Kryddaðar hafra-, súkkulaði- og rúsínukökur

Ilmurinn sem kemur í eldhúsið þegar maður bakar þessar er ekki bara lokkandi heldur er eins og maður hafi labbað um allt með jólalykt í úðabrúsa og úðað eins og vitleysingur. Þvílíkur og annar eins ilmur. Ég bakaði þessar einu sinni rétt áður en Jóhannes kom heim og svipurinn á honum þegar hann opnaði dyrnar var eins og á jólaljósi...þvílík hamingja (auðvelt að gleðja karlmenn). Kökurnar eru bara nokkuð hollar því í þeim er holl fita, flókin kolvetni, járn, kalk, vítamín o.fl. Súkkulaði er svo sem aldrei hollustuvara (nema það allra dekksta) en er í góðu lagi í litlu magni...sem smákökur einmitt eru, nema maður borði mörg kíló í einu. Sem væri nú græðgi. En alveg skiljanlegt.

Athugið að þið þurfið matvinnsluvél eða blandara til að fínmala haframjölið. Hafið einnig í huga að þið getið flýtt fyrir ykkur með því að nota heslihnetur sem búið er að rista, afhýða og saxa.


Ljúffengar og kryddaðar smákökur

Þessi uppskrift er:

  • Án mjólkur

Kryddaðar hafra-, súkkulaði- og rúsínukökur

Gerir um 30 smákökur

Innihald

  • 60 g heslinetur
  • 100 g haframjöl
  • 90 g spelti
  • 1 tsk kanill
  • 1 tsk múskat (e. nutmeg)
  • 0,5 tsk engifer
  • 0,5 tsk negull (e. cloves)
  • 1 tsk vínsteinslyftiduft
  • 0,5 tsk salt (Himalaya- eða sjávarsalt)
  • 4 msk kókosolía
  • 70 g rapadura hrásykur (eða annar hrásykur)
  • 2-4 msk sojamjólk (ef þarf)
  • 1 egg
  • 50 g sesamfræ
  • 50 g dökkt, lífrænt framleitt súkkulaði, með hrásykri
  • 55 g rúsínur (eða smátt saxaðar döðlur)

 

Aðferð

  1. Ef þið notið heilar heslihnetur með hýði, þurristið þá hneturnar á heitri pönnu. Til að þurrrista á pönnu er best að hita hana á fullum hita og rista hneturnar í 2-3 mínútur eða þangað til hýðið fer að losna. Kælið og nuddið hýðinu af. Saxið hneturnar smátt.
  2. Malið haframjölið í matvinnsluvél eða blandara þangað til fínmalað.
  3. Sigtið saman í stóra skál; spelti, vínsteinslyftiduft, kanil, múskat, engifer, negul og salt. Hrærið vel.
  4. Í aðra skál skuluð þið hræra saman egg, kókosolíu og rapadura hrásykurinn. Hrærið mjög vel og hellið út í stóru skálina. Blandið varlega saman með stórri sleif.
  5. Saxið súkkulaðið gróft og blandið því út í skálina ásamt rúsínum og sesamfræjum. Veltið deiginu aðeins til (ekki hræra mikið).
  6. Blandið mjólk út í ef þarf en annars má sleppa henni. Deigið á að vera frekar þétt en ekki þannig að það molni.
  7. Setjið bökunarpappír á bökunarplötu. Rúllið saman jafnar kúlur úr deiginu (um 1 kúfaða matskeið) og setjið á plötuna. Hafið svolítið bil á milli þeirra.
  8. Þrýstið létt ofan á hverja köku með gaffli (eða flötum lófa). Bakið við 180°C í um 20 mínútur.
  9. Geymið í lokuðu plastíláti.

Gott að hafa í huga

  • Athugið að smákökurnar eru bestar nýbakaðar. Frystið þær smákökur sem þið borðið ekki samdægurs og hitið svo upp síðar. Þær verða eins og nýbakaðar.
  • Nota má undanrennu, hrísmjólk, haframjólk eða möndlumjólk í staðinn fyrir sojamjólk.
  • Ef kókosolían er hörð má stinga krukkunni í heitt vatn í nokkrar mínútur þar til hún verður fljótandi.
  • Notið hamingjuegg ef þið mögulega getið.
  • Nota má carob í stað súkkulaðis og kakós. Carob hentar þeim sem eru viðkvæmir fyrir örvandi efnum kakósins og hentar því börnum vel. Carob fæst í heilsubúðum og heilsuhillum matvöruverslana. Það fæst bæði sem duft (eins og kakó) og í plötum (eins og súkkulaði).
  • Athugið að dökkt súkkulaði inniheldur stundum mjólk, lesið ávallt innihaldslýsingu ef þið eruð með óþol/ofnæmi.

Ummæli um uppskriftina

Engin ummæli hafa verið rituð

Skrifa ný ummæli

Vinsamlegast athugið að reiti merkta með * þarf að fylla út.
 
Innihald þessa svæðis verður ekki sýnilegt almenningi.
Þessi spurning hér að neðan er til að varna því að spamvélar geti sett inn sjálfvirkar færslur.
Vinsamlegast leggðu saman tölurnar og skrifaðu niðurstöðurnar. T.d. fyrir einn plús þrír, skaltu skrifa 4.
sextán plús einn eru