Hreinsandi sítrusdrykkur

Þessi drykkur minnti mig alveg svakalega á Afríku þegar ég var að smakka hann til og sérstaklega á Kenya en þar eru appelsínur eilítið súrari en þessar sem við eigum að venjast á Íslandi. Þær sem við fáum á Íslandi koma nefnilega yfirleitt frá Spáni eða Bandaríkjunum. Ég man í fyrsta skipti sem ég sá appelsínur í Kenya. Þær eru aðeins stærri en límónur og eiturgrænar að lit (en reyndar gular að innan sem ég vissi ekki þá). Í fyrsta skipti sem við komum þangað var ég búin að velta því fyrir mér alveg svakalega oft hvers vegna Kenyabúar borðuðu svona oft límónur. Mér fannst það beinlínis stórfurðulegt. Það var ekki fyrr en í næsta skipti sem ég fór þangað að ég fór að spyrjast fyrir um þetta. Ég spurði einn Kenyabúa hvers vegna þessu sætti. Hann horfði á mig eins og ég væri eitthvað ruuuugluð. Já en þetta eru appelsínur!!! Ég sagði að það gæti ekki verið? Þær væru appelsínugular? Hann svaraði á móti að það hlyti að vera eitthvað að appelsínunum okkar þar sem þær væru appelsínugular..kannski væru þær skemmdar? Þetta sýndi glögglega hversu fastheldin við erum á ýmislegt í lífi okkar, hvort sem við búum í Kenya eða á Íslandi.

Í fyrsta skipti sem ég smakkaði appelsínu í Kenya vorum við að sigla á Indlandshafi, í gamalli tréskútu sem notuð hafði verið fyrir krydd, þræla og ýmsan varning milli Mombasa og Zanzibar. Um borð var matur sem við borðuðum með bestu lyst enda orðin svöng. Í eftirmat voru… þessar límónur (sem ég nú vissi að voru appelsínur) og ég borðaði þær auðvitað líka. Þær voru sérlega gómsætar en aðeins súrari en okkar (ekki óþroskaðar súrar heldur svona sterksætsúrar) sem pössuðu vel þarna eftir matinn. Margir þeir sem kafa í Indlandshafi, við Kenya fá svona appelsínubita þegar upp á yfirborð er komið því appelsínubátarnir hreinsa munninn og eru frískandi eftir gúmmíbragðið! Þetta var ég sem sagt að hugsa um á meðan ég bjó til drykkinn á köldum vetrardegi á Íslandi. Hann er einstaklega hressandi og hreinsandi og sprengfullur af C vítamíni. Engiferið er einnig gott fyrir meltinguna og við flökurleika. Ef þið viljið meira engiferbragð má rífa engiferið á rifjárni og setja út í drykkinn.

Til að útbúa þennan drykk þarf safapressu eða hreinan gulrótarsafa.