Góðar brauðbollur með öllum mat

Þessar brauðbollur er auðvelt að búa til og má setja eitthvað annað en sólþurrkaða tómata og ólífur í þær. Það er t.d. upplagt að setja rifnar gulrætur, grillaða papriku og jafnvel kúrbít út í bollurnar.

Mér finnst bollurnar passa nánast með öllum mat en ef ykkur finnst bragðið af ólífunum of sterkt, getið þið sleppt þeim og notað eitthvað annað í staðinn.


Góðar og hollar speltbollur með öllum mat

Þessi uppskrift er:

  • Án mjólkur
  • Án eggja
  • Án hneta
  • Vegan

Góðar brauðbollur með öllum mat

Gerir 15-20 bollur

Innihald

  • 700 g spelti
  • 3 tsk vínsteinslyftiduft
  • 1 tsk salt (Himalaya eða sjávarsalt)
  • 500 ml sojamjólk. Gæti þurft meira eða minna
  • 1 msk sítrónusafi
  • 1 msk kókosolía
  • 2 tsk agavesíróp
  • 10 sólþurrkaðir tómatar án olíu
  • 10 grænar ólífur

Aðferð

  1. Í stóra skál skuluð þið blanda saman spelti, salti og vínsteinslyftidufti.
  2. Hrærið agavesírópi og kókosolíu saman og hellið út í speltið.
  3. Blandið saman 50 ml sojamjólk og sítrónusafanum. Látið standa á borðinu þangað til mjólkin fer að mynda kekki (í um 15 mínútur). Bætið út í speltið.
  4. Hrærið allt saman og bætið afganginum af sojamjólkinni saman við speltið. Þið gætuð þurft meira eða minna af mjólkinni.
  5. Saxið ólífur og sólþurrkaða tómata smátt og setjið út í deigið.
  6. Hrærið deigið varlega saman. Hrærið alls ekki of mikið (veltið því til svona 8-10 sinnum, rétt svo til að blanda öllu saman).
  7. Gætið þess að deigið verði ekki of blautt. Deigið á að vera þannig að það hægt sé að móta bollur með góðu móti án þess að hægt sé að hnoða það.
  8. Skiptið deiginu í 12 hluta og mótið bollur. Einnig er gott að nota ískúluskeið.
  9. Bakið við 225°C í 15-20 mínútur.

Gott að hafa í huga

  • Í staðinn fyrir sólþurrkaða tómata og ólífur má nota t.d. rúsínur, furuhnetur (pine nuts), ristuð sesamfræ, sinnepsfræ, graskersfræ og margt fleira.
  • Ef þið finnið aðeins sólþurrkaða tómata í olíu má þerra olíuna með eldhúsþurrku en einnig hef ég notað þessa aðferð: Setjið sólþurrkuðu tómatana í sigti og hellið sjóðandi heitu vatni yfir þá (um 500 ml eða svo). Þerrið tómatana með eldhúsþurrku.
  • Í staðinn fyrir sojamjólk getið þið einnig notað haframjólk, hrísmjólk, möndlumjólk eða undanrennu.
    Ef þið notið súrmjólk, AB mjólk eða jógúrt má sleppa sítrónusafanum.
  • Ef kókosolían er hörð má stinga krukkunni í heitt vatn í nokkrar mínútur þar til hún verður fljótandi.

Ummæli um uppskriftina

Engin ummæli hafa verið rituð

Skrifa ný ummæli

Vinsamlegast athugið að reiti merkta með * þarf að fylla út.
 
Innihald þessa svæðis verður ekki sýnilegt almenningi.
Þessi spurning hér að neðan er til að varna því að spamvélar geti sett inn sjálfvirkar færslur.
Vinsamlegast leggðu saman tölurnar og skrifaðu niðurstöðurnar. T.d. fyrir einn plús þrír, skaltu skrifa 4.
níu plús fjórir eru