Tofu- og kjúklingabaunabuff

Þetta eru hollir og léttir grænmetisborgarar. Ég steiki aldrei, aldrei grænmetisborrgara heldur baka ég þau í ofni. Mér finnst heldur ólystugt að borða mat sem er löðrandi í óþarfa fitu. Borgarar og buff eru alveg frábær bökuð í ofni. Mér finnst alveg frábært að setja nokkur svona buff í nestisboxið og ég hef líka tekið þau með mér í útilegur og göngur og hitað upp á grilli.

Auðvelt er að gera þessi buff mjólkurlaus og hnetulaus. Sleppa má hnetunum og nota má sojaost í staðinn fyrir venjulegan ost. Það eru engin egg og ekkert hveiti í þessari uppskrift svo hún hentar vel þeim sem hafa glútein- og eggjaóþol.

Athugið að þið þurfið matvinnsluvél eða blandara til að mala hneturnar (en þið getið líka sett þær í poka og lamið þær með hamri).

Þessi uppskrift er:

  • Án glúteins
  • Án eggja

Þessa uppskrift er auðvelt að gera:

  • Án mjólkur
  • Vegan (fyrir jurtaætur)

Tofu- og kjúklingabaunabuff

Fyrir 2-3

Innihald

  • 2 stórar kartöflur, soðnar, skrældar og stappaðar
  • 50 g hnetur, malaðar fínt (t.d cashewhnetur)
  • 1 hvítlauksrif, afhýtt og saxað smátt
  • 10 sólþurrkaðir tómatar (án olíu), saxaðir smátt
  • 3 msk graslaukur, saxaður smátt (má sleppa)
  • 250 g stíft tofu, þerrað með þurrku
  • 1 msk kókosolía
  • 200 g kjúklingabaunir í dós
  • 100 g magur ostur, rifinn
  • 0,5 tsk turmeric
  • 0,5 tsk cumin (ekki kúmen)
  • Smá klípa cayenne pipar
  • 1 tsk salt (Himalaya eða sjávarsalt). Notið aðeins smá klípu ef kjúklingabaunirnar eru með viðbættu salti)

Aðferð

  1. Sjóðið kartöflurnar þangað til þær eru orðnar mjúkar. Kælið, skrælið og stappið.
  2. Setjið hneturnar í matvinnsluvél og látið vélina ganga í um 5-10 sekúndur eða þangað til hneturnar eru orðnar fínt malaðar.
  3. Látið vatnið renna af kjúklingabaununum setjið baunirnar í matvinnsluvélina og maukið í um 5 sekúndur.
  4. Afhýðið hvítlauk og saxið mjög smátt.
  5. Saxið sólþurrkuðu tómatana og graslaukinn smátt.
  6. Hellið vatninu af tofuinu og þerrið með eldhúsþurrku. Myljið gróft.
  7. Rífið ostinn á rifjárni.
  8. Setjið ofangreint hráefni í stóra skál og setjið kókosolíu, turmeric, cumin, cayenne pipar og salt saman við. Hrærið mjög vel.
  9. Skiptið blöndunni í um 15 hluta. Mótið buff í höndunum (um 1 sm á þykkt). 
  10. Setjið bökunarpappír á bökunarplötu og raðið buffunum á plötuna.
  11. Bakið við 180°C í um 20 mínútur. Snúið við og bakið áfram í um 10 mínútur.

Gott að hafa í huga

  • Ef þið viljið hafa borgarana stökkari, þá skulið þið baka þá í lengri tíma á hvorri hlið.
  • Gott er að bera fram sinnepssósu með borgurunum eða hvítlauksjógúrtsósu.
  • Ef kókosolían er hörð má stinga krukkunni í heitt vatn í nokkrar mínútur þar til hún verður fljótandi.
  • Nota má aðra olíu en kókosolíu, t.d. vínberjakjarnaolíu eða repjuolíu.
  • Nota má sojaost í staðinn fyrir venjulegan ost.
  • Ef þið finnið aðeins sólþurrkaða tómata í olíu má annað hvort þerra olíuna með eldhúsþurrku en einnig hef ég notað þessa aðferð: Setjið sólþurrkuðu tómatana í sigti og hellið sjóðandi heitu vatni yfir þá (um 500 ml eða svo). Þerrið með eldhúsþurrku.

Ummæli um uppskriftina

Engin ummæli hafa verið rituð

Skrifa ný ummæli

Vinsamlegast athugið að reiti merkta með * þarf að fylla út.
 
Innihald þessa svæðis verður ekki sýnilegt almenningi.
Þessi spurning hér að neðan er til að varna því að spamvélar geti sett inn sjálfvirkar færslur.
Vinsamlegast leggðu saman tölurnar og skrifaðu niðurstöðurnar. T.d. fyrir einn plús þrír, skaltu skrifa 4.
níu plús einn eru