Morgunverður í glasi

Þessi drykkur er beint úr bókinni Innocent smoothie recipe book frá Innocent fyrirtækinu hér í London sem gerir bestu smoothie drykki í heimi (að mínu mati!!). Fyrirtækið er dásamlegt því það hugsar ekki bara um gróða og skjótan pening í vasann heldur greiða þeir 10% af öllum gróða beint til bænda og þeirra sem rækta það sem fyrirtækið þarf. Þeir styðja líka alls kyns verkefni í þróunarlöndum og skapa þar vinnu og sanngjarna viðskiptahætti. Allt hráefni er lífrænt ræktað. Fyrir þá sem eru ekki hrifnir af hafragraut á morgnana þá er þessi drykkur fullkominn því í honum eru hafrar, döðlur, banani, hunang og jógúrt. Fullkomin byrjun á deginum.

Ef þið hafið glúteinóþol getið þið sleppt haframjölinu. Ef þið eruð jurtaætur (enska: vegan) getið þið notað agavesíróp í staðinn fyrir hunang.

Athugið að þið þurfið blandara til að útbúa þennan drykk.
&;


Morgunmatur í glasi, góð byrjun á deginum

Þessi uppskrift er:

  • Án mjólkur
  • Án eggja
  • Án hneta

Þessa uppskrift er auðvelt að gera:

  • Vegan (fyrir jurtaætur)

Morgunverður í glasi

Fyrir 2

Innihald

  • Nokkrir ísmolar
  • 5 Medjool döðlur (þessar mjúku)
  • 125 ml hreinn eplasafi
  • Hálfur banani
  • 2 tsk acacia hunang (eða agavesíróp)
  • 200 ml sojajógúrt (eða hrein jógúrt/AB mjólk)
  • 20 g haframjöl

Aðferð

  1. Setjið ísmolana í blandarann og hellið 50 ml af eplasafanum út á. Blandið í nokkrar sekúndur.
  2. Bætið döðlunum og afganginum af eplasafanum út í og blandið í heila mínútu eða þangað til döðlurnar eru silkimjúkar (blandið lengur ef þið notið þurrkaðar döðlur).
  3. Bætið banana, jógúrt, haframjöli og hunangi saman við og blandið í um 30 sekúndur.
  4. Hellið í glös og berið fram strax.

Gott að hafa í huga

  • Í stað hunangs má nota hreint hlynsíróp (enska: maple syrup) eða agavesíróp.
  • Ef þið finnið ekki Medjool döðlur (fást stundum í heilsubúðum og í stærri matvöruverslunum), getið þið sett venjulegar, þurrkaðar döðlur í bleyti í 30 mínútur. Hellið vatninu af og maukið döðlurnar.
  • Það er ægilega gott að setja svolítið hnetusmjör út í drykkinn. Útbúið ykkar eigið hnetusmjör eða kaupið úr heilsubúð.

Ummæli um uppskriftina

Engin ummæli hafa verið rituð

Skrifa ný ummæli

Vinsamlegast athugið að reiti merkta með * þarf að fylla út.
 
Innihald þessa svæðis verður ekki sýnilegt almenningi.
Þessi spurning hér að neðan er til að varna því að spamvélar geti sett inn sjálfvirkar færslur.
Vinsamlegast leggðu saman tölurnar og skrifaðu niðurstöðurnar. T.d. fyrir einn plús þrír, skaltu skrifa 4.
fimm plús þrettán eru