Epla- og valhnetubaka

Þessi baka er alveg svakalega holl því hún inniheldur holla fitu (omega 3 fitusýrur) úr valhnetunum sem og prótein, trefjar, flókin kolvetni og annað gott fyrir okkur. Talið er neysla á valhnetum minnki líkur á hjartasjúkdómum sem og fleiri sjúkdómum svo við ættum eiginlega öll að borða svona eins og lúku á hverjum degi (nema ekki þeir sem eru með hnetuofnæmi...það væri ekki svo sniðugt). Bökuna má bera fram kalda en einnig má hita hana í ofni áður en hún er borin fram. Uppskriftin er glúteinlaus og hentar þeim sem eru jurtaætur (þ.e. ef notað er hlynsíróp í stað hunangs).

Athugið að þið þurfið matvinnsluvél og 20 sm kringlótt form fyrir þessa uppskrift.

Þessi uppskrift er:

  • Án glúteins
  • Án mjólkur
  • Án eggja
  • Vegan

Epla- og valhnetubaka

Gerir eina köku

Innihald

  • 250 g valhnetur 
  • 180 g döðlur, saxaðar gróft
  • 3 sæt epli (græn eða bleik), skræld og sneidd þunnt
  • Safi af 1 sítrónu
  • 500 ml vatn
  • 0,5 tsk kanill
  • 0,25 tsk negull
  • 2 msk hreint hlynsíróp eða hunang (acacia)
  • 125 ml hreinn eplasafi
  • 40 g rúsínur (einnig má nota döðlur)

Aðferð

  1. Setjið valhnetur og döðlum í matvinnsluvél. Blandið í um 40 sekúndur eða þangað til allt er orðið grófhakkað án þess að verða að mauki.
  2. Klæðið 20 sm kringlótt form með bökunarpappír og þrýstið blöndunni ofan í, bæði í botn og upp á hliðar.
  3. Kælið í ísskáp í um klukkutíma.
  4. Kjarnhreinsið eplin og sneiðið frekar þunnt. Setjið í skál.
  5. Blandið vatninu og sítrónusafanum saman og hellið yfir eplin. Látið standa í 10 mínútur.
  6. Sigtið sítrónuvatnið vel frá eplunum.
  7. Setjið eplasneiðarnar á stóra pönnu ásamt kanil, negul, rúsínum, hlynsírópi og eplasafa.
  8. Hitið í um 15-20 mínútur eða þangað til eplin verða frekar mjúk.
  9. Takið eplasneiðarnar og rúsínurnar af pönnunni með götóttum spaða þannig að vökvinn leki af.
  10. Látið vökvann malla á pönnunni í um 5 mínútur við frekar háan hita.
  11. Hellið vökvanum í flösku eða í skál og kælið.
  12. Dreifið eplasneiðunum jafnt yfir botninn á kökunni. Hellið eða penslið vökvanum af pönnunni yfir eplin.
  13. Dreifið aðeins meiri kanil yfir ef þið viljið.
  14. Það má stinga bökunni í ofninn og hita við 100°C í um 20 mínútur.

Gott að hafa í huga

  • Það er gott að bera fram bökuna með hollum vanilluís, cashewhneturjóma eða þeyttum rjóma fyrir þá sem borða slíkt.
  • Nota má pecanhnetur í staðinn fyrir valhnetur.

Ummæli um uppskriftina

Lísa Hjalt
12. des. 2010

mmmmm, man þegar ég gerði þessa fyrst ... er með soft spot fyrir valhnetum, eins og þú veist ;-)

sigrun
12. des. 2010

Þú þarft að fara að endurnýja kynnin við valhneturnar :)

Skrifa ný ummæli

Vinsamlegast athugið að reiti merkta með * þarf að fylla út.
 
Innihald þessa svæðis verður ekki sýnilegt almenningi.
Þessi spurning hér að neðan er til að varna því að spamvélar geti sett inn sjálfvirkar færslur.
Vinsamlegast leggðu saman tölurnar og skrifaðu niðurstöðurnar. T.d. fyrir einn plús þrír, skaltu skrifa 4.
einn plús tveir eru