Harissakjúklingur

Þessi uppskrift kemur úr bókinni okkar Moro. Moro er skrifuð af hjónum sem hafa ferðast um allan heim til að kynna sér ólíka matarmenningu og hefðir. Þau ákváðu svo að opna veitingastað í London þegar heim var komið og bjóða gestum upp á alls kyns framandi og spennandi rétti. Veitingastaðurinn heitir sem sé líka Moro og er afar vinsæll þó beri ekki mikið á honum. Í nýlegri könnun sem var gerð um daginn hér í blöðunum, þá var Moro valinn „mest vanmetni veitingastaðurinn” miðað við verð. Þá voru teknir inn í staðir eins og Fifteen (Jamie Oliver) og River Café sem eru mjög dýrir og þó að maturinn sé góður þá er maður að borga svo mikið fyrir nafnið að það er kannski ekki alveg þess virði. Ég sel það ekki dýrara en ég keypti það. Mér finnst Fifteen reyndar rosa góður. En sem sagt, Jóhannes eldaði þennan kjúklingarétt eitt kvöldið og hann heppnaðist bara vel (svona miðað við að Jóhannes eldar á 5 ára fresti). Harissa er yfirleitt borin fram með kúskús, soðnum eggjum og brauði og er hægt að geyma hana í margar vikur í ísskápnum. Sko í uppskriftina áttu að fara 250 GRÖMM af chili pipar en ég setti niður fótinn og sagði nei takk, ég ætla ekki að þurfa að hringja á slökkviliðið eftir að hafa borðað kvöldmat. Þannig að við minnkuðum chili pipar magnið úr 250 grömm í 50 grömm (sem er samt rúmur 1 chili pipar á mann) og það var fínt. Athugið samt að bæta aðeins meira við af sætu paprikunni í staðinn. Að sjálfsögðu er hægt að setja meiri chili pipar í réttinn en það fer allt eftir smekk auðvitað. Hafið bara handslökkvitækið tiltækt.

Athugið að best er að nota matvinnsluvél eða töfrasprota til að gera harissa maukið.

Athugið einnig að notað er bæði cumin (jeerah seeds) og kúmen (caraway seeds) í réttinn, svona til að fyrirbyggja rugling.