Pítu-pizzur (nokkrar útgáfur)

Ok þetta hljómar kannski pínu skrítið, pítu-pizzur en það sem málið snýst um er að nota pítubrauðin sem pizzubotna því það sparar tíma og fyrirhöfn svona þegar maður er að flýta sér. Ég fann þessa uppskrift í grænmetisbók sem Smári og Anna Stína (bróðir minn og konan hans) gáfu mér en þau eru mikið grænmetisfólk (hún er grænmetisæta) og góðir kokkar. Það er auðvitað betra að búa til sína eigin pizzubotna en svona í miðri viku, eftir vinnu þá finnst mér þetta góð lausn. Svo finnst mér líka sniðugt að geta búið til alls konar pizzur með lítilli fyrirhöfn þ.e. maður setur bara það sem maður vill ofan á hverja og eina!! Ef þið viljið búa til ykkar eigin pizzasósu þá er það bara frábært, margir eiga „sína” pizzasósu sem þeir nota alltaf. Ég hef keypt lífrænt framleiddar pizzasósur sem eru mjög góðar.

Upplagt er fyrir krakka að raða því hráefni sem þau vilja helst á sínar eigin pizzur. Það tryggir að pizzurnar muni alveg örugglega slá í gegn.

Það er lítið mál að gera pizzurnar mjólkurlausar og vegan (þ.e. fyrir jurtaætur), því auðvelt er að skipta út venjulegum osti fyrir sojaosti. Ég man sérstaklega vel eftir því hversu glöð ég var fyrir forsjálnina eftir að ég var nýkomin heim af fæðingardeildinni. Ég gróf upp endalaust magn af pítu-pizzum úr frystinum við mikla hamingju mína og eiginmannsins! Ég hef fryst þessar pizzur í bílförmum og hitað svo upp þegar vantar eitthvað gott í gogginn með engri fyrirhöfn. Eins er líka gott að taka með sér í nestið ef maður getur hitað upp í örbylgjuofni, bakaraofni eða samlokurist. Þetta eru a.m.k. töluvert hollari pizzur en þær sem keyptar eru tilbúnar í búðum. Athugið að í pítubrauðum er yfirleitt ger.

Hér fyrir neðan eru nokkur afbrigði af þeim pítu-pizzum sem okkur finnst bestar.