Hnetu- og karríborgarar

Þetta eru aldeilis fínir grænmetisborgarar og eru í ætt við karríhnetusteikina hérna á vefnum. Borgararnir eru mildir en bragðgóðir og henta því allri fjölskyldunni. Þeir henta einnig vel sem fylling í t.d. spelt pítubrauð. Borgararnir eru pakkfullir af vítamínum, próteinum, trefjum og hollri fitu. Það er upplagt að gera heilan helling í einu og frysta. Þeir henta líka sérlega vel í nestisboxið sem og á til upphitunar á grillið í útilegunni.

Athugið að auðvelt er að gera uppskriftina eggjalausa og glúteinlausa. Uppskriftin er án mjólkur og hentar því þeim sem hafa mjólkuróþol.

Þessi uppskrift er:

  • Án mjólkur

Þessa uppskrift er auðvelt að gera:

  • Án eggja
  • Án glúteins
  • Vegan (fyrir jurtaætur)

Hnetu- og karríborgarar

Gerir 20-25 borgara

Innihald

  • 2 meðalstórir laukar, saxaðir smátt
  • 1 rauður chili pipar, fræhreinsaður og saxaður smátt
  • 6 hvítlauksrif, marin eða söxuð smátt
  • 5 sm biti ferskt engifer, afhýtt og rifið á rifjárni
  • 1 msk kókosolía
  • 2 tsk karrí
  • 2 tsk tómatmauk (puree)
  • 0,5 tsk salt (Himalaya eða sjávarsalt)
  • 1 lítil kartafla, skræld og rifin á rifjárni
  • 2 meðalstórar gulrætur, rifnar á rifjárni
  • 300 g blómkál (þyngd fyrir snyrtingu). Brjótið í litla sprota og rífið á rifjárni eða í matvinnsluvél
  • 140 g blandaðar hnetur (cashew-, hesli-, eða Brasilíuhnetur), malaðar í matvinnsluvél
  • 25 g corianderlauf, söxuð gróft. Notið nokkur lauf í að skreyta hnetusteikina
  • 100 g spelt brauðrasp (eða spelt hrökkbrauð)
  • 1 egg, hrært lauslega

Aðferð

  1. Afhýðið engifer, lauk og hvítlauk og saxið smátt.
  2. Skerið chili piparinn langsum, fræhreinsið og saxið smátt.
  3. Skrælið kartöflu og gulrætur og rífið á rifjárni.
  4. Rífið blómkál á rifjárni eða setjið í matvinnsluvél (með blaði til að rífa grænmeti). Malið í 3-5 sekúndur.
  5. Hitið kókosolíuna á stórri pönnu. Bætið við vatni ef þarf meiri vökva.
  6. Steikið laukinn þangað til hann fer að mýkjast.
  7. Bætið chili, hvítlauk, karríi, tómatmauki, salti og engiferi út í og hitið í nokkrar mínútur.
  8. Bætið rifnu kartöflunni, gulrótunum og blómkálinu saman við og hitið í nokkrar mínútur.
  9. Setjið ofangreint hráefni í stóra skál.
  10. Saxið corianderlauf smatt.
  11. Setjið hnetur og brauðsneiðar (eða hrökkbrauð) í matvinnsluvél og blandið í nokkrar sekúndur eða þangað til nokkuð fínmalað. Setjið í stóru skálina og hrærið vel.
  12. Bætið egginu og coriander saman við og hrærið vel.
  13. Mótið borgarana í höndunum (svona eins og vatnsglas í ummál). Gott er að hafa þá tæpa 1 sm eða svo á þykkt.
  14. Setjið bökunarpappír á bökunarplötu og raðið borgurunum á plötuna.
  15. Bakið í 30-40 mínútur við 190°C. Snúið borgurunum eftir 25-30 mínútur og bakið áfram.

Gott að hafa í huga

  • Berið fram með t.d. hvítlauksjógúrtssósu (köld) eða sveppasósu (heit) ásamt byggi eða hýðishrísgrjónum og góðu salati.
  • Borgararnir slá alltaf í gegn sem nesti og bragðast vel kaldir.
  • Upplagt er að frysta borgarana og geymast þeir þannig í nokkra mánuði ef vel pakkaðir inn í plastpoka eða box. Gott er að setja bökunarpappír á milli borgaranna svo þeir frjósi ekki í einn köggul. Þannig getur maður líka kippt einum og einum úr frystinum í einu og hitað upp.
  • Nota má glúteinlaust hrökkbrauð eða brauð í staðinn fyrir spelt brauð eða hrökkbrauð.
  • Nota má eitthvað annað krydd í staðinn fyrir coriander t.d. basil og steinselju ef ykkur finnst coriander ekki gott.
  • Ef þið hafið eggjaofnæmi getið þið í staðinn notað 1 msk af hörfræjum sem hafa legið í 3 msk af vatni í 20 mínútur. Hellið hörfræjum og vatninu út í stóru skálina og hrærið.
  • Notið hamingjuegg ef þið mögulega getið.
  • Ef kókosolían er hörð má stinga krukkunni í heitt vatn í nokkrar mínútur þar til hún verður fljótandi.
  • Nota má aðra olíu en kókosolíu, t.d. vínberjakjarnaolíu eða repjuolíu.

Ummæli um uppskriftina

Engin ummæli hafa verið rituð

Skrifa ný ummæli

Vinsamlegast athugið að reiti merkta með * þarf að fylla út.
 
Innihald þessa svæðis verður ekki sýnilegt almenningi.
Þessi spurning hér að neðan er til að varna því að spamvélar geti sett inn sjálfvirkar færslur.
Vinsamlegast leggðu saman tölurnar og skrifaðu niðurstöðurnar. T.d. fyrir einn plús þrír, skaltu skrifa 4.
einn plús þrír eru