Sætar kartöflur bakaðar í ofni

Þetta er nú varla uppskrift því aðferðin er svo einföld að það er næstum því hlægilegt. Þessi uppskrift á líklega heimsmetið í fæstu innihaldsatriðum, það er aðeins eitt innihald...einungis sætar kartöflur. Nákvæmlega ekkert annað. Þetta meðlæti hef ég fengið hjá Smára bróður og Önnu Stínu konunni hans. Ég hafði notað sætar kartöflur í mat áður en aldrei prófað að baka þær beint í ofni eins og þau gera. Þetta er alveg sjúklega gott og maður endar oft á því að borða þessar kartöflur bara sem snakk, mjög erfitt að hætta. Þær eru svo sætar að það lekur stundum úr þeim eins konar síróp við baksturinn (enda er sterkjan stundum notuð sem náttúrulegt sætuefni). Sætar kartöflur eru brúnbleikar á lit, oft ílangar og er hægt að finna þær í grænmetisdeildum í flestum matvörubúðum. Kartöflurnar þarf ekki að skola né skræla bara skera þær í báta og inn í ofn. Vissuð þið að það er minna „sykurmagn” í sætri kartöflu en venjulegri kartöflu! Sætar kartöflur eru stútfullar af C vítamíni og trefjum og eru afar hollar.