Tómatsúpa frá Zanzibar

Þessi súpa er mjög einföld og æðislega góð (auk þess að hún er að springa úr vítamínum og andoxunarefnum!). Upprunaleg uppskrift kemur úr bók sem heitir Swahili Kitchen (sem Jóhannes gaf mér þegar hann kom frá Afríku eftir prílið á Mt. Kenya 2006) en ég bætti hvítlauk og kartöflum í uppskriftina. Best er að grilla tómatana og helminginn af lauknum í ofninum og þeir verða algert nammi þannig. Athugið að það tekur um 40-50 mínútur að grilla grænmetið svo gefið ykkur góðan tíma. Súpan sjálf hentar vel fyrir þá sem hafa glúteinóþol, eggjaóþol, hnetuóþol og mjólkuróþol.

Athugið að best er að nota matvinnsluvél, blandara eða töfrasprota til að mauka súpuna.


Afrísk tómatsúpa, holl og góð.

Þessi uppskrift er:

  • Án glúteins
  • Án eggja
  • Án hneta

Tómatsúpa frá Zanzibar

Fyrir 3-4 sem forréttur

Innihald

  • 500 g tómatar, vel þroskaðir
  • 4 laukar, saxaðir smátt
  • 2 hvítlauksrif, söxuð smátt
  • 1 msk kókosolía
  • 160 g kartöflur
  • 2 msk tómatmauk (puree)
  • 500 ml vatn
  • 1 gerlaus grænmetisteningur
  • 1 tsk basil
  • Smá klípa svartur pipar
  • Salt (Himalaya eða sjávarsalt)

 

Aðferð

  1. Setjið tómatana í skál, hellið sjóðandi heitu vatni yfir þá og látið standa í skál í 1-2 mínútur.
  2. Látið tómatana kólna aðeins og afhýðið þá strax með beittum hnífi.
  3. Skerið tómatana í báta og setjið í eldfast mót (setjið svolitla kókosolíu í eldhúspappír og strjúkið yfir eldfasta mótið).
  4. Afhýðið laukana fjóra, skerið tvo af laukunum í báta og raðið í eldfasta mótið.
  5. Hitið ofarlega í ofninum við 220°C í um 40-50 mínútur eða þangað til brúnirnar á tómötunum og laukunum eru orðnar dökkar og jafnvel svartar.
  6. Afhýðið hvítlaukina og saxið ásamt hinum laukunum tveimur.
  7. Saxið hina laukana tvo ásamt hvítlauknum. Saxið frekar gróft.
  8. Hitið kókosolíu í potti og steikið hvítlaukinn og laukinn þangað til laukurinn verður mjúkur.
  9. Afhýðið kartöflurnar og skerið í grófa bita. Setjið út í pottinn ásamt basil, tómatmaukinu, vatninu og grænmetisteningunum. Látið kartöflurnar sjóða í um 20 mínútur.
  10. Kælið súpuna aðeins. Setjið hana í smá skömmtum í matvinnsluvél eða notið töfrasprota. Maukið í um 20 sekúndur eða þangað til súpan er orðin silkimjúk.
  11. Takið nú eldfasta mótið úr ofninum, kælið aðeins og setjið grænmetið líka í matvinnsluvélina
  12. Maukið meira ef þið viljið hafa súpuna vel blandaða en minna ef þið viljið hafa bita í henni.
  13. Smakkið til með salti og pipar.

 

Gott að hafa í huga

  • Berið fram með snittubrauði og soðnum eggjum. Soðin egg eru alveg fáránlega góð með tómatsúpum.
  • Súpan sjálf er frábær grunnur fyrir góða grænmetissúpu. Ef þið viljið hafa meira grænmeti í henni (t.d. blaðlauk, gulrætur, sveppi, papriku o.s.frv.) léttsteikið þá grænmetið og látið malla í súpunni þangað til grænmetið er orðið mjúkt.
  • Ef kókosolían er hörð má stinga krukkunni í heitt vatn í nokkrar mínútur þar til hún verður fljótandi.
  • Gerlausir grænmetisteningar fást í heilsubúðum og stærri matvöruverslunum.
  • Ef þið eruð ekki viðkvæm fyrir geri getið þið notað venjulega, lífrænt framleidda grænmetisteninga.

Ummæli um uppskriftina

Margrét
05. jan. 2011

Margar uppskriftir hérna sem ég þarf að prófa. Ætla að fara eftir ráðlegginunum sem þú gafst mér í haust um að breyta matarræðinu hjá mér og strákunum hægt og hljóðlega, sérstaklega með brauðið. Er einhver sérstök brauðuppskrift sem þú myndir mæla með þegar maður er að reyna að venja sig af hvítu brauði?

sigrun
05. jan. 2011

Sæl Margrét, mér líst vel á þig :)

Prófaðu þessa uppskrift að Kókosbrauðbollunum (krökkum líkar hún yfirleitt vel). Þú getur prófað að nota fyrst fínt spelti á móti hvítu hveiti eða svolitlu heilhveiti og svo smátt og smátt breytt hlutföllunum yfir í grófara hveiti (og/eða spelti). Gerðu þetta á löngum tíma (jafnvel mánuðum) og þá munu krakkarnir ekkert taka eftir breytingunum. Minnkaðu kannski aðeins hlutfallið af kókosnum fyrst ef þú heldur að krakkarnir þínir muni fúlsa við því en flestum börnum finnst bollurnar mjög góðar :) Gangi þér vel!

Kv.

Sigrún

Ragnheiður
11. okt. 2011

Ég prófaði þessa súpu nú á fallegu haustkvöldi í Reykjavík. Hún bragðaðist afar vel og fór vel í maga. Ómissandi að setja soðin egg útí:-) Ætla að prófa fleiri af þeim spennandi súpuuppskriftum sem hér er að finna nú í vetur. Kem þá einhverju grænmeti ofaní "kallinn", sem vill helst ekki sjá neitt ferskt grænmeti á matardisknum sínum (nokkuð sem ég get ekki skilið...) En hann borðaði 2 sneisafullar skálar af súpunni góðu í kvöld:-) Takk f. mig.

sigrun
12. okt. 2011

Gaman að heyra Ragnheiður...sérstaklega með "kallinn" :)

Anna.Margret.Gunnars
16. nóv. 2011

Hæ Sigrún!

Er í lagi að frysta þessa súpu og hita upp seinna? (fyrir prófatíðina í desember) :-)

Bestu kv.

Anna

sigrun
16. nóv. 2011

Jú heldur betur. Það má frysta allar súpurnar mínar fyrir utan þær sem innihalda pasta eða núðlur :) Sjóddu eggin eftir að þú ert búin að taka súpuna úr frystinum (ekki frysta þær með súpunni) :)

Anna.Margret.Gunnars
17. nóv. 2011

Frábært! Takk kærlega!!

Ingibjörgl
28. mar. 2012

Var að elda þessa, breytti pínu. Grillaði hvítlaukinn áður en hann fór í pottinn og sett grænmetisafa á móti vatninu. Æðisleg súpa sem verður pottþétt gerð aftur. Takk fyrir mig :o)

sigrun
28. mar. 2012

Frábært að heyra :) Verði þér að góðu :)

Skrifa ný ummæli

Vinsamlegast athugið að reiti merkta með * þarf að fylla út.
 
Innihald þessa svæðis verður ekki sýnilegt almenningi.
Þessi spurning hér að neðan er til að varna því að spamvélar geti sett inn sjálfvirkar færslur.
Vinsamlegast leggðu saman tölurnar og skrifaðu niðurstöðurnar. T.d. fyrir einn plús þrír, skaltu skrifa 4.
sjö plús sjö eru