Ávaxtasalat frá Afríku

Á öllum hótelum sem ég hef komið á í Austur Afríku (og þau eru mörg) er borið fram einhvers konar ávaxtasalat í bland við kökur og pönnukökur og fleira góðgæti fyrir svanga ferðamenn. Ég fer að sjálfsögðu alltaf beinustu leið í ávaxtaskálina enda lítið fyrir mig að hafa á hinum svæðunum. Það gerir þó ekkert til því ávaxtasalötin eru alltaf góð. Reyndar veiði ég alltaf papaya ávöxtinn úr því mér finnst hann aaaaaalgjör viðbjóður og ég nota því mango í staðinn í mitt salat. Mango er þó mikið notað í Afríku svo ég er ekkert að svindla. Eina svindlið í mínu salati er að ég nota vínber en vínber eru sjaldséðir gestir á þessum slóðum. Ástaraldin er ómissandi í þetta salat en það er einmitt afríski punkturinn yfir i-ið. Það er fátt betra en að enda viðburðarríkan og heitan ævintýradag í Afríku á ávaxtasalati og tebolla (sumir reyndar kjósa kökusneið og koníak!). Það er bara ein regla sem ég hef með svona salöt. Hún er: ALDREI, ALDREI skilja eftir steina í melónum eða vínberjum. Það er fátt leiðinlegra en að bíta í gómsætt salat til þess eins að skyrpa út úr sér bragðvondum steinum. Steinar úr ástaraldinum sleppa fyrir horn því þá á að borða. Þetta salat er pakkfullt af vítamínum og trefjum og er sérlega sumarlegt.

Þessi uppskrift er:

  • Án glúteins
  • Án mjólkur
  • Án eggja
  • Án hneta
  • Vegan
  • Hráfæði

Ávaxtasalat frá Afríku

Fyrir 4 sem meðlæti

Innihald

  • Fjórðungur ananas, vel þroskaður
  • Fjórðungur vatnsmelóna, vel þroskuð
  • 1 mango, vel þroskað. Nota má papaya ef þið viljið í staðinn
  • 3 ástaraldin (enska: passion fruit), (veljið þunga og krumpaða ávexti)
  • 1 banani, ágætlega þroskaður
  • 1 lúka græn, steinalaus vínber (bara upp á litinn, má sleppa)

Aðferð

  1. Gott er að miða við að hafa alla bitana jafn stóra eða álíka og sykurmola að stærð.
  2. Skerið ananasinn í bita.
  3. Skerið vatnsmelónuna í bita og fræhreinsið.
  4. Skerið mangoið í bita (sneiðið meðfram steininum með löngum hnífi, afhýðið og notið svo bara það sem þið getið skorið í jafna bita. Afganginn má frysta og nota síðar).
  5. Skerið vínberin í helminga, fræhreinsið ef þarf.
  6. Skerið banana í frekar grófar sneiðar.
  7. Blandið öllu saman í stóra skál. Til að merja ekki ávextina er gott að setja lúku af hverjum ávexti ofan í skálina og fylla hana þannig. Þannig þarf maður ekki að hræra mikið.
  8. Skerið ástaraldinin í helminga og skafið allt úr þeim yfir salatið.
  9. Setjið plast yfir skálina ef ekki á að bera salatið fram strax.
  10. Ef salatið er ekki nægilega sætt (t.d. ef ananasinn er ekki nægilega vel þroskaður) má setja eins og 50 ml af hreinum appelsínusafa yfir salatið.

Gott að hafa í huga

  • Til að velja þroskaðan ananas: ef þið potið í botninn á honum ætti hann að gefa aðeins eftir, lyktin af botninum ætti að vera sæt og þung ananaslykt og þið ættuð að geta plokkað blað úr krónunni auðveldlega.
  • Til að velja þroskaða melónu: prófið að ýta á endana á melónunni, þeir ættu að gefa aðeins eftir. Melónan á að virka mjög þung miðað við stærð ef þið haldið á henni og ef þið bankið í hana ættuð þið að finna smá hreyfingu í kjötinu (ekki gott að útskýra ha ha).
  • Til að velja þroskað ástaraldin: ávöxturinn á að virka þungur eða álíka eins og tómatur. Hýðið á að vera krumpað.

Ummæli um uppskriftina

Engin ummæli hafa verið rituð

Skrifa ný ummæli

Vinsamlegast athugið að reiti merkta með * þarf að fylla út.
 
Innihald þessa svæðis verður ekki sýnilegt almenningi.
Þessi spurning hér að neðan er til að varna því að spamvélar geti sett inn sjálfvirkar færslur.
Vinsamlegast leggðu saman tölurnar og skrifaðu niðurstöðurnar. T.d. fyrir einn plús þrír, skaltu skrifa 4.
sex plús fjórir eru