Grilluð grænmetissamloka

Þessi er nú einföld en engu að síður bragðgóð og með alveg hellings grænmeti. Það er upplagt að nota afgangana úr ísskápnum í vikulok, í eina svona grillaða. Það er ekki oft sem ég nota spelt ciabatta brauð en það hentar vel í þessa uppskrift. Ef þið þolið ekki ger, getið þið keypt gerlaust samlokubrauð úr heilsubúð eða annað brauð sem ykkur þykir gott. Mikilvægt er að brauðið geti haldið öllu innihaldinu á meðan það grillast.

Þessi uppskrift er:

  • Án eggja
  • Án hneta

Þessa uppskrift er auðvelt að gera:

  • Án mjólkur
  • Vegan (fyrir jurtaætur)

Grilluð grænmetissamloka

3-4 samlokur

Innihald

  • 4 spelt ciabatta/pítubrauð/langlokubrauð
  • 2 msk grænt pestó
  • 5 msk 5% sýrður rjómi (án gelatíns, frá Mjólku)
  • 1 lítill kúrbítur, skorinn í grófa strimla
  • 3-4 grillaðar paprikur í krukkum (úr heilsubúð)
  • 6 sveppir, sneiddir þunnt
  • 4 sólþurrkaðir tómatar (ekki í olíu), skornir í þunnar lengjur
  • 4 kirsuberjatómatar, skornir í helminga
  • 50 g mozzarella, sneiddur þunnt
  • 50 g magur ostur, rifinn
  • Smá klípa svartur pipar eftir smekk
  • Smá klípa salt (Himalaya eða sjávarsalt) ef þarf

Aðferð

  1. Hrærið saman pestói og sýrðum rjóma og setjið til hliðar.
  2. Skerið kúrbítinn í strimla (óþarfi er að skræla hann). Grillið kúrbítinn í efstu rim í ofninum (setjið bökunarpappír á bökunarplötu) við 200°C í um 10 mínútur.
  3. Skerið paprikuna langsum, fræhreinsið og skerið í 4 lengjur. Setjið paprikurnar í eldfast mót og grillið í efstu rim við 220°C í um 20-25 mínútur eða þangað til skinnið fer að bólgna og verða svart. Látið paprikurnar í plastpoka í 5 mínútur og lokið fyrir. Hreinsið svo hýðið af og fleygið.
  4. Sneiðið sveppina þunnt og steikið í svolitlu vatni á pönnu. Saltið og piprið eftir smekk.
  5. Skerið kirsuberjatómatana í helminga.
  6. Skerið sólþurrkaða tómatana í mjóar lengjur.
  7. Rífið magra ostinn á rifjárni og sneiðið mozzarella ostinn í þunnar sneiðar.
  8. Skerið brauðin í tvennt langsum og hreinsið megnið af mjúka brauðinu innan úr.
  9. Smyrjið pestómaukinu innan í.
  10. Raðið 2 helmingum af kirsuberjatómötum á hvern botn, nokkrum strimlum af kúrbít, sólþurrkuðum tómötum í strimlum, paprikum, sveppum, osti og mozarella-osti.
  11. Saltið og piprið eftir smekk.
  12. Hitið í góðu samlokugrilli (helst með þungu loki) þangað til osturinn fer að bráðna og brauðið er grillað.

Gott að hafa í huga

  • Það er að sjálfsögðu hægt að nota alls kyns grænmeti í stað þessa sem er talið hér að ofan t.d. eggaldin, ferskar paprikur, ólífur, maískorn svo dæmi sé nefnt.
  • Best er að kaupa gerlaus spelt ciabatta ef þið finnið slík brauð (í heilsubúðum eða bakaríum).
  • Í staðinn fyrir sýrðan rjóma má nota majones.
  • Ef þið finnið aðeins sólþurrkaða tómata í olíu má annað hvort þerra olíuna með eldhúsþurrku en einnig hef ég notað þessa aðferð: Setjið sólþurrkuðu tómatana í sigti og hellið sjóðandi heitu vatni yfir þá (um 500 ml eða svo). Þerrið með eldhúsþurrku.
  • Nota má sojaost í staðinn fyrir mozzarella og magran ost.
  • Nota má rautt pestó í staðinn fyrir grænt.

Ummæli um uppskriftina

Engin ummæli hafa verið rituð

Skrifa ný ummæli

Vinsamlegast athugið að reiti merkta með * þarf að fylla út.
 
Innihald þessa svæðis verður ekki sýnilegt almenningi.
Þessi spurning hér að neðan er til að varna því að spamvélar geti sett inn sjálfvirkar færslur.
Vinsamlegast leggðu saman tölurnar og skrifaðu niðurstöðurnar. T.d. fyrir einn plús þrír, skaltu skrifa 4.
fjórtán plús þrír eru