Svekkelsi og bækur

Ég er enn þá svo miður mín að ég get varla skrifað. Er búið að taka mig 2 daga að 'safna mér saman' eins og sagt er á ensku. Ég var að fletta blaðinu síðastliðinn föstudagsmorgunn og sá þá frétt sem ég fékk mig næstum því til að grenja. U2 var með bókaáritun ('U2 by U2') fyrir 'hardcore fans' í bókabúð hérna í nágrenninu. OK veit ekki HVAÐA bókabúð en hún hefur ÖRUGGLEGA verið mjög nálægt. Mér finnst að það eigi sko að skilgreina HVAÐ 'hardcore fan' þýðir. Ég á alla diskana, búin að fara á 2 tónleika og veit örugglega meira um þá en þeir sjálfir og mér finnst að ég hefði átt að fá að fara. Svo virðist sem miðarnir hafi verið auglýstir nokkrum klukkutímum áður en þeir mættu á staðinn. Þetta voru bara heppnir aðdáendur, ekkert annað :( Spáið í það ef ég hefði nú fengið áritaða bók, af þeim öllum og mynd af mér með þeim? (er ekkert búin að hugsa svo mikið um það).

Við fórum smá rúnt á laugardaginn eins og við gerum oft. Fórum í Fresh and Wild og keyptum inn alls konar heilsudót. Fórum svo í Waterstones bókabúðina (nei ég var ekki að vonast til þess að þeir væru þar enn þá...fór bara að hugsa svo mikið um bækur.....aðallega uppskriftabækur að ég gat ekki annað en skroppið. Við búum rétt hjá stærstu bókabúð Evrópu svo það er erfitt að fara EKKI þangað öðru hvoru. Bara uppskriftabækurnar eru álíka margar og allar bækurnar til samans í Pennanum Austurstræti he he). Ég keypti 2 uppskriftabækur (er nýbúin að kaupa eina á netinu sem heitir 'The RAW Gourmet' eftir Naomi Shannon EN hún var notuð svo hún telst ekki með (er það nokkuð? hmmmmmm). Ég keypti á laugardaginn bók sem heitir 'Bread: From ciabatta to rye' eftir Lindu Collister (Nigella Lawson segist hafa lært að baka brauð af henni), aðra sem heitir 'Vegan Cooking' eftir Nicola Graimes. Hmm nú hugsa margir "já en hún er hvorki í hráfæði né jurtafæðu svona einvörðungu". Nei nei en það eru samt margar uppskriftir í bókunum sem eru svo sniðugar (og svo voru myndirnar líka svo fallegar. Átti inni bókakaup því ég keypti enga í Danmörku (sjáið þið 'fíknina', kannast einhver við mynstrið.... endalausar afsakanir he he).

Við fórum annars á prýðisgóðan veitingastað á laugardagskvöldinu. Við höfum reyndar farið áður en ég mundi ekki mikið eftir staðnum svo sem. Núna myndi ég alveg muna eftir honum því maturinn var stórgóður. Staðurnn heitir 'Osatsuma'. Þetta er svona austurlenskur núðlustaður, með sushi, núðlur, bentobox, sashimi o.fl., o.fl. Mjög bragðgott og ljúft. Ég fékk mér grænmetisnúðlur, snöggsteiktar og Jóhannes fékk sér kjúklinganúðlur. Skammtarnir eru stórir og við borguðum bara 15 pund fyrir allt saman (um 1800 krónur), 2 núðlurétti og vatnsflösku!! Mæli með þessum stað ef þið viljið góðar núðlur í London (soho). Við gátum ekki stillt okkur um að fara svo á Neal's Yard Salad Bar og fá okkur eina holla köku. Mmmmmmmmmm. Vildi óska þess að þeir gæfu út uppskriftabók svo við hin gætum framreitt kannski eitthvað í líkingu við þetta fínerí. Ef einhver 'hollustusinnaður' á leið til London þá er Neal's Yard veitingastaðurinn alger skylda.