Magnamín og þreyttir Íslendingar

Mér finnst frábært þegar fólki gengur vel, alveg sama hvar og hvenær. Ég er voða glöð fyrir hönd Magna sem er eflaust að standa sig voða vel. Ég hef ekki séð einn einasta þátt en það eru allir á öndinni yfir þessu hér á Klakanum. Það er bara eitt pínu ponsu atriði sem stendur í mér. Ég fatta ekki alveg að Íslendingar séu að drita smsum í ofboði í samstilltu þjóðarátaki (svona eins og þegar um snjóflóð sem eyðir út heilu þorpi er ræða) þar sem ýmsir framámenn þjóðarinnar hvetja til átaks og vökunótta o.s.frv. Ég hélt að maður ætti að komast áfram á hæfileikum og að ef maður væri nógu góður þá yrði maður kosinn hvort eð er? Er ég kannski að misskilja? Mér finnst svona pínu niðurlægjandi að þurfi einhvers konar 'hópefli' og 'átak' og 'múgsefjun' og 'áróður' og ég veit ekki hvað til að Koma honum Magna okkar áfram.

Það væri best fyrir hann að detta út núna. Hann er búinn að fá það pöblisití sem hann þarf og það er undir honum og umboðsmönnum komið hvernig spilað er úr því. Eflaust margir vegir opnir þar. Það væru ægileg örlög fyrir hann að vinna (að mínu mati). Hefur þetta fólk sem er í samstilltu þjóðarátaki eitthvað spáð í örlög aumingja stráksins ef hann vinnur. Er það það sem landinn vill? Að hann þurfi að dúsa með ömurlegri (ÖMURLEGRI) hljómsveit í burtu frá fjölskyldunni í ár? Hefur EINHVER heyrt um hljómsveitina frá því í fyrra sem sigraði? Nei hélt ekki. Eru Íslendingar virkilega svona hégómagjarnir að þeir æsast allir upp þegar þeir heyra Tommy Lee hrópa eitthvað um Iceland, Iceland? Er það þessi sefjun sem Íslendingar eru að lenda í, nóg til að halda hálfri þjóðinni vakandi og styrkja símafyrirtæki um einhverja tugi milljóna?

Held það væri hollt fyrir Íslendinga að fá smá svefn og hugsa málið. Drengurinn er búinn að sýna sig og sanna (að mér skilst) en vill hann í alvörunni vinna þetta?