Hollustupoppkorn

Þetta poppkorn er alveg örugglega hollasta poppkorn sem þið getið búið til. Það er nauðsynlegt að eiga loftpopptæki (air popper) en slík tæki fást í flestum heimilistækjabúðum. Best er að kaupa þannig tæki að hægt sé að poppa beint í skál. Svoleiðis græja kostar ekki mikið og er frábær fjárfesting. Svo þarf maður olíuúðabrúsa (ég blanda saman smá ólífuolíu og vatni). Svoleiðis fæst í t.d. Pipar og Salt og ég get lofað ykkur að það verður ein mest notaða græjan á heimilinu! Í 100 g af venjulegu poppkorni sem keypt er geta verið um 400 hitaeiningar og allt að 40 grömm af fitu svona til viðbótar við saltið sem er svo mikið að það gæti hækkað blóðþrýstinginn í grjóti. Ég ætla ekki einu sinni að nefna „bíópopp” á nafn (bannað á þessu heimili...það er eiginlega blótsyrði he he). Í þessu poppi er minna en 1 gramm af fitu, um 1 g af salti (helmingurinn af því verður eftir í skálbrúnunum) og svona um 50-100 hitaeiningar. Þetta poppkorn er líka sniðugt fyrir krakka því það er mun minna salt í þessu en venjulegu poppi.