Rúsínuhafrakökur

5. mars, 2003

Þessar smákökur eru svo, svo góðar og jólalegar og það kemur hreint út sagt yndisleg lykt í húsið þegar maður bakar þær. Smákökurnar eru líka nokkuð hollar miðað við smákökur og ég lauma oft nokkrum í nestisboxið í kringum jólatímann.

Senda uppskrift

Prenta uppskrift

Setja í uppskriftabox

Hollar smákökur fyrir jólin

1 ummæli

Þessi uppskrift er:

Án mjólkur
Án hneta

Rúsínuhafrakökur

Gerir um 40 kökur

Innihald

250 g rúsínur, saxaðar frekar smátt
150 g haframjöl
125 g spelti
1 msk kanill
0,5 tsk salt (Himalaya eða sjávarsalt)
2 tsk vínsteinslyftiduft
200 g rapadura hrásykur (eða annar hrásykur)
130 ml lífrænt framleiddur barnamatur án sykurs; epla-, peru-, eða aprikósumauk
3 egg
5 msk kókosolía
3-4 msk appelsínusafi (hreinn) ef þarf

Aðferð

Saxið rúsínurnar nokkuð smátt.
Sigtið saman í stóra skál: kanil, spelti, lyftiduft og salt. Hrærið haframjölinu saman við.
Í annarri skál skuluð þið hræra saman eggjum, rapadura hrásykri, kókosolíu og barnamat. Hrærið vel og hellið út í stóru skálina.
Hrærið varlega og bætið rúsínunum varlega út í. Bætið appelsínusafa út í ef deigið er of þurrt. Deigið á að vera þannig að það klístrist við skálina og sé of blautt til að hnoða það, samt ekki það blautt að það myndi leka af sleif.
Kælið deigið í um klukkustund.
Setjið bökunarpappír á bökunarplötu. Búið til kúlur með teskeið og setjið á plötuna. Hafið um 1 sm bil á milli.
Þrýstið létt ofan á hverja kúlu með gaffli (gott að bleyta hann á milli).
Bakið við 200°C í um 20 mínútur eða þangað til kökurnar eru orðnar gullbrúnar.

Gott að hafa í huga

Athugið að smákökurnar eru bestar nýbakaðar. Frystið þær smákökur sem þið borðið ekki samdægurs og hitið svo upp síðar. Þær verða eins og nýbakaðar.
Ef kókosolían er hörð má stinga krukkunni í heitt vatn í nokkrar mínútur þar til hún verður fljótandi.
Ég nota Hipp Organic, Organix eða Holle barnamat. Þessi merki eiga það sameiginlegt að vera lífrænt framleidd og eru ekki með viðbættum sykri.
Í staðinn fyrir barnamat má nota eplamauk (enska: Apple sauce) úr heilsubúð eða heilsudeildum matvöruverslana.
Ef afgangur er af barnamatnum má frysta hann í ísmolabox og nota í drykk síðar (smoothie).
Notið hamingjuegg ef þið mögulega getið.
Nota má saxaðar hnetur (t.d. valhnetur) í smákökurnar.
Nota má smátt saxaðar döðlur eða aprikósur í staðinn fyrir rúsínur (eða á móti þeim).