hnoðið í stóra kúlu.
  
• Ef deigið er of þurrt skal bæta við soyamjólkinni hér, smá slettu í einu. Það má auðvitað nota annað en soyamjólk t.d. hrísmjólk, undanrennu, möndlumjólk eða eitthvað annað.
  
• Skiptið deiginu í 4 hluta og mótið pylsur í höndunum.
  
• Skerið í 1cm bita og raðið á bökunarplötu sem búið er að klæða með bökunarpappír.
  
• Mótið bitana aðeins ef þarf (þannig að þær verði kringlóttari).
  
• Bakið við 180°C í um 15 mínútur.
  
• Kökurnar ættu að vera stökkar að utan og mjúkar að innan. Ef kökurnar verða mjúkar má geyma brauðsneið í boxinu, þá harðna kökurnar aftur.
  
  

Prenta þessa uppskrift     -     Senda þessa uppskrift

Þessi uppskrift er glúteinlaus og er úr bókinni Gluten -Free French Desserts and Baked Goods eftir Valérie Cupillard. Möffinsarnir urðu merkilega góðir og eru þeir fyrstu glúteinlausu sem ég baka. Þeir sem smökkuðu möffinsana (Auðun og Jóhannes) voru sammála um að þeir væru fínir meira að segja miðað við venjulega möffinsa. Kannski voru þeir bara svona svangir, ég veit það ekki sko. Það átti upphaflega að vera 150 ml af smjöri og 6 egg í uppskriftinni en ég gerði hana léttari með 6 eggjahvítum á móti 2 eggjum og 6 matskeiðum af kókosfeiti. Það er alveg langtum nóg fita. Svo átti að vera helmingi meiri sykur en ég minnkaði hann líka. Afskaplega fínir möffinsar með kaffinu. Möffinsarnir á myndinni eru svolítið dökkir en ástæðan er sú að ofninn sem ég bakaði þá í, er 50 ára gamall (og stórhættulegur) svo það er enginn blástur þar nema ég opni ofninn og blási sjálf he he. Það var einn í upphafi sem var ljósari en hinir en ég borðaði óvart möffinsann sem ég ætlaði að nota á myndinni svo þið afsakið það.
 
Pistachio og súkkulaðibitamuffins
Gerir 12 stykki

• 160gr hrísmjöl (enska: rice flour)
  
• 40gr kartöflumjöl (enska: potato flour)
  
• 120gr ávaxtasykur
  
• 2 egg
  
• 6 eggjahvítur
  
• 6 msk kókosfeiti eða ólífuolía
  
• 4 msk saxað súkkulaði (án sykurs) eða carob
  
• 40 pistachio hnetur, ósaltaðar, saxaðar gróft
  
• 2 epli eða perur, saxaðar fínt
  
• 1/2 tsk heilsusalt (Herbamare)
  
  Aðferð:
  
• Hitið ofninn í 180°C.
  
• Blandið saman hrísmjölinu, súkkulaðinu, saltinu og hnetunum í stóra skál.
  
• Blandið eggjunum og kókosfeitinni eða ólífuolíunni og ávaxtasykrinum saman í lítilli skál.
  
• Blandið öllu varlega saman.
  
• Ef notuð er muffins bökunarplata, setjið þá sérsniðinn bökunarpappír inn í, sjá athugasemdir hérna að neðan). Einnig má nota siliconform.
  
• Setjið deig í hverja muffinsholu og fyllið 2/3 upp að brún.
  
• Bakið í um 35-40 mínútur.
  
• Fjarlægið pappírinn varlega af muffinsunum (ef notaður).
  
  Ef maður notar ekki olíu eða smjör í deigið þá getur maður hvorki notað venjuleg pappírsform, né muffinsbökunarplötuna. Það fást sem sé ekki muffinspappírsform sem maður getur sett í án þess að þurfa að nota smjör eða olíu í deigið. Ég er búin að leita út um allt. Ég hef í staðinn sniðið hringi (strika með penna utan um undirskál) úr bökunarpappír og sett í hvert muffinspláss og svo deigið þar ofan í. Það er hægt að nota möffinspappírinn svo um 6 sinnum. Einnig má nota siliconform og þá þarf ekki bökunarpappír. Ef maður notar ekki olíu eða smjör í deigið þá getur maður hvorki notað venjuleg pappírsform, né muffinsbökunarplötuna. Það fást sem sé ekki muffinspappírsform sem maður getur sett í án þess að þurfa að nota smjör eða olíu í deigið. Ég er búin að leita út um allt. Ég hef í staðinn sniðið hringi (strika með penna utan um undirskál) úr bökunarpappír og sett í hvert muffinspláss og svo deigið þar ofan í. Það er hægt að nota möffinspappírinn svo um 6 sinnum. Einnig má nota siliconform og þá þarf ekki bökunarpappír.

Prenta þessa uppskrift     -     Senda þessa uppskrift

Þessir eru hættulega góðir, svo góðir að mann langar ekkert að hætta að borða þá. Þeir eru auðvitað hollir þ.e. mikið af hnetum og fræjum og þess háttar en þeir eru hitaeiningaríkir líka svo maður ætti nú ekki að raða þeim í sig endilega (þó að sé erfitt að gera annað!). Upplagðir með kaffinu, sem orkumikið nesti á í lautarferðina eða bara til að fá sér oft, oft, oft. Ég notaði hreint hlynsíróp en hægt er að nota t.d. hunang í staðinn
 
Sesamtoppar
Gerir um 25-30 bita

• 1 dl hreint hlynsíróp (enska: maple syrup).
  
• 1 bolli sesamfræ
  
• 1 bolli sólblómafræ
  
• 1/2 bolli kúrenur eða litlar rúsínur
  
• 1/2 bolli pecanhnetur saxaðar
  
• 1/2 bolli möndlur (möndluskífur)
  
• 1/4 bolli graskersfræ (má sleppa)
  
• 1/2 bolli kókosmjöl
  
• 1/2 bolli carob, saxað (fæst í Heilsuhúsinu, Yggrasli, Heilsudeild Hagkaups)
  
  Aðferð:
  
• Blandið þurru hráefnin saman og bætið svo hlynsírópinu varlega saman.
  
• Setjið bökunarpappír á bökunarplötu.
  
• Blandan verður mjög laus svo það sem þarf að gera er að gera hrúgur af sesamblöndunni með teskeið. Þær munu ekki haldast vel saman. Ímyndið ykkur bara að þið séuð að búa til litlar íslenskar vörður :)
  
• Hrúgið um 1 msk (í haug) fyrir hvern sesambita.
  
• Hitið ofninn í 80°C og bakið í 20 mínútur.
  
• Lækkið hitann á ofninum í 50°C og bakið áfram í 20 mínútur.
  
• Takið bitana úr ofninum, látið þá kólna í ofninum 10 mínútur.
  
• Af því að bitarnir eru enn þá mjúkir er gott að móta þá betur á þessu stigi þ.e. ýtið brúnunum betur saman með fingrunum (þ.e. svo þeir haldist betur saman og verði að fallegri hrúgum).
  
• Ef þeir eru mjög lausir og mjúkir eftir að hafa kólnað í 20 mínútur skuluð þið baka í 10 mínútur í viðbót.
  
  
  
• Hægt er að skipta út sumu innihaldinu hérna að ofan og nota eitthvað annað í staðinn.
• Til dæmis mætti nota sykurlaust súkkulaði, döðlur, svört sesamfræ, valhnetur, cashewhnetur, fíkjur, aprikósur, heslihnetur,
  
• Það er ekkert mál að búa til flapjack úr þessari uppskrift. Notið lítið (um 25cm á kant), ferkantað form og þrýstið blöndunni ofan í. Bakið um 10 mínútur lengur en sesamtoppana. Takið úr forminu, látið kólna í 10 mínútur og skerið varlega í bita. Látið kólna alveg.
  

Prenta þessa uppskrift     -     Senda þessa uppskrift

Við kaupum okkur oft svona sólskinskúlur í heilsubúðum hér í London. Þetta eru í raun bara sólblómafræ, rúsínur, hrískökur og byggmaltsíróp blandað saman í kúlu og látið harðna. Ég ákvað að búa til mína eigin og keypti til þess Barleymalt síróp (unnið úr byggi) og það heppnaðist alveg ljómandi vel. Þetta er allavega sniðugt nasl til að taka með sér t.d. í bíltúrinn eða í ferðalagið, fínt fyrir krakka að búa til og svo gæti verið skemmtilegt að gera svona kúlur og skreyta með t.d. litríkum borða og gefa sem gjöf. Aðalkosturinn samt er að kúlan gefur frábæra samsetningu af hollri fitu, vítamínum, próteinum, flóknum kolvetnum og er mjög góður kostur t.d. sem miðdegissnarl. Athugið að búa til kúlurnar minnst sólarhring áður en á að borða þær.
 
Sólskinskúla
Gerir 4 kúlur

• 2 dl sólblómafræ
  
• 2 dl ljósar rúsínur (enska: sultanas)
  
• 6 hrískökur (enska: Rice cakes)
  
• 6-8 msk lífrænt framleitt byggmaltsíróp (enska: Barleymalt Syrup) blandað saman við 3 msk af vatni. Þeir sem hafa glúteinóþol mega ekki borða byggafurðir og ættu því að nota hrísgrjónasíróp í staðinn (enska: brown rice syrup). Getur þurft að hræra vel, blandast hægt saman
  
  Aðferð:
  
• Öllu blandað saman, hrískökurnar muldar (ekki alveg í mjöl samt) og sírópinu hellt varlega yfir í mjórri bunu, hrært oft í á meðan.
  
• Best er að setja plastfilmu ofan í t.d. morgunmatsskál og skófla svona 5-6 kúfullum matskeiðum ofan í.
  
• Takið plastið upp og mótið kúlu í höndunum og lokið plastfilmunni mjög þétt utan um kúluna (látið harðna í plastinu).
  
• Kúlurnar eru bestar á 3ja degi en geymast í viku áður en þær fara að þorna of mikið.
  
• Hver kúla á að vera eins og meðalstór appelsína að stærð eða um 70-90 grömm eftir smekk.
  
  
• Hægt er að nota t.d. sesamfræ, hörfræ og alls kyns fræ í kúluna.

Prenta þessa uppskrift     -     Senda þessa uppskrift

Sérlega sniðug súkkulaðimús með hollri fitu úr cashewhnetum sem er afar góð fyrir hjarta og æðar. Kakó inniheldur líka andoxunarefni og kakónibbur eru eitt það hollasta sem maður fær. Í þessarri mús er hvorki rjómi, egg, hvítur sykur, matarlím né nokkuð annað sem getur stíflað æðar eða farið illa með líkamann. Það er best að borða músina við stofuhita því hún stífnar upp í kælinum. Athugið að bananarnir verða aðeins brúnir við að geymast svo best er að gera þennan eftirrétt samdægurs (eða undirbúa allt nema bananana fyrirfram). Gefið ykkur alveg 3 tíma áður en bera á músina fram því blandan þarf að stífna á milli laga. Gott er að leggja cashewhneturnar í bleyti í sólarhring áður en þið maukið þær (og hella svo vatninu af).
 
Súkkulaði- og bananamús
Fyrir 2

• 100 gr cashewhnetur
  
• 1 stór, vel þroskaður banani
  
• 30 gr kakóduft (lífrænt framleitt)
  
• 4 msk agavesíróp
  
• 1/8 tsk salt (Himalaya eða sjávarsalt)
  
• 1/4 bolli sojamjólk (einnig má nota möndlumjólk, haframjólk, hrísmjólk eða undanrennu)
  
• 2 msk kókosfeiti
  
• 1/2 tsk vanilludropar eða vanilluduft úr heilsubúð
  
• 1 msk kakó
  
• 1 msk kakónibbur (má sleppa en gefur skemmtilega áferð)
  
  
• Setjið cashewhneturnar í matvinnsluvél og maukið alveg þangað til hneturnar fara að mynda kekki, gæti tekið nokkrar mínútur. Skafið hliðar matvinnsluvélarinnar og haldið áfram í 1 mínútu. Mikilvægt er að hneturnar séu mjög vel maukaðar.
  
• Bætið 1 tsk af kókosfeiti saman við í dropatali á meðan vélin vinnur. Setjið maukið til hliðar.
  
• Setjið bananann, saltið, agavesírópið, vanilludropana og sojamjólkina út í matvinnsluvélina og blandið vel.
  
• Bætið afgangnum af kókosfeitinni saman við og maukið vel (í nokkrar sekúndur).
  
• Skiptið blöndunni þannig að hún sé 60/40 og geymið ljósa hlutann (og hafið hann minni þ.e. 40 á móti 60) í ísskáp með plasti yfir.
  
• Bætið kakóinu út í blönduna sem eftir er í matvinnsluvélinni (sem er 60 á móti 40 þ.e. stærri hluti en sá ljósi) og blandið vel.
  
• Hellið helmingnum af kakóblöndunni í tvö 100 ml glös (t.d. kokteilglös). Geymið afganginn af kakóblöndunni á borðinu.
  
• Látið kakóblönduna í glösunum stífna í ísskápnum í klukkutíma.
  
• Takið glösin úr ísskápnum og hellið helmingnum af bananablöndunni yfir kakóblönduna í glösunum.
  
• Látið stífna í glösunum í klukkutíma.
  
• Endið á afgangnum af súkkulaðiblöndunnni sem er nú við stofuhita. Hellið yfir bananablönduna.
  
• Dustið með kakói yfir súkkulaðiblönduna.
  
• Skreytið með kakónibbum.
  
• Setjið plastfilmu yfir glösin og geymið í ísskápnum.
  
• Áður en bera á músina fram er best að láta hana standa í stofuhita í 30 mínútur.
  
  
• Kakónibbur fást í flestum heilsubúðum. Einnig má saxa mjög dökkt súkkulaði og dreifa yfir músina.
  
• Gott er að leggja cashewhneturnar í bleyti í sólarhring áður en þið maukið þær.
  
• Ef þið eigið til cashewhnetumauk getið þið notað það (sama magn) í staðinn fyrir að mauka sjálf hneturnar.

Prenta þessa uppskrift     -     Senda þessa uppskrift

Þetta er einfalt og þægilegt og upplagt til að eiga í ísskápnum þegar gesti ber að garði. Nota má döðlur í stað rúsína en einnig má nota saxaðar aprikósur, þurrkuð epli og margt fleira.
 
Súkkulaði- og kókosnammi
Gerir um 35-40 stykki

• 150 gr gott, dökkt súkkulaði án hvíts sykurs (t.d. frá Rapunzel). Nota má mjólkursúkkulaði, dökkt súkkulaði eða allt eftir því hvað ykkur finnst gott
  
• 0,5 bolli rúsínur (einnig má nota saxaðar döðlur, aprikósur, fíkjur o.s.frv.)
  
• 0,5 bolli sólblómafræ (einnig má nota önnur fræ t.d. graskersfræ)
  
• 1 bolli kókosflögur (bætið við ef þarf)
  
  Aðferð:
  
• Bræðið súkkulaðið yfir vatnsbaði (hitið vatn í litlum potti á lægsta hita. Setjið skál ofan í vatnið og brjótið súkkulaðið þar ofan í. Vatnið má aldrei komast í snertingu við súkkulaðið).
  
• Látið kólna aðeins.
  
• Setjið í stærri skál og blandið öllu öðru saman við.
  
• Búið til litlar hrúgur með teskeið.
  
• Setjið í ísskáp og kælið í um 30 mínútur.
  
  

Prenta þessa uppskrift     -     Senda þessa uppskrift

Ég veit ekki hvað fudge er á íslensku svo ég lét orðið bara í sviga fyrir aftan nafn uppskriftarinnar. Fudge er svona eiginlega klesst kaka eða þétt svo þið verðið bara að ímynda ykkur hvernig áferðin er ef þið hafið aldrei smakkað svoleiðis. Þessir bitar eru alveg upplagðir t.d. í afmæli í staðinn fyrir smjör-rjóma-sykur óhollustuna sem er oft borin fram í svona hefðbundnum súkkulaðikökum. Þessir bitar eru ekki léttir svo sem en þeir eru ekki með neinni viðbættri fitu eða sykri eins og margar óhollar kökur eru. Maður fær sér bara lítinn mola með kaffinu og þá þarf maður ekki að hafa neitt samviskubit. Uppskriftin er sérlega einföld og fljótleg.
 
Súkkulaði- og möndlubitar (fudge)
Gerir 12-14 bita

• 100 gr dökkt, lífrænt framleitt súkkulaði með hrásykri (eða carob)
  
• 20-25 döðlur (gott að láta þær liggja í bleyti í 30 mínútur)
  
• 1 lúka rúsínur (um 1/4 bolli)
  
• 2 lúkur möndlur, saxaðar smátt (um 1/2 bolli)
  
  Aðferð:
  
• Hellið vatninu af döðlunum og maukið þær vel í matvinnsluvél.
  
• Setjið til hliðar.
  
• Setjið söxuðu möndlurnar í skál ásamt rúsínunum.
  
• Bræðið súkkulaði yfir vatnsbaði. Setjið smá vatn í lítinn pott, setjið hitaþolna skál yfir (þannig að skálin fari ekki ofan í vatnið) og bræðið yfir vægum hita.
  
• Blandið döðlumaukinu út í bráðið súkkulaðið, hrærið vel. Það er allt í lagi þó að
• blandan sé kekkjótt.
  
• Hellið strax út í skálina með möndlunum og rúsínunum.
  
• Hrærið vel.
  
• Setjið plastfilmu eða bökunarpappír í botninn á lágu, breiðu plastboxi (um 15x20cm).
  
• Ýtið ofan á blönduna með matskeið og passið að hvergi séu göt.
  
• Kælið í um klukkutíma.
  
• Skerið í litla bita.
  
• Berið fram kalt og geymið í ísskáp.
  
  
• Nota má heslihnetur eða Brasilíuhnetur í staðinn fyrir möndlur og einnig má nota aprikósur í staðinn fyrir rúsínur.

Prenta þessa uppskrift     -     Senda þessa uppskrift

Ég var lengi búin að vera að prófa mig áfram með ís sem væri hollur, fituskertur og án eggja. Ég held að það hafi tekist hér. Þessi uppskrift er einföld og má nýta hana sem grunnuppskrift í alls kyns ís. Hann inniheldur mun minni fitu en venjulegur ís þar sem ég nota matreiðslurjóma (15%) og ég notaði undanrennu í staðinn fyrir fitumeiri mjólk eða meiri rjóma. Einnig má nefna að það eru engin egg í uppskriftinni og því tilvalinn fyrir þá sem hafa eggjaóþol. Það þarf heldur ekki að þeyta rjómann. Eina vesenið við þennan ís er að maður þarf að hræra í ísnum á um 30 mínútna fresti í 2-3 tíma eða svo til að brjóta ískristallana svo hann krefst viðveru. Ef hins vegar þið eigið ísvél þá þurfið þið ekkert að spá í að hræra. Þetta var jólaísinn okkar 2004 og hann fór vel niður í grísku/áströlsku gestina okkar frá London :) Myndina hér fyrir ofan tók Jón Örvar Gestsson af ísnum sem hann bjó til. Athugið að í hans útgáfu var 1 dl af kókosmjöli sem var víst rosa gott. Fyrir þá sem hafa mjólkuróþol má nota soyarjóma og soyamjólk í stað mjólkur og venjulega rjómans.
 
Súkkulaðibitaís
Fyrir 4-5

• 2 bananar, vel þroskaðir, smátt saxaðir
  
• 1 msk sítrónusafi
  
• 1 tsk vanilludropar
  
• 90 ml agavesíróp
  
• 200 ml matreiðslurjómi (15%), hafrarjómi eða sojarjómi. Athugið að það þarf ekki að þeyta rjómann
  
• 150 ml köld undanrenna, haframjólk eða möndlumjólk
  
• 50 gr dökkt og gott súkkulaði með hrásykri, fínt saxað (má líka nota t.d. carob eða jafnvel döðlur, þurrkaðan ananas, fíkjur eða hvað sem er í staðinn). Mér finnst ágætt að setja súkklaðið nokkrar sekúndur í matvinnsluvél til að það verði mjög fínt saxað.
  
  Aðferð:
  
• Blandið saman bönunum, sítrónusafa, vanilludropum, agavesíróp, rjóma og mjólk. Hrærið í nokkrar mínútur.
  
• Færið blönduna í ískalt plastbox eða járnbox og setjið í frysti í um 30 mínútur.
  
• Takið ísinn út og hrærið í honum með gaffli til að brjóta ískristallana. Frystið aftur í 30 mínútur.
  
• Endurtakið nokkrum sinnum þ.e. hræra og frysta á um hálftíma fresti þangað til blandan er farin að þykkna og erfiðara er orðið að hræra. Blandið þá saxaða súkkulaðinu og/eða hnetunum ef notað.
  
• Setjið í frysti og hrærið þangað til erfitt er orðið að hræra í blöndunni.
  
• Ef þið eigið ísvél getið þið sett ísinn beint í ísvélina og svo beint í frysti.
  
  
• Gott er að taka ísinn út um 15-20 mínútur áður en á að borða hann til að mýkja hann aðeins.
  
• Ekki þarf að þeyta rjómann í þessari uppskrift.
  
• Hægt er að nota carob í stað súkkulaðisins.
  
• Einnig má nota hlynsíróp (enska: maple syrup) í stað agavesírópsins.

Prenta þessa uppskrift     -     Senda þessa uppskrift

Fínt krem á flestar kökur. Til að fá minna súkkulaðibragð skal nota minna af súkkulaðidufti (eðlilega hí hí). Einnig má nota carob í stað súkkulaðis.
 
Súkkulaðikrem á köku
Á eina kringlótta köku

• 4-5 msk gott, dökkt kakóduft (án sykurs) eða carobduft
  
• 2 bananar, mjög vel þroskaðir, stappaðir
  
• 2 tsk vanilludropar eða vanilluduft
  
• 2 msk kartöflumjöl
  
• 1 msk kaffi (ég nota koffeinlaust). Má sleppa
  
• 2-3 tsk agavesíróp
  
  Aðferð:
  
• Blandið öllu saman í matvinnsluvél og kælið.
  
• Smyrjið á kökuna þegar kremið er búið að stífna aðeins.
  
  

Prenta þessa uppskrift     -     Senda þessa uppskrift

Já það er magnað að þessi mús sé holl. Enginn rjómi, ekkert smjör og lítill sykur. Hún er mjög próteinrík því það eru eggjahvítur í henni en einnig er tofu sem gerir hana kremaða og flotta. Músin hentar einnig vel fyrir fólk með mjólkuróþol þar sem engar mjólkurafurðir eru í henni. Ég notaði dökkt súkkulaði (75% kakó), án sykurs (bittersweet). Hægt er að nota ljóst súkkulaði líka en dökkt gefur sterkara bragð og er mun hollara þar sem í kakóbaununum eru holl andoxunarefni. Athugið að það eru hráar eggjahvítur í uppskriftinni. Gera þarf uppskriftina um 4 tímum áður en á að bera hana fram en ekki er gott þó að láta hana standa lengur en það í ísskáp þar sem eggjahvíturnar eða tofuið fer að leka smávegis og sitja eftir í botninum. Uppskriftin kemur úr bók sem heitir Healthful Cooking sem Jóhannes keypti handa mér.
 
Súkkulaðimús (með tofu)

• 4 eggjahvítur við stofuhita
  
• 4 msk ávaxtasykur
  
• 125 gr dökkt, sykurlaust súkkulaði (má nota líka dökkt súkkulaði með appelsínubragði)saxað gróft
  
• 125 gr tofu, mjúkt (soft eða smooth, ekki harða gerðin) við stofuhita
  
• 1 tsk appelsínusafi
  
  Aðferð:
  
• Bræðið súkkulaðið við vægan hita í potti (má ALLS ekki hitna of mikið, bara rétt til að það bráðni) eða hitið yfir vatnsbaði.
  
• Látið súkkulaðið kólna við stofuhita, má ekki vera of heitt því þá verður músin grófkorna þegar hún blandast við tofuið.
  
• Hrærið tofuið í matvinnsluvél þangað til það er orðið vel blandað saman, 1-2 mínútur.
• Blandið líkjörnum ef hann er notaður saman við.
  
• Þeytið eggjahvíturnar í um 2 mínútur á meðalhraða þangað til þær verða loftkenndar og hvítar. Aukið hraðann og stífþeytið í um 2-3 mínútur eða þangað til mjúkir toppar hafa myndast.
  
• Bætið einni matskeið af sykri út í í einu. Bætið einni matskeið, hrærið í 10 sekúndur og svo koll af kolli.
  
• Þegar allur sykurinn hefur blandast saman við, hrærið þá í um 2-3 mínútur eða þangað til eggjahvíturnar eru orðnar glansandi og stífar.
  
  
• Blandið 1/3 af eggjahvítunum út í súkkulaðiblönduna með gúmmísleif, hrærið afar varlega.
  
• Blandið þessu því næst út í restina af eggjahvítunum og hrærið varlega þangað til allt er orðið blandað saman.
  
• Setjið plastfilmu yfir og setjið inn í ísskáp í um 3 tíma áður en á að borða músina.
  
• Ef einhver vökvi er á botninum eftir 3 tíma, hellið honum þá varlega frá.
  
  
• Til að breyta til mætti nota dökkt súkkulaði, sykurlaust með appelsínubragði og dreifa smá appelsínuberki yfir músina.
  
• Hægt er að nota hvítt súkkulaði en það er ekki næstum því eins hollt og það dökka.

Prenta þessa uppskrift     -     Senda þessa uppskrift

Holl og góð kaka, sniðug ef maður þarf að útbúa köku með góðum fyrirvara því hún geymist í margar vikur, innpökkuð í ísskáp og verður bara betri þannig. Best er að útbúa kökuna fyrst og setja kremið á, stuttu áður en kakan er borin fram því kremið stífnar á nokkrum dögum og er betra frekar þunnt og lint. Einnig má frysta kökuna.
 
Sultukaka með carobkremi
Gerir eina köku

• 1/4 dl möndluflögur
  
• 1/4 dl kókosmjöl
  
• 2 dl cashewhnetur
  
• 1 bolli puffed rice (fæst í flestum heilsubúðum)
  
• 15-20 gráfíkjur, snúið litla stubbinn á endanum af, saxið gróft
  
• 8-10 döðlur, saxaðar gróft
  
• 2 dl rúsínur
  
• 2-4 msk hreinn appelsínusafi
  
• 1-2 msk hreint hlynsíróp (enska: maple syrup)
  
• 3 msk carobduft (má nota kakóduft, notið þá lífrænt framleitt og gott kakó)
  
• 285 gr sulta án sykurs (t.d. frá Himneskri hollustu eða St.Dalfourd, mér finnst Raspberry mjög gott)
  
  Carobkrem:
  
• 1,5 dl carobduft
  
• 1 vel þroskaður banani, stappaður
  
• 1/2 dl hlynsíróp (enska: maple syrup), bætið við ef þarf meira. Hægt er að nota agavesíróp en það stífnar ekki eins vel og hlynsírópið
  
  Aðferð:
  
• Malið möndlur og hnetur og kókos og puffed rice í matvinnsluvél.
  
• Bætið carobdufti saman við og malið aðeins áfram.
  
• Setjið í stóra skál.
  
• Maukið döðlur, gráfíkjur og rúsínur með smá appelsínusafa þangað til allt er orðið að mauki.
  
• Blandið öllu vel saman, jafnvel í hrærivél (gott að vera í þunnum plasthönskum ef þið notið hendurnar).
  
• Áferðin á deiginu á að vera nokkuð þétt, alls ekki blaut en allt á samt að festast vel saman.
  
• Skiptið hráefninu í tvot hluta.
  
• Þrýstið helmingnum í þunnt (um 1cm) lag í litlu kökuformi með lausum botni. Þrýstið MJÖG vel. Gott að láta kólna aðeins í ísskáp.
  
• Losið varlega yfir á stóran kökudisk.
  
• Dreifið sultunni í þykku lagi yfir kökubotninn.
  
• Takið til annað kökuform (eða þrífið hitt á milli). Þrýstið deiginu vel ofan í botn formsins.
  
• Takið varlega úr forminu og leggið ofan á sultuna.
  
• Blandið öllu sem fara á í kremið vel saman.
  
• Kremið ætti að vera frekar þunnt og leka pínulítið með hliðunum.
  
• Ef kremið er mjög lint má láta það stífna aðeins í ísskáp.
  
  
• Einnig má nota sólblómafræ, möndlur, heslihnetur og sesamfræ með cashewhnetunum.
  
• Nota má agavesíróp í staðinn fyrir hlynsírópið.
  
• Frysta má kökuna og bera hálf frosna fram, mjög góð þannig líka.

Prenta þessa uppskrift     -     Senda þessa uppskrift

Mjög einfalt konfekt sem er líka afar hollt. Það er mikið af A vítamíni í sveskjum (sem breytist í Beta-Carotine í líkamanum) og þær eru einnig trefjaríkar. Bæði plómur og þurrkaðar plómur (sveskjur) hafa efni sem kallast neochlorogenic og chlorogenic acid (phenols). Þessi efni eru rík af andoxunarefnum. Sveskjur hjálpa líka til við að lækka blóðþrýsting og koma á jafnvægi í blóðsykri. Einnig hjálpa sveskjur til við upptöku járns. Þetta er því sannkallað hollustukonfekt vegna þess að cashewhnetur eru líka bráðhollar (innihalda einómettaðar fitusýrur sem eru góðar fyrir hjartað)! Myndin sýnir konfekt sem ég rúllaði í kakói en mér finnst líka afskaplega gott að dreypa konfektinu í dökkt súkkulaði.
 
Sveskju- og cashewkonfekt
Gerir 30-40 konfektmola

• 1 1/2 bolli döðlur (ég miða við 250 ml bolla)
  
• 1/2 bolli sveskjur
  
• 60 gr cashewnetur (eða 6 msk cashewhnetumauk (enska: Cashew Butter). Einnig má nota möndlumauk. Fæst í flestum heilsubúðum og heilsudeildum matvöruverslana)
  
• 1 tsk kókosfeiti
  
• 6 msk gott, lífrænt framleitt kakó eða carob
  
• 6 msk agavesíróp eða hreint hlynsíróp (enska: maple syrup)
  
• 1/2 bolli fínt saxaðar heslihnetur eða möndlur
  
• 30-40 gr dökkt, lífrænt framleitt súkkulaði með hrásykri
  
  Aðferð:
  
• Leggið döðlur og sveskjur í bleyti í um 30 mínútur.
  
• Setjið cashewhnetur í matvinnsluvél og maukið í alveg heila mínútu eða þangað til það er orðið kekkjótt og olíukennt. Bætið kókosfeitinni í dropum út í og látið vélina ganga í nokkrar sekúndar. Setjið til hliðar.
  
• Hellið vatninu af döðlunum og sveskjunum og maukið í matvinnsluvél ásamt cashewhnetumaukinu. Maukið þangað til allt hefur blandast vel saman.
  
• Bætið agavesírópi og kakói út í og blandið áfram þangað til allt hefur maukast vel.
  
• Blandið heslihnetunum saman við.
  
• Ef deigið er of þurrt má setja nokkra dropa af appelsínusafa eða vatni út í.
  
• Kælið í um 2 klukkustundir í kæli (eða yfir nótt).
  
• Mótið kúlur úr deiginu.
  
• Deigið er nóg fyrir 40 litlar kúlur (12 grömm).
  
• Bræðið súkkulaðið yfir vatnsbaði. Best er að hita vatn í potti (bara botnfylli) á vægum hita. Setjið skál ofan í sem situr á brúnum pottsins og brjótið súkkulaðið ofan í.
• Fylgist með því og hrærið öðru hvoru.
  
• Dýfið konfektinu ofan í og látið súkkulaðið storkna.
  
• Geymið í ísskáp.
  
  
• Til tilbreytingar má velta konfektmolunum upp úr kakói, fínmöluðu kókosmjöli, möndlumjöli o.s.frv.

Prenta þessa uppskrift     -     Senda þessa uppskrift

Þið eruð örugglega að hugsa að ég hljóti að vera búin að tapa söguþræðinum…að setja uppskrift að Sörum á hollustuvef??? Áður en þið slökkvið á tölvunni ykkar kíkið þá á uppskriftina..hún er nefnilega ekkert svo óholl eftir að hafa gengið í gegnum CafeSigrun umbreytingu! Þessar Sörur eru próteinríkar, kalkríkar, með hollri fitu og bara ansi sniðug viðbót við jólabaksturinn. Ég nota ekki eggjarauður eins og á að gera, ekki flórsykur, ekki hvítan sykur, ekki smjör og almennt ekki neitt sem gæti stíflað æðar eða komið manni á spítala he he. Kannski ættu þessar kökur bara að heita CafeSigrunur...Ég ætla að taka loforð af ykkur að bjóða ekki ömmu gömlu og afa upp á þessar Sörur sem "alvöru" því þau munu sennilega fussa um ókomin ár. Við Jóhannes vorum hins vegar alsæl með Sörurnar okkar. Mér hefði ekki dottið í hug að baka þær nema af því Lísa Hjalt, (sú sem á frönsku súkkulaðikökuna hér á vefnum) skoraði á mig. Þar sem ég á erfitt með áskoranir lagðist ég í tilraunir og ég þurfti að gera nokkrar slíkar, misheppnaðar til að þetta gengi upp. Athugið að þar sem ég nota ekki flórsykur verða botnarnir mun flatari en á hefðbundnum Sörum þar sem þungi rapadura sykursins kremur loftið aðeins. Það kemur þó ekki að sök bragðsins vegna (uuu held ég). Athugið að kremið þarf að gera a.m.k. 3 klukkustundum áður en þið gerið Sörurnar en megið gera það sólarhring áður.Þessar kökur eru tímafrekar og svolítið flóknar í framkvæmd (þess vegna hittast oft margir saman og gera Sörur fyrir jólin!).
 
Sörur
Gerir um 25 stykki

Botn:

• 100 gr möndlur (hollari með hýðinu á)
  
• 100 gr rapadura hrásykur, malaður á hæsta styrk í matvinnsluvél í 1 mínútu
  
• 2 eggjahvítur
  
  Krem:
  
• 100 gr cashewhnetur
  
• 1 banani
  
• 1/4 bolli kakóduft (lífrænt framleitt)
  
• 4 msk agavesíróp
  
• 1/8 tsk salt (Himalaya eða sjávarsalt)
  
• 2 msk kókosfeiti
  
• 100 gr dökkt, súkkulaði með hrásykri, lífrænt framleitt
  
  Botn – Aðferð:
  
• Hitið ofninn í 160°C.
  
• Malið möndlur eins fínt og hægt er án þess að þær fari að verða olíukenndar eða kekkjóttar.
  
• Bætið rapadura sykrinum út í og malið aðeins áfram.
  
• Stífþeytið eggjahvíturnar. Mikilvægt er að skálin sé tandurhrein og án allrar fitu.
• Einnig er mikilvægt að ekkert af rauðunni fari með ofan í skálina. Notið handþeytara eða hrærivélina til að þeyta eggjahvíturnar. Þær ættu að verða háglansandi, hvítar og stífar þannig að toppar fara að myndast. Passið að þeyta ekki of mikið því þá kremjið þið loftið úr þeim.
  
• Setjið nokkrar matskeiðar af möndlu/rapadura blöndunni ofan í eggjahvíturnar og veltið varlega til (ekki hræra af krafti).
  
• Endurtakið með alla möndlu/rapadurablönduna þangað til allt hefur blandast vel saman en er samt loftkennt.
  
• Setjið bökunarpappír á bökunarplötuna.
  
• Setjið kúfulla teskeið af deiginu í einu á bökunarplötuna með 2cm bili á milli.
• Reynið að láta deigið ekki dreifast alveg flatt út. Ef það gerist er ekki nægilegt loft í deiginu. Kökurnar bragðast jafn vel en líta ekki eins vel út.
  
• Bakið í u.þ.b. 15-20 mínútur eða þangað til kökurnar eru orðnar gullnar og aðeins harðar í endana.
  
• Leyfið kökunum að kólna alveg í ofninum og þær ættu að verða alveg harðar inn að miðju.
  
  Krem – Aðferð:
  
• Maukið cashewhnetur í matvinnsluvél á fullum krafti í 10-15 sekúndur eða þangað til þær eru orðnar að algjöru mauki eða fínkornóttar.
  
• Sigtið kakó út í cashewhnetumaukið.
  
• Bætið salti, agavesírópi og banana út í.
  
• Maukið í nokkrar sekúndur þangað til allt er orðið vel blandað saman.
  
• Bætið kókosfeitinni út í og blandið í nokkrar sekúndur.
  
• Látið kremið í plastbox og leyfið að stífna helst í sólarhring en að minnsta kosti í 3 tíma.
  
• Bræðið súkkulaðið yfir vatnsbaði. Best er að hita vatn í potti (bara botnfylli) á vægum hita. Setjið skál ofan í sem situr á brúnum pottsins og brjótið súkkulaðið ofan í skálina.
  
• Fylgist með því og hrærið öðru hvoru.
  
  Samsetning:
  
• Takið hverja Söru og smyrjið ofan á flatari hliðina með kremi. Leggið á disk.
  
• Dýfið hverri Söru á hvolf (þannig að kremið snúi niður) ofan í brædda súkkulaðið. Látið
• kólna í ísskápnum.
  
  
• Sörurnar má frysta.
  
• Athugið að svona Sörur geymast ekki eins lengi og hinar hefðbundnu Sörur með smjör-flórsykurskremi en ættu að geymast vel í tvær vikur eða svo.

Prenta þessa uppskrift     -     Senda þessa uppskrift

Jóhannesi fannst þessar rosalega góðar en mér fannst þær síðri, kannski af því að ég er ekki svo mikið fyrir hunang. Þeir sem eru jurtaætur (enska: vegan) myndu skipta hunanginu út fyrir eitthvað annað því hunang er jú dýraafurð! Þetta nammi er hollt og gott og gaman að eiga í kælinum fyrir gesti. Skipta má út valhnetum fyrir pecanhnetur.
 
Valhnetu- og hunangsnammi
Gerir 10-12 stykki

• 1/2 bolli saxaðar valhnetur
  
• 1/2 bolli kókosmjöl
  
• 2 kúfaðar msk carobduft
  
• 1/4 bolli acacia hunang (fæst t.d. í Yggdrasli)
  
• 1/4 bolli sesamfræ eða kókosmjöl (gæti þurft meira)
  
  Aðferð:
  
• Blandið öllu nema sesamfræjunum saman og mótið kúlur í höndunum (gott að nota plasthanska).
  
• Veltið upp úr sesamfræjum eða kókosmjöli.
  
• Kælið.
  
  

Prenta þessa uppskrift     -     Senda þessa uppskrift

Þessar kökur eru svo hollar að þær virka eins og vítamíntöflur. Þær eru óbakaðar og því nýtast ensímin og vítamínin til fulls. Hollusta valhneta er ótvíræð og holla fitan stuðlar að heilbrigðu hjarta en þær innihalda m.a. omega-3 fitusýrur, E vítamín, B vítamín, magnesium, andoxunarefni, prótein og trefjar. Valhnetur eru taldar geta lækkað vonda kólesterólið í blóðinu. Rúsínurnar gefa okkur fína orku sem líkaminn dundar við að vinna úr yfir langan tíma. Ég sleppi stundum kakóinu og nota kanil í staðinn, sérstaklega fyrir jólin. Nota má pecanhnetur í staðinn fyrir valhnetur. Athugið að fjöldi kakanna fer eftir því hvernig kökumót þið notið. Ég nota frekar lítil mót og fæ um 15-20 kökur.
 
Valhnetu- og rúsínukökur
Gerir 15-20 kökur

• 60 gr rúsínur
  
• 40 gr valhnetur
  
• 30 gr kakó
  
• 1 msk kakónibbur (má sleppa)
  
• 1 tsk agavesíróp
  
  Aðferð:
  
• Setjið valhneturnar og rúsínurnar í matvinnsluvél og malið í um 20 sekúndur eða þangað til allt blandast vel saman og er fínkornótt.
  
• Bætið kakónibbunum, kakóiinu og agavesírópinu út í og blandið áfram í nokkrar sekúndur. Skafið hliðar matvinnsluvélarinnar og blandið áfram í nokkrar sekúndur.
  
• Bætið 1 tsk af agavesírópi út í ef blandan er of þurr.
  
• Hnoðið deigið vel saman með höndunum og geymið í ísskáp í um 20 mínútur.
  
• Setjið plastfilmu á borð (eða bökunarpappír)
  
• Fletjið deigið út með höndunum eða kökukefli svo það verði um 1/2 cm. að þykkt og skerið út kökur með smákökumóti.
  
• Geymið í ísskáp eða frysti og berið fram kalt.
  
  
  
• Nota má carob í staðinn fyrir kakó.
  
• Nota má pecanhnetur í staðinn fyrir valhnetur.
  
• Sleppa má kakóinu og nota 30 gr kókosmjöl og 1 tsk kanil í staðinn.
  
• Nota má hlynsíróp í staðinn fyrir agavesíróp.
  
• Kakónibbur fást í heilsubúðum, nota má 85% dökkt súkkulaði í staðinn.

Prenta þessa uppskrift     -     Senda þessa uppskrift

Vanillubíómjólkin sykurlausa sem við Íslendingar eigum er mjög sniðug og ótal margt hægt að gera úr henni. Hún er frekar þykk og hefur svipaða áferð og óþeyttur rjómi. Til dæmis er hægt að skera niður ávexti og nota biomjólkina sem sósu ofan á. Nota hana sem rjóma ofan á heita eplaböku og einnig er hægt að gera úr henni ís eins og ég gerði hér. Ísinn er frekar harður (allavega ef maður á ekki ísvél :( því það er lítil fita í honum (fyrir utan carobið/súkkulaðið). Vanillubíómjólk er EINA afurðin á CafeSigrun sem inniheldur sætuefni. Það er nefnilega ekki til hrein vanillubíómjólk, því miður. Þó ég sé alfarið á móti sætuefnum þá sleppur þessi uppskrift í gegn hjá mér (svona spari). Ef ég mun deyja úr einhverju get ég alveg eins drepist af því að borða þennan vanillubíómjólkurís einu sinni á ári eða svo. Ísinn er án eggja svo hann hentar vel þeim sem hafa eggjaóþol.

 
Vanillubiomjólkurís
Gerir um 1 lítra

• 500 ml vanillubíómjólk
  
• 2 vel þroskaðir, stórir bananar
  
• 1 tsk sítrónusafi
  
• 1 tsk vanilludropar
  
• 50 gr carob eða gott, dökkt súkkulaði með hrásykri, (má sleppa og nota saxaðar gráfíkjur eða döðlur í staðinn)
  
• 2 msk agavesíróp
  
  Aðferð:
  
• Blandið saman bönunum, sítrónusafa, vanilludropum, agavesírópi, og biomjólk. Hrærið í nokkrar mínútur.
  
• Færið blönduna í ískalt plastbox, eða járnbox og setjið í frysti í um 30 mínútur.
  
• Takið ísinn út og hrærið í honum með gaffli til að brjóta ískristallana. Frystið aftur í 30 mínútur.
  
• Endurtakið nokkrum sinnum þ.e. hræra og frysta á um hálftíma fresti þangað til blandan er farin að þykkna og erfiðara er orðið að hræra.
  
• Blandið saxaða carobinu/súkkulaðinu saman við og hrærið vel.
  
• Setjið í frysti og hrærið þangað til erfitt er orðið að hræra í blöndunni.
  
  
• Gott er að taka ísinn út um 15-20 mínútur áður en á að borða hann til að mýkja hann aðeins.
  
  

Prenta þessa uppskrift     -     Senda þessa uppskrift

Þetta er ansi holl útgáfa af jóla-vanilluís. Það er enginn rjómi, engin egg og ekkert slíkt í ísnum. Ég notaði kókosfeiti og agavesíróp og möndlumjólk og döðlurnar gefa líka sætt bragð. Vanillubragðið er nokkuð áberandi en mér finnst það mjög gott. Þið getið notað 1 vanillustöng ef þið eruð ekki eins hrifin og ég af vanillubragðinu. Hægt er að bæta dökku, góðu súkkulaði út í, söxuðu smátt en einnig má setja myntu, kakó/carob, hnetur, ber o.fl. út í ísinn. Það er ekki oft sem maður getur sagt að ísinn sem maður er að borða sé trefjaríkur, próteinríkur, kalkríkur og með hollri fitu! Ég notaði vanillustangir sem ég keypti í kryddskóginum á Zanzibar en þið þurfið ekki að fara svo langt sem betur fer því vanillustangir fást bæði í heilsubúðum og öðrum búðum. Ég mæli samt með því að þið farið einhvern tímann til Zanzibar enda dásamleg eyja! Möndlumjólk má kaupa í flestum verslunum.
 
Vanilluís
Fyrir 5-6

• 5 bollar möndlumjólk (ég miða við 250 ml bolla). Þeir sem vilja geta notað léttmjólk
  
• 2 stk vanillustangir
  
• 1 bolli döðlur
  
• 1/2 bolli agavesíróp
  
• 4 msk kókosfeiti
  
  Aðferð:
  
• Setjið döðlurnar ásamt 1 bolla af möndlumjólk í blandara. Blandið af fullum krafti í um 30 sekúndur.
  
• Bætið agavesírópi og kókosfeiti saman við.
  
• Skerið vanillustangir í tvennt og skafið úr stöngunum ofan í blandarann.
  
• Blandið í 5 sekúndur.
  
• Hellið í stóra skál.
  
• Bætið afgangnum af mjólkinni saman við og hrærið vel.
  
• Ef þið eigið ísvél, setjið þá blönduna í ísvél og setjið svo í plastbox í frysti þegar hún er orðin tilbúin.
  
• Fyrir þá sem eiga ekki ísvél þá þarf að setja blönduna í stórt plastbox og hræra í blöndunni á um klukkutíma fresti í nokkra klukkutíma eða þangað til erfitt er orðið að hræra meira.
  
  

Prenta þessa uppskrift     -     Senda þessa uppskrift

Þetta er reyndar meiri bananamús en vanillumús því bananabragðið er nokkuð sterkt. Þetta er mús sem okkur Jóhannesi finnst ferlega góð og við gerum hana stundum þegar okkur langar í eftirmat sem er ekki of þungur í maga en er samt stútfullur af vítamínum, próteinum og hollri fitu. Svo er þetta reglulega góð blanda fyrir ís líka! Það er mjög gott að hálf frysta blönduna og setja svo í matvinnsluvél eða blandara, bæta smá mjólk við til viðbótar og drekka sem hristing (sjeik)! Mikilvægt er að eiga góðan blandara eða góða matvinnsluvél til að mauka hneturnar sem best.
 
Vanillumús
Fyrir 2

• 100 gr cashewhnetur
  
• 1 stór, vel þroskaður banani
  
• 4 msk agavesíróp
  
• 1/8 tsk salt (Himalaya eða sjávarsalt)
  
• 1/4 bolli sojamjólk (einnig má nota möndlumjólk, haframjólk, hrísmjólk eða undanrennu)
  
• 2 msk kókosolía
  
• 2 vanillustangir
  
  Aðferð:
  
• Setjið cashewhneturnar í matvinnsluvél og maukið alveg þangað til hneturnar fara að mynda kekki, gæti tekið nokkrar mínútur.
  
• Bætið 1 tsk af kókosolíu saman við í dropatali á meðan vélin gengur. Setjið til hliðar.
  
• Setjið bananann, saltið, agavesírópið, vanilludropana og sojamjólkina út í matvinnsluvélina og blandið vel.
  
• Bætið afgangnum af kókosolíunni saman við og maukið vel (í nokkrar sekúndur).
  
• Skerið vanillustöngina í tvennt langsum og skafið úr henni ofan í matvinnsluvélina. Skafið hliðar matvinnsluvélarinnar og blandið í 10 sekúndur.
  
• Setjið blönduna í skál og látið stífna í ísskápnum í um klukkutíma.
  
• Dreifið smávegis kakói yfir ef þið viljið og berið fram kalt.
  
  
  

Prenta þessa uppskrift     -     Senda þessa uppskrift

Ég get sagt ykkur það...að ég fór næstum því með heilt eggjabú í tilraunir á þessum bollum. Ég keypti eggjabakka eftir eggjabakka og þær mistókust ALLTAF...nema að lokum, small þetta saman hjá mér, loksins! Það var reglulega gott vatnsdeigsbollubragð af þessum og með cashewrjóma og jarðarberjasultu, hið mesta sælgæti! Það er ekki til að maður finni "glúteinlaust bragð" og ég var ferlega ánægð með sjálfa mig. Jóhannes kaus meira að segja þessar frekar en þær hefðbundnu. Ég fékk sem sagt fyrirspurn um glúteinlausar vatnsdeigsbollur og lagðist því í smá tilraunir. Þetta var útkoman. Þið getið að sjálfsögðu notað hvaða fyllingu sem þið viljð en ég hef hér notað cashewrjóma og heimatilbúna jarðarberjasultu. Svo eru nokkrar tillögur til viðbótar hérna fyrir neðan. Bollurnar eru bestar á þeim degi sem þær eru bakaðar og verða frekar harðar daginn eftir. Athugið að afar mikilvægt er að sigta mjölið út í vatnið.
 
Vatnsdeigsbollur (glúteinlausar) með cashewrjóma og jarðarberjasósu
Gerir 10-12 litlar bollur

• 20 gr fínmalað maísmjöl (enska: corn flour)
  
• 25 gr fínmalað hrísmjöl (enska: rice flour
  
• 100 gr kartöflumjöl (enska: potato flour)
  
• 1 stórt egg
  
• 100 ml vatn
  
• 2 msk agavesíróp
  
• 4 msk kókosolía
  
  Vatnsdeigsbollur-Aðferð:
  
• Hitið vatnið, agavesírópið og olíuna í potti þangað til fer að sjóða.
  
• Takið pottinn af hitanum. Sigtið eina matskeið í einu af mjöli í einu út í pottinn.
• Hrærið hverja matskeið af mjöli með trésleif þangað til deigið líkist helst þykkum graut. Deigið ætti að losna frá pottinum og vera kekkjalaust og slétt og flaueliskennt.
  
• Látið deigið kólna alveg.
  
• Hrærið eggið lauslega og bætið varlega út í deigið. Athugið að ekki er víst að þið þurfið allt eggið. Ekki setja of mikið því annars verður deigið of blautt. Best er að nota hrærivél eða handþeytara.
  
• Hrærið þangað til deigið er orðið nógu stíft til að þið getið snúið skeið á hvolf með deigi í án þess að dropi niður.
  
• Ef deigið er of blautt, setjið þá meira kartöflumjöl og hrærið betur þangað til deigið er orðið nokkuð stíft.
  
• Hitið ofninn í 170°C.
  
• Setjið bökunarpappír á bökunarplötu og búið til um 10-12 bollur (stærð fer eftir smekk).
  
• Notið skeið til að setja deigið á pappírinn, gott er að nota skeið á móti til að skafa innan úr.
  
• Bakið í 20 mínútur (ekki opna ofninn á meðan).
  
  Jarðarberjasósa:
  
• 100 gr jarðarber (fersk eða frosin)
  
• 2 msk vatn
  
• 2 msk agavesíróp
  
  Jarðarberjasósa-Aðferð:
  
• Setjið jarðarberin, vatnið og agavesírópið í pottinn og látið malla í 30 mínútur við vægan hita. Takið úr pottinum, setjið í skál og hrærið með gaffli svo að jarðarberin leysist vel í sundur. Geymið í ísskáp með plastfilmu yfir.
  
  Cashewrjómi: (Tvöfaldið uppskriftina ef þið viljið cashew-súkkulaðimauk)
  
• 100 gr cashewhnetur
  
• 2 msk vatn
  
• 2 msk agavesíróp
  
  Cashewrjómi-Aðferð:
  
• Setjið cashewhneturnar í matvinnsluvél og malið þangað til þær verða að mauki. Þið gætuð þurft að mala hneturnar í alveg 3 mínútur.
  
• Skafið hliðar vélarinnar að innan með spaða og bætið smá slettu af vatni við. Maukið þangað til hneturnar verða aðeins mjólkurlitaðar (í um 1 mínútu).
  
• Bætið öllu vatninu út í á meðan vélin gengur og maukið vel. Þið gætuð þurft að skafa innan úr hliðum vélarinnar og halda svo áfram.
  
• Bætið agavesírópinu saman við og maukið í nokkrar mínútur. Nú ætti blandan að vera orðin eins og þykkur grautur.
  
  Cashew-súkkulaðimauk:
  
• Gerið 100 gr af cashewrjómanum og setjið 1-2 msk af kakói út í. Látið vélina ganga í nokkrar sekúndur.
  
  Súkkulaðihjúpur:
  
• 50 gr dökkt, lífrænt framleitt súkkulaði með hrásykri
  
• Bræðið súkkulaðið yfir vatnsbaði. (Setjið svolítið vatn í lítinn pott. Setjið skál ofan á pott þannig að skálin sitji á brúnunum. Setjið súkkulaðið ofan í skálina og bræðið yfir vægum hita).
  
• Dýfið toppum vatnsdeigsbollanna ofan í súkkulaðið og látið storkna.
  
  
• Bollurnar eru bestar samdægurs.

Prenta þessa uppskrift     -     Senda þessa uppskrift

Þetta salat fékk ég fyrst í Naivasha sem er í Kenya, fyrir norðan Nairobi. Rauðrófur eru frekar mikið notaðar í Kenya og ananas er notaður í allt enda vex þessi frábæri ávöxtur víða í Kenya. Þegar ég sá þetta salat fyrst þá horfði ég á það og velti vöngum yfir því hvort ég ætti að prófa eða ekki. Ákvað svo að salat sem væri svona fallegt á litinn ætti skilið að vera smakkað. Ég sá ekki eftir því, salatið var afar bragðgott og skemmtilegt ekki síst af því áferðin á rauðrófum og ananas er svo ólík. Salatið er sérlega hollt og gott, vítamínríkt, járnríkt og gott fyrir meltinguna. Salatið má borða sem meðlæti eða í nesti eitt og sér. Manni þarf að þykja rauðrófur góðar til að geta borðað salatið en ég er heppin því ég elska rauðrófur!
 
Ananas-og rauðrófusalat frá Naivasha
Fyrir 4 sem meðlæti

• 2 litlar rauðrófur
  
• 1/4 ananas
  
• 1/4 tsk salt (Himalaya eða sjávarsalt)
  
  Aðferð:
  
• Sjóðið rauðrófurnar með saltinu í um 20-25 mínútur eða þangað til þær eru orðnar nokkuð mjúkar.
  
• Kælið rófurnar, afhýðið og skerið í litla bita (gott er að nota hanska því liturinn er ansi sterkur og erfitt að ná honum af höndum). Miðið við stóra sykurmola að stærð.
  
• Afhýðið ananasinn, skerið miðjuna úr honum og saxið í bita jafnstórum rauðrófubitunum.
  
• Best er að setja lúku af ananas í skál, setja svo lúku af rauðrófum, lúku af ananas og koll af kolli svo ananasinn verði ekki fjólublár þegar salatið er borið fram. Ekki hræra í salatinu.
  
  

Prenta þessa uppskrift     -     Senda þessa uppskrift

Þessi drykkur er Afríka í glasi (eða að minnsta kosti Tanzanía og Kenya í glasi). Það er ekkert sem hefur minnt mig jafn mikið á þessa staði eins og fyrsti sopinn sem ég tók af þessum drykk þegar ég var að búa hann til. Hann er alveg hreint dásamlega frískur og góður, mitt á milli þess að vera súr og sætur og er upplagður sem sumardrykkur. Á ferðalögum okkar um þessar slóðir kaupum við gjarnan ferska safa hvers konar, og það er fátt betra en að koma t.d. úr morgunsafaríi, svolítið syfjaður en upprifinn eftir ævintýri morgunsins (t.d. eftir að hafa séð ljón, fíla eða blettatígur!!!) og koma beint í morgunmat þar sem svalandi ávaxtadrykkur bíður manns. Fyrir utan að vera frískandi þá er safinn afar hollur því mango er fullt af andoxunarefnum, trefjum, A, K og E vítamíni og inniheldur kalíum (potassium) eins og bananar en kalíum leikur stórt hlutverk í að halda blóðþrýstingi í lagi o.fl. Ástaraldin (sem heitir á ensku Passion Fruit) inniheldur svipaða vítamínbombu. Athugið að þegar þið veljið ástaraldin á ávöxturinn að virka svolítið þungur miðað við stærð og hýðið á að vera svolítið krumpað (virkar ekki girnilegt en þannig er það þroskað). Ef ykkur finnst steinarnir í ástaraldinum ekki góðir (þeir eru ætir) má láta safann renna fyrst í gegnum sigti.
 
Ástaraldins- og mangodrykkur
Fyrir 2

• 1 mango (lítið), vel þroskað
  
• 6 ástaraldin (lítil)
  
• 200 ml hreinn appelsínusafi
  
  Aðferð:
  
• Afhýðið mangoið og skerið í litla bita (þó þeir fari í blandara er best að skera það í litla bita vegna trefjanna sem eru í mangoi).
  
• Skerið ástaraldinin í helminga.
  
• Setjið mangobitana í blandara ásamt appelsínusafanum og blandið í 10 sekúndur eða þangað til allt er vel maukað. Bætið meiri appelsínusafa út í ef ykkur finnst þurfa.
  
• Skafið kjötið úr ástaraldin helmingunum með skeið ofan í blandarann.
  
• Blandið áfram í 2 sekúndur.
  
  
• Einnig má nota ananassafa eða eplasafa.
  
• Ef þið viljið drykkinn ískaldan má blanda ísmola fyrst í blandaranum. Bragðið nýtur sín hins vegar best ef drykkurinn er ekki alveg ískaldur.

Prenta þessa uppskrift     -     Senda þessa uppskrift

Þessi er rosa fín og matarmikil. Held að það sé ekki til fullkomnari haustsúpa, svei mér þá. Súpan er einstaklega holl því hún inniheldur tómata, engifer, sætar kartöflur, hnetur og margt fleira hollt og gott. Þar sem ég er nýkomin frá Afríku þegar þetta er skrifað þá langar mig helst að elda bara afrískan mat. Maturinn sem við fengum í Kenya var afar góður og bragðmikill án þess að vera of sterkur eða kryddaður. Hann er ekkert ósvipaður indverskum mat að sumu leyti þ.e. miðað við notkun á sumum kryddum eins og kanil, cumin, kartöflum, spínati og fleiru. Það þægilega við súpuna er að maður getur skorið grænmetið mjög gróft því það fer allt saman í matvinnsluvél!
 
Austur-Afrísk grænmetissúpa með hnetum og sætum kartöflum
Fyrir 4

• 1 msk kókosfeiti eða ólífuolía
  
• 1 meðalstór laukur, saxaður gróft
  
• 2 hvítlauksgeirar, saxaðir gróft
  
• smá bútur af engifer (um 2 gr), saxaður frekar smátt
  
• 1 msk cuminduft (ekki kúmen)
  
• 1 msk corianderduft
  
• 1 tsk kanilduft
  
• 1 tsk negulduft
  
• 250 gr tómatar, saxaðir gróft
  
• 450 gr sætar kartöflur, saxaðar gróft
  
• 1 stór gulrót, söxuð gróft
  
• 750 ml vatn
  
• 1 msk heilsusalt (Herbamere)
  
• 1/2 stór gerlaus grænmetisteningur t.d. frá Rapunzel
  
• 20 gr kashew hnetur, þurrristaðar á pönnu (má nota jarðhnetur líka)
  
• 1 tsk cayenne pipar (má sleppa)
  
• 1 msk hnetusmjör (hreint og auðvitað án viðbætts sykurs)
  
• Nokkur lauf af coriander til skreytinga (má sleppa)
  
  Aðferð:
  
• Hitið kókosfeitina eða olíuna á stórri pönnu á meðalhita.
  
• Hitið laukinn í um 10 mínútur eða þangað til hann er orðinn mjúkur.
  
• Bætið hvítlauk, engiferi, cumin, coriander, kanil og negul saman við.
  
• Bætið tómötunum, sætu kartöflunum og gulrótinni saman við. Hitið í um 5 mínútur.
  
• Hellið 750 ml af vatni út í. Saltið og bætið grænmetisteningnum út í.
  
• Látið suðuna koma upp og leyfið þessu að malla í um 30 mínútur eða þangað til grænmetið er orðið mjúkt.
  
• Takið súpuna af hellunni og látið kólna í nokkrar mínútur.
  
• Hellið súpunni í matvinnsluvél ásamt þurrristuðu hnetunum og hnetusmjörinu og blandið þangað til allt er orðið vel saxað (eiga ekki að sjást neinir grænmetisbitar. Súpan verður svona sinnepsgul á litinn).
  
• Færið þessa blöndu nú í pott og hitið vel.
  
• Dreifið nokkrum corianderlaufum yfir súpuna áður en hún er borin fram.
  
• Berið fram með nýbökuðu, grófu brauði.
  
  
• Súpan er enn þá betri daginn eftir.
  
• Ef þið viljið hafa súpuna grófari, má mauka grænmetið minna.

Prenta þessa uppskrift     -     Senda þessa uppskrift

Það var um haustið 2007 þegar við Jóhannes vorum (oft sem áður) í Nairobi. Við vorum nýkomin frá Zanzibar en þar áður höfðum við verið að lóðsa nokkra hópa fólks um Kenya. Við vorum með 7 tíma aflögu fyrir næsta flug (til London). Ég hringdi í James sem er innfæddur leigubílstjóri (eða réttara sagt strákpjakkur sem leigir gamla druslu og rúntar með fólk og fær um 500 krónur á dag fyrir). Ég hafði fengið James nokkrum sinnum til að skutla mér og líkaði vel við þennan hægláta en duglega strák. Nú, hann fór með okkur inn til Nairobi og við ákváðum að eyða tímanum í bókabúð, að kaupa hnetur og ávexti í flugvélina (í nesti) og fara á nokkur kaffihús. Við fórum í Sarit Centre sem er stór verslunarmiðstöð í Westlands hverfinu í Nairobi en þar er öruggt og þægilegt að versla. Þó að ég sé ekki hrifin af verslunarmiðstöðvum þá er eitthvað öðruvísi við að versla þar sem varðmenn vopnaðir AK 47 rifflum eru á sveimi….ekki alveg Smáralindsstemmningin. Nú við versluðum nokkrar bækur, þó ekki uppskriftabækur (því ég á þær flestar um afríska matargerð), fengum okkur ljúffengt kaffi á Dorman’s og rétt áður en við ætluðum að hitta James aftur ákváðum við að hendast upp á efstu hæð og grípa með okkur bananadrykkinn góða sem ég fæ mér alltaf þegar á leið þarna um. Við þeystumst upp, þeystumst aftur niður með bananadrykk í hönd (risaglös) og út í bíl. Það vildi ekki betur til en svo að Jóhannes náði að hella yfir sig allan um 400 ml af klístruðum bananadrykk. Það var 30 stiga hiti og engin loftkæling, við á leið út á flugvöll, fötin í töskunni, ekki einu sinni pappír uppi við og bílsætið óóóóóógeðslegt. Aumingja James…. Við vorum alveg miður okkar en tókst að ná í hreinan bol, þurrka það mesta úr sætum og af buxum og hendast út á flugvöll. Jóhannes var svo svekktur að ég gat ekki annað en gefið honum eiginlega allan minn drykk (allt of mikið fyrir mig hvort eð var). Við skildum við James á flugvellinum með fullt af þjórfé og pening fyrir þrifum. Hann brosti bara og sagði "Hakunamatata". En sem sagt þetta er uppskriftin af bananadrykknum og á meðan þið drekkið hann, ímyndið ykkur að þið hellið rúmlega 400 ml yfir ykkur í bíl í 30 stiga hita og með enga loftkælingu. Veeeeel klístrað!

Uppskriftin inniheldur hunang en því má skipta út fyrir agavesíróp ef þið eruð jurtaætur.
 
Bananadrykkur frá Nairobi
Fyrir 2

• 2 vel þroskaðir, stórir bananar
  
• 1 msk acacia hunang eða agavesíróp
  
• 150 ml sojamjólk (einnig má nota haframjólk, hrísmjólk, möndlumjólk eða undanrennu)
  
• 4 ísmolar
  
  Aðferð:
  
• Setjið ísmolana í blandara.
  
• Hellið 50 ml af sojamjólk út á ísmolana.
  
• Blandið vel eða þangað til mjólkin fer að freyða.
  
• Setjið bananana, hunangið og afganginn af sojamjólkinni út í.
  
• Blandið vel eða upp undir mínútu.
  
• Berið fram strax.
  
  

Prenta þessa uppskrift     -     Senda þessa uppskrift

Það hljómar kannski skrítið að setja hvítlauk, rúsínur og banana saman, en það er ferlega gott. Rétturinn verður ekki of sætur því hann er frekar mikið kryddaður. Próteinríkur og fitusnauður réttur. Þessa uppskrift fann ég í fínni bók sem ég á og heitir einfaldlega "chicken"!
 
Bananakjúklingur með rúsínusósu
Fyrir 2

• 1/2 kjúklingur (organic og free range þ.e. "hamingjusamur"), grillaður og skinnlaus. Einnig má steikja kjúklingabringur upp úr smá kókosfeiti og vatni
  
• 2 stórir, þroskaðir bananar
  
• 2 hvítlauksrif, marið
  
• 1/2 ferskur, fínt saxaður, rauður chillipipar
  
• 1/2 tsk heilsusalt (Herbamare)
  
• 1 lárviðarlauf, mulið smátt
  
• 2 dl kjúklingasoð (1 gerlaus kjúklingakraftsteningur. Ef hann er ekki til má nota gerlausan grænmetistenging t.d. frá Rapunzel)
  
• 1 msk kornsterkja (courn flour eða arrow root) leyst upp í 1 msk af vatni
  
• 1 dl hrein, fitulaust jógúrt
  
• 1/2 dl rúsínur
  
• 1/2 rauð paprika í sneiðum
  
  Aðferð:
  
• Allt kjöt rifið af kjúklingnum og sett í eldfast mót, skinnið er ekki notað.
  
• Bananarnir eru sneiddir niður og þeim raðað ofan á.
  
• Paprikusneiðunum raðað yfir.
  
• Sósujafnaranum (kornsterkjunni) og kjúklingasoðinu blandað út í jógúrtina, ásamt papriku, hvítlauk og rúsínum.
  
• Þessu er svo hellt yfir kjúklinginn.
  
• Hitað í um 10-20 mín í forhituðum ofni við 180°C
  
  
• Það er mjög gott að hafa ferskt salat, grjón (basmati með villihrísgrjónum eða brún hýðishrísgrjón) og heitt, Gróft snittubrauðmeð
  
  
  
  

Prenta þessa uppskrift     -     Senda þessa uppskrift

Þessi uppskrift er auðveld í undirbúningi því mest af hráefninu fer í matvinnsluvél. Uppskriftin er líka mjög holl því í túnfisknum eru Omega 3 fitusýrur sem hjálpa til að sporna við hjartasjúkdómum. Einnig eru túnfiskur og kjúklingabaunir ríkar af E vítamíni sem eru sterk andoxunarefni og hjálpa til við að sporna t.d. við krabbameini, hjartasjúkdómum og ýmsu öðru. Það er sniðugt að búa til tvöfaldan skammt og frysta rest því borgararnir geymast í um mánuð í frysti.
 
Bauna- og túnfiskborgarar
Gerir um 10 borgara

• 2 x 420 gr dósir kjúklingbaunir (sigtið vatnið frá)
  
• 1 búnt vorlaukar (6-7 stykki), saxaðir gróft (notið miðjuhlutann og grænu blöðin líka)
  
• 400 gr túnfiskur í dós í eiginn vökva eða vatni (ekki olíu). Kaupið aðeins "Dolphin friendly" túnfisk
  
• 1 tsk chillipipar (má sleppa og nota svartan pipar fyrir þá sem þola ekki sterkan mat). Einnig má nota paprikuduft
  
• 1 tsk cumin
  
• 1 hvítlauksrif, saxað gróft
  
• 30 ml sítrónusafi
  
• Hnefafylli corianderlauf, söxuð gróft
  
• 150 ml hrein jógúrt eða ab mjólk (sojajógúrt fyrir þá sem nota ekki mjólkurvörur)
  
• Steinselja, coriander eða eitthvað annað ferskt krydd
  
  Aðferð:
  
• Setjið kjúklingabaunirnar og vorlaukinn í matvinnsluvél og maukið. Ekki samt mauka alveg í spað.
  
• Bætið túnfisknum, vorlauknum, chillipiparnum, cumin, hvítlauk, sítrónusafa og corianderlaufunum út í, blandið í nokkrar sekúndur þannig að blandist allt vel saman án þess þó að verða að mauki.
  
• Skiptið deiginu í 10-12 hluta og notið hendurnar til að búa til buffin.
  
• Hitið í ofni í um 20-25 á hvorri hlið við um 200°C. Hitið lengur ef þið viljið harðari skorpu.
  
• Fyrir sósuna skuluð þið blanda saman jógúrti eða ab mjólk og fersku kryddi. Einnig er gott að setja hvítlauk út í ásamt smá pipar.
  
  Sósan:
  
• Blandið saman jógúrti eða ab mjólk og fersku kryddi. Einnig er gott að setja hvítlauk út í ásamt smá pipar.
  
  
• Berið fram með salati (t.d. spínati eða lambhagasalati, þurrristuðum furuhnetum, kirsuberjatómötum, ólífum o.fl.).
  
• Hægt er að nota Borlotti baunir eða Cannellini baunir í stað kjúklingabaunanna.

Prenta þessa uppskrift     -     Senda þessa uppskrift

Þegar ég var í Rwanda febrúar 2008 hitti ég stúlku að nafni Nadine í bænum Ruhengeri sem er við rætur Virunga fjallanna. Ég spurði hana hvað Rwandabúar borðuðu helst og hún svaraði: Baunir, grænmeti, kartöflur og maís hvers dags en kjöt spari. Hún nefndi pintóbaunir, kartöflur, sellerí og fleira úr uppskrift frá mömmu sinni og uppskrift þessi varð til úr þeim upplýsingum. Baunir eru mikið notaðar í Rwanda og ekki síst vegna þess að kjöt er frekar lítið borðað enda kannski ekki á færi allra að kaupa kjöt upp á hvern dag. Þessi baunaréttur er ekki svo ósvipaður Kitheri, baunaréttinum góða frá Kenya, báðir eru þeir mildir og bragðgóðir án þess að láta mikið yfir sér. Fínasti grænmetisréttur svona þegar maður á ekki of mikið í ísskápnum. Í þennan rétt má bæta við meira grænmeti eins og gulrótum, papriku, grænum baunum o.fl. svona eftir því hvað maður á. Rétturinn er bestur ef hann fær að malla í svolítinn tíma og hann er betri daginn eftir. Nauðsynlegt er að leggja pintóbaunir í bleyti að morgni til að geta búið til þennan rétt að kvöldi.
 
Baunaréttur frá Rwanda
Fyrir 2-3

• 1 bolli pintóbaunir, lagðar í bleyti (3 bolla af vatni) í 8 tíma
  
• 1 stór kartafla, skorin í bita (svipaða og sykurmola að stærð). Rwandabúar nota cassava en kartöflur eru einnig notaðar
  
• 3 sellerístilkar, sneiddir
  
• 1 laukur, skorinn í þunnar sneiðar
  
• 1 tsk kókosolía
  
• 1 gerlaus grænmetisteningur (einnig má nota salt og annað krydd í staðinn)
  
  Aðferð
  
• Hellið vatninu af baununum og setjið baunir í pott ásamt vatni þannig að rétt fljóti yfir.
  
• Látið sjóða í um 30 mínútur eða þangað til baunirnar eru orðnar meyrar en ekki mjúkar.
  
• Bætið selleríi, kartöflum og grænmetisteningi út í og látið malla í um 15 mínútur eða þangað til kartöflurnar eru orðnar nokkuð mjúkar en ekki alveg að mauki.
  
• Á meðan skuluð þið hita kókosolíu á stórri pönnu og steikja laukinn í 5 mínútur eða þangað til hann verður gylltur og fer að ilma, bætið við vatni ef þarf meiri vökva.
  
• Hellið öllu úr pottinum á pönnuna.
  
• Látið malla í 20 mínútur eða þangað til allt fer að blandast vel saman og verða svolítið maukkennt (rétturinn er bestur svoleiðis).
  
• Berið fram með t.d. chapati eða brauðbollum.
  
  

Prenta þessa uppskrift     -     Senda þessa uppskrift

Perur hafa hreinsandi eiginleika og bláber eru hollustuheimsmeistarar, full af andoxunarefnum og járni. Þetta er sannkallaður hollustudrykkur og upplagt að nota bláberin úr berjamó haustsins.

 
Bláberja- og perudrykkur
Fyrir 2

• Safi úr 1/2 sítrónu
  
• 1 pera, vel þroskuð
  
• 115 gr bláber
  
• 175 ml AB mjólk (einnig má nota sojajógúrt, venjulega jógúrt eða hreint skyr)
  
• 2 tsk agavesíróp
  
• Smá klípa kanill (má sleppa)
  
• 4 ísmolar
  
  Aðferð:
  
• Setjið ísmolana fyrst í blandarann. Blandið í nokkrar sekúndur.
  
• Hreinsið steinana úr perunni og setjið í blandarann ásamt sítrónusafa, bláberjum og AB mjólk.
  
• Blandið í um 10 sekúndur.
  
• Bætið agavesírópinu saman við og blandið aðeins áfram.
  
• Dreifið kanil yfir ef þið viljið.
  
  
  

Prenta þessa uppskrift     -     Senda þessa uppskrift

Bláber eru flokkuð sem súperfæða (ofur holl) og ekki skrýtið þar sem þau eru algjörlega pakkfull af andoxunarefnum og vítamínum. Dökkblái liturinn er greinilegt merki um það. Bláber innihalda einnig járn og trefjar, eru góð fyrir hjarta, heila og sjón og þykja góð í að sporna gegn ýmsum tegundum krabbameins. C vítamínið hjálpar svo með upptöku á járninu svo útkoman verður reglulega hollt og gott te sem er bæði járnríkt, bragðgott og á að virka bakteríudrepandi ef við erum t.d. með einhverja slæmsku í maganum. Þetta er uppáhaldsteið mitt á haustin þegar bláberin eru glæný. Ef þið eigið ekki ný bláber má nota lífræna bláberjasultu eða frosin bláber.
 
Bláberjate
Fyrir 2

• 2 msk bláber, fersk eða frosin. Einnig má nota lífræna bláberjasultu
  
• 600 ml vatn
  
• 2 tsk agavesíróp eða acacia hunang
  
• 2 tsk sítrónusafi
  
  Aðferð:
  
• Setjið bláber (eða bláberjasultu), agavesíróp og sítrónusafa í lítinn pott.
  
• Látið suðuna koma upp án þess að bullsjóði.
  
• Ef notuð eru fersk eða frosin bláber er gott að kremja þau með matskeið í pottinum. Ef notuð er sulta er hún látin leysast upp í vökvanum.
  
• Bætið vatninu saman við og hitið að suðu.
  
• Hellið vökvanum í gegnum fíngatað sigti.
  
• Hellið í glös.
  
• Berið fram strax.
  
  
• Drykkurinn er einnig afbragð ískaldur. Kælið í ísskáp þangað til hann er orðinn ískaldur og berið fram með ísmolum.

Prenta þessa uppskrift     -     Senda þessa uppskrift

Þessi er einföld, bragðgóð og ódýr, alveg upplögð í lok mánaðarins þegar buddan er farin að léttast. Mig minnir að þessi hafi upphaflega komið úr Nýkaupsbókinni frábæru hans Sigga Hall en ég er aðeins búin að breyta henni.
 
Blaðlauks- og kartöflumaukssúpa
Fyrir 4

• 1 tsk kókosfeiti eða ólífuolía
  
• 1 blaðlaukur, grófskorinn (nema skilja smá bút af miðhlutanum eftir)
  
• 4-6 kartöflur, litlar, afhýddar og skornar í grófa bita
  
• 1 hvítlauksrif
  
• 1 laukur grófskorinn
  
• 2 stórir gerlausir grænmetisteningar t.d. frá Rapunzel (það var kjúklingakraftsteningur í upprunalegu uppskriftinni) og 1 lítri af vatni.
  
• 5-6 lárviðarlauf
  
• smá timian (má sleppa)
  
• salt og pipar
  
  Aðferð:
  
• Hitið kókosfeitina eða ólífuolíuna.
  
• Hitið blaðlaukinn, laukinn og kartöflurnar í potti í smástund þangað til mjúkt.
  
• Lárviðarlaufinu bætt útí sem og soðinu.
  
• Látið malla við vægan hita í 20 mínútur eða þangað til kartöflurnar eru orðnar mjúkar.
  
• Þetta er svo maukað í matvinnsluvél eða með töfrasprota.
  
• 10 mínútum áður en súpan er borin fram, skerið þá niður restina af blaðlauknum í fínar sneiðar og setjið timian líka yfir súpuna.
  
• Saltið og piprið.
  
  
• Fín með nýbökuðu brauði eða grófu snittubrauði

Prenta þessa uppskrift     -     Senda þessa uppskrift

Þessi er fullkominn að hausti þegar maður getur notað fínu nýju kartöflurnar og ef maður býr svo vel að eiga blómkál úr garðinum þá er það sko ekki verra. Súpan er mild og fín, afar mögur þannig að hún hentar vel fólki sem vill létta máltíð en seðjandi. Mér finnst rosalega gott að setja smávegis af rifnum osti og jafnvel rifnum parmesan út í til að fá meira bragð en það er allt eftir smekk hvers og eins auðvitað. Ég veit fátt betra á köldum haustdegi en að borða súpu úr fersku, nýuppteknu grænmeti. Þessi uppskrift kemur upprunalega úr litlum ítölskum bæklingi en ég er aðeins búin að breyta henni þó og gera hana hollari.
 
Blómkáls og kartöflusúpa
Fyrir 2-3

• 1/2 stór blómkálshaus
  
• 1/2 stór kartafla, skorin í teninga
  
• 375 ml léttmjólk (eða nýmjólk fyrir þá sem vilja)
  
• 500 ml grænmetissoð (500 ml soðið vatn + 1-2 grænmetisteningar t.d. frá Rapunzel)
  
• Nokkrir vorlaukar
  
• 1 msk kókosfeiti eða ólífuolía
  
• 13 gr spelti (kartöflumjöl fyrir þá sem hafa glúteinóþol)
  
• 20 gr rifinn, magur ostur
  Lítill bútur ferskur parmesan (má sleppa), rifinn á rifjárni
  
• Heilsusalt (Herbamare)
  
• Pipar
  
  Aðferð:
  
• Brjótið blómkálið í litla jafn stóra sprota.
  Setjið blómkálið í stóran pott ásamt mjólkinni, kartöfluteningunum, grænmetissoðinu og hvíta partinum af vorlauknum (sá græni er notaður ofan á súpuna).
  
• Sjóðið allt í 20 mínútur eða þangað til grænmetið er orðið mjög mjúkt.
  
• Síið vökvann í stóra skál og geymið grænmetið í annarri skál.
  
• Hitið kókosfeitina í stóra pottinum og bætið speltinu saman við. Hrærið allan tímann og mjög hratt í 1 mínútu eða svo (þangað til að úr verður smá grautur).
  
• Bætið vökvanum (sem var síaður frá) hægt saman við, smátt og smátt í einu þangað til allt blandast vel saman.
  
• Látið suðuna koma upp og látið malla í 2-3 mínútur.
  
• Bætið grænmetinu saman við og smakkið til með salti og pipar.
  
• Notið nú töfrasprota til að mauka súpuna eða setjið í nokkrum skömmtum í matvinnsluvél eða blandara. Blandið þangað til súpan er orðin silkimjúk (þið getið geymt nokkra bita af blómkálinu til að hafa grófari áferð ef þess er óskað).
  
• Bætið rifna ostinum saman við og hrærið þangað til hann bráðnar.
  
• Bætið parmesan ostinum út á.
  
• Saxið græna hlutann af vorlauknum og dreifið yfir.
  
• Berið fram strax.
  
• Gott er að hafa nýbakað brauð með súpunni.
  
  

Prenta þessa uppskrift     -     Senda þessa uppskrift

Þessi rjómi er sniðugur fyrir þá sem þola ekki mjólkurvörur eða soyarjóma en vilja samt gera vel við sig t.d. á tyllidögum. Þetta er mjög hollur rjómi þar sem cashewhnetur innihalda minni fitu en aðrar hnetur. 75% af fitunni í cashewhnetunum eru ómetteðu fitusýrurnar oleic sýrur sem er sama holla einómettaða fitan sem finnst í ólífuolíu. Sýran stuðlar að heilbrigðu hjarta, sérstaklega hjá sykursjúkum. Cashewhnetur innihalda einnig kopar, kalk og fosfór og auðvitað prótein.
 
Cashewhneturjómi
Gerir 200 ml

• 1,5 bolli cashewhnetur lagðar í bleyti í um 2 tíma
  
• 2 döðlur
  
• 1 tsk vanilludropar eða vanilluduft
  
• 1/2 bolli hreinn appelsínusafi
  
  Aðferð:
  
• Hellið vatninu af cashewhnetunum (vatnið er ekki notað).
  
• Blandið öllu saman í matvinnsluvél, blandið mjög vel eða þangað til rjóminn er orðinn mjúkur og flaueliskenndur og engir bitar eru eftir. Gæti tekið 3-4 mínútur.
  
• Setjið í skál og plastfilmu yfir.
  
• Kælið rjómann í ísskáp áður en hann er borinn fram.
  
  
• Hægt er að nota t.d. heslihnetur eða möndlur í staðinn fyrir cashewhnetur.

Prenta þessa uppskrift     -     Senda þessa uppskrift

Haldið ekki að gasið á eldavélinni hafið klárast akkúrat þegar ég var að búa til þennan rétt (þegar 20 mínútur voru eftir af eldunartímanum), ég endaði á því að þurfa að setja súpuna í eldfast mót og hita hana svoleiðis. Sem var ekki auðvelt því ég gerði helling af súpu og ofninn var því fullur af eldföstum mótum með baunasúpu í. Það kom reyndar ekki að sök því súpan varð alveg ferlega góð, hún er með mildu, sætu kryddbragði eins og margir indverskir réttir og er létt en um leið saðsöm því í henni er kókosmjólk. Grasker innihalda C vítamín og fleira gott fyrir okkur svona yfir vetrartímann. Linsubaunir eru trefja, járn- og próteinríkar, innihalda fólinsýrur og magnesíum og eiga að stuðla að heilbrigðu hjarta. Grasker eru komin á kreik í nóvember svo það er upplagt að gera þessa súpu þegar grasker eru í búðinni og slydda á rúðunni (rímaði næstum því.....).
 
Dhal (baunasúpa) með graskeri og kókosmjólk
Fyrir 3-4

• 1 msk kókosfeiti og vatn til viðbótar ef þarf meiri vökva
  
• 1 hvítlauksgeiri, saxaður mjög smátt
  
• Smá bútur (um 1cm) ferskt engifer, afhýtt og saxað smátt
  
• 1 rauður chillipipar, fræhreinsaður og saxaður smátt
  
• 1 kanilstöng
  
• 2 negulnaglar (enska: cloves)
  
• 2 laukar, saxaðir smátt
  
• 2 sellerístilkar, saxaðir smátt
  
• 1 msk tómatmauk (puree)
  
• 200 gr brúnar linsubaunir (enska: lentils), skolaðar vel
  
• 1 lítri vatn
  
• 500 gr grasker eða vetrargrasker (þau eru minni og krumpuð). Þyngdin miðast við graskerið áður en það er verkað.
  
• 400 gr kókosmjólk, lífrænt framleidd úr heilsubúð
  
• 1/2 tsk múskat
  
• 1/2 tsk agavesíróp
  
• 1 tsk salt (Himalaya eða sjávarsalt) eða 1 gerlaus grænmetisteningur
  
  Aðferð:
  
• Hitið kókosfeitina í stórum potti.
  
• Hitið laukinn í 5 mínútur eða þangað til hann er orðinn mjúkur. Bætið vatni við ef þarf meiri vökva.
  
• Bætið kanilstönginni, negulnöglunum, hvítlauknum, engiferinu, chillipiparnum og selleríinu út í. Hitið í nokkrar mínútur.
  
• Bætið tómatmaukinu út í ásamt baununum.
  
• Hellið vatninu út á og látið suðuna koma upp.
  
• Látið bullsjóða í 10 mínútur og fjarlægið froðu ef hún myndast.
  
• Kryddið með salti eða setjið grænmetisteninginn út í hér ef þið notið hann.
  
• Lækkið hitann og látið malla við vægan hita í um klukkutíma eða þangað til baunirnar verða mjúkar.
  
• Á meðan skuluð þið afhýða graskerið, fræhreinsa það og saxa í grófa bita.
  
• Setjið í meðalstóran pott ásamt múskati og agavesírópi.
  
• Hellið kókosmjólkinni út á og látið sjóða við vægan hita í um 30-40 mínútur eða þangað til graskerið er orðið mjög mjúkt.
  
• Maukið graskerið með töfrasprota.
  
• Fjarlægið negulnaglana og kanilstöngina úr baunasúpunni.
  
• Maukið súpuna í 2-3 sekúndur með töfrasprota (verður þykkari þannig).
  
• Blandið graskersmaukinu og baunasúpunni saman og hitið í smástund (líka gaman að setja baunasúpuna í skál og graskersmaukið ofan á og bera þannig fram).
  
• Berið fram með chapati brauði eða glúteinlausu brauði.
  
  
• Nota má butternut grasker (squash) í staðinn fyrir venjulegt, stórt grasker.

Prenta þessa uppskrift     -     Senda þessa uppskrift

Þetta er uppskrift sem ég fann í einni af matreiðslubókunum mínum. Þetta er svona ekta kínverskur réttur (nema vantar olíuna sem er oft á austurlensku stöðunum og er því meinhollur), mildur og fer vel í maga.
 
Egg Fu Yung með hýðishrísgrjónum
Fyrir 4

• 175 gr hýðishrísgrjón eða bygggrjón (enska: pearl barley). Þeir sem hafa glúteinóþol ættu ekki að borða bygg en mega borða hýðishrísgrjón
  
• 2 þurrkaðir kínverskir sveppir (eða 2 stórir venjulegir, opnir í þunnum sneiðum)
  
• 4 eggjahvítur, hrærðar lauslega
  
• 1 blaðlaukur, lítill, skorinn í tvennt og svo í þunnar sneiðar. Nota skal miðjuna þ.e. hvíta hlutann og græna hlutann nema ekki blöðin
  
• 1/4 paprika, skorin í bita
  
• 60 gr mambussprotar, hver sneið sneidd í tvennt
  
• 60 gr water chestnuts (má sleppa)
  
• 125 gr ferskar baunaspírur
  
• 2 msk tamarísósa
  
• 1 tsk kókosfeiti eða ólífuolía
  
• 1 msk sesamolía (má sleppa en gefur gott bragð)
  
• Heilsusalt (Herbamare) og pipar
  
  Aðferð:
  
• Sjóðið grjónin.
  
• Hrærið eggin með smá salti, hitið kókosfeiti eða ólífuolíu á pönnu og setjið eggin út á.
  
• Hrærið stöðugt þangað til þau eru orðin “hrærð”.
  
• Bætið tamarísósunni saman við og hrærið áfram.
  
• Hitið sveppina, blaðlaukinn og paprikuna í tvær mínútur.
  
• Bætið mambussprotunum, water cestnuts og baunaspírunum við og hitið í mínútu.
  
• Látið vatnið renna af grjónunum og bætið við á pönnuna ásamt því sem eftir er.
• Blandið vel, þangað til grjónin eru orðin heit.
  
• Kryddið með salti og pipar.
  
• Blandið eggjunum saman við.
  
  
• Ég nota bara eggjahvítur í þennan rétt, heilsunnar vegna en upphafleg uppskrift innihélt 2 egg (rauður og hvítur).

Prenta þessa uppskrift     -     Senda þessa uppskrift

Þessi súpa er voðalega einföld og þægileg, upplögð svona í miðri viku. Ég veit aldrei hvað ég á að hafa með súpunni (væri örugglega best að hafa "prawn-crackers" en ég myndi frekar borða málningu heldur en að borða það ógeð, hvoru tveggja stíflar æðarnar sennilega jafnmikið). En allavega, þessi súpa er holl, próteinrík og góð og upplögð í forrétt ef þið eruð með austurlenska veislu á borðum. Hún er líka mjög ódýr og heppileg ef buddan er ekki þung.
 
Eggjadropa og maískornasúpa
Fyrir 2-3

• 250 gr maískorn (án viðbætts sykurs)
  
• 2 eggjahvítur
  
• 1 tsk sesamolía (má sleppa)
  
• 1,5 stórir gerlausir grænmetisteningar frá Rapunzel
  
• 6 dl sjóðandi vatn
  
• 2 msk maísmjöl (þ.e. sósujafnari. Má líka nota arrowroot)
  
• 1 msk tamarisósa (eða soyasósa) til að bragðbæta ef þarf
  
• 1 tsk agavesíróp
  
  Aðferð:
  
• Hrærið eggjahvítuna vel.
  
• Blandið maísmjöl saman við 1-2 msk af vatni hrærið mjög vel þangað til kekkirnir eru horfnir.
  
• Hellið sjóðandi vatni yfir grænmetisteningana (í potti).
  
• Hleypið suðunni upp og blanda maískornunum saman við.
  
• Setjið agavesírópið út í.
  
• Látið malla (ekki sjóða) í 15 mínútur, ekki með lokinu á.
  
• Blandið eggjahvítunum saman við maísmjölsblönduna og hrærið vel.
  
• Hellið eggjahvítu/maísmjölsblöndunni út í, í lítilli, en stöðugri bunu og hrærið í súpunni allan tímann (án þess að sjóði í súpunni). Eggjadroparnir þykkna og verða að mjóum, hvítum ræmum. Gætið þess að ekki sjóði í súpunni.
  
• Setjið sesamolíuna útí.
  
• Smakkið til með tamarisósunni, ekki víst að þurfi.
  
  
• Það er líka hægt að setja rifinn kjúkling út í, bætið bara aðeins af soði við svo súpan verði ekki alltof þykk. Ef kjúklingur er notaður, má nota kjúklingakraft í stað grænmetiskrafts.

Prenta þessa uppskrift     -     Senda þessa uppskrift

Voða létt, próteinrík og góð súpa, mestmegnis vatn og maískorn en afskaplega bragðgóð og fljótleg í undirbúningi. Krabbakjötið er nokkuð dýrt en það gefur gott bragð. Það er hægt að kaupa bæði frosið og niðursoðið krabbakjöt.
 
Eggjadropa- og krabbakjötssúpa
Fyrir 2-3

• 250 gr maískorn (án viðbætts sykurs)
  
• 2 eggjahvítur
  
• 2 msk maísmjöl (þ.e. sósujafnari. Má líka nota arrowroot)
  
• 1 tsk sesamolía
  
• 2 stórir gerlausir grænmetisteningar t.d. frá Rapunzel
  
• 8 dl vatn
  
• 1 msk hrísgrjónavín eða þurrt sérrí (hægt að nota hrísgrjónaedik líka)
  
• 2 tsk mjög smátt söxuð, fersk engiferrót
  
• 1 tsk heilsusalt (Herbamare)
  
• 1 tsk ávaxtasykur
  
• 200 gr frosið eða niðursoðið krabbakjöt
  
  Aðferð:
  
• Blandið maísmjölinu saman við 1-2 msk af vatni. Hrærið vel þangað til kekkirnir hverfa.
  
• Hrærið eggjahvíturnar vel.
  
• Blandið eggjahvítunum og maísmjölið vel saman og setjið til hliðar.
  
• Hleypið suðunni upp í stórum potti og blandið maískornunum og grænmetiskraftinum saman við.
  
• Látið malla (ekki sjóða) í 15 mínútur, ekki með lokinu á.
  
• Bætið hrísgrjónavíninu eða sérríinu, engiferinu, saltinu og ávaxtasykrinum saman við.
  
• Hleypið suðunni aftur upp og lækkið hitann þangað til kraumar.
  
• Bætið krabbakjötinu út í.
  
• Hrærið í eggjahvítu/maísmjölsblöndunni og hellið henn út í súpuna, í lítilli, en stöðugri bunu og hrærið í súpunni allan tímann (gætið þess að láta súpuna ekki sjóða). Eggjadroparnir verða að mjóum, hvítum ræmum.
  
• Bætið sesamolíunni við og látið malla í 2 mínútur án þess að sjóði.
  
• Kryddið með salti og pipar.
  
  
• Hægt að skipta krabbakjötinu út og nota rifið kjúklingakjöt í staðinn.
  
• Einnig hægt að hafa þetta bara með maískornum og jafnvel smávegis af mjúku tofu ef maður borðar ekki kjöt.

Prenta þessa uppskrift     -     Senda þessa uppskrift

Æ mig vantaði einhvern tímann meðlæti með einhverju sem ég var að elda og ég átti bara þetta í ísskápnum. Voða einfalt bara.
 
Einfalt hrísgrjónasalat
Meðlæti fyrir 3-4

• 2 bollar hýðishrísgrjón eða bygggrjón (enska: pearl barley). Þeir sem hafa glúteinóþol ættu ekki að borða bygg en mega borða hýðishrísgrjón
  
• Sólþurrkaðir tómatar (olían þerruð af með eldhúsþurrku) skornir mjög smátt
  
• 2 sveppir saxaðar mjög smátt
  
• 2 msk möndlur, þurristaðar og svo muldar
  
• 1 tsk turmeric duft,
  
• 1/2 tsk heilsusalt (Herbamare) og smá pipar
  
• 2 msk vatn
  
  Aðferð
  
• Sjóðið grjónin.
  
• Sólþurrkuðu tómatarnir og sveppirnir steiktir upp úr vatni og salti og turmerici.
  
• Þessu er svo blandað saman við grjónin og borið fram.
  
  
• Gott með allskyns fiskréttum, kjúklingaréttum og salötum.

Prenta þessa uppskrift     -     Senda þessa uppskrift

Ég er alltaf að reyna að búa til einföld salöt sem geta gengið með öllum mat. Mér finnst alltaf best að blanda saman mismunandi salatblöðum (t.d. eikarlauf, klettasalat o.fl.), svolitlu af sætu (t.d. mango, epli, jarðarber, vínber) og svo hráu grænmeti (t.d. gulrótum, paprikum, gúrkum tómötum). Svo finnst mér öðru hvoru gott að setja út í salöt t.d. fetaost og ólífur. Hnetur set ég gjarnan út í til að fá skemmtilega áferð og gott bragð. Fetaost nota ég reyndar sjaldan og þegar ég nota hann, er það hreinn fetaostur án kryddolíu (sem er oft bölvuð draslolía). Svo eins og með flest salöt þá má skipta út, breyta og bæta. Salatsósan er afar ljúffeng og fljótgerð og hentar vel bæði með salötum, inn í vefjur, ofan á grænmetisborgara, með grillmat o.fl.
 
Einfalt salat með tahini salatsósu (dressingu)
Fyrir 4 sem meðlæti

Salatið:

• 200 gr blandað salat (t.d. Lambhagasalat, eikarlauf o.fl.)
  
• 1 rauð paprika
  
• 1/4 mango, vel þroskað
  
• 1/4 gúrka
  
• 1/2 avocado, vel þroskað (má sleppa)
  
• 2 msk hreinn fetaostur (ekki í olíu)
  
• 10-15 svartar ólífur
  
• Ein lúka pecanhnetur
  
  Tahini salatsósan:
  
• 2 msk tahini (sesammauk)
  
• 50 ml hreinn appelsínusafi
  
• 1 msk tamarisósa
  
• 1 tsk tabasco sósa (eða piparsósa (hot pepper sauce))
  
• 1 tsk hrísgrjónaedik (eða annað edik sem ykkur finnst gott)
  
  Aðferð:
  
• Byrjið á því að undirbúa salatsósuna.
  
• Blandið saman tahini, appelsínusafa, tamarisósu, tabasco sósu (setjið nokkra dropa fyrst og bætið svo við meiru ef þið þolið) og hrísgrjónaedik í litla skál. Hrærið mjög vel með skeið. Það þarf ekki að nota blandara en þið getið notað hann ef þið viljið.
  
• Geymið við stofuhita þangað til á að bera salatsósuna fram (hún stífnar annars í kæli).
  
• Hægt er að útbúa salatsósuna með nokkurra daga fyrirvara og taka svo sósuna út nokkrum klukkustundum áður en á að nota hana.
  
• Skolið salatblöðin og setjið á stóran disk eða í skál.
  
• Skerið paprikuna í tvennt, fræhreinsið og skerið í frekar þunnar og litlar sneiðar.
  
• Skerið gúrkuna í þunnar sneiðar og svo aftur í helminga.
  
• Afhýðið mangoið og skerið í litla bita (álíka stóra og sykurmola).
  
• Afhýðið avocadoið og skerið í bita.
  
• Myljið pecanhneturnar með fingrunum eða saxið frekar fínt.
  
• Blandið öllu sem á að fara í salatið vel saman.
  
• Berið salatsósuna fram sér.
  
  
• Nota má grænar ólífur í staðinn fyrir svartar.
  
• Nota má annan lit af paprikum í staðinn fyrir rauðar.
  
• Einnig má nota rifnar gulrætur, melónur, kirsuberjatómata o.fl. í salatið.

Prenta þessa uppskrift     -     Senda þessa uppskrift

Þessi tamaridressing er fín yfir salöt og alls kyns borgara og grillmat. Hún er algjörlega fitulaus og hentar því vel fólki sem vill fá bragðgóða dressingu en ekki of hitaeiningaríka. Uppskriftin er úr Demuths bókinni minni (Demuths er frábær grænmetisveitingastaður í Bath, Englandi).
 
Epla- og tamaridressing
Gerir 200 ml

• 50 ml tamarisósa
  
• 150 ml eplasafi
  
• 1/2 tsk agavesíróp (má sleppa)
  
• 1/2 tsk sítrónusafi
  
• 2 cm. bútur engifer, afhýddur
  
• 1 tsk paprika eða 1/2 tsk cayennepipar
  
  Aðferð:
  
• Blandið öllu saman í skál nema engiferinu.
  
• Rífið engiferið á fínrifflóttu rifjárni. Haldið rifjárninu fyrir ofan skálina með dressingunni í og látið safann leka í skálina.
  
• Hrærið vel saman.
  
  
  
  
• Gott með salati, grænmetisborgurum og buffum, grillmat og fleiru.

Prenta þessa uppskrift     -     Senda þessa uppskrift

Þessar gömlu góðu, íslensku fiskibollur svíkja engan og líklega eru flest íslensk heimili með einhvers konar fiskibollur á boðstólum. Hins vegar svíkja gömlu, góðu fiskibollurnar sem steiktar eru í smjöri, heilsuna. Ég hef aldrei á ævinni steikt mat sem maður getur auðveldlega bakað og smjör hef ég aldrei á ævinni keypt né notað. Það verður kannski ekki sama áferð á bökuðum fiskibollum en steiktur, brasaður matur er fyrir mér ekki mannamatur. Um það eru svo sem skiptar skoðanir he he. Þessi máltíð er ódýr (ef maður kaupir frosinn fisk) og er holl, próteinrík og létt/fitulítil. Það er upplagt að gera svolítið magn í einu, baka og svo frysta nokkrar bollur saman til að borða síðar.
 
Fiskibollur
Gerir 12-15 bollur

• 450 gr ýsa (einnig má nota þorsk). Ódýrast er að kaupa frosinn fisk
  
• 1/4 laukur, saxaður gróft
  
• 1/4 blaðlaukur, saxaður gróft (má nota lauk í staðinn)
  
• 1 hvítlauksgeiri, saxaður gróft
  
• 1/2 tsk ferskt engifer, saxað fínt (má sleppa)
  
• 1 egg
  
• 1/2 dl sojamjólk (einnig má nota hrísmjólk, haframjólk eða undanrennu)
  
• 3 msk kartöflumjöl eða spelti
  
• 1 tsk pipar
  
• 1 tsk salt (Himalaya eða sjávarsalt)
  
• 1 tsk kókosolía
  
  Aðferð:
  
• Setjið laukinn, hvítlaukinn, engiferið og blaðlaukinn í matvinnsluvélina og blandið í 10 sekúndur.
  
• Setjið fiskinn og eggið saman við laukinn og maukið ágætlega (þannig að hann losni vel í sundur).
  
• Bætið speltinu, saltinu og piparnum saman við og blandið í nokkrar sekúndur eða þannig að úr verði eins konar deig.
  
• Bætið mjólkinni saman við eins og þurfa þykir, deigið ætti ekki að vera of blautt.
  
• Bætið kókosolíunni saman við.
  
• Mótið bollur með matskeið (gott að vera í plasthönskum og dýfa skeiðinni í vatn inn á milli).
  
• Setjið bökunarpappír á bökunarplötu.
  
• Raðið bollunum á plötuna.
  
• Bakað í ofni við 180° C í um 15-20 mínútur.
  
• Snúið við og bakið í 10-15 mínútur.
  
  
• Berið fram með góðu salati, byggi eða hýðishrísgrjónum og tamarisósu.
  
• Bollurnar má geyma í kæli og hita daginn eftir og upplagt er að taka þær með í nestið.

Prenta þessa uppskrift     -     Senda þessa uppskrift

Þetta er frekar einfaldur indverskur fiskiréttur. Goa er eyja rétt við utan Indland sem að Portúgalar réðu einu sinni yfir. Það skiptir svo sem engu máli, rétturinn er fínn og hollur. Ekki láta hráefnið hræða ykkur en best er að nálgast þau í austurlenskum matvörubúðum. Ef þið finnið ekki curry leaves er best að sleppa þeim (það kemur ekkert annað í staðinn). Ef þið finnið ekki cuminfræ og corianderfræ má nota malaðar útgáfur af fræjunum. Ef þið eruð viðkvæm fyrir chilli, skuluð þið bara nota einn í staðinn fyrir þrjá.
 
Fiskiréttur frá Goa
Fyrir 4-5

• 35 gr kókosmjöl (gróft), ristað á pönnu
  
• 2 hvítlauksgeirar, afhýddir og saxaðir gróft
  
• 3 litlir chilli (rauðir), saxaðir gróft
  
• 2 tsk corianderfræ
  
• 2 tsk cumin fræ (ekki kúmen)
  
• 1/2 tsk malað turmeric
  
• 1 msk tamarisósa
  
• 1 msk ferkst engifer, afhýtt og saxað gróft
  
• 1 laukur saxaður meðalgróft
  
• 1 laukur saxaður gróft
  
• 75 ml kalt vatn
  
• 1 msk kókosfeiti
  
• 2 meðalstórir tómatar, saxaðir meðalgróft
  
• 8 curry lauf (fæst í austurlenskum búðum og sumum matvöruverslunum). Ef þau fást ekki má sleppa þeim
  
• 175 ml grænmetissoð (1 gerlaus teningur frá Rapunzel) eða fiskisoð fyrir þá sem vilja
  
• 300 ml kókosmjólk (enska: coconut milk)
  
• 1 kg ýsa (eða þorskur fyrir þá sem borða þorsk) skorin í bita
  
  Aðferð:
  
• Maukið saman í matvinnsluvél; kókosmjöl, hvítlauk, chilli, coriander- og cuminfræin, turmeric, tamarisósu, engifer og gróft saxaða laukinn ásamt kalda vatninu þangað allt er maukað saman. Gætuð þurft að láta matvinnsluvélina ganga í 1 mínútu.
  
• Hitið kókosfeitina (ásamt smá vatni ef þarf) á stórri pönnu (eða grunnum potti).
  
• Hitið smátt saxaða laukinn þangað til hann er orðinn örlítið gulleitur (í um 5 mínútur).
  
• Bætið kókosblöndunni úr matvinnsluvélinni saman við og hitið þangað til kemur góð lykt eða í nokkrar mínútur. Hrærið reglulega í öllu á pönnunni.
  
• Bætið tómötunum, curry laufunum, grænmetisteningnum og sjóðandi heita vatninu út á pönnuna.
  
• Látið malla, ekki með lokinu á í um 10 mínútur þangað til sósan fer að þykkna.
  
• Bætið kókosmjólkinni út í.
  
• Bætið fiskinum við og látið malla við vægan hita í um 10 mínútur með lokinu á eða þangað til fiskurinn er orðinn hvítur og laus í sér.
  
  
• Berið fram með bygggrjónum, hýðishrísgrjónum, basmati hýðishrísgrjónum, naan brauði, gúrkusósu o.s.frv. Athugið að þeir sem hafa glúteinóþol mega ekki borða bygggrjón eða naan brauð.

Prenta þessa uppskrift     -     Senda þessa uppskrift

Bíðið við….franskar kartöflur á vef CafeSigrun… er það ekki prentvilla? Er konan orðin klikkuð???? Áður en þið sendið mér, áhyggjufull fyrirspurn um hvort ég sé orðin galin þá skuluð þið skoða innihaldslýsinguna á þessari uppskrift…. Það eru þrjú atriði á listanum, kartöflur, olíuúði og salt…, ekkert annað. Frönskurnar eru því bráðhollar og afar, afar langt frá því sem finna má á skyndibitastöðum. Hugmyndin er byggð á frönskunum hennar Lísu Hjalt sem er dyggur notandi CafeSigrun en hún fékk hugmyndina frá vinkonu sinni. Ég notaði kókosolíu/vatnsúða en Lísa útbýr frönskurnar þannig að hún penslar bökunarpappír með olíu og lætur pappírinn liggja undir kartöflunum í 2 tíma. Við það drekka kartöflurnar í sig olíuna á löngum tíma. Svo saltar hún og bakar. Hvor aðferðin sem þið notið skiptir ekki öllu máli en ég get lofað ykkur hollum og góðum frönskum kartöflum.
 
Franskar kartöflur
Fyrir 4-5 sem meðlæti

• 6 kartöflur
  
• 1 tsk kókosolía og vatn (blandað saman í úðabrúsa eða í skál til að pensla)
  
• Salt (Himalaya eða Maldon)
  
  Aðferð:
  
• Skerið kartöflurnar fyrst í sneiðar (svona 5 mm þykkar).
  
• Skerið kartöflurnar því næst í strimla.
  
• Setjið bökunarpappír á bökunarplötu.
  
• Setjið kartöflurnar á bökunarpappír og úðið eða penslið kókosolíu/vatni yfir.
  
• Saltið og veltið kartöflunum aðeins til.
  
• Bakið við 200°C í um 20-25 mínútur.
  
• Berið fram strax.
  
  
• Mér finnst gott að hafa kartöflurnar stökkar en þið getið haft þær mýkri með því að baka þær aðeins styttra eða við lægri hita.
  
• Gott er að krydda kartöflurnar með kartöflukryddi frá Pottagöldrum.

Prenta þessa uppskrift     -     Senda þessa uppskrift

Hrísmjöl fer vel í magann á nánast öllum krílum enda er afar óvenjulegt að ungabörn (nú eða fullorðnir) hafi ofnæmi eða óþol fyrir hrísgrjónafurðum. Þetta kex er mátulega hart (en ekki of) og brotnar ekki í litla mola (sem þýðir að það á ekki að hrökkva ofan í háls barnanna), gott á milli fingranna (ekki of gróft) og er hvorki of sætt né of sterkt á neinn hátt. Þetta kex er upplagt að eiga fyrir börnin á milli mála. Alltaf skal fylgjast með börnum borða kex þar sem þau geta átt það til að stinga því heilu upp í sig í einu og þannig getur það staðið í þeim. Ég setti kexkökurnar inn fyrir 9-12 mánaða en börn eru mismunandi og það eru örugglega mörg börn sem geta byrjað að naga kex fyrr og það getur hentað vel fyrir tanntöku. Ef kexið rennur til á bökunarplötunni, hefur deigið verið of blautt (minnkið þá vatnsmagnið næst). Hrísmjöl er afar mismóttækilegt fyrir vökva og því er misjafnt hvað þarf mikið af vökvanum. Þið getið útbúið deigið þykkara og mótað kex úr því en gætið þess að það verði þá ekki of hart í bakstri.
 
Fyrsta kexið
Gerir um 35 kexkökur

• 40 gr hrísmjöl (enska: rice flour)
  
• 30-50 ml vatn (gæti þurft meira eða minna)
  
• 1/8 tsk salt (Himalaya eða sjávarsalt)
  
• 1/2 msk agavesíróp eða eplasafi
  
• 4 tsk kókosolía (eða smjör)
  
  
  Aðferð:
  
• Hrærið vatnið (byrjið með 30 ml og bætið meira út í ef þarf) saman við hrísmjölið þangað til það verður að þykkum graut sem ekki er of blautur (skeiðin á að geta staðið lóðrétt í maukinu (svipað og t.d. stífþeyttar eggjahvítur en auðvitað ekki eins loftkennt).
  
• Bætið kókosolíunni út í og hrærið vel.
  
• Deigið á að vera það þunnt að það dropi af sleifinni í kekkjum en ekki það þunnt að það leki af skeiðinni í bunu.
  
• Ef deigið er of þunnt bætið þá aðeins meira af hrísmjöli út í en ef það er of þykkt má þynna það með vatni.
  
• Setjið bökunarpappír á bökunarplötu.
  
• Látið 1 tsk af deigi leka á plötuna í einu og hafið smá bil á milli. Reynið að hafa ekki hrúgu af deigi heldur þannig að það verði frekar þunnt.
  
• Deigið á að vera þannig að þegar þið eruð búin að láta það leka á plötuna getið þið aðeins mótað útlínur þess með skeið og ef þið dragið tannstöngul í gegnum deigið ætti það að skilja eftir sig far sem ekki lokast.
  
• Fyrir eldri börn (þau sem eru komin vel á veg með að borða ávaxta- og grænmetismauk) er gaman er að setja nokkra dropa af bláberjasafa eða rauðrófusafa út í deigið til að gera það litríkara.
  
• Bakið við 180°C í um 8-10 mínútur.
  
• Kexið er mjúkt þegar það er búið að bakast en harðnar svo aðeins.
  
  
• Fyrir eldri börn er hægt að setja t.d. bláber í kexið eða rifið epli án hýðis. Einnig má nota perur, mango, ferskjur o.fl.
  
• Ef kexið rennur til á bökunarplötunni, hefur deigið verið of blautt (bætið þá næst aðeins meira af hrísmjöli út í). Hrísmjöl er afar mismóttækilegt fyrir vökva og því er misjafnt hvað þarf mikið af vökvanum.
  
• Ef kexið verður mjög hart hefur það verið bakað of lengi.

Prenta þessa uppskrift     -     Senda þessa uppskrift

Þessi súpa kemur úr bók sem heitir Zanzibar Kitchen. Það er fátt sem lýsir matnum á Zansibar jafn vel og þessi súpa. Kókosmjólkin er gríðarlega mikið notuð sem og öll kryddin sem í súpuna fara en þau eru einkennandi fyrir Zanzibar. Það er ólýsanlegt að ganga um í kryddskógunum á Zanzibar í þessum mikla hita sem þar er og finna ilminn af öllu kryddinu í kringum mann. Það er allt annar heimur og eitthvað sem ég mæli með fyrir allt mataráhugafólk. Maður hefur ekki upplifað kryddin fyrr en maður hefur farið í Spice Tour! Í uppskriftina áttu að fara 125ml af rjóma en mér finnst það óþarfi því kókosmjólkin er nokkuð feit. Súpan er fín fyrir alla fjölskylduna því þrátt fyrir að í henni sé tabasco, þá er hún ótrúlega mild. Súpan er upplögð í október/nóvember þegar graskerin eru á kreiki. Gott er að kaupa grasker og sjóða það til að geyma til seinni tíma.
 
Graskers- og kókossúpa frá Zanzibar
Fyrir 4

• 2 tsk kókosfeiti eða ólífuolía. Bætið við vatni ef þarf
  
• 50 gr laukur, saxaður gróft
  
• 200 gr soðið grasker (afhýðið, fræhreinsið, skerið í búta og sjóðið í söltu vatni í um 15 mínútur)
  
• 650 ml grænmetissoð (vatnið + 2 gerlausir grænmetisteningar t.d. frá Rapunzel)
  
• 375 ml undanrenna eða léttmjólk
  
• 1/8 tsk negull
  
• 1 tsk ferskt, rifið engifer (má nota þurrkað engifer en þá þarf bara 1/2 tsk)
  
• 1 tsk sítrónusafi
  
• 1/2 tsk kanill
  
• Smá sletta af Tabasco sósu (eða sterkri piparsósu). Má nota malaða papriku í staðinn, til að fá mildari súpu
  
• 1/2 tsk heilsusalt (Herbamare) ef þarf
  
• 250 ml kókosmjólk, lífrænt framleidd
  
• Smá klípa saffran. Má sleppa en gefur fallegan lit
  
  Aðferð:
  
• Hitið kókosfeitina í stórum potti og steikið laukinn þangað til hann verður mjúkur.
  
• Bætið graskerinu við ásamt mjólkinni, grænmetissoðinu, kryddinu, tabasco sósunni, saltinu og sítrónusafanum.
  
• Látið malla í 15 mínútur.
  
• Bætið kókosmjólkinni við og hitið í eina mínútu án þess að sjóði.
  
• Bætið saffrani við.
  
• Kælið súpuna aðeins og setjið svo í smáskömmtum í matvinnsluvél. Einnig má nota töfrasprota.
  
• Blandið vel, sumir vilja þó grófari áferð og skal þá blanda súpuna minna.
  
• Hitið súpuna upp að suðu.
  
  
• Berið súpuna fram sjóðandi heita með nýbökuðu brauði.

Prenta þessa uppskrift     -     Senda þessa uppskrift

Þessi uppskrift kemur nánast beint upp úr Delia Smith grænmetisbókinni minni (Delia’s Vegetarian Collection) sem er frábær. Mæli alveg með henni. Ég steikti reyndar ekki upp úr smjöri og ég notaði léttmjólk í stað nýmjólkur. Mín súpa varð ljósari en súpan hennar Deliu (svona fyrir utan að vera örugglega photoshopuð þ.e. breytt í tölvu) þá grunar mig að graskerið sem ég notaði hafi ekki verið alveg fullkomlega ferskt (var sko að prófa grasker í fyrsta skipti með þessari súpu) svo súpan á líklega að verða aðeins appelsínugulari. Súpan sjálf er prýðisgóð og þetta er frekar stór uppskrift sem dugar manni í marga daga. Ódýr en seðjandi matur og fullkomið að búa til brauðbollur með til að dýfa í súpuna á köldum haustdegi. Grasker er mjög hollt að sjálfsögðu, fullt af Beta-Carotine sem er andoxunarefni sem hjálpar okkur að sporna t.d. gegn krabbameini. Svo getur maður ristað graskersfræin og notað þau í brauð eða ofan á salat, ekki amalegt það enda eru þau svo holl að maður ætti að borða þau á hverjum einasta degi. Þau innihalda m.a. prótein, kalíum, zinc, járn og hollar fitusýrur. Zinc er sérstaklega gott fyrir karlmenn! Ef þið fáið stórt grasker getið þið saxað það og og fryst til að nota afganginn í kryddað graskersbrauð eða meiri súpu.
 
Graskerssúpa með grilluðum maískornum
Fyrir 3-4 sem aðalréttur

• 700 gr grasker, afhýtt, fræhreinsað og saxað í 2,5cm bita
  
• 570 gr maískorn, frosin (eða fersk). Athugið að aðeins helmingurinn er notaður fyrst.
  
• 1 tsk kókosfeiti eða ólífuolía
  
• 1 laukur, saxaður
  
• 275 ml léttmjólk
  
• 725 ml grænmetissoð (vatn + 2 gerlausir grænmetisteningar t.d. frá Rapunzel)
  
• Heilsusalt (Herbamare)
  
• Svartur pipar
  
• Smávegis tamarisósa (fyrir maískornin)
  
  Aðferð:
  
• Hitið kókosfeiti eða ólífuolíu í potti og steikið laukinn í um 8 mínútur eða þangað til hann er orðinn mjúkur.
  
• Bætið saxaða graskerinu út í ásamt helmingnum af maískornunum.
  
• Hrærið vel og saltið og piprið.
  
• Lækkið hitann og leyfið grænmetinu að svitna aðeins eða í um 10 mínútur.
  
• Bætið mjólkinni út í ásamt grænmetiskraftinum og látið malla með lokið ofan á (ekki samt loka alveg því mjólkin getur auðveldlega soðið upp úr. Fylgist því vel með pottinum og ekki fara frá honum).
  
• Á meðan þetta er að malla skuluð þið stilla ofninn á hæsta hitastig (um 250°C).
  
• Setjið bökunarpappír á bökunarplötu og dreifið afgangnum af maískornunum á bökunarpappírinn. Dreifið vel.
  
• Setjið bökunarplötuna í um 3 cm. fjarlægð frá mesta hitanum (yfirleitt efst uppi í ofninum).
  
• Hitið í um 8 -10 mínútur. Hrærið aðeins í þeim eftir um 4 mínútur.
  
• Þegar maískornin eru orðin gullbrún má taka þau úr ofninum.
  
• Skvettið strax smávegis af tamarísósu yfir (um 1 msk eða svo) og nuddið maískornunum aðeins upp úr sósunni. Einnig má salta þau ef ykkur þykir það þægilegra. Slökkvið á ofninum og setjið baunirnar aftur inn í hann. Leyfið þessu að standa í nokkrar mínútur.
  
• Þegar súpan er tilbúin skuluð þið nota töfrasprota eða matvinnsluvél til að blanda súpuna. Þið ráðið hvort hún er alveg maukuð eða með smá bitum í.
  
• Berið fram í skálum og dreifið bökuðu maískornunum yfir. Ekki gleyma þeim, því þau eru æði!!!!
  
  
• Til að grilla graskersfræ (til að nota seinna) skuluð þið hreinsa graskerskjötið af fræjunum, dreifa þeim á bökunarplötu og baka við um 150°C í um 45-50 mínútur. Hrærið í þeim eftir um 20 mínútur. Gott er að dreifa smá tamarísósu yfir fræin um leið og þau koma úr ofninum, nudda þeim aðeins í sósuna og leyfa þeim að kólna svoleiðis. Fullkomið í salatið eða sem hollt snakk! Ef þið saltið ekki graskersfræin getið þið notað þau út á morgunmat eða t.d. í brauð (nú eða yfir salat!)

Prenta þessa uppskrift     -     Senda þessa uppskrift

Sumir kannski vita að hægt sé að borða laxaroð en aðrir hugsa eflaust með sér að ég sé orðin galin. Ég ætla bara að segja ykkur að eftir að þið smakkið get ég næstum því lofað ykkur að þið eigið eftir að hugsa grátandi til baka í ÖLL þau skipti sem þið hafið hent laxaroði og að þið munið aldrei, aldrei aftur henda því. Grillað laxaroð er bæði svakalega hollt og gott og frábært sem meðlæti t.d. ofan á salöt, sem snakk og auðvitað inn í sushirúllur (en þar nota ég það mest). Ég hef oft, oft, oft beðið um að fá laxaroð með í poka þegar ég kaupi lax og yfirleitt horfir afgreiðslufólk á mig eins og ég sé snar-galin (sem ég er jú pínulítið). Hins vegar hafa þau í Fylgifiskum verið mjög skilningsrík og eru farin að lauma auka laxaroði ofan í pokann þegar ég versla við þau við mikla gleði mína. Ég á sushibók og í henni er uppskrift að steiktu laxaroði en það er óðs manns æði enda er næg fita í roðinu og það verður stökkt og ljúffent eins og snakk með því að grilla það. Ég lærði þessa aðferð af Elínu mágkonu minni sem lærði aðferðina af kanadískum sushisnillingi. Prófið að bera þetta fram sem snakk í næsta matarboði og verið undir það búin að hakan á gestum detti niður þegar þeir smakka þessa dásemd. Ég hef prófað silungaroð líka en finnst laxinn margfalt betri. Aðferðin virkar flókin því lýsingin er löng en það er bara vegna þess að ég hef hana ítarlegra en kannski þarf. Mér finnst algjörlega frábært að geta nýtt afurðina svona vel og þurfa ekki að henda neinu…þetta væri góð viðskiptahugmynd fyrir einhvern áhugasaman! Þetta er uppskrift sem ég ætlaði að taka með mér í gröfina en af því að ég ætla að verða svo langlíf (því ég borða svo hollt) þá fannst mér ómögulegt að bíða í tugi ára með að birta uppskriftina. Hún er sem sagt birt undir miklum þrýstingi þeirra sem hafa fengið að smakka grillað laxaroð hjá mér í gegnum tíðina.
 
Grillað laxaroð
Fyrir 3-4 sem snakk

• Roð af heilum laxi (getið yfirleitt látið roðfletta fyrir ykkur í búðinni)
  
• 2 msk tamarisósa (einnig má nota sojasósu)
  
• 2 msk fiskisósa
  
• 1 msk sesamolía
  
• 1 msk sesamfræ (má sleppa)
  
  Aðferð:
  
• Hitið ofninn í 220°C
  
• Ef þið hafið ekki látið roðfletta fyrir ykkur skuluð þið roðfletta laxinn (haldið í sporðinn með hreistrið niðri og setjið beittan hníf undir kjötið, skerið að roðinu og togið í roðið í leiðinni og þannig losið þið kjötið frá).
  
• Leggið roðið (hreistrið niður) á stórt bretti.
  
• Skafið allt kjöt innan úr með matskeið. Skiljið aðeins eftir af því sem er næst roðinu eftir (ljósfjólublátt að lit) en fjarlægið allt bleika kjötið sem varð eftir).
  
• Þið þurfið líklega tvö eldföst mót því roðið má ekki krumpast. Notið eldföst mót sem eru ekki spari því þau verða svolítið ljót.
  
• Hellið nokkrum dropum af sesamolíu í botninn á eldföstu mótunum og dreifið úr með fingrunum (gott að nota einnota hanska).
  
• Skerið roðið í tvennt og leggið bútana (hreistrið niður) í eldföstu mótin þannig að þau séu ekkert krumpuð.
  
• Hellið tæpri hálfri matskeið af sesamolíu yfir báða bútana.
  
• Hellið fiskisósunni yfir roðið.
  
• Hellið tamarisósunni yfir roðið.
  
• Dreifið úr þessu öllu með fingrunum og nuddið létt inn í roðið.
  
• Hellið sesamfræjunum yfir ef þau eru notuð.
  
• Setjið eldföstu mótin inn í ofn (gott að setja álpappír ofan á þau).
  
• Galdurinn er að grilla roðið rétt þannig að það verði ekki brennt og ekki of mjúkt.
  
• Grillið roðið í um 25 mínútur en kíkið á roðið eftir fyrstu 20 mínúturnar og fylgist með því á 5 mínútna fresti eftir það. Stundum þarf meiri tíma og stundum minni.
  
• Roðið á ekki að vera mjög blautt að ofan og á að virka eins og það sé orðið stíft án þess að það sé brunnið. Mikilvægt er að brenna ekki roðið.
  
• Þegar roðið er tilbúið á að vera hægt að taka það upp úr eldfasta mótinu og halda því lóðréttu án þess að það sígi niður. Ástæðan fyrir því að það á að vera svona stíft er að þið komið til með að brjóta roðið í bita.
  
• Slökkvið á ofninum og látið roðið kólna alveg inni í ofninum.
  
• Brjótið roðið í bita og berið fram í litlum skálum (maður borðar ekki mikið í einu) eða dreifið yfir salat, út á núðlurétti o.s.frv.
  
• Grillað roð geymist í ísskáp í nokkra daga.
  
  
• Nota má sojasósu í stað tamarisósu. Athugið að sojasósa inniheldur hveiti (og því ekki góð fyrir þá sem hafa glúteinóþol).
  
• Reynið að finna lífrænt framleidda fiskisósu, þær fást stundum í heilsubúðum. Ég hef stundum sleppt því að nota fiskisósuna og nota þá í staðinn 2 msk af tamarisósu til viðbótar sem ég hræri í 1 tsk agavesíróp.
  
• Frysta má roðið ógrillað (hreint þ.e. beint af laxinum) og grilla það svo síðar.

Prenta þessa uppskrift     -     Senda þessa uppskrift

Heitið á uppskriftinni ætti eiginlega að vera "Grjónagrauturinn hans Jóhannesar..en mín uppskrift er samt betri". Málið er að Jóhannes kunni að elda grjónagraut þegar við byrjuðum að búa (en ég ekki því ég kunni ekki einu sinni að sjóða pasta) og þetta var eitt af því sem ég bað hann um að elda. Við skiptumst algjörlega í tvennt með blessaða grjónagrautinn. Grjónagrautur eru eins og trúarbrögð. Ég vil ALLS ekki hafa rúsínur í hafragraut, finnst það ekkert gott en Jóhannes var alinn upp við það og stendur gallharður á sínu. Ég vil hafa mjólkina vel fljótandi yfir og ég vil að mjólkin sé sjóðandi heit. Hann vill hafa grautinn hnausþykkan og svo setur hann kalda mjólk út á. Það er gjörsamlega allt rangt við hans útgáfu af grjónagraut. Þetta er eiginlega það eina sem við rífumst um..nokkurn tímann. Við rífumst aldrei en við getum röflað um grjónagraut út í eitt. Jóhannes er með uppskriftina sína alltaf á hreinu því hann eldaði svo oft grjónagraut heima hjá sér og ég verð að viðurkenna að það er fátt betra en heitur grjónagrautur á köldum vetrardegi (mín útgáfa auðvitað), það er BARA best. Það endar alltaf á því að við þurfum að sjóða grautinn í 2 pottum en þetta hefst allt að lokum og við brosum bæði út að eyrum með skál af rjúkandi grjónagraut í tveimur útgáfum. Ég nota brún hrísgrjón fyrir hollari útgáfu af grjónagraut (annars eru yfirleitt notuð hvít í grjónagraut) og það má auðvitað nota hýðishrísgrjón líka en þau eru jú aðeins grófari og þurfa lengri suðu.
 
Grjónagrautur
Fyrir 2

• 1 bolli brún, löng grjón
  
• 1 bolli vatn
  
• 1/2 tsk heilsusalt (Herbamare)
  
• 3 bollar mjólk (léttmjólk eða nýmjólk. Þeir sem hafa mjólkurofnæmi geta notað hrísmjólk)
  
• 2 lúkur rúsínur (ég nota þær aldrei eins og áður hefur komið fram. Amen)
  
• 1 tsk rapadura hrásykr
  
• 1/2-1 tsk kanill
  
  Aðferð:
  
• Hellið grjónunum í pott.
  
• Hellið vatninu yfir og saltið.
  
• Hafið lokið á pottinum.
  
• Látið sjóða þangað til allt vatn er gufað upp (í um 20 mínútur).
  
• Hellið mjólkinni út í og látið malla með lokinu á í um 40 mínútur eða þangað til grauturinn hefur þykknað mikið.
  
• Hér eru rúsínurnar settar út í (fyrir þá sem eru kreisí og nota rúsínur í grjónagraut) og þær mýktar í svona 5 mínútur.
  
• Setjið aðeins meiri mjólk og svo fer eftir því hvað þið viljið hafa grautinn þykkan hversu lengi þið látið hann malla. Mér finnst best að hafa vel fljótandi af heitri mjólk yfir grautinn en það er smekksatriði. Ég helli sem sagt um 1 dl af mjólk yfir grautinn rétt áður en hann er borinn fram og læt nánast sjóða en Jóhannes vill hann hnausþykkann og hann setur kalda mjólk út á (það er ekki hægt að breyta karlmönnum með sumt...það er alveg víst).
  
• Blandið hrásykrinum og kanilnum saman og setjið út á ef þið viljið.
  
  
  

Prenta þessa uppskrift     -     Senda þessa uppskrift

Bragðgóð, ódýr og góð máltíð, mitt á milli súpu og grænmetis með sósu. Maður getur notað alls kyns grænmeti sem maður á ísskápnum (upplagt með haustinu þegar við erum að pota upp okkar eigin grænmeti) og svo getur maður notað núðlur til að drýgja matinn eða soðið hýðishrísgrjón/bygg með. Ég kaupi alltaf lífrænt framleitt grænt karrímauk úr heilsudeildum matvörubúða (eða úr heilsubúð). Maður getur gert sitt eigið sjálfur en svona getur maður sparað sér tíma. Þessi lífrænt framleiddu eru líka bara ansi bragðgóð. Athugið að karrímauk getur innihaldið rækjumauk og ef þið eruð jurtaætur (vegan) mynduð þið þurfa að velja karrímauk án rækjumauks. Athugið að magn karrímauks í uppskriftinni fer eftir styrkleika þess, prófið ykkur bara áfram.
 
Grænmeti í grænu karrímauki og kókossósu
Fyrir 2-3

• 1 sæt kartafla, afhýdd og söxuð í meðalstóra bita
  
• 1 laukur, saxaður frekar smátt
  
• 1/2 rauð paprika, sneidd í grófa strimla
  
• 4 portabello sveppir, saxaðir í meðalstóra bita
  
• 6 þurrkuð kaffir lime blöð (má sleppa)
  
• 400 ml kókosmjólk
  
• 250 ml vatn
  
• 1 gerlaus grænmetisteningur
  
• 2-5 msk grænt karrímauk. Magn fer eftir styrkleika karrísins sem og smekk ykkar
  
• 2 tsk agavesíróp
  
• 1 tsk kókosfeiti
  
• 2 msk límónusafi
  
• Rifinn börkur af einni límónu
  
  Aðferð:
  
• Hitið kókosfeitina í stórum potti.
  
• Bætið lauknum saman við ásamt karrímaukinu. Byrjið á 2 msk því sum karrímauk eru mjög sterk.
  
• Bætið vatninu ásamt grænmetisteningnum út í.
  
• Bætið sveppunum og paprikunni við og hitið í 5 mínútur eða þangað til grænmetið fer að linast.
  
• Hrærið vel í þessu til að grænmetisteningurinn leysist upp.
  
• Hellið kókosmjólkinni út í og lækkið hitann. Látið malla í 5 mínútur.
  
• Bætið lime blöðunum út í ásamt sætu kartöflunni, látið malla í 10 mínútur eða þangað til kartöflubitarnir eru orðnir mjúkir.
  
• Bætið agavesírópinu, límónusafanum og berkinum út í.
  
• Smakkið til með meira karrímauki.
  
• Hitið vel og berið fram.
  
• Berið fram með hýðishrísgrjónum eða byggi.
  
  
• Einnig er gott að sjóða t.d. hrísgrjóna- eða sobanúðlur (úr bókhveiti) og setja út í.
• Setjið þær þá út í allra síðast, rétt áður en maturinn er borinn fram.
  
• Í staðinn fyrir portabello sveppi má nota aðra stóra sveppi.
  
• Í staðinn fyrir sveppi má nota eggaldin (enska: eggplant).
  
• Ef afgangur er af kókosmjólkinni má frysta hana í ísmolabox og nota síðar, t.d. í svona súpur.

Prenta þessa uppskrift     -     Senda þessa uppskrift

Þessi er upplögð fyrir þá sem eru með glúteinóþol því í bökunni er ekki þessi hefðbundni hveitibotn. Hins vegar skyldu þeir sem hafa fordóma gegn glúteinleysi ekki stoppa hér því bakan er hin besta. Hún er pakkfull af vítamínum og próteinum og hollri fitu og meðal annars er mikið af omega 3 fitusýrum. Alveg upplögð til að sporna gegn hjartasjúkdómum. Með því að bæta t.d. agavesírópi í botninn mætti útbúa berjaböku eða eitthvað annað sniðugt því botninn er þéttur og góður. Bakan virkar kannski flókin en er það alls ekki, það er meira dútl við hana heldur en að maður þurfi að vera einhver snillingur í eldhúsinu til að búa hana til. Bökuna er þó best að gera t.d. á laugardagskvöldi nema ef maður er búinn að skera allt og undirbúa áður. Það má að sjálfsögðu nota hefðbundinn speltbotn í bökuna ef maður kýs það frekar.
 
Grænmetisbaka með hnetu- og fræbotni
Fyrir 4-6

Botn

• 3/4 bolli sólblómafræ
  
• 3/4 bolli valhnetur (eða pecanhnetur
  
• 2 msk sesamfræ
  
• 2 msk hörfræ (lögð í bleyti í 10 mínútur í 1/4 bolla af vatni)
  
• Smá heilsusalt (Herbamare)
  
  Fylling
  
• 4 bollar saxað savoy kál eða spínat (savoy kál fæst t.d. í hagkaupum). Ef savoy kál er notað þarf að sjóða það í nokkrar mínútur til að fá sætara bragð.
  
• 2 bollar niðursneiddir, ferskir sveppir
  
• 1 lítill laukur, saxaður fínt
  
• 3 meðalstórir hvítlauksgeirar, maukaðir
  
• 1 tsk ítölsk kryddblanda t.d. frá Pottagöldrum
  
• 1 tsk chilliduft (má sleppa)
  
• 1/2 gerlaus grænmetiskraftur t.d. frá Rapunzel (ekkert vatn, aðeins krafturinn)
  
• 1 lítill tómatur, saxaður, fræin hreinsuð úr
  
• 140 gr mjúkt tofu
  
• 5 eggjahvítur
  
• 1/8 tsk turmeric
  
• Heilsusalt (Herbamare) og svartur pipar
  
• 1 tsk kókosfeiti og vatn ef þarf meiri vökva
  
• 1 bolli rifinn, magur ostur
  
  Aðferð:
  
• Forhitið ofninn í 180°C.
  
• Blandið saman salti, valhnetum, sesamfræjum og sólblómafræjum í matvinnsluvél. Blandið þangað til allt er orðið fínmalað.
  
• Bætið hörfræjunum, ásamt vatninu saman við og malið áfram eða þangað til blandan verður eins og deig.
  
• Klæðið 22 cm. bökuform með bökunarpappír.
  
• Pressið deigið ofan í formið, vel utan í alla kanta og jafnt upp kantana svo að botninn verði alls staðar jafnþykkur.
  
• Bakið í 20 mínútur.
  
• Á meðan botninn er í ofninum skuluð þið steikja hvítlaukinn og laukinn í smá kókosfeiti á stórri pönnu. Steikið þangað til laukurinn fer að linast.
  
• Bætið grænmetiskraftinum út í og hrærið vel.
  
• Bætið sveppunum saman við og steikið þá þangað til þeir eru orðnir mjúkir. Bætið vatni við ef þarf meiri vökva.
  
• Bætið söxuðu tómötunum út í.
  
• Bætið savoy kálinu (hellið vatninu af) eða spínatinu saman við grænmetið á pönnunni.
  
• Blandið saman eggjahvítum, tofu, 1/2 bolla af rifnum osti og kryddi í matvinnsluvél og malið í nokkrar sekúndur. Saltið og piprið að smekk.
  
• Takið botninn út.
  
• Setjið grænmetið ofan á botninn.
  
• Hellið svo tofublöndunniyfir grænmetið. Gott er að ýta með gaffli ofan í grænmetið svo tofublandan smjúgi vel ofan í öll göt. Þannig verður bakan þéttari.
  
• Dreifið afgangnum af ostinum yfir.
  
• Bakið í 25 mínútur eða þangað til osturinn er farinn að bráðna vel.
  
• Látið bökuna kólna og fjarlægið svo bökunarpappírinn varlega.
  
  
• Bökuna má frysta og það er upplagt að skera hana í sneiðar, frysta og hita svo upp eða taka með kalda í nesti því hún er nánast jafn góð köld.
  

Prenta þessa uppskrift     -     Senda þessa uppskrift