Bygg- og cashewhnetuborgarar

Þetta eru góðir grænmetis- og hnetuborgarar sem henta vel sem hvers dags matur og gott að eiga þá í frystinum. Það er lang best að gera nokkuð mikið magn í einu þegar maður hefur nógan tíma og frysta (nema maður hafi nógan tíma í miðri viku… sem fáir hafa). Ég var að hugsa þegar ég útbjó þessa uppskrift að hún er eiginlega vonlaus fyrir þá sem hafa einhvers óþol eða ofnæmi því í uppskriftinni er glútein, hnetur, fræ, laukur og egg. Ég var að hugsa um að bæta smá mjólk út í hana líka til að hafa hana 100% “ó-þolandi” (lélegur brandari). En engar áhyggjur…, ef þið hafið ofnæmi/óþol má finna aðra borgara hér á vefnum sem henta betur. Fyrir þá sem hafa ekkert ofnæmi/óþol eru borgararnir dæmalaust góðir. Ég hef oft tekið þessa borgara með mér í nesti hvort sem er í vinnuna eða í útileguna því auðvelt er að hita þá upp. Uppskriftin hentar líka vel í hnetusteik.

Nauðsynlegt er að nota matvinnsluvél fyrir þessa uppskrift.

Þessi uppskrift er:

  • Án mjólkur

Þessa uppskrift er auðvelt að gera:

  • Án glúteins

Bygg- og cashewhnetuborgarar

Gerir 16 borgara

Innihald

  • 480 g kjúklingabaunir (vatnið sigtað frá)
  • 200 g bygg, ósoðið
  • 1 laukur, afhýddur og saxaður smátt
  • 1 tsk kókosolía
  • 125 g cashewhnetur, þurrristaðar
  • 1 egg
  • 60 g tahini (sesammauk)
  • 1 tsk cumin
  • 1 tsk turmeric
  • 0,5 tsk karrí
  • 2 msk tamarísósa
  • 1 msk sítrónusafi
  • 1 gerlaus grænmetisteningur, skorinn í litla bita
  • 1 lítil gulrót, skræld og rifin
  • 40 g speltbrauðrasp (ég nota líka stundum spelt hrökkbrauð)
  • Nokkrar msk vatn (ef þarf)

Aðferð

  1. Sjóðið byggið samkvæmt leiðbeiningum á pakka. Setjið til hliðar.
  2. Hitið pönnu (án olíu) og þurrristið cashewhneturnar í 3-5 mínútur eða þangað til þær taka lit. Takið hneturnar af pönnunni og kælið aðeins.
  3. Afhýðið laukinn og saxið smátt.
  4. Skrælið gulrótina og rífið á rifjárni.
  5. Hellið vatninu af kjúklingabaununum.
  6. Skerið grænmetisteninginn í mjög litla bita.
  7. Hitið kókosolíu á pönnunni. Steikið laukinn í 7-10 mínútur. Notið vatn ef þið þurfið að bæta við vökva.
  8. Setjið cashewhneturnar í matvinnsluvél og malið þangað til þær eru næstum því orðnar að mauki (eða mjög fínmalaðar).
  9. Setjið grænmetisteninginn út í og maukið í nokkrar sekúndur.
  10. Bætið brauðsneiðinni eða hrökkbrauðinu saman og malið í nokkrar sekúndur. Setjið í stóra skál.
  11. Setjið kjúklingabaunir, egg, tahini, cumin, turmeric, karrí, tamarísósu og sítrónusafa út í matvinnsluvélina.
  12. Maukið vel (mér finnst gott að hafa áferðina frekar mjúkaen þið ráðið hvort hún sé grófari). Setjið nokkrar matskeiðar af vatni út í ef þarf.
  13. Setjið blönduna út í stóru skálina og bætið byggi, gulrótum, lauk og brauðraspi út í.
  14. Kælið í 30 mínútur í ísskáp.
  15. Mótið borgara með höndunum.
  16. Setjið bökunarpappír á bökunarplötu og setjið borgarana á plötuna.
  17. Bakið við 180°C í 30-40 mínútur og snúið borgurunum við einu sinni.

Gott að hafa í huga

  • Berið fram með sinnepssósu og salati og jafnvel meira af soðnu byggi.
  • Nota má hýðishrísgrjón í staðinn fyrir bygg.
  • Ef kókosolían er hörð má stinga krukkunni í heitt vatn í nokkrar mínútur þar til hún verður fljótandi.
  • Nota má aðra olíu en kókosolíu, t.d. vínberjakjarnaolíu eða repjuolíu.
  • Gerlausir grænmetisteningar fást í heilsubúðum og stærri matvöruverslunum.
  • Ef þið eruð ekki viðkvæm fyrir geri getið þið notað venjulega, lífrænt framleidda grænmetisteninga.
  • Nota má sojasósu í staðinn fyrir tamarisósu en athugið að sojasósan inniheldur hveiti.
  • Nota má heslihnetur (afhýddar og þurrristaðar) í staðinn fyrir cashewhnetur.

Ummæli um uppskriftina

Engin ummæli hafa verið rituð

Skrifa ný ummæli

Vinsamlegast athugið að reiti merkta með * þarf að fylla út.
 
Innihald þessa svæðis verður ekki sýnilegt almenningi.
Þessi spurning hér að neðan er til að varna því að spamvélar geti sett inn sjálfvirkar færslur.
Vinsamlegast leggðu saman tölurnar og skrifaðu niðurstöðurnar. T.d. fyrir einn plús þrír, skaltu skrifa 4.
tíu plús fjórir eru