Detox uppskriftir

Síða 2 af 3

Detox þýðir eiginlega afeitrun. Ég myndi samt frekar kalla detox hreingerningu því alveg eins og við þrífum eldhússkápana fyrir jól er gott að gera smá hreingerningu á líkamanum eftir jól.

Uppskriftirnar í þessum flokki eru samantekt á þeim uppskriftum sem ættu að hreinsa og næra líkamann meira en flestar aðrar uppskriftir á vefnum mínum (þó allar séu þær auðvitað hollar)...þessar fá bara nokkur aukastig fyrir hollustu.

Ég er ekki strangtrúuð í svona afeitrunarmálum og er hrifnari af því að líkaminn aðlagist hollu mataræði dags daglega án aukaefna, bragðefna, litarefna o.s.frv. en mér finnst samt gott öðru hvoru að skera nokkuð á mjólkur- og kornvörur, hnetur og sojavörur í nokkra daga og auka þeim mun meira ávexti, grænmeti, tærar súpur og heimatilbúið te og ferska ávaxta- og grænmetissafa. Hjá þeim sem nota einhvers konar unnar matvörur að jafnaði (t.d. pakkasúpur, tilbúna rétti, kex, álegg o.fl., o.fl.) er sérstaklega mikilvægt að hreinsa út aukaefnin sem bætt er í þess konar vörur. Ekki misskilja mig samt...það er ekki hægt að tappa af aukaefnum í líkamanum með því að svolgra engiferte!!! Málið er aðeins flóknara en svo og það er auðvitað alltaf best að sleppa unnum matvörum.

Flestum líður yfirleitt vel eftir svolitla hreingerningu og fólki finnst það vera léttara á sér eftir á. Öllu má þó ofgera og ekki er mælt með afeitrun fyrir þá sem eru heilsuveilir fyrir og ekki heldur fyrir börn eða ófrískar konur. Ekki er heldur mælt með afeitrun í langan tíma í senn þar sem líkaminn fer í föstuástand þ.e. hann fer að búa sig undir hungursneyð og það fer aldrei vel með líkamann að rugla hann svoleiðis. Það er einnig ákaflega mikilvægt að ráðfæra sig við lækni eða næringarfræðing ef á að fara út í alvöru djúphreinsun.

Athugið að uppskriftirnar eru mis-detox vænar þ.e. best er auðvitað að drekka sem mestan vökva eins og te og tærar súpur en síður t.d. soðið grænmeti (nema það sé gufusoðið). Það ætti þó ekki að stoppa ykkur í að nota þessar uppskriftir því þær eru léttar, fitulitlar, innihalda helling af vítamínum, trefjum og öðru góðu fyrir okkur og henta sérlega vel þessa fyrstu mánuði eftir jólin þegar við erum svolítið hæg á okkur, andlega og líkamlega.

Ég vona að þessar hugmyndir nýtist ykkur. Uppskriftaflokkurinn verður opinn fram í febrúarmánuð.


Sólskin í skál, algjört vítamínsalat

Gulrótar-, ananas og rúsínusalat frá Kenya

Þetta salat hef ég fengið oft og mörgum sinnum í Kenya. Ég hef líka fengið salatið í Tanzaníu enda kannski ekki skrýtið þar sem ananas vex á báðum stöðum og er mikið notaður í matargerð.

Hálsbólgudrykkurinn fíni

Hálsbólgudrykkur

Ég krækti mér í svæsna hálsbólgu um daginn (sem er óvenjulegt því ég verð aldrei lasin) og vantaði eitthvað til að mýkja hálsinn sem var eins og sandpappír af grófleika 12.

Bláberjasósa, sprengfull af hollustu

Heit bláberja- og vanillusósa

Dásemdarsósa sem er (ég get svo svarið það) góð út á allt, hvort sem það er ís, í drykki (smoothie), yfir kökur, í jógúrt eða bara ein og sér upp úr pottinum.

Gott kex fyrir maga og meltingu

Hörfræskex

Hörfræ eru alveg sérstaklega holl. Þau eru trefjarík og losa um í pípulögninni okkar þannig að ekkert ætti að stíflast! Hörfræ eru einnig mikilvæg í baráttunni við að sporna gegn krabbameini t.d.

Detoxdrykkur

Hreinsandi peru-, gulrótar- og engifersafi

Þennan hreinsandi (detox) drykk er gott að gera í safapressu en fyrir þá sem eiga ekki slíka græju er alveg hægt að mauka perurnar í blandara en þá er drykkurinn aðeins þykkari.

Hreinsandi og nærandi drykkur

Hreinsandi sítrusdrykkur

Þessi drykkur minnti mig alveg svakalega á Afríku þegar ég var að smakka hann til og sérstaklega á Kenya en þar eru appelsínur eilítið súrari en þessar sem við eigum að venjast á Íslandi.

Algjör járnkarl

Járnríkur aprikósudrykkur

Þurrkaðar aprikósur innihalda helling af járni og appelsínusafinn hjálpar til við upptöku járnsins í líkamanum.

Vítamíndrykkur fullur af járni

Járnríkur og hreinsandi vítamíndrykkur

Ég er sko ekkert að ýkja með því að nefna þennan drykk vítamíndrykk því hann er stútfullur af hollustu.

Vítamínríkur sellerísafi

Járnríkur sellerí-, rauðrófu- og gulrótarsafi

Þessi kemur beint af beljunni svo að segja eða réttara sagt úr bókinni Innocent smoothie recipe book: 57 1/2 recipes from our kitchen to yours og er ein af mínum uppáhalds.

Frískandi og fullur af C vítamíni

Jarðarberja- og vatnsmelónudrykkur

Þessi drykkur er í miklu uppáhaldi og það er sérstaklega áferðin sem mér finnst svo frábær því hún er loftkennd og freyðandi.

Jarðarberjadrykkur, fullur af hollustu

Jarðarberjahristingur

Vissuð þið að til eru 600 afbrigði af jarðarberjum? Þetta var fróðleikskorn dagsins í boði CafeSigrun!

Mmmm kósí jólaglögg, svoo góður og hollur drykkur

Jólaglögg (óáfengt)

Ég smakkaði í fyrsta skipti jólaglögg (óáfengt að sjálfsögðu) í jólaboði hjá yfirmanni mínum í verslun sem ég vann í með skóla í mörg ár.  Ég gleymi því ekki hvað mér fannst jólaglöggið gott.

Litríkt og hollt salat

Kachumbari (tómat- og rauðlaukssalat)

Uppskriftin kemur frá Lucy Mwangi mágkonu minni sem er frá Kenya.

Sumarlegur og frískandi safi

Kiwi- og límónusafi

Þegar Jóhannes smakkaði þennan drykk sagði hann: „Þennan drykk væri ég til í að kaupa oft”.

Kjúklingabaunaspírur vinstra megin en óspíraðar baunir hægra megin

Kjúklingabaunaspírur

Kjúklingabaunaspírur eru æðislega góðar og komu mér reglulega á óvart. Það er auðveldast að spíra þær af þeim baunum sem ég hef prófað og þær geymast ágætlega í kæli.

Járn- og vítamínríkt salat

Klettasalat með rauðrófum og parmesan

Ég fékk svipað salat á krá einni í London sem er þekkt fyrir góðan mat enda er eigandi staðarins enginn annar en Gordon Ramsay.

Kókos og hvítlaukmaukið

Kókos- og hvítlauksmauk (coconut and garlic chutney) frá Tanzaníu

Eða eiginlega ekki frá Tanzaníu heldur frá Indlandi því kókosmauk er mikið notað þar. Ég smakkaði þetta meðlæti hins vegar á indverskum veitingastað í Moshi, Tanzaníu.

Kókosbananar með afrískum áhrifum

Kókosbananar með afrískum áhrifum

Afbragðsgott sem meðlæti með krydduðum mat t.d. indverskum og thailenskum en einnig hentar hann vel með bragðmiklum afrískum mat.

Afar hollur og frískandi drykkur

Krækiberja- og engiferdrykkur

Þessi drykkur er ferskur og frísklegur og upplagður á haustin þegar maður á krækiber.

Léttur og fínn hummus

Kúrbítshummus

Þessi uppskrift er úr Rawvolution bókinni minni sem er hráfæðisbók. Hummusinn er léttari en hefðbundinn hummus enda er notaður kúrbítur (zucchini, courgette) í stað kjúklingabauna.

Grænar og vænar límónukökur, afskaplega hressandi og góðar

Límónu- og macadamiakökur

Macadamiahnetur minna mig alltaf á Afríku og þá sérstaklega Kenya því í hvert skipti sem ég fer þangað kaupi ég hrúgu af macadamiahnetum enda eru þær ódýrar þar.

Mango- og engiferssúpa frá Kenya á masai dúk

Mango- og engiferssúpa frá Masai Mara

Þessa súpu fékk ég hjá stúlku sem heitir Margaret Ngugi en hún er kokkur á Mara Simba Lodge í Masai Mara í Kenya en þar dvaldi ég í nokkra daga í febrúar 2007.

Melónu-, peru- og ananasdrykkur

Þessi drykkur (smoothie) er einstaklega nærandi og hreinsandi því bæði melónur og perur eru trefjaríkar. Góður drykkur fyrir sál og líkama!

Ferskt og gott salat

Möndlu- og agúrkusalat

Þetta salat er alveg hreint dæmalaust hollt og hreinsandi. Það er beinlínis barmafullt af vítamínum, próteinum, kalki, trefjum, steinefnum, andoxunarefnum og ég veit ekki hvað.

Mung baunaspírur vinstra megin en óspíraðar baunir hægra megin

Mung baunaspírur

Þessar hefðbundnu baunaspírur sem maður kaupir t.d. í austurlenskan mat eru yfrleitt mung baunir. Það er auðvelt að láta þær spíra og þær eru afar bragðgóðar.