Snittubrauð

Einfalt, fljótlegt og hollt snittubrauð. Þó að snittubrauðið sé ekki eins létt og loftkennt og út úr búð þá er það auðvitað í staðinn mun hollara! Mig grunar þó að hinn venjulegi Frakki myndi skyrpa og bölva við að sjá uppskriftina. Ég nota snittubrauðið í svo margt eins og t.d. bruschetta, í grillaða tómatbrauðið og auðvitað með súpum og pottréttum. Snittubrauðið má frysta og ég geri gjarnan fleiri og styttri brauð í staðinn fyrir eitt langt. Ég segi það með sanni að ég hef hent þessu brauði saman á innan við 3 mínútum (löng saga ... redding í matarboði).


Þó ekki sé það franskt þá er snittubrauðið engu að síður gott

Þessi uppskrift er:

  • Án mjólkur
  • Án eggja
  • Án hneta
  • Vegan

Snittubrauð

Gerir eitt langt brauð

Innihald

  • 150 ml sojamjólk (eða önnur mjólk)
  • 1 msk sítrónusafi
  • 1 msk agavesíróp (eða acacia hunang)
  • 300 g spelti
  • 1 tsk Himalaya eða sjávarsalt
  • 3 tsk vínsteinslyftiduft
  • 50-100 ml vatn

Aðferð

  1. Blandið saman sojamjólk og sítrónusafanum. Látið standa á borðinu þangað til mjólkin fer að mynda kekki (í um 15 mínútur).
  2. Bætið agavesírópinu út í hrærið vel.
  3. Blandið saman í stóra skál; spelti, vínsteinslyftidufti og salti. Hrærið vel.
  4. Hellið sojamjólkurblöndunni varlega út í stóru skálina þangað til hægt er að hnoða deigið létt. Misjafnt er hversu mikinn vökva þarf og gætið þess að deigið verði ekki of blautt. Það má ekki klístrast of mikið við fingurna.
  5. Bætið vatni út í deigið ef það er of þurrt en bætið við spelti ef það er of blautt.
  6. Hnoðið deigið létt og búið til eina lengju (eða tvær styttri) úr brauðinu (aðeins mjórra en venjulegt snittubrauð því það þenst út við bakstur). Gætið þess að séu ekki sprungur í deiginu.
  7. Setjið bökunarpappír á bökunarplötu og færið deigið á pappírinn.
  8. Bakið við 180°C í um 25-30 mínútur.
  9. Látið brauðið kólna í 10 mínútur. Skerið svo í sneiðar og berið fram.

Gott að hafa í huga

  • Snittubrauðið er upplagt með súpum, pottréttum, baunakássum og mörgu öðru.
  • Gott er að dreifa sesamfræjum yfir brauðið áður en það fer inn í ofninn.
  • Í staðinn fyrir sojamjólk getið þið einnig notað haframjólk, hrísmjólk, möndlumjólk eða undanrennu.
  • Ef þið notið súrmjólk, AB mjólk eða jógúrt má sleppa sítrónusafanum.
  • Nota má hunang í staðinn fyrir agavesírópið.

Ummæli um uppskriftina

Lilja B.
05. jan. 2011

Hver er munurinn á grófmöluðu spelti og fínmöluðu?
Hvort notar þú í þessa uppskrift?

sigrun
05. jan. 2011

Sami munur og á grófu og fínu hveiti þ.e. grófleiki mjölsins og áferð. Ég nota grófmalað spelti í allar mínar uppskriftir nema annað sé tekið fram.

Kv.
Sigrún

gestur
22. apr. 2011

Þetta er frábært brauð, þú ert alveg að bjarga mér í 1000 skipti með að verða grænmetisæta :) og það gengur svo vel með þínum uppskriftum, takk kærlega fyrir þetta sigrún þú ert frábær :)

sigrun
22. apr. 2011

Gaman að heyra :)

tóta
13. ágú. 2011

Þetta eru uppáhalds hamborgarbrauðin okkar. Ommnommnomm.

Anna Jóna
06. nóv. 2011

Ég prófaði þetta brauð, sleppti sojamjólk (átti hana ekki til) og notaði vatn í staðinn. Svo setti ég grænar ólífur í brauðið (mjög smátt saxaðar). Áður en ég setti brauðið í ofninn smurði ég smá olíu ofan á og stráði sjávarsalti ofan á - það var sjúklega gott :) Algjört nammi - frábær vefur hjá þér Sigrún!

sigrun
06. nóv. 2011

Mér líst vel á þessa samsetningu hjá þér Anna Jóna, takk fyrir að deila með okkur :)

gestur
08. jan. 2013

Er hægt að baka þetta brauð sem venjulegt brauð (samlokubrauð) og er í lagi að nota heilhveiti í staðinn fyrir spelt?

sigrun
08. jan. 2013

Jú það ætti að vera hægt. Ég hef reyndar notað þessa hér uppskrift reyndar þegar ég geri samlokurbrauð: http://cafesigrun.com/braud-med-ollu-mogulegu-i (þú getur sleppt fræjunum ef þú vilt). Þú getur notað heilhveiti í allar uppskriftirnar mínar ef þú kýst það en athugaðu að vökvamagnið getur verið aðeins öðruvísi en það sem gefið er upp. Prófaðu þig bara áfram og passaðu að setja ekki of mikinn vökva (alltaf betra að setja minni vökva en meiri í byrjun, það má alltaf bæta við).

gestur
08. jan. 2013

Flott takk fyrir það. En hvernig veit ég að ég sé með rétt vökvamagn ef ég nota heilhveiti?

sigrun
09. jan. 2013

Byrjaðu með 100 ml af vökva og bættu svo 50 ml í einu eins og þarf. Deigið á að vera eins og í skrefi 4 í brauðuppskriftinni. Passaðu að hræra ekki mikið, bara velta deiginu til. Annars verður brauðið of hart.

Skrifa ný ummæli

Vinsamlegast athugið að reiti merkta með * þarf að fylla út.
 
Innihald þessa svæðis verður ekki sýnilegt almenningi.
Þessi spurning hér að neðan er til að varna því að spamvélar geti sett inn sjálfvirkar færslur.
Vinsamlegast leggðu saman tölurnar og skrifaðu niðurstöðurnar. T.d. fyrir einn plús þrír, skaltu skrifa 4.
níu plús einn eru