Hjónabandssæla

Þegar ég var yngri hélt ég að hjónabandssæla héti hjónabands-æla (og hélt alltaf að verið væri að gera grín að hjónabandi með því að gera svona ljóta köku því ekki eru hjónabandssælur nú sérstaklega fallegar).

Það var ekki fyrr en löngu seinna að ég skildi að mig hafði vantað eitt s inn í nafnið og kakan hljómaði eftir það aðeins girnilegri fyrir vikið! Þetta er sem sé hollari útgáfa af hjónabandssælu og víst er að þessi kaka er engin æla heldur sæla út í gegn og það með stóru S-i! Ég nota kókosolíu og auðvitað heimatilbúna rabarbara-og döðlusultu. Í botninn set ég svolítið af hnetum svo allt í allt er þessi hjónabandssæla sprengfull af C vítamíni, trefjum, próteinum, flóknum kolvetnum, hollri fitu o.fl. Hún hentar einnig þeim sem hafa mjólkuróþol og þeim sem eru vegan því engar mjólkurafurðir eru í henni. Veit reyndar ekki hvort að þetta sé uppskriftin af sérstakri sælu í hjónabandinu en í staðinn er þetta uppskrift af góðri og hollri köku og betri heilsa hlýtur að leiða til einhvers góðs! Í staðinn fyrir að nota heimatilbúna rabarbarasultu getið þið soðið 170 g rabarbara, 20 ml appelsínusafa og 50 g döðlur og maukað saman.

Athugið að þið þurfið 21 sm smelluform fyrir þessa köku. Athugið einnig að til að flýta fyrir ykkur er best að kaupa heslihnetur sem búið er að rista og afhýða og einnig er gott að vera búin að útbúa rabarbarasultuna með góðum fyrirvara.