Kornflekskökur (kornflögukökur)

Ég ólst upp að hluta í Kanada og margt af því sem fólk af minni kynslóð þekkir, fór alveg fram hjá mér. Eins og t.d. Kardimommubærinn, Dýrin í Hálsaskógi, Stundin okkar og kornflekskökur. Ég var í staðinn vel að mér í Sesame Street og hvernig maður á að gæta sín á því að laða ekki að sér skógarbirni á tjaldstæðum í Klettafjöllunum. Bestu vinir mínir voru krakkar af mexikönskum uppruna en einnig átti ég 2 góða vini sem voru af Blackfoot og Cree Indiána ættbálki. Mér er mjög minnistætt þegar ég smakkaði mat þessarra krakka en hann var allt öðruvísi en það sem ég hafði vanist á. Fjölbreytileikinn er þó hollur fyrir börn og ég reyni að hafa það að leiðarljósi hvað mín börn varðar sem víla ekki fyrir sér að smakka á alls kyns tilraunum hjá mömmu. Líklega gildir þó einu hvar börn eru niðurkomin í heiminum, þau eiga eftir að fíla þessar kornflekskökur alveg í ræmur. Allavega fríkuðu mín börn algjörlega út (og mamman smá líka) þegar þessar voru tilbúnar í ísskápnum. Þær eru algjörlega frábærar. Ég hef boðið upp á þær ótal oft í afmælum og börnin kvarta ekkert þó að þær séu pínulítið hollari en þessar venjulegu. 

Í þessum kornflekskökum er um helmingi minni sykur en þær hefðbundnu. Ég nota ekki síróp í kökurnar og heldur ekki smjörlíki eða pálmafeiti (að sjálfsögðu ekki). Nota má dökkt eða ljóst súkkulaði með hrásykri en einnig er gott að blanda saman báðum tegundum. Kökurnar mínar eru einnig trefjaríkari en þær hefðbundnu en ég nota döðlur eða rúsínur sem gera þær saðsamari en ella. Ég nota einnig hnetur fyrir svolítið af hollri fitu.


Frábærar kornflekskökur í barnaafmælið

Þessi uppskrift er:

  • Án glúteins
  • Án eggja

Þessa uppskrift er auðvelt að gera:

  • Án hneta
  • Án mjólkur
  • Vegan (fyrir jurtaætur)

Kornflekskökur (kornflögukökur)

20-25 fremur litlar kökur

Innihald

  • 25 g heslihnetur
  • 25 g döðlur eða rúsínur
  • 100 g lífrænt framleitt súkkulaði með hrásykri (dökkt eða ljóst)
  • 1 msk kókosolía
  • 90 g kornflögur (corn flakes) eða speltflögur (spelt flakes) úr heilsubúð 
  • Konfekt pappírsform eða lítil muffinsform

Aðferð

  1. Byrjið á því að þurrrista heslihneturnar á heitri pönnu. Þurrristið í nokkrar mínútur eða þangað til hýðið fer að losna af og hneturnar taka lit. Kælið hneturnar og nuddið hýðið af með fingrunum. Saxið hnetur og rúsínur frekar smátt.
  2. Saxið súkkulaði gróft og bræðið yfir vatnsbaði. (Setjið svolítið vatn í lítinn pott. Setjið skál ofan á pott þannig að skálin sitji á brúnunum. Setjið súkkulaðið ofan í skálina og bræðið yfir vægum hita). Gætið þess að ofhita ekki súkkulaðið og það má alls ekki fara dropi af vatni ofan í skálina. Bætið kókosolíu út í og hrærið vel. Takið skálina af hitanum. 
  3. Hrærið döðlum, hnetum og kornflögum út í skálina. Hrærið þannig að blandist vel saman en ekki merja flögurnar. Setjið 2 kúfaðar teskeiðar af blöndunni í hvert form.
  4. Geymið í kæli og berið kornflögukökurnar fram kaldar.

.

Gott að hafa í huga

  • Nota má kókosmjöl eða döðlur/aprikósur í staðinn fyrir hnetur.
  • Nota má carob í staðinn fyrir súkkulaði.
  • Kornflögur án viðbætts sykurs fást í heilsubúðum og heilsudeildum stærri matvöruverslana