Blaðlauks- og kartöflumaukssúpa

Þessi súpa er einföld, bragðgóð og ódýr og alveg upplögð í lok mánaðarins þegar buddan er farin að léttast. Súpan hentar vel þeim sem hafa mjólkuróþol sem og glúteinóþol. Hún hentar einnig þeim sem eru jurtaætur (enska: vegan). Súpuna má frysta og hita upp síðar. Athugið að nota þarf matvinnsluvél til að mauka súpuna en einnig má nota töfrasprota eða blandara.

Þessi uppskrift er:

  • Án glúteins
  • Án mjólkur
  • Án eggja
  • Án hneta
  • Vegan

Blaðlauks- og kartöflumaukssúpa

Fyrir 4

Innihald

  • 1 tsk kókosolía
  • 1 blaðlaukur, saxaður gróft (skiljið lítinn bút úr miðjunni eftir)
  • 4 kartöflur afhýddar og skornar í grófa bita
  • 1 hvítlauksrif, saxað gróft
  • 1 laukur, saxaður gróft
  • 2 stórir gerlausir grænmetisteningar 
  • 1 lítri vatn
  • 5 lárviðarlauf
  • 0,5 tsk salt (Himalaya eða sjávarsalt)
  • 0,5 tsk svartur pipar

Aðferð

  1. Saxið blaðlaukinn gróft (allt nema svolítinn bút úr miðjunni).
  2. Skrælið kartöflurnar og saxið gróft.
  3. Afhýðið hvítlauksrifið og laukinn og saxið gróft.
  4. Hitið kókosolíuna í stórum potti.
  5. Hitið blaðlaukinn, hvítlaukinn, laukinn og kartöflurnar í pottinum í smástund þangað til mjúkt (nokkrar mínútur). Ef þarf meiri vökva í pottinn, notið þá vatn.
  6. Bætið lárviðarlaufunum út í ásamt vatninu og grænmetisteningunum.
  7. Látið malla við vægan hita í 20 mínútur eða þangað til kartöflurnar eru orðnar mjúkar.
  8. Kælið aðeins og maukið svo í matvinnsluvél eða blandara eða með töfrasprota.
  9. Rétt áður en súpan er borin fram skerið þá niður afganginn af blaðlauknum í mjóar sneiðar og setjið í súpuna (bara til að fá aðeins meiri áferð og eitthvað til að bíta í..má líka sleppa).
  10. Saltið og piprið.

Gott að hafa í huga

  • Súpan er afar góð með nýbökuðu, grófu snittubrauði.
  • Gott er að þykkja súpuna með svolítilli kókosmjólk. Hún gefur aukna fyllingu og súpan verður saðsamari þannig.
  • Ef kókosolían er hörð má stinga krukkunni í heitt vatn í nokkrar mínútur þar til hún verður fljótandi.
  • Nota má aðra olíu en kókosolíu, t.d. vínberjakjarnaolíu eða repjuolíu.
  • Nota má sojasósu í staðinn fyrir tamarisósu en athugið að sojasósan inniheldur hveiti.
  • Gerlausir grænmetisteningar fást í heilsubúðum og stærri matvöruverslunum.
  • Ef þið eruð ekki viðkvæm fyrir geri getið þið notað venjulega, lífrænt framleidda grænmetisteninga.

Ummæli um uppskriftina

ingibjorgd
28. jan. 2011

Alveg hreint frábær súpa sem féll vel í kramið hjá bæði stórum og smáum :) Ég bætti við lúku eða tveimur af rauðum linsubaunum og kom það mjög vel út.

Skrifa ný ummæli

Vinsamlegast athugið að reiti merkta með * þarf að fylla út.
 
Innihald þessa svæðis verður ekki sýnilegt almenningi.
Þessi spurning hér að neðan er til að varna því að spamvélar geti sett inn sjálfvirkar færslur.
Vinsamlegast leggðu saman tölurnar og skrifaðu niðurstöðurnar. T.d. fyrir einn plús þrír, skaltu skrifa 4.
einn plús einn eru