Pítusósa

Þessi létta pítusósa er nú tööööööluvert hollari en hefðbundin pítusósa sem er bara eitrað kransæðakítti. Þessi pítusósa passar vel með pítubrauði, sem ídýfa eða ofan á salat. Einnig passar sósan sérlega vel með grilluðum mat t.d. fiski sem og bökuðum kartöflum.

Þessi uppskrift er:

  • Án glúteins
  • Án hneta

Þessa uppskrift er auðvelt að gera:

  • Án eggja

Pítusósa

Fyrir 2-3 sem meðlæti

Innihald

  • 125 ml hrein jógúrt eða AB mjólk
  • 2 msk majones. Einnig má nota 5% sýrðan rjóma (án gelatíns, frá Mjólku)
  • 1 hvítlauksrif, marið
  • Lítil hnefafylli steinselja, fersk eða 1 tsk þurrkuð
  • 1 graslaukur, ferskur
  • 1 tsk tamarisósa
  • 0,5 tsk agavesíróp
  • Chili pipar eða cayennepipar eftir smekk

Aðferð

  1. Afhýðið og merjið hvítlaukinn og setjið í skál.
  2. Saxið steinseljuna og graslaukinn og setjið í skálina.
  3. Bætið jógúrti, tamarisósu, chili pipar, agavesírópi og majonesi út í.
  4. Blandið öllu vel saman og kælið í um 30 mínútur.

Gott að hafa í huga

  • Nota má gríska jógúrt í staðinn fyrir jógúrt. Þannig fæst þykkari sósa.
  • Ef þið hafið mjólkuróþol má nota sojajógúrt í staðinn fyrir venjulega jógúrt.
  • Nota má sojasósu í staðinn fyrir tamarisósu en sojasósa inniheldur hveiti.
  • Ef þið hafið eggjaóþol má sleppa majonesinu og nota sýrða rjómann í staðinn.

Ummæli um uppskriftina

Þórdís
05. maí. 2011

Sæl ég vil byrja á að þakka þér kærlega fyrir þessa síðu hefur reynst mér frábærlega við að breyta og bæta minn/okkar fjölskyldunni minni okkar lífsstíl kærar þakkir fyrir þetta. en er með eina spurningu er alltaf að vandræðast með geymslutíma eins og til dæmis pítusósan hvað er í lagi að geyma hana lengi myndiru halda?

bestu þakkir fyrir mig:)

kv þórdís

sigrun
05. maí. 2011

Gaman að heyra Þórdís :)

Í raun er bara sami geymslutími og á þeirri mjólkurvöru sem þú notar þ.e. ef þú notar AB&;mjólk eða hreina jógúrt er það sami geymslutími og á mjólkurvörunum (þ.e. frá því þú opnar þær). Hef geymt sósuna í viku í ísskáp og það var allt í lagi. Skoðaðu bara utan á umbúðirnar á mjólkurvörunum og það ætti að gefa þér svarið :)

Skrifa ný ummæli

Vinsamlegast athugið að reiti merkta með * þarf að fylla út.
 
Innihald þessa svæðis verður ekki sýnilegt almenningi.
Þessi spurning hér að neðan er til að varna því að spamvélar geti sett inn sjálfvirkar færslur.
Vinsamlegast leggðu saman tölurnar og skrifaðu niðurstöðurnar. T.d. fyrir einn plús þrír, skaltu skrifa 4.
fimm plús þrír eru