Cashewís

8. maí, 2006

Þetta er ægilega góður ís og hentar vel fyrir þá sem eru með mjólkuróþol eða vilja engar dýraafurðir og/eða eru jurtaætur (enska: vegan). Hann er troðfullur af próteinum og vítamínum og það besta er að það er enginn sykur í ísnum. Hann er ekki léttur þ.e. cashewhnetur og hafrarjómi innihalda fitu en þessi fita er ekki óholl þ.e. það er tiltölulega lítið af mettaðri fitu í hnetum og hafrarjóma og hækkar þar af leiðandi ekki slæma kólesterólið í blóðinu. Það getur meira að segja lækkað!

Athugið að þið þurfið ekki ísvél til að útbúa þessa uppskrift en nauðsynlegt er að eiga matvinnsluvél.

Senda uppskrift

Prenta uppskrift

Setja í uppskriftabox

Ís án mjólkur, aðaluppistaðan er cashewhnetur

0 ummæli

Þessi uppskrift er:

Án mjólkur
Án eggja
Vegan

Cashewís

Fyrir 3-4

Innihald

100 g döðlur, saxaðar gróft
75 ml appelsínusafi
2 vel þroskaðir bananar
75 g cashewhnetur
225 ml sojamjólk
200 ml hafrarjómi
1 tsk vanilludropar (úr heilsubúð)

Aðferð

Saxið döðlurnar gróft og setjið í pott ásamt appelsínusafanum. Sjóðið þangað til döðlurnar verða að mauki. Kælið vel.
Setjið cashewhneturnar í matvinnsluvél og malið í um 30 sekúndur eða þangað til þær eru orðnar fínkornóttar og vel malaðar. Skafið hliðar matvinnsluvélarinnar og bætið 50 ml af sojamjólkinni út í. Maukið í um 2 mínútur eða þangað til áferðin verður flauelismjúk.
Afhýðið banana og bætið þeim út í matvinnsluvélina. Látið vélinna vinna í um 30 sekúndur. Smakkið blönduna...hún er unaðsleg!!!
Bætið döðlunum út í matvinnsluvélina og maukið í 10 sekúndur.
Á meðan vélin vinnur skuluð þið hella hafrarjómanum og afganginum af sojamjólkinni út í.
Ef notuð er ísvél: Setjið blönduna í ísvél í um 30 mínútur og setjið svo í plastbox. Setjið boxið í frystinn og frystið í nokkrar klukkustundir eða þangað til ísinn er tilbúinn.
Ef ekki er notuð ísvél:
Hellið blöndunni í grunnt plastbox og setjið í frystinn. Takið út frystinum á um hálftíma - klukkustundar fresti og brjótið ískristallana ef þeir myndast. Endurtakið þangað til erfitt er orðið að hræra í blöndunni.
Látið ísinn þiðna í ísskáp í um 30-40 mínútur áður en hann er borinn fram. Þannig verður auðveldara að skafa úr boxinu.

Gott að hafa í huga

Fyrir súkkulaðiútgáfu má setja 2 msk af kakói út í sem og 50 g af lífrænt framleiddu, dökku súkkulaði með hrásykri.
Ef þið þolið mjólk getið þið notað matreiðslurjóma og undanrennu í staðinn fyrir hafrarjóma og sojamjólk. Ef þið þolið ekki glútein getið þið notað sojarjóma eða matreiðslurjóma í staðinn fyrir hafrarjómann.
Ég nota hafrarjómann frá Oatly. Hann fæst í flestum stærri matvöruverslunum og heilsubúðum.
Nota má möndlur (afhýddar) og macadamiahnetur í staðinn fyrir cashewhnetur.