Kiwi- og límónusafi

1. júlí, 2007

Þegar Jóhannes smakkaði þennan drykk sagði hann: „Þennan drykk væri ég til í að kaupa oft”. Svo sem gott að fá góð viðbrögð og allt það en hvað með hinar, mörg hundruð uppskriftirnar á vefnum mínum sem hann hefur þurft að smakka (og ekki boðist til að kaupa)? Hmmmmmm!!! Allavega, hvort sem hann er til sölu eða ekki er þetta ferskur, hreinsandi og nærandi drykkur, yfirfullur af C vítamíni. Best er að nota safapressu fyrir safann.

Gætið þess að mjög ung börn geta haft ofnæmi fyrir kiwifræjum svo farið varlega þegar þið gefið ungum börnum þennan safa.

Athugið að best er að nota safapressu og blandara til að útbúa þennan drykk. Ef þið eigið ekki safapressu getið þið sleppt vínberjunum og notað eingöngu hreinan eplasafa.

Senda uppskrift

Prenta uppskrift

Setja í uppskriftabox

Sumarlegur og frískandi safi

0 ummæli

Þessi uppskrift er:

Án glúteins
Án mjólkur
Án eggja
Án hneta
Vegan
Hráfæði

Kiwi- og límónusafi

Fyrir 2

Innihald

3 vel þroskuð kiwi, afhýdd og skorin í stóra bita
150 ml eplasafi (eða 1 sætt epli, þvegið og skorið í stóra bita)
2 lúkur græn vínber (steinalaus), þvegin (má nota 100 ml eplasafa til viðbótar í staðinn)
Safi úr einni límónu

Aðferð

Ef notuð er safapressa:
Þvoið vínberin vel.
Þvoið eplið og skerið í stóra bita. Setjið eplið og vínberin í safapressu. Farið í lið 5 og haldið áfram með uppskriftina.
Ef notaður er blandari eingöngu:
Afhýðið kiwiið, skerið í stóra bita og setjið í blandarann. Blandið í 2 sekúndur (fræin mega ekki maukast í sundur því þá verður drykkurinn bitur á bragðið).
Bætið límónusafanum, vínberjasafanum (ef notaður) og eplasafanum út í. Blandið í aðrar 2 sekúndur (eða hrærið með stórri skeið).
Hellið í glös og berið fram strax.