Heit bláberja- og vanillusósa

Dásemdarsósa sem er (ég get svo svarið það) góð út á allt, hvort sem það er ís, í drykki (smoothie), yfir kökur, í jógúrt eða bara ein og sér upp úr pottinum. Sósuna má bera fram kalda líka, þrátt fyrir nafnið. Hún er algjörlega meiriháttar blönduð út í AB mjólk og einnig má nota hana í bláberjaostakökuna góðu. Bláber eru full af andoxunarefnum og járni ásamt trefjum. Þessi djúpi, blái litur er einmitt það sem gerir bláber svona holl en í honum leynast andoxunarefnin. Nota má frosin bláber í sósuna og sósuna má einnig frysta og hita upp síðar.


Bláberjasósa, sprengfull af hollustu

Þessi uppskrift er:

  • Án glúteins
  • Án mjólkur
  • Án eggja
  • Án hneta
  • Vegan

Heit bláberja- og vanillusósa

Gerir um 250 ml af sósu

Innihald

  • 200 g bláber, fersk eða frosin
  • 1 msk hlynsíróp 
  • 4 dropar stevia án bragðefna (eða 1 msk hlynsíróp til viðbótar)
  • 1 vanillustöng
  • 1 tsk sítrónusafi
  • 50 ml eplasafi eða annar hreinn ávaxtasafi 

Aðferð

  1. Setjið bláber, hlynsíróp, stevia, sítrónusafa og eplasafa í lítinn pott. Látið suðuna koma upp og leyfið þessu öllu að malla í nokkrar mínútur.
  2. Skerið vanillustöngina eftir endilöngu og skafið vanillufræin úr stönginni með oddinum á litlum hnífi. Hrærið vel. Leyfið stönglinum svo að sjóða með bláberjunum. Merjið berin aðeins með litlum gaffli og hrærið vel. Látið sósuna malla í 10 mínútur. 
  3. Fjarlægið vanillustöngina. 
  4. Berið sósuna fram heita með t.d. heitum bökum og kökum, ís o.fl. 

Gott að hafa í huga

  • Nota má hunang í stað hlynsíróps (ef þið eruð ekki vegan)
  • Sósan geymist í meira en viku í ísskápnum.
  • Sósuna má frysta og hita upp síðar.
  • Þrátt fyrir nafnið má bera sósuna fram kalda. 

Ummæli um uppskriftina

Drífa Garðarsdóttir
19. ágú. 2012

rosalega góð þessi

sigrun
20. ágú. 2012

Gott að heyra Drífa :)

gestur
12. apr. 2017

Þessi er algjört meistaraverk.. ég átti ekki vanellustöng en notaði Bourbon-vanilla fra Naturata og átti heldur ekki appelsinusafa en notaði Heilsusafa frá Floridana og lemon safa...þetta virkaði allt fint...en ég mun prufa uppskriftina eins og hún er seinna...

sigrun
12. apr. 2017

Meistaraverk já.....það er ekkert annað :) Ég hef líka notað Bourbon vanilluna og hún passar mjög vel hér. Þín útgáfa er held ég ekki síðri heldur en mín útgáfa...svona í hreinskilni sagt :)

Skrifa ný ummæli

Vinsamlegast athugið að reiti merkta með * þarf að fylla út.
 
Innihald þessa svæðis verður ekki sýnilegt almenningi.
Þessi spurning hér að neðan er til að varna því að spamvélar geti sett inn sjálfvirkar færslur.
Vinsamlegast leggðu saman tölurnar og skrifaðu niðurstöðurnar. T.d. fyrir einn plús þrír, skaltu skrifa 4.
tveir plús núll eru