Chili non carne (chillipottréttur með sojakjöti)

Þessi réttur lætur ekki mikið yfir sér, en er mjög góður og einfaldur, upplagður í miðri viku. Best er að gera svolítið stóran skammt og taka með sér í nestisboxið eða borða í hádegismat heima. Uppskriftin er án glúteins en athugið sojakjötið sem þið kaupið upp á ef skyldi vera glútein í því (ætti ekki að vera). Kaupið sojakjötið endilega úr heilsubúð og það ætti að vera Non-GMO þ.e. ekki erfðabreytt.

Þessi uppskrift er:

  • Án glúteins
  • Án mjólkur
  • Án eggja
  • Án hneta
  • Vegan

Chili non carne (chillipottréttur með sojakjöti)

Fyrir 4

Innihald

  • 150 g sojakjöt (hakk)
  • 1 gerlaus grænmetisteningur 
  • 0,5 tsk hvítlaukssalt (t.d. frá Pottagöldrum) eða 1 hvítlauksrif, saxað smátt
  • 1 laukur, afhýddur og saxaður smátt
  • 1 tsk kókosolía
  • 2 tsk cumin (ekki kúmen)
  • 1 tsk chili pipar
  • Smá klípa oregano
  • 0,5 tsk svartur pipar
  • 1 tsk agavesíróp 
  • 2 msk kartöflumjöl eða spelti
  • 460 g saxaðir tómatar úr dós
  • 460 g nýrnabaunir úr dós
  • 1 vel þroskað avocado, afhýtt og skorið í teninga

Aðferð

  1. Setjið sojakjötið í skál og bútið gerlausa grænmetisteninginn út í skálina.
  2. Sjóðið vatn og hellið nægilega mikið af heitu vatni yfir sojakjötið þannig að það fljóti yfir. Hrærið mjög vel og hellið meira vatni út ef þarf. Látið sojakjötið liggja í vökvanum í um 30 mínútur.
  3. Afhýðið laukinn og saxið smátt. Ef notað er hvítlauksrif afhýðið það þá og saxið smátt.
  4. Hitið kókosolíu í djúpum potti. Steikið laukinn í 5-7 mínútur og bætið hvítlauknum út í (ef ekki er notað hvítlauksduft). Notið vatn ef þarf meiri vökva.
  5. Látið sojakjötið út í (ætti að vera búið að drekka í sig allan vökvann).
  6. Blandið saman cumen, chili pipar, oregano, hvítlaukssalti, pipar, agavesírópi og kartöflumjöl og hellið yfir sojakjötið.
  7. Sjóðið við meðalhita í 5 mínútur og hrærið í oft á meðan.
  8. Bætið tómötunum og safanum af þeim í pottinn.
  9. Látið vökvann renna af nýrnabaununum og setjið baunirnar í pottinn. Látið krauma í 25-30 mínútur.
  10. Afhýðið avocado, fjarlægið steininn og saxið í bita.
  11. Skiptið pottréttinum jafnt á diska og setjið avocadobita ofan á hvern disk. Einnig má bera fram avocadoið á sér diski.

Gott að hafa í huga

  • Berið fram með byggi eða hýðishrísgrjónum. Einnig er gott að nota nýbakað chapati með réttinum.
  • Það er mjög gott að nota meira grænmeti í réttinn eins og t.d. sveppi, spergilkál, maískorn, paprikur o.fl.
  • Ef þið viljið búa til meiri mat úr þessum rétti (ef margir eru í mat), þá mætti bera fram „hollar” nachosflögur (úr heilsubúð). Nachosflögur eru svo sem aldrei hollar en þær sem þið kaupið í heilsubúð eru margfalt hollari en þær sem keyptar eru í matvöruverslunum.
  • Gott er að bera fram 5% sýrðan rjóma (frá Mjólku, án gelatíns) með matnum, eða hreina jógúrt.
  • Ef kókosolían er hörð má stinga krukkunni í heitt vatn í nokkrar mínútur þar til hún verður fljótandi.
  • Nota má aðra olíu en kókosolíu, t.d. vínberjakjarnaolíu eða repjuolíu.
  • Gerlausir grænmetisteningar fást í heilsubúðum og stærri matvöruverslunum.
  • Ef þið eruð ekki viðkvæm fyrir geri getið þið notað venjulega, lífrænt framleidda grænmetisteninga.

Ummæli um uppskriftina

Engin ummæli hafa verið rituð

Skrifa ný ummæli

Vinsamlegast athugið að reiti merkta með * þarf að fylla út.
 
Innihald þessa svæðis verður ekki sýnilegt almenningi.
Þessi spurning hér að neðan er til að varna því að spamvélar geti sett inn sjálfvirkar færslur.
Vinsamlegast leggðu saman tölurnar og skrifaðu niðurstöðurnar. T.d. fyrir einn plús þrír, skaltu skrifa 4.
tólf plús þrír eru