Suðrænn fiskiréttur

Þetta er voða einföld, holl og góð uppskrift, fín svona í miðri viku þegar tímaleysið háir okkur einna mest. Fiskurinn og reyndar rétturinn allur er magur og ekki sakar að hann er líka próteinríkur og fullur af C vítamíni.

Þessi uppskrift er:

  • Án glúteins
  • Án eggja
  • Án hneta

Suðrænn fiskiréttur

Fyrir 2

Innihald

  • 1 bolli soðin hýðishrísgrjón eða bygg
  • 8 msk jógúrt ásamt 1 msk af maísmjöli (enska: corn flour en einnig má nota arrow root)
  • 3 tsk karrí
  • 200 ml ananassafi (eða hluti appelsínusafi)
  • 400 g hvítur fiskur (t.d. ýsa) roð- og beinhreinsaður
  • 10 sveppir, sneiddir þunnt
  • 150 g ananas úr dós, í bitum (án sykurs). Geymið safann
  • Hálf rauð paprika, sneidd frekar þunnt
  • 100 g magur ostur, rifinn
  • 0,5 tsk salt (Himalaya eða sjávarsalt)
  • 5 svartar ólífur, sneiddar (má sleppa)

Aðferð

  1. Sjóðið um 1 dl hýðishrísgrjón þannig að þið fáið um 1 bolla soðin grjón. Sjóðið samkvæmt leiðbeiningum á umbúðum og setjið svo til hliðar.
  2. Hrærið saman jógúrti, maísmjöli, karríi og ananassafa. Setjið til hliðar.
  3. Sneiðið sveppi og ólífur frekar þunnt.
  4. Bútið ananasinn ef hann er í heilum hringjum. Geymið safann.
  5. Skerið paprikuna langsum, fræhreinsið og skerið í frekar þunnar sneiðar.
  6. Rífið ostinn og skerið fiskinn í stóra bita.
  7. Setjið grjónin í botninn á eldföstu móti (óþarfi að smyrja mótið).
  8. Raðið sveppum og ananasbitum ofan á grjónin. Dreifið ólífusneiðunum yfir.
  9. Setjið fiskinn ofan á grænmetið og hellið sósunni yfir fiskinn.
  10. Raðið paprikusneiðunum ofan á fiskbitina og setjið rifna ostinn yfir allt saman. Saltið eftir smekk.
  11. Bakið við 175°C í um 25-30 mínútur eða þangað til fiskurinn er orðinn hvítur og svolítið laus í sér og osturinn bráðinn.

Gott að hafa í huga

  • Berið fram með salati og snittubrauði.
  • Í staðinn fyrir jógúrt má nota sojajógúrt eða sýrðan sojarjóma (eða venjulegan 5% sýrðan rjóma, án gelatíns, frá Mjólku).
  • Nota má annan fisk í réttinn, t.d. lúðu, steinbít, þorsk o.fl.

Ummæli um uppskriftina

gestur
27. mar. 2012

Þessi er mjög góður, hlutlaust bragð og fljólegur í matreiðslu. Mun pottþétt gera hann aftur :)

sigrun
27. mar. 2012

Gott að heyra :)

Skrifa ný ummæli

Vinsamlegast athugið að reiti merkta með * þarf að fylla út.
 
Innihald þessa svæðis verður ekki sýnilegt almenningi.
Þessi spurning hér að neðan er til að varna því að spamvélar geti sett inn sjálfvirkar færslur.
Vinsamlegast leggðu saman tölurnar og skrifaðu niðurstöðurnar. T.d. fyrir einn plús þrír, skaltu skrifa 4.
átján plús tveir eru