Sveppasúpa

Þetta er bara svona hefðbundin sveppasúpa, ekkert flókin en alveg rosalega góð og einn ódýrasti matur sem fyrir finnst held ég. Ég veit að það eru nokkrir notendur CafeSigrun sem nota þessa súpu á jólunum. Það eru góð meðmæli og gleður mig mikið! Súpan er án glúteins og auðvelt er að gera súpuna mjólkurlausa.


Sveppasúpan fína, ódýr og góður matur

Þessi uppskrift er:

  • Án glúteins
  • Án eggja
  • Án hneta

Þessa uppskrift er auðvelt að gera:

  • Án mjólkur
  • Vegan (fyrir jurtaætur)

Sveppasúpa

Fyrir 2-3

Innihald

  • 2 litlir laukar, saxaðir mjög smátt
  • 1 msk kókosolía
  • 250 g sveppir, saxaðir
  • 25 stk þurrkaðir sveppir (blandaðir)
  • 1 lítri vatn
  • 2 gerlausir grænmetisteningar
  • 50 ml matreiðslurjómi
  • 100 ml léttmjólk
  • 2 msk kartöflumjöl (eða spelti)
  • 0,25 tsk múskat
  • Salt (Himalaya eða sjávarsalt)
  • Fullt af svörtum pipar

Aðferð

  1. Afhýðið laukinn og saxið smátt.
  2. Saxið sveppina smátt (þá venjulegu, ekki þá þurrkuðu).
  3. Hitið kókosolíu í potti og steikið svepppina og laukinn þangað til laukurinn fer að mýkjast. Notið vatn ef vantar meiri vökva.
  4. Stráið kartöflumjölinu yfir og hrærið vel í.
  5. Skolið þurrkuðu sveppina upp úr köldu vatni. Setjið þá svo í skál og hellið 200 ml af sjóðandi vatni yfir þá. Látið standa í 20 mínútur.
  6. Setjið grænmetisteningana og afganginn af vatninu (800 ml) út í pottinn og látið malla við lágan hita í um 20 mínútur.
  7. Hellið þurrkuðu sveppnum og vatninu af þeim út í súpuna.
  8. Bætið að lokum matreiðslurjóma, léttmjólk og múskati út í.
  9. Hitið vel án þess að sjóða.
  10. Bragðið súpuna til með salti og pipar.

Gott að hafa í huga

  • Við áttum smá súpu í afgang einhvern tímann og ég bætti soðnum hrísgrjónum og frosnum, grænum baunum útí. Það var bara hin prýðilegasta súpa og örugglega allt í lagi að bæta t.d. blómkáli, spergilkáli, gulrótum, pasta og fleiru út í. Upplagt til að drýgja grænmetisafgangana í ísskápnum!!
  • Það er einnig mjög gott að nota maískorn til helminga við sveppina.
  • Berið súpuna fram með grófu snittubrauði.
  • Ef kókosolían er hörð má stinga krukkunni í heitt vatn í nokkrar mínútur þar til hún verður fljótandi.
  • Nota má aðra olíu en kókosolíu, t.d. vínberjakjarnaolíu eða repjuolíu.
  • Gerlausir grænmetisteningar fást í heilsubúðum og stærri matvöruverslunum.
  • Ef þið eruð ekki viðkvæm fyrir geri getið þið notað venjulega, lífrænt framleidda grænmetisteninga.
  • Nota má hrísmjólk, möndlumjólk, sojamjólk eða haframjólk í staðinn fyrir lettmjólk.
  • Nota má hafrarjóma eða sojarjóma í staðinn fyrir matreiðslurjóma. Einnig má nota kókosmjólk.

Ummæli um uppskriftina

ingibjorgd
23. jan. 2011

Þessi súpa er alveg himnesk :) Ég átti að vísu ekki rjóma þannig að ég sleppti honum og notaði mjólk í staðinn... en það virtist ekki koma að sök því súpan var einstaklega ljúffeng og í alla staði dásamleg :)

sigrun
23. jan. 2011

Gaman að heyra Ingibjörg og takk fyrir að deila með okkur :)

Þurý
30. jan. 2014

Frábær súpa. Ég á eftir að gera hana aftur, umm

sigrun
30. jan. 2014

Æðislegt Þurý, gaman að heyra :)

Skrifa ný ummæli

Vinsamlegast athugið að reiti merkta með * þarf að fylla út.
 
Innihald þessa svæðis verður ekki sýnilegt almenningi.
Þessi spurning hér að neðan er til að varna því að spamvélar geti sett inn sjálfvirkar færslur.
Vinsamlegast leggðu saman tölurnar og skrifaðu niðurstöðurnar. T.d. fyrir einn plús þrír, skaltu skrifa 4.
tveir plús sex eru