Hreinsandi peru-, gulrótar- og engifersafi

Þennan hreinsandi (detox) drykk er gott að gera í safapressu en fyrir þá sem eiga ekki slíka græju er alveg hægt að mauka perurnar í blandara en þá er drykkurinn aðeins þykkari. Lífrænt framleiddan gulrótarsafa má kaupa í heilsubúðum. Bæði perurnar og engiferið hafa hreinsandi eiginleika og gulrótarsafinn inniheldur helling af Beta Carotene (sem breytist í A vítamín í líkamanum) og K og C vítamínum en perurnar innihalda mikið af C vítamíni. A vítamín er sérstaklega gott fyrir lungnastarfsemi. Perur eru líka trefjaríkar og eru sá ávöxtur sem hvað síst kemur af stað ofnæmisviðbrögðum og eru því heppilegar fyrir ung börn. Þetta er upplagður drykkur yfir háveturinn því þarf líkaminn einmitt á þessum vítamínum að halda.

Þessi uppskrift er:

  • Án glúteins
  • Án mjólkur
  • Án eggja
  • Án hneta
  • Vegan
  • Hráfæði

Hreinsandi peru-, gulrótar- og engifersafi

Fyrir 2

Innihald

  • 2  vel þroskaðar perur, þvegnar og skornar í stóra bita
  • 50 ml gulrótarsafi (úr heilsubúð) eða 1 stór gulrót í safapressu 
  • 1 sm bútur ferskt engifer, rifið á rifjárni eða sett í gegnum safapressu

Aðferð

  1. Ef notuð er safapressa: Þvoið og skrælið gulrætur. Þvoið peruna og skerið í stóra bita. Setjið gulrætur, perur og engifer í safapressuna.
  2. Ef ekki er notuð safapressa: Afhýðið perurnar, kjarnhreinsið og skerið í stóra bita.
  3. Blandið perurnar í blandara ásamt helmingnum af gulrótarsafanum. Blandið í um 5 sekúndur.
  4. Blandið afganginum af gulrótarsafanum saman við og rífið engiferið á rifjárni þannig að safinn leki ofan í blandarann. Blandið í um 5 sekúndur.
  5. Hellið í glös og berið fram strax.

Gott að hafa í huga

  • Það er mjög gott að nota í þessa uppskrift perur sem eru farnar að slappast.
  • Til að gera drykkinn sætari er gott að bæta hálfu epli til viðbótar í safann.

Ummæli um uppskriftina

Hildur Símonardóttir
28. jan. 2012

Takk fyrir nákvæmlega sem ég var að leita að.

Skrifa ný ummæli

Vinsamlegast athugið að reiti merkta með * þarf að fylla út.
 
Innihald þessa svæðis verður ekki sýnilegt almenningi.
Þessi spurning hér að neðan er til að varna því að spamvélar geti sett inn sjálfvirkar færslur.
Vinsamlegast leggðu saman tölurnar og skrifaðu niðurstöðurnar. T.d. fyrir einn plús þrír, skaltu skrifa 4.
sex plús níu eru