Haustsúpa með sætum kartöflum og eplum

Þessi súpa er fín fyrir krakkana því hún er mild og svolítíð sæt. Hún fer einkar vel í maga og er stútfull af C vítamínum. Það er ekkert glútein í súpunni og ekki heldur mjólk. Hún hentar því vel þeim sem hafa glútein- og/eða mjólkuróþol.

Athugið að best er að nota matvinnsluvél, blandara eða töfrasprota til að mauka súpuna.


Svolítið sæt og öðruvísi súpa

Þessi uppskrift er:

  • Án glúteins
  • Án mjólkur
  • Án eggja
  • Án hneta
  • Vegan

Haustsúpa með sætum kartöflum og eplum

Fyrir 4-5

Innihald

  • 3 blaðlaukar, sneiddir í mjóar sneiðar
  • 1 msk kókosolía
  • 1 stór gulrót, afhýdd og sneidd í þunnar sneiðar
  • 600 g sætar kartöflur, afhýddar og saxaðar gróft
  • 2 græn epli, afhýdd og söxuð gróft.
  • 1,2 lítrar af vatni
  • 2 gerlausir grænmetisteningar
  • Smá klípa múskat (enska: nutmeg)
  • 225 ml eplasafi
  • 225 ml kókosmjólk
  • Smá klípa salt (Himalaya eða sjávarsalt)
  • Svartur pipar eftir smek

Aðferð

  1. Sneiðið blaðlaukinn í mjóar sneiðar.
  2. Afhýðið sætu kartöflurnar, eplin og gulrótina. Sneiðið gulrótina þunnt en saxið sætu kartöflurnar gróft. Kjarnhreinsið eplin og saxið gróft.
  3. Hitið kókosolíuna í stórum potti.
  4. Setjið blaðlaukinn í pottinn og mýkið í 6-8 mínútur. Bætið við vatni ef þarf meiri vökva.
  5. Bætið gulrótunum, sætu kartöflunum, eplunum og vatninu út í ásamt grænmetisteningunum.
  6. Kryddið með salti, pipar og múskati.
  7. Látið suðuna koma upp, minnkið svo hitann og látið malla í um 20 mínútur eða þangað til grænmetið er orðið mjúkt.
  8. Kælið súpuna aðeins og hellið svo í smá skömmtum í blandara eða matvinnsluvél og maukið eftir smekk. Mér finnst gott að mauka svona súpur svolítið mikið.
  9. Setjið súpuna aftur í pottinn og bætið eplasafanum og kókosmjólkinni saman við.
  10. Hitið að suðu en látið ekki bullsjóða.
  11. Berið fram með snittubrauð.

Gott að hafa í huga

  • Ef kókosolían er hörð má stinga krukkunni í heitt vatn í nokkrar mínútur þar til hún verður fljótandi.
  • Nota má aðra olíu en kókosolíu, t.d. vínberjakjarnaolíu eða repjuolíu.
  • Gerlausir grænmetisteningar fást í heilsubúðum og stærri matvöruverslunum.
  • Ef þið eruð ekki viðkvæm fyrir geri getið þið notað venjulega, lífrænt framleidda grænmetisteninga.
  • Ef afgangur er af kókosmjólkinni má frysta hana í ísmolabox og nota síðar, t.d. í svona súpur.

Ummæli um uppskriftina

berglind03
12. des. 2011

Notaði venjulegan lauk í stað blaðlauks og bætti við engifer. Súpan var stórkostlega góð :)

sigrun
12. des. 2011

Sniðug að bæta engiferi við og gott að vita að hægt sé að nota lauk í stað blaðlauks :) Gaman að heyra að súpan hafi heppnast svona vel. Það er upplagt að frysta hana og hita upp síðar, verður bara betri þannig :)

Hafdís Sævarsdóttir
22. okt. 2014

Við gerðum þessa súpu í leikskólanum um daginn
og hún sló algjörlega í gegn :)
Gerum þessa klárlega aftur.

Kveðja Hafdís og Elín á Holtakoti

sigrun
22. okt. 2014

Frábært að heyra :)

Skrifa ný ummæli

Vinsamlegast athugið að reiti merkta með * þarf að fylla út.
 
Innihald þessa svæðis verður ekki sýnilegt almenningi.
Þessi spurning hér að neðan er til að varna því að spamvélar geti sett inn sjálfvirkar færslur.
Vinsamlegast leggðu saman tölurnar og skrifaðu niðurstöðurnar. T.d. fyrir einn plús þrír, skaltu skrifa 4.
tveir plús tólf eru