Skyr (kvarg) bollur

Kvarg (Quark) er fitulaus mjúkostur sem fæst t.d. í London. Hann fékkst eitt sinn á Íslandi en sölu hans var hætt, því miður enda er hráefnið eðalgott t.d. í bakaðar ostakökur. Eitt sinn sem oftar var ég á leið til Íslands frá London (flaug á tveggja ára tímabili, heim einu sinni í mánuði). Ég átti til svolítið af kvargi (var í London) og næstum hálfan lítra af jógúrti og ég vissi ekkert hvað ég átti að gera við það (ég tími aldrei að henda hráefni). Ég ákvað að prófa það bara í brauðbollur og kom bara nokkuð vel út. Kvargið er nokkuð beiskt/rammt svo það þarf að setja a.m.k. 1 msk af agavesírópi til að vinna á móti beiska bragðinu. Hægt er að nota skyr í stað kvargs.

Þessi uppskrift er:

  • Án eggja
  • Án hneta en með fræjum
  • Án hneta

Skyr (kvarg) bollur

Gerir 12-15 bollur

Innihald

  • 550 g spelti
  • 50 g hveitiklíð (má nota meira spelti í staðinn)
  • 2 tsk vínsteinslyftiduft
  • 1 tsk salt (Himalaya eða sjávarsalt)
  • 30 g haframjöl
  • 400 ml hrein jógúrt
  • 100 ml skyr (eða kvarg)
  • 1 mtsk agavesíróp
  • 200-300 ml vatn eða undanrenna eftir þörfum, deigið á að vera frekar blautt
  • 40 g „rúgflögur” (enska: rye flakes) eða haframjöl
  • 30 g sólblómafræ

Aðferð

  1. Hrærið saman í stóra skál; spelti, vínsteinslyftidufti, hveitiklíð, salti og haframjöli. 
  2. Þurristið rúgflögurnar á pönnu þangað til þær eru orðnar vel brúnar (1-2 mínútur). Bætið þeim í skálina.
  3. Hrærið saman agavesíróp, jógúrti, skyri og helmingnum af vatninu.
  4. Bætið vökvanum út í. Gætið þess að deigið verði ekki of blautt. Deigið á að vera þannig að það hægt sé að móta bollur með góðu móti án þess að hægt sé að hnoða það. Bætið meiri vatni í deigið ef þarf.
  5. Hrærið deigið gætilega (aðeins 8-10 sinnum), alls ekki má hræra deigið of mikið.
  6. Bætið sólblómafræjunum út í og hrærið nokkrum sinnum.
  7. Skiptið deiginu í 12 búta og mótið bollur. Einnig er gott að nota ískúluskeið.
  8. Setjið bökunarpappír á bökunarplötu.
  9. Búið til bollur úr deiginu og setjið á plötuna.
  10. Bakið við 180°C í 30-35 mínútur.

Gott að hafa í huga

  • Það má setja hvað sem er í þetta brauð, prófið t.d. gulrætur, sesamfræ, hörfræ, hirsi, birkifræ o.s.frv.
  • Til að þurrrista á pönnu er best að hita pönnu á fullum hita og rista flögurnar í 1-2 mínútur. Gott er að hrista pönnuna öðru hvoru.
  • Í staðinn fyrir venjulega jógúrt og skyr má nota gríska jógúrt.

Ummæli um uppskriftina

Engin ummæli hafa verið rituð

Skrifa ný ummæli

Vinsamlegast athugið að reiti merkta með * þarf að fylla út.
 
Innihald þessa svæðis verður ekki sýnilegt almenningi.
Þessi spurning hér að neðan er til að varna því að spamvélar geti sett inn sjálfvirkar færslur.
Vinsamlegast leggðu saman tölurnar og skrifaðu niðurstöðurnar. T.d. fyrir einn plús þrír, skaltu skrifa 4.
tveir plús sex eru