Súkkulaðimuffins

Hollir og góðir, einfaldir og þægilegir, alltaf góð blanda. Upplagt er að frysta helling af muffinsunum og taka svo með sér þegar maður er á hlaupum!!!! Ég geri þessa muffinsa gjarnan að vetri til og oft þegar ég finn að ég er orðin óvenju þreytt. Járnið í kakóinu/súkkulaðinu hressir mig alltaf við og ekki síst ef ég drekk appelsínusafa með. Það er að minnsta kosti góð afsökun fyrir því að raða súkkulaðimuffinsum í sig!

Athugið að í dökku súkkulaði getur verið mjólk svo lesið vel á umbúðir ef þið hafið mjólkuróþol.

Þessi uppskrift er:

  • Án hneta

Þessa uppskrift er auðvelt að gera:

  • Án mjólkur

Súkkulaðimuffins

Gerir 8-10 stóra muffinsa

Innihald

  • 70 g dökkt, lífrænt framleitt súkkulaði, með hrásykri, saxað smátt
  • 125 g spelti
  • 25 g kakó
  • 2 tsk vínsteinslyftiduft
  • 0,5 tsk salt (Himalaya eða sjávarsalt)
  • 1 egg
  • 80 g rapadura sykur (eða annar hrásykur)
  • 200 ml hrein sojajógúrt (eða venjuleg jógúrt)
  • 2 msk agavesíróp
  • 50 ml sojamjólk (eða önnur mjólk), ef þarf
  • 1 msk kókosolía
  • 1 tsk vanilludropar úr heilsubúð

Aðferð

  1. Saxið súkkulaðið smátt.
  2. Sigtið saman í stóra skál; spelti kakó, lyftiduft og salt. Hrærið vel.
  3. Í annarri skál skuluð þið blanda saman rapadura hrásykri, jógúrti, vanilludropum, agavesírópi, kókosolíu og eggi. Hrærið vel og hellið út í stóru skálina. Hrærið afar varlega (bara um 7-8 hreyfingar). Deigið á að vera það blautt að það leki af sleif í stórum kekkjum en ekki t.d. það þurrt að hægt sé að hnoða það. Ef deigið er of þurrt bætið þá sojamjólkinni saman við.
  4. Bætið súkkulaðinu út í og hrærið varlega (2-3 hreyfingar).
  5. Takið til silicon muffinsform. Setjið nokkra dropa af kókosolíu í eldhúsþurrku og strjúkið holurnar að innan.
  6. Fyllið hverja holu nánast upp að rönd með deigi. Gott er að nota ískúluskeið.
  7. Bakið við 180°C í um 20-25 mínútur.

Gott að hafa í huga

  • Ef maður notar ekki olíu eða smjör í deigið þá getur maður hvorki notað venjuleg muffins pappírsform, né muffinsbökunarplötu úr járni. Það fást sem sé ekki muffins pappírsform sem maður getur bakað í án þess að þurfa að nota smjör eða olíu í deigið. Það sem þið getið gert er að sníða hringi úr bökunarpappír. Strikið með penna utan um undirskál og klippið út. Setjið svo í hverja muffinsholu. Það er hægt að nota muffinspappírinn í allt að sex skipti. Ef þið notið silicon muffinsform þurfið þið ekki bökunarpappír.
  • Nota má undanrennu, hrísmjólk, haframjólk eða möndlumjólk í staðinn fyrir sojamjólk.
  • Ef kókosolían er hörð má stinga krukkunni í heitt vatn í nokkrar mínútur þar til hún verður fljótandi.
  • Nota má hreint hlynsíróp (enska: maple syrup) í staðinn fyrir agevesíróp.
  • Notið hamingjuegg ef þið mögulega getið.
  • Gott er að setja svolítið af söxuðum valhnetum út í deigið.
  • Nota má carob í stað súkkulaðis og kakós. Carob hentar þeim sem eru viðkvæmir fyrir örvandi efnum kakósins og hentar því börnum vel. Carob fæst í heilsubúðum og heilsuhillum matvöruverslana. Það fæst bæði sem duft (eins og kakó) og í plötum (eins og súkkulaði).
  • Athugið að dökkt súkkulaði inniheldur yfirleitt mjólk, lesið ávallt innihaldslýsingu ef þið eruð með óþol/ofnæmi. Hægt er að nota mjólkurlaust súkkulaði í staðinn.

Ummæli um uppskriftina

Engin ummæli hafa verið rituð

Skrifa ný ummæli

Vinsamlegast athugið að reiti merkta með * þarf að fylla út.
 
Innihald þessa svæðis verður ekki sýnilegt almenningi.
Þessi spurning hér að neðan er til að varna því að spamvélar geti sett inn sjálfvirkar færslur.
Vinsamlegast leggðu saman tölurnar og skrifaðu niðurstöðurnar. T.d. fyrir einn plús þrír, skaltu skrifa 4.
tveir plús sextán eru