Kjúklingakarríréttur

Þetta er svona mildur laugardagskjúklingur, ofsalega fínn með grófu brauði, byggi eða hýðishrísgrjónum og góðu salati.

Þessi uppskrift er:

  • Án glúteins
  • Án eggja
  • Án hneta

Kjúklingakarríréttur

Fyrir 2-3

Innihald

  • 500 g grillaður, skinnlaus kjúklingur í strimlum
  • 1 laukur, afhýddur og saxaður
  • 1,5 tsk ferskt engifer, afhýtt og saxað
  • 1 stk hvítlauksrif, saxað smátt
  • 1 tsk kókosolía
  • 2,5 tsk karrí
  • 0,5 tsk cumin, malað (ekki kúmen)
  • 0,5 tsk kanill
  • 50 ml ósætt eplamauk (t.d. frá Hipp Organic eða Holle)
  • 50 ml hrein jógúrt
  • 1 msk maísmjöl
  • 2,5 tsk tómatmauk (puree)
  • 75 g frosnar, grænar baunir
  • 125 ml vatn
  • 1 gerlaus grænmetisteningur
  • 25 ml kókosmjólk

Aðferð

  1. Hitið kókosolíu á stórri pönnu.
  2. Afhýðið lauk og engifer og saxið smátt.
  3. Mýkið laukinn á pönnunni í 7-10 mínútur. Notið vatn ef þarf meiri vökva.
  4. Bætið engiferi og hvítlauk út á og hitið í 3 mínútur.
  5. Bætið við karríi, cumin og kanil og látið malla þar til fer að ilma (í um 1 mínútu). Ef vantar vökva, bætið þá svolitlu vatni við.
  6. Hrærið saman vatni, maísmjöli og tómatmauki og setjið út á pönnuna. Látið malla í 5 mínútur.
  7. Bætið grænmetisteningi út í og látið malla þangað til hann leysist upp (í um 5 mínútur).
  8. Rífið kjúklinginn í stóra strimla og setjið út á pönnuna. Látið sjóða svo að kjúklingurinn hitni í gegn. Ef hrár kjúklingur er notaður skal bæta við smávegis vatni og láta kjúklinginn sjóða í sósunni.
  9. Lækkið hitann og látið malla þar til sósan hefur þykknað lítillega, hrærið við og við, í um 30 mínútur.
  10. Setjið grænar baunir, jógúrt og eplamauk út í sósuna og hitið í 5 mínútur.
  11. Bætið kókosmjólk út á pönnuna og lækkið hitann aðeins.
  12. Hrærið þar til sósan hefur þykknað nóg til að hylja bakhluta skeiðar, eða í um 3 mínútur (látið ekki sjóða).
  13. Kryddið með smávegis salti (Himalaya eða sjávarsalt) og svörtum pipar.
  14. Berið fram á pönnunni og skreytið með fersku coriander.

Gott að hafa í huga

  • Berið fram með hýðishrísgrjónum, mango mauki (mango chutney), raita gúrkusósu og jafnvel nýbökuðu chapati brauði.
  • Notið einungis „hamingjusaman” kjúkling(þ.e. free range) ef þið mögulega getið.
  • Ef þið fáið ekki grillaðan kjúkling steikið þá kjúkling í smá kókosolíu og vatni (fjarlægið skinnið). Einnig má nota hráan kjúkling og hita í sósunni.
  • Ef kókosolían er hörð má stinga krukkunni í heitt vatn í nokkrar mínútur þar til hún verður fljótandi.
  • Gerlausir grænmetisteningar fást í heilsubúðum og stærri matvöruverslunum.
  • Ef þið eruð ekki viðkvæm fyrir geri getið þið notað venjulega, lífrænt framleidda grænmetisteninga.
  • Ef afgangur er af kókosmjólkinni má frysta hana í ísmolabox og nota síðar, t.d. í svona súpur.

Ummæli um uppskriftina

Erna Kristín
01. sep. 2011

Stórgóður réttur. Öll fjölskyldan naut góðs af.

sigrun
01. sep. 2011

Gaman að heyra Erna Kristín, takk fyrir að deila með okkur :)

Tóta
17. okt. 2011

Dásamlegur réttur, ég eldaði sem betur fer tvöfaldauppskrift !

sigrun
17. okt. 2011

Gaman að heyra....kannski að ég eldi hann bara um helgina sjálf (vantar nefnilega mynd) :)

Eygló J
02. sep. 2014

Prófaði þennan og hann er æðislega góður. Takk fyrir okkur!
Á að vera frekar lítil sósa? En hún var sjúklega góð og ég vildi meira af henni ;)
Væri alveg til í að sjá mynd af þínum rétt svo ég sjái áferðina?

sigrun
02. sep. 2014

Góður punktur Eygló, ég þarf að snara mynd inn á vefinn :) Sósan er ekki mikil og það má tvöfalda hana ef fólki finnst hún góð .)

Skrifa ný ummæli

Vinsamlegast athugið að reiti merkta með * þarf að fylla út.
 
Innihald þessa svæðis verður ekki sýnilegt almenningi.
Þessi spurning hér að neðan er til að varna því að spamvélar geti sett inn sjálfvirkar færslur.
Vinsamlegast leggðu saman tölurnar og skrifaðu niðurstöðurnar. T.d. fyrir einn plús þrír, skaltu skrifa 4.
tveir plús núll eru