Austurlenskar fimm krydda grænmetisnúðlur

„Fimm-krydda" hljómar kannski flókið, en er í raun er hægt að kaupa samnefnt krydd í flestum stærri matvöruverslunum og heitir þá yfirleitt „five spice" eða „chinese five spice". Þýðingin er hræðileg hjá mér, ég veit, tillögur eru vel þegnar :) Þetta er fínn svona „taka til í ísskápnum" réttur því það er hægt að setja fullt af mismunandi grænmeti í réttinn. Gott er að eiga Wok pönnu til að útbúa þennan rétt en nota má djúpa pönnu í staðinn. Athugið að svolítið maus er að útbúa svona rétti svo mér finnst best að útbúa mikið í einu og eiga fyrir a.m.k. 2 daga.

Soba núðlur eru glúteinlausar en nota má aðrar núðlur í þennan rétt. Athugið einnig að ég nota sesamolíu en ef þið hafið ofnæmi fyrir sesamfræjum má að sjálfsögðu sleppa henni.


Fimm krydda grænmetisnúðlur

Þessi uppskrift er:

  • Án mjólkur
  • Án eggja
  • Án hneta en með fræjum
  • Án hneta
  • Vegan

Austurlenskar fimm krydda grænmetisnúðlur

Fyrir 3-4

Innihald

  • 225 g soba núðlur (eða einhverjar aðrar núðlur sem ykkur finnst góðar)
  • 1 msk kókosolía
  • 1 tsk sesamolía
  • 2 gulrætur, skornar í mjóa stöngla
  • 1 sellerístöngull, skorinn í mjóa stöngla
  • 1 lítill fennel haus, skorinn í mjóa stöngla
  • 2 kúrbítar (enska: courgette), skornir í hálft og sneiddir (í litla hálfmána)
  • 1 rauður chili pipar, saxaður smátt
  • 2,5 sm biti engifer, ferskt, saxað mjög smátt
  • 3 vorlaukar, saxaðir smátt
  • 1 hvítlauksgeiri, marinn
  • 1,5  tsk kínverskt krydd (Chinese Five-Spice Powder)
  • 0,5 tsk kanill
  • 50 ml heitt vatn

Aðferð

  1. Sjóðið núðlurnar samkvæmt leiðbeiningum, skolið með köldu vatni og setjið til hliðar.
  2. Skerið gulræturnar og selleríið í örmjóar ræmur, eins og tannstöngla.
  3. Skerið fennelhausinn í tvennt, takið út harða kjarnann og skerið svo í örmjóar ræmur, eins og tannstöngla.
  4. Skerið kúrbítinn í hálft og sneiðið í litla hálfmána.
  5. Afhýðið engiferið og saxið mjög smátt.
  6. Saxið vorlaukana smátt (báða enda).
  7. Afhýðið hvítlauksgeirann og merjið.
  8. Raðið grænmetinu í litlar skálar við eldavélina.
  9. Hitið wok pönnu eða djúpa pönnu þangað til hún er orðin brennandi heit. Hitið kókosolíu þangað til hún er orðin mjög heit.
  10. Hitið engifer, chili pipar og hvítlauk í nokkrar mínútur.
  11. Bætið öllu hinu grænmetinu við og steikið í 7-8 mínútur. Ef vantar meiri vökva, bætið þá svolitlu vatni út í.
  12. Bætið kanil og kínverska kryddinu saman við og steikið í 1 mínútu.
  13. Bætið vorlauknum út í og steikið í 1 mínútu.
  14. Hellið heita vatninu yfir og sjóðið í 1 mínútu.
  15. Bætið núðlunum við og hrærið vel.
  16. Hellið sesamolíunni yfir og berið fram strax.

Gott að hafa í huga

  • Hægt er að nota sveppi, bambussprota, baunaspírur, egg, tofu, paprikur eða water chestnuts í staðinn fyrir eitthvað af ofan töldu grænmetinu.
  • Nota má aðrar núðlutegundir í staðinn fyrir soba núðlur t.d. udon núðlur eða heilhveitinúðlur.
  • Ef kókosolían er hörð má stinga krukkunni í heitt vatn í nokkrar mínútur þar til hún verður fljótandi.
  • Nota má aðra olíu en kókosolíu, t.d. vínberjakjarnaolíu eða repjuolíu.

Ummæli um uppskriftina

Engin ummæli hafa verið rituð

Skrifa ný ummæli

Vinsamlegast athugið að reiti merkta með * þarf að fylla út.
 
Innihald þessa svæðis verður ekki sýnilegt almenningi.
Þessi spurning hér að neðan er til að varna því að spamvélar geti sett inn sjálfvirkar færslur.
Vinsamlegast leggðu saman tölurnar og skrifaðu niðurstöðurnar. T.d. fyrir einn plús þrír, skaltu skrifa 4.
fimm plús sjö eru