Möndlukökur með súkkulaðikremi

Möndlur eru mjög kalk- og próteinríkar og macadamiahnetur innihalda holla einómettaða fitu, trefjar og einnig innihalda þær kalk og prótein. Þetta eru sem sagt afar hollar smákökur og gaman að bjóða upp á öðruvísi og óbakaðar kökur með kaffinu. Nota má möndlur í allan botninn í stað macadamiahneta en þá verður hann aðeins þurrari. Ef þið viljið ekki súkkulaði má nota carob í kremið í staðinn.

Athugið að matvinnsluvél þarf til að útbúa þessa uppskrift.


Sniðugar litlar möndlukökur með kremi

Þessi uppskrift er:

  • Án glúteins
  • Án mjólkur
  • Án eggja
  • Vegan
  • Hráfæði

Möndlukökur með súkkulaðikremi

Gerir 12-15 stykki

Innihald

Botn:

  • 50 g möndlur
  • 50 g macadamiahnetur
  • 2 msk agavesíróp
  • 1 tsk kókosolía

Krem:

  • 100 g cashewhnetur
  • 1 banani
  • 30 g kakó
  • 4 msk agavesíróp
  • Smá klípa salt (Himalaya eða sjávarsalt)
  • 2 msk kókosolía

Aðferð

Botn – Aðferð:

  1. Setjið möndlur og macadamiahnetur í matvinnsluvél og malið í um 10 sekúndur eða þangað til fínkornótt.
  2. Á meðan vélin vinnur bætið þá agavesírópinu og kókosolíunni út í. Látið vélina vinna í um 10 sekúndur.
  3. Mótið kúlur úr deiginu og setjið á disk. Fletjið kúlurnar aðeins út með flötum lófanum.
  4. Setjið plastfilmu yfir bitana og geymið í ísskápnum.

Krem – Aðferð:

  1. Maukið cashewhnetur í matvinnsluvél á fullum krafti í 10-15 sekúndur eða þangað til þær eru orðnar fínkornóttar eða maukaðar.
  2. Sigtið kakó út í matvinnsluvélina og bætið einnig salti, agavesírópi og banana út í.
  3. Maukið í nokkrar sekúndur þangað til allt er orðið vel blandað saman.
  4. Á meðan vélin vinnur, bætið þá kókosolíunni út í og maukið í um 15 sekúndur eða þangað til kremið er orðið silkimjúkt.
  5. Leyfið kreminu að stífna í klukkustund í ísskápnum.
  6. Setjið kremið í sprautupoka og sprautið kremi á hverja köku, frekar þykkt þannig að fallegir toppar myndist. Ef þið eigið ekki sprautupoka getið þið sett kremið á með teskeið.
  7. Geymið kökurnar í lokuðu íláti í ísskáp eða í frystinum.

Gott að hafa í huga

  • Ef kókosolían er hörð má stinga krukkunni í heitt vatn í nokkrar mínútur þar til hún verður fljótandi.
  • Nota má carob í stað súkkulaðis og kakós. Carob hentar þeim sem eru viðkvæmir fyrir örvandi efnum kakósins og hentar því börnum vel. Carob fæst í heilsubúðum og heilsuhillum matvöruverslana. Það fæst bæði sem duft (eins og kakó) og í plötum (eins og súkkulaði).

Ummæli um uppskriftina

Engin ummæli hafa verið rituð

Skrifa ný ummæli

Vinsamlegast athugið að reiti merkta með * þarf að fylla út.
 
Innihald þessa svæðis verður ekki sýnilegt almenningi.
Þessi spurning hér að neðan er til að varna því að spamvélar geti sett inn sjálfvirkar færslur.
Vinsamlegast leggðu saman tölurnar og skrifaðu niðurstöðurnar. T.d. fyrir einn plús þrír, skaltu skrifa 4.
tveir plús núll eru