Íslatte að hætti Freysa

Ég fékk svona íslatte fyrst á kaffihúsi sem heitir Englen í Árhúsum sumarið 2006. Setið var úti í ógnarhita í garðinum bak við kaffihúsið. Freysi vinur okkar (þá búsettur í Árhúsum) sagði rogginn að hann gæti búið til álíka gott latte heima hjá sér en ég var nú ekki svo tilbúin að trúa honum. Pressan á honum var því mikill er heim var komið. En viti menn, þetta tókst hjá stráknum! Danska mjólkin er reyndar mögnuð og ég fæ ekki sömu áferð á mjólkina í Englandi eða Íslandi. Best er að nota léttmjólk. Ég hef notað sojamjólk líka og hún er allt í lagi en hún freyðir reyndar lítið. Hrísmjólk nær ekki sömu áferð en haframjólk og möndlumjólk virkar nokkuð vel.

Þessi uppskrift er:

  • Án glúteins
  • Án eggja
  • Án hneta

Þessa uppskrift er auðvelt að gera:

  • Án mjólkur
  • Vegan (fyrir jurtaætur)

Íslatte að hætti Freysa

Fyrir 2

Innihald

  • Um 10 stórir ísmolar
  • 200 ml léttmjólk (sojamjólk má nota en hún freyðir ekki mikið)
  • 150-200 ml koffeinlaust kaffi (venjulegt fyrir þá sem vilja)
  • 4 msk hreint hlynsíróp
  • 1 tsk vanilludropar (úr heilsubúð)

Aðferð

  1. Útbúið kaffið, hafið það frekar sterkt (setjið til hliðar).
  2. Setjið ísmolana og um 50 ml af mjólkinni  í blandara og blandið í um 5 sekúndur.
  3. Bætið afgangi af sojamjólk og vanilludropum út í og blandið á fullum hraða í heila mínútu eða þangað til mjólkurblandan er orðin silkimjúk og rjómakennd og farin að freyða vel.
  4. Bætið einum ísmola til viðbótar út í blandarann og blandið á fullum hraða í nokkrar sekúndur.
  5. Hellið mjólkinni í há glös (um tvo þriðju hluta glassins). Gætið þess að þykki hlutinn (froðan) fari líka ofan í glösin.
  6. Hellið kaffinu varlega í mjórri bunu ofan á froðuna í hvoru glasi.
  7. Bætið 2 ísmolum út í hvort glas.
  8. Berið fram strax.

Gott að hafa í huga

  • Fyrir hressandi mjólkurdrykk má blanda saman 200 ml léttmjólk eða sojamjólk, 1 msk hreint hlynsíróp og fullt af ísmolum. Ísmolarnir eru blandaðir fyrst og hinu blandað saman við á mesta hraða í um 2 mínútur. Berið fram ískalt.
  • Freysi notaði upprunalega sykurlaust síróp í blönduna en ég nota hlynsíróp.

Ummæli um uppskriftina

Engin ummæli hafa verið rituð

Skrifa ný ummæli

Vinsamlegast athugið að reiti merkta með * þarf að fylla út.
 
Innihald þessa svæðis verður ekki sýnilegt almenningi.
Þessi spurning hér að neðan er til að varna því að spamvélar geti sett inn sjálfvirkar færslur.
Vinsamlegast leggðu saman tölurnar og skrifaðu niðurstöðurnar. T.d. fyrir einn plús þrír, skaltu skrifa 4.
sautján plús núll eru